تجمع اللي راح يولدون بمستشفى الصباح ...

[ام اغلى الناس]

شلونكم بنات
انا اكلمكم من الصباح
منومه من الاربعا قبل امس

٢٧/٦
نزل علي ماي وانا نايمه ٨ ونص
كاني سويتها على نفسي
ماي شفاف ماله لون او ريحه
قلت يمكن عادي
بدلت ورديت اتقلب ابي انام وبنفس الوقت خايفه
رد نزل وانا بالحمام عال ١٠ ونص

عاد قلت لامي
قالت ليش ساكته؟
قلت اخاف يبهذلوني
قالت اخاف مو زين ع الربط
دقيت ع اختي ودتني و زوجي جا لنا هناك
فحصتني الدكتور وقالت لبش صبرتي نزل مرتين باذبحج هههههه
حبوبه بالطواري اسمها هبه الشمري
دخلوني جناح الولاده شالوا الربط
والله يا بنات حسيت اني باموت
الله يسامح كل عضوه قالت مايعور
من غير بنج ولاشي
يفتح من تحت ويدخل ادوات ومقصات وانا باموت من الالم
خلص و وداني الدور الاول جناح ١٤ ولاده
نفس اللي تحت
حطولي تخطيط
والسستر المصريه مالها خلق
ماتبينا
كل شوي ودها نطلع
كاننا قاعدين ع راسها
دخلت من ٣ العصر تقريبا ل ١٢ ونص بالليل
كل شوي يفحصوني
قالوا معاج طلق و مفتوحه ٢سم
ان ما زاد عن ٢سم نطلعج الجناح
وفعلا طلعت مارضى يفتح

كانت جنبي وحده يمكن سوريه
مسكينه تصايح وتبجي
وتقول مشان الله ولدوني قيصري وخلاص
من دخلت لين طلعت وهي مافتحت الا واحد ونص سانتي
كانت ٥ سم صارت ٦ ونص
وقالوا مانولدج لين تصيرين ١٠سم

 

[أم معاذ الكندري]

الله يسهل عليج ياقلبي وأي عورتي قلبي
وشلون شالوه لج من غير بنج لزم بنج خفيف ع الاقل
الله يسهل عليج ياقلبي

 

[ام اغلى الناس]

مشكوره ام معاذ وتسلمين
الحمدلله على كل حال
ماكنت ادري انه يعور جذي
الله يستر من الولاده

 

[ام اغلى الناس]

مشكوره ام معاذ وتسلمين
الحمدلله على كل حال
ماكنت ادري انه يعور جذي
الله يستر من الولاده

 

[yoyo"s mam]

ياحبيبتي ام اغلى الناس

شلون تحملت بدون تخدير؟؟

يااربي والله خوفتيني من المشفى

الله يكون بعونك ياقلبي ويسهل عليك وتقومين بالسلامه

وعقبالي ياارب

 

[ام اغلى الناس]

والله يام يويو قمت اصرخ صراخ وبجي موطبيعي
بس الحمدلله عدت على خير
وشكله الولاده بالصباح انتي ونصيبج
بعضهم يمدح وبعضهم لا
بنت جيرانا تقول اخذي ابرة الظهر ماراح تحسين بشي
وناس تقول اخذناها ماسوت شي

الله يهونها علينا

 

[yoyo"s mam]

ياعمري انت

زين خلصت منها سبحان الله قلتلك قبل لوتشيلن الربط قبل الولاده لاني ادري ان شيل الربط والولاده مع بعض تذبح

بس الحمدلله هذا اللي ربي كاتبه

وانت بتاخذين ابره الظهر ولا لا؟؟

ومتى بتطلبينها انشالله؟

ناطرتك بتطمن عليك انشالله تكونين بخير ياارب

 

[ام اغلى الناس]

هلا ام يويو
انا ناويه اطلب الابره باذن الله وقت الولاده
وان ولدت باذن الله اقولكم كل شي بالتفاصيل
بس ادعولي الله يهونها علي وماحس بالعوار

 

[yoyo"s mam]

اامين ياقلبي ربي يهونها عليك

ويجعل ولادتك مثل لمح البصر

بس انت قولي الادعيه تسهيل الولاده وشويه ايات من القران وباذن الله ربي بيكون معك

ميسره ياقلبي

وناطرتك تطمنيني

 

[أم معاذ الكندري]

الله يسهل عليكم حبيباتي
والله يكون بعونج اغلى الناس ويارب ماتحسين بشي
بنات الصراحه انا تقريبا شلت فكرة اني اولد بالصباح ع الي قاعده اسمعه
طمنينا عليج يا اغلى الناس

 

[ام اغلى الناس]

تسلمون بنات
ام معاذ انا مو قصدي اخرعكم
بس قلت لج انتي ونصيبج
البنت اللي جنبي كانت تصرخ وتبجي بشكل مو طبيعي
لما عطوها ابرة الظهر سكتت ونامت
بس مادري ليش كل شوي يوقفونها عنها
يمكن مو زين تطول فيها الابره و المخدر
او ينطرون حزة الولاده الصجيه
الله اعلم
لانه قالها اول مره عطيتج مخدر
ثاني وثالث مره عطيتج بس مهديء مدري مسكن نسيت

تو الناس على ولادتج
انطري تجارب البنات
وخليج راجعي مني لين اخر الثامن عاد قرري
ان مارتحتي للصباح روحي خاص

انا والله كنت ناويه خاص بس ظروف
والحمدلله

 

[أم معاذ الكندري]

الحمدلله ع كل حال
حبيبتي والله انتي ليلحين بالمستشفي ماولدوج
واذا ماولدوج شناطرين ليش ماطلعوج البيت

 

[yoyo"s mam]

صادقه ام اغلى الناس

انا اعرف كثير ناس مدحوهم

وعلى قولتك كل وحده ونصيبها

ايش صار معك طمنينا عليك

غريبه ماولدوك وانت نزلت عندك ماي الجنين؟

ناطرين اخبارك ياقلبي

 

[ام اغلى الناس]

انطر باجر ان شاء الله الاستشاري يمر يشوفني ويقرر شاسوي
ام يويو
الماي اللي نزل مو واجد وبالسونار قال كمية الماي زينه

 

[أم معاذ الكندري]

الحمدلله ان الكميه شويه اهم شي ان البيبي بخير يارب

 

[قمرية الفيس]

انا عندي مبدا مراجعات الحوامل حكومة اما الولادة لاوالله خاص

 

[ام اغلى الناس]

السلام عليكم
بنات انا الحمدلله ولدت
الحمدلله اللي عطاني عمر جديد اشوف عيالي
تجربتي باختصار
تقدرون تختارون من هالكلمات عن المستشفى؛
سفاحين او مجرمين او جزارين
والله يا بنات ما ابالغ
ماودي اتذكر الكابوس اللي صارلي بس عشان خاطركم باقول
يوم كامل وانا اطلق بغرفة الولاده
كنت مفتوحه 3سم
وكل شوي اللي رايح واللي جاي يفحصني من تحت
و بعدين قاموا يوسعوني
بعدين دكتوره شيما كويتيه مو محجبه بطت لي الماي
كنت اتمنى تولدني شكلها حبوبه
وكل 3 ساعات تقريبا يمر دكتور
ولما بدا يذبحني الطلق جابوا دكتور التخدير اسمه عماد او شي جذي
كل ما راح مفعول الابره ناديته ويغيرلي فيها
كل شوي يحطلي نوع ثاني
مفعولها يمكن ساعه او ساعتين ويختفي
وطبعا تخدير اي شي مو نفس رويال حياه ماكنت احس برجولي
المهم لما وصلت 6 او 7 سم قلت جيبوه يغيرها
طبعا السستر المصريه الله لايوفقها من جتني وهي كل شوي تنحاش
واذا شافت دكاتره وقفت عندي
كنت اتمنى تجيني هنديه احسن من المص يات الف مره
المهم قلت جيبوه قالوا لا خلاص انتي ولاده
قلت ابيه ماراح اولد من غير تخدير
عاد هني بدا الموت الصجي
الم مو طبيعي واقولهم شي بيطيح مني
وقالها الدكتور خليج عندها قربت تولد
بس الاخت كالعاده انحاشت
وانادي مايردون
وما جابوا دكتور التخدير
عقبها جو مجموعة دكاتره ومتدربين وانا بقمة انهياري واصايح وابجي
والدكاتره باااااردين يقولون شفيج؟
قلت الحين تطلعوني من هالمستشفى مابيها مابي اولد هني عذبتوني
قال مايصير انتي خلاص ولاده
كنت يمكن 8سم
وعقبها جو قروب دكتورات معاهم دكتوره مصريه حنان
تقول ليش تبجين ابي افحصج
قلت لا ماحد يلمسني الا لما يخدروني بالابره
كان تعصب علي وتهاوش وتمشي
وعقبها جتني معصبه
تقول شتبين
قلت ابره
قالت مافيش ابره ارتحتي؟
يعني تعاندني
وتصارخ بوجهي كاني جاهل عندها
والله تنرفزت حيل من طريقتها وردها
وبعدها بشوي قالت لي سستر هنديه خليني اقيسج يمكن ولاده وترتاحين ولا يطيح منج
خليتها تقيس
ردت جت وحده ثانيه قاست قلت حلاو هو كل شوي بس تقيسون
عاد بعدين دخلوني ولاده
ووووويع
والله غلطت عمري هالمستشفى
تخيلوا حسيت بكل شي
بطلعة البيبي وبالخياط وبالعذاب
حسيت اني بفلم رعب
الله لايوفقهم
دعيت عليهم هالمجرمين
يوم كامل وانا اتولد واصايح وابجي
لما جت توديني السستر غرفة الافاقه
جاني دكتور التخدير غير عماد
هو عطاني ابره وانا اولد بس ماسوت شي
يقول شرايج
قلت قصيتوا علي هذي مو ابرة ظهر
قال لازم اخففها حيل عشان تنزلين البيبي
قلت الله يسامحك
قال نشوفج الولاده الجايه
قلت اي انطرني انتوا سفاحين و توبه اجي هني
قام يضحك
اللي ولدوني حنان ام لسان طويل و هنديه
والهنديه بعذ خيطتني
بس الخياط موووو شي والله يستر
قبل الولاده سالت السستر يسون تجميل للخياط؟
قالت لا الدكتور يعطيج موعد للخياط قلت انطريني
انا حاطه ببالي باذن الله اروح اي دكتوره خاصه تشوف الخياط مستاهل تجميل ولالا

ااااااه با بنات
تجربه خايسه
واستغرب من اللي يمدحون المستشفى
تجربه ماعدت اكررها باذن الله
وانا ما قلت قصتي اخرعكم
بس انا صج ندمت حيل لما فكرت بالحكومه
واهم شي الحمدلله على الصحه والسلامه
سامحوني ان نسيت شي
قاعده اكتب عالسريع والخياط ذابحني

 

[ام اغلى الناس]

وخلاص اسمحولي ما عاد بادش التجمع
اللي تحب تسالني عن اي شي حياها الله عالخاص

 

[فديت من يشبهني]

الف حمدالله ع سلامتج


كنتي بتجمع التوااام تمدحييين صباح
وانا اعارضج ... لان عذااااب مو طبيعي وساخه واهمال


لو اموت ماجيبهم بصباح
مالت عليهم
حرام عليهم عذبوووووج ومشكلع تونز انتي
حاله خاصه


المهم طمنينا عن حاله التونز وزنهم زين ؟

 

[بحور العنا]

الحمدالله ع السلامه حبيبتيويتربى بعزكم يارب
كل شي بأجره ان شاء الله
واهم شي انكم طيبين وبخير هذي بالدنيا كلها
ايام وتنسين حبيبتي