تجمع الدكتور ( حيان الاحمد )

[جوزائيه مغروره]

الله يسلمكم يارب

الدكتور قالي احتمال يطلع الولد معاي بس البنوته اذا رضاعتها اوكي راح يطلعها

والعمليه ما تعور كثر بطني من فوق لانه كله هوا ويعطوني دوا للغازات

والجرح ما شفته بس اختي تقول مو مبين وايد وخياط مو تدبيس

وسوى لي شد خفيف شال اللحمه الزايده تحت السره وشد العضلات

بس جسمي ما تغير بطني لي الحين متفوخ

 

[مــتــنــحــة]

الف الحمدالله على سلامتج جوجو

وماعليج الشد مايبين من اول شي طبيعي يصير معاج انتفخات بس مع الوقت تخف باذن الله

وصاجه انا سويت عملية المراره والله ماعورتني العمليه مثل ماعورتني وضايقتني الغازات

شربي كمون وينسون

ولاتشربين اشياء بارده تزيد الغازات

وارتاحي هاليومين اذا طلعوا الحلوين يبي لج شده وحيل تجابلينهم الله يبلغج فيهم يارب

 

[sara_87]

جوزائيه

الحمدالله على سلامتج انتي والبيبيات

و توو الناس على جسمج نطري عليه اسبوع على الاقل بتشوفين نفسج غيير

الماي اللي بجسمج كله بينزل

 

[مذهلة2013]

جوجو
انا اختي الحين قاعده تضعف ماشاءالله وايد
كانت والده تونيز بشهر3 هذا وحيان قالها ترا مو عبالج جك بوم تضعفين يبيلج نفاسين يلا تشيلين الجيلي الي ببطنج يقولها جيلي هههههه لانه الواحد ويلا تضعف وهالمره ربي يخليكم ماعطاكم توأم واكيد الجلد تمدد لين قال بس ومو بسهوله يرد

 

[جوزائيه مغروره]

الله يسلمكم يارب

اي صاجين العوار بدا يخف الحمدالله

ودكتور حيان مو مقصر معاي وكل يوم يمرني

واليوم استانس لما شافني واقفه بروحي وقالي اذا استمريتي جذي خلال يومين راح تنسين الجرح

 

[كوكيز بالكريمة]

الحمدالله جوجو .. شدي حيلج إن شاءالله بالمشي و شربي اشيا دافيه تريحج .. الحمدالله على سلامه التوينز ربي يحفظهم .. ﻻ تنسين الحليب ابدي شفطي مو تنسينه يتحجر ﻻ سمح الله و يسبب لج سخونه .. انا كنت احط كمادات ساخنه على صدري و تريحني حيييل و تنزل ماده اللبأ (( الشفافه )) ﻻني لو بغفل عن هالشي يذبحني العوار .. ﻻ تنسوووون هالشي بجريات

ومثل ماقالوا البنات جسمج بعده متروس ماي صبري عليه و حاولي تالي ترضعين طبيعي إن شاءالله ﻻنه حيل يخفف وطالعه من الشر إن شاءالله

شلوون عنايتهم المواساه إن شاءالله حلوه .. ادري غثيتج باﻻسئله تحمليني هههه ﻻني وراج وراج ههه نفس الدكتور والمستشفى

صج شدج خفيف يعني اخذ 400 واﻻ المتوسط 500 .. تدرين ﻻزم احسب ميزانيتي عدل ﻻنه كل شي علي الله المستعان بس .. و سعر الغرفه جم مادري شنو اﻻحسن العاديه واﻻ ميني رويال ؟؟

 

[katrina90]

الحمدالله جوازئيه ريحتيني لان كنت احاتي لو ولاده مبكره مثلج ومثل قلبي حساس محتاره بين الدكتور حيان والحكومه عشان الشيشه ولا الدكتور حيان ماعليه كلام مرتاحة له

حبيبتي جوازائيه جم خذو على الشيشه ؟

 

[جوزائيه مغروره]

الله يسلمكم يارب

بالنسبه حق الشد ما اخذ مني غير ٤٠٠ اللي اهي سعر القيصريه

وعنايتهم حلوه بس مودري شسالفه ليش زحمه والغرف مو صج ما لقيت الا العاديه

بس عنايتهم باليهال واو عجيبه

وسعر الشيشه طلع خلال ٤ ايام تقريبا ٦٥٠

وولي الحين ماندري جم بيطلع لانهم لي الحين بالشيشه وحضانتهم البسيطه مو الشديده الحمدالله

 

[كوكيز بالكريمة]

الله المستعان ليش هالسعر ياحافظ واهما مو محتاجين ذيج العنايه

ﻻ تسكتون سألوهم يمكن يعطون ادويه او دربات تزيد السعر

شلون الغرفه العاديه جوجو ضيجه واﻻ يعني .. اهم شي مرتب و مو ضيج حيل .. اوصفي الغرفه شنو فيها ؟؟

بترافقني اختي و تدرين اهلي بيمرون و زوجي واهله يعني مابي غرفه بس سرير وكنبه وحمام ﻻا ابي شي اوسع شوي

 

[جوزائيه مغروره]

ايدكانوا معطينهم مضاد حيوي ومغذي بس الحين وقفوهم واعتمدوا لهم الرضاعه والتحاليل

الغرفه العاديه اسمها عاديه يعني قعده تكفي شخصين او ٣ وسرير وحمام

الاكبر منها فيها مطبخ تحضيري والقعده زياده شوي

اما الباجي ما شفتهم

 

[katrina90]

جوازئيه حبيبتي ماقصرتي بالرد على اسالتنا لجفي ميزان حسناتج

بس بسالج وقت حمالج كنتي تطلعين جم مره بالشهر ولا الاسبوع ؟ وكله منسدحه ولا عادي تقعدين؟

 

[احلاانسانه]

الحمدالله علي سلامتج جوجو خارجه من الشر ان شاءالله ويتربون بعزكم يارب وتفرحين بشوفتهم اي طفل يطلع قبل شهر
لازم حضانه عادي واذا الميزانيه مرهقتج حوليهم للحكومه لان دكتور حيان يقول هالمستشفيات يطلعون مليون عله بالطفل
علشان ياخذون فلوس من الحضانه انتي ساليهم مطولين ولا لا وعلي طول سالي عنهم وامشي عادي ولاتفكرين بالجرح
كل شي انشاءالله بعدي علي خير تقومين بالسلامه يارب

 

[sara_87]

جوزائيه

شلونج وشلون البيبيات طمني عنهم عسى اطلعوو من الشيشه؟

و صاجه احلا انسانه

هالمستشفيات يطلعون علل بالياهال عشان الفلووس حسبي الله عليهم


يوم ولدت ولدي قالولي الحمدالله سليم وكل شي طبيعي
ويوم بطلع من المستشفى جان دكتور الاطفال يقول حق ريلي ترا قلب البيبي فيه صوت ولازم اتسوون له سونار نطمن

طبعا انا ماصدقته لانه ادري فيهم نصابيين و وينه يوم ولدته ماقلتو لنااا الا حزت الطلعه!!

و ريلي بداا يوسوس والا انسوي له سونار حق قلبه

قلت له اوكي

وبعدها بيومين رحنا الطبيب و سوينا سونار والحمدالله مافيه شي قال طبيعي انه يطلع هالصوت اهو توه منولد

و حسبي الله عليهم خذو على السونار بس ١٠٠ دينار

 

[جوزائيه مغروره]

الله يسلمكم

انا كنت اطلع عادي بس بالثامن صرت حدي بيوت ما اطلع اكثر

وريلي قلتله نحولهم العدان يقولي لا

ودكتور حيان قالي دامهم عند دكتور اعرفه عدل تطمني كل شي يقوله صح

الحين ناطرين البنت وزنها يصير 1800 علشان يطلعونها والولد فيه انتفاخ بالبطن بس يروح يطلعونه

يقولي الدكتور شكلهم حالفين يطلعون مع بعض

 

[كوكيز بالكريمة]

يسعد مساكم امهات

اخيراااا" بطل المنتدى

طمنونا عنكم

جوجو شلونج وشلون التوينز إن شاءالله بخير طمنينا

و باجي الحلوات وينكم طمنونا

احلى وحده صج اللي ترد اول هههه >> يعني صايدتكم هههه

 

[katrina90]

هههه انا اول وحدة


نبي حل حق المنتدى تكفون وين المديرة بكلمها ؟



ههه تعقدت..


انا بخير بس ظهري شاب علي والترجيع ماوقف بس اهون من قبل ،، والنفسيه يوم اوك يوم لا

شفت تنزيلات بالسوق قلت اروح اشوف بس تصدقون اجرت ويل جير بدعت هههههه كنت ناويه بس عالسراير والكبت بس ماحصلت شي زين بحدود ميزانيتي بس لقيت بحدود ال 120 – 150 وحلوين بس اللي على 70 و80 مو شي فشكلي بشتري ال 100 وشي بعد شسوي

 

[مذهلة2013]

هههه انا اول وحدة


نبي حل حق المنتدى تكفون وين المديرة بكلمها ؟



ههه تعقدت..


انا بخير بس ظهري شاب علي والترجيع ماوقف بس اهون من قبل ،، والنفسيه يوم اوك يوم لا

شفت تنزيلات بالسوق قلت اروح اشوف بس تصدقون اجرت ويل جير بدعت هههههه كنت ناويه بس عالسراير والكبت بس ماحصلت شي زين بحدود ميزانيتي بس لقيت بحدود ال 120 – 150 وحلوين بس اللي على 70 و80 مو شي فشكلي بشتري ال 100 وشي بعد شسوي

هههههههههههه
اريحلج والله الويل جير
اي احسن اشتري الاحسن لانه بيظل وياج ان شاءالله :eh_s(17):

 

[جوزائيه مغروره]

اشتقت لكم

انا مبدعه مع هالتوينز

يننوني من اول يوم قعدت ابجي وهسترت من الحراره هههههه

بس الحين الامور تمام مع خواتي والخدم مسوين شفتات معاي

بنات لاحظت في مثل تفخه تحت سرتي واكبرت وحتى دكتور حيان شافها قالي هذا ماي

باجر موعدي معاه وانشالله يعطيني حل لها لانه احسها اكبرت

 

[katrina90]

من شنو الماي جوزائيه ومابين وقت العمليه ؟

 

[مذهلة2013]

الحمدلله جوجو
ولدتي وارتحتي
ربي يخليلج ما عطااااااااج يارب