تجمع الدكتور ( حيان الاحمد )

[مذهلة2013]

ربي يسهل عليج جوجو ان شاءالله كلها جم ساعه وتخلصين وتشوفينهم ان شاءالله

 

[مــتــنــحــة]

جوجو

انتي رحتي اليوم ؟؟

واللهً لما طلعت قال بعد شوي بتجي فلانه واحتمال تكون ولاده وتذكرتج

يالله الله يهون عليج يارب ويفرحنا بخبر ولادتج بصحه وسلامه ياااااااارب

 

[مــتــنــحــة]

توني طالعه من عيادة دكتور حيان

واااي يازينه انا خلاص قررت اولد عنده وعسئ الله يسخرلي اموري يارب

اسلوب ومعامله وذكي وشاطر

المهم

سالته عن ابرة الظهر

قال مااحبها مو لانها تسبب شلل وهالخرابيط

يقولً لان عندنا بدائل احسن منها مثل الكمام والمسكن اللي ينحط بالوريد او بابره بالعضل

ولانها مرات تتحرك من مكانها وقلت له هذا اللي فعلا صار معاي

وقال لانها بعدين ممكن تسبب صداع وعلاجه جدا بسيط وهو كثرة السوائل والقهوه واني انسدح بشكل متساوي بدون مخدات او بالكثير مخده وحده

والصداع حده 4 او 5 ايام اذا زاد يسوون لج رقعه وهي انها يسحبون من دمج ويحطونه بالنخاع الشوكي

طبعا انا لما قال جذي خفت بس هو يقولً جدا بسيط وانا اثق فيه صراحةً

 

[احلاانسانه]

الله يسهل عليج جوجو وتبشرينا بسلامتج وناسه قربنا وحده ورا الثانيه الله يتمم علينا ويسهلها ونخلص علي خير

 

[sara_87]

جوزائيه

الله يسهل عليج يارب

وبشرينا اذا ولدتي

 

[جوزائيه مغروره]

صباح الخير

الحمدالله انا ولدت امس بالليل بعمليه قيصريه

وللاسف حطوا البيبيات بالشيشه ولي الحين ما شفتهم وقالوا راح اشوفهم اليوم

الفال لكم تولدون بالتاسع يارب

سبب الولاده كان فيني طلق وفوق هذا ماي الولد كان مبطوط وانا مو عارفه على بالي افرازات

 

[sara_87]

جوزائيه

الحمدالله على سلامتج حبيبتي ومبروك ماياج

وان شاءالله يطلعون بيبياتج بالسلامه

بس ليش حطوهم بالشيشه؟ وزنهم جم؟

انا يوم ولدت عيالي واحد منهم كان كيلوين و الثاني كيلو و٩٠٠ والحمدالله ما اقعدو الا جم ساعه بالشيشه بس

 

[مــتــنــحــة]

جوجو

الحمدالله على سلامتج وقرة عينج بشوفة الحلوين الله يرزقج برهم يارب

ماعليه لازم التوأم يحطونهم بالشيشه بس لاتحاتين ان شاءالله يطلعونهم لج باسرع وقت

 

[مذهلة2013]

الحمدلله على السلامه جوجو
ان شاءالله كلها جم يوم ويطلعون عيالج ان شاءالله اغلب التوأم جذي يحتاجون عنايه اشوي
ربي يخليهم لج

 

[katrina90]

جوزائيه الحمدالله على سلامتج الف مبروووووك حبيبتي .. يتربون بعزج حبايبي


انا متابعتج من زمان وفرحت بولادتج ولاتخافين الشيشه اغلب عايلتنا دشوها وانا منهم كنت كيلو نتفه


اذا صرتي احسن بليز كتبي لنا قصة ولادتج وعن ابرة الظهر وكل شي

 

[احلاانسانه]

الحمدالله علي سلامتج جوجو ومبروك ماياج وان شاءالله يطلعون مافيهم الا العافيه

 

[مذهلة2013]

جوجو
طمنينا عليييييييييج وعلى البيبياات ؟؟

 

[كوكيز بالكريمة]

السلام عليكم حلوااات .. اخباركم

جوووووجووووو حمدالله ع السلامه ياقلبي و يتربون يعزج و عز ابوهم إن شاءالله .. الحمدالله قدر الله بما شاء فعل و إن شاءالله يطلعون بالسلامه قريب اهم شي صحتهم و سلامتهم بالشيشه تأكدي ف ﻻ تحاتين إن شاءالله .. استودعيهم رب العالمين اهو الحافظ...

♡

اذ اوزانهم متعديه الكيلو و 800 إن شاءالله مايطولون

 

[مذهلة2013]

بنات شوفو دكتوري حيان الاحمد مطيحله صور مع المواليد ههههههه

 

[كوكيز بالكريمة]

ماشاءالله تبارك الله ربي يحفظهم ﻷهاليهم والفال لنا بسلامه إن شاءالله

بشوووش ماشاءالله عليه ... ربي يجزاه كل خير و يبارك له بعمله و يرزقه من حيث ﻻ يحتسب

 

[كوكيز بالكريمة]

ماشاءالله تبارك الله ربي يحفظهم ﻷهاليهم والفال لنا بسلامه إن شاءالله

بشوووش ماشاءالله عليه ... ربي يجزاه كل خير و يبارك له بعمله و يرزقه من حيث ﻻ يحتسب

 

[جوزائيه مغروره]

الله يبارك فيكم ويسلمكم من كل شر انشالله

خل اقولكم شصار معاي بالضبط

الله يسلمكم قبل اسبوع من اخر موعد مع دكتوري كانت تنزل علي افرازات ولما اقعد من النوم كنت احس اني مسويتها على نفسي ولما اجيك القى افرازات وماي

وهالماي على بالي افرازات وما اهتميت

قعدت على هالحال جم يوم لي يوم الاثنين الفير كان ماسكني عوار بظهري مثل الكهربا

حاولت استحمله وكان يخف ويروح ويرد

نطرت لي 9 ودقيت على دكتوري وقالي اخذي شور ودقي بعد ساعه قلتله اوكي

ومافاد وقالي تعالي العياده ورحت له سوى لي تخطيط وطلع معاي طلق كل 7 دقايق وسوى لي سونار طلع الماي اللي كان ينزل وانا مو عارفه هذا ماي الولد وزين ما نشف عليه

وقالي خلال ساعه تكونين بالمستشفى

ودق على دكتوره هناك وبلغها عن حالتي وقالها راح يجهزوني واهو ينطرني هناك

وطبعا من الخرعه قلتله مايصير باجر قالي لا مو زين

ورحنا انا وريلي شقتنا خذيت لي شور سريع ومريت اهلي وخذيت جنطتي ورحنا هناك

وطبعا طول الطريج والطلق كان يزيد بس انا ساكته مو حابه اوتر ريلي

وصلنا المواساه وهناك العبوا يقولون محد كلمنا واخر شي دقينا على دكتور حيان وقالهم مكلم منو وحولوني عليها وسووا لي تحاليل وتخطيط والساعه 9 نزلوني العمليات

شفت دكتور التخدير وسولف معاي وبعد شفت دكتور حيان وجدامي دق على دكتور الاطفال وقالي هذا افضل دكتور ودخلوني العمليات وقعدوا يسولفون معاي ويضحكوني وفجاه رحت بسابع نومه

وحلمت بالكعبه واني بروح لها وفااااضيه جنها حقي بروحي

ولما قعدت من البنج لقيت نفسي ابجي وفاصله بجي من العوار مال القيصريه والسستر عطتني مسكن وكان يروح

وبعدين ودوني غرفتي وطبعا كنت ابي غرفه اكبر بس للاسف كانوا كلهم فل حتى مال الرسبشن يقولي هالزحمه اول مره تصير

وبس هذا اللي صار معاي

والعوار اللي حاسه فيه من الغازات مو العمليه

واليوم تسبحت بروحي وغيروا لي جرحي

واليهال بالشيشه ما حطوا لهم تنفس بس جهاز يراقب نبضات القلب ومغذي حق الاكل

 

[جوزائيه مغروره]

اوزانهم الولد كيلوين والبنت كيلو و ٧٠٠

 

[مذهلة2013]

جوجو
الحمدلله على السلامه وكله باجره ان شاءالله
ماشاءالله اوزانهم حلوه ربي يحفظهم من كل شر

 

[كوكيز بالكريمة]

الحمدالله جوجو ... ربي يبلغج فيهم معاريس إن شاءالله .. اهتمي بنفسج و اكلي عدل و ﻻتحاتين البيبيات و تجوعين نفسج و تصاومين عن اﻻكل ديري بالج انتي نفاس مو زين عليج ..

شلون الجرح إن شاءالله عواره مو قوي ؟؟ شلون سكر لج الجرح خيط واﻻ كبس ؟؟ والشد سواه لج إن شاءالله ؟؟