تجمع اولياء امور مدرسة الخليج الانجليزية في السالمية

[عزيزتى]

اشلونكم امهات
الستور في بلايز كم طويل ولا ماعندهم ؟كل يوم اقول بمر
وبالنسبة للشتوي مافي الاجاكيت غريبة للحين مايابو؟؟؟؟
انا من اول شى اخذت بنطلون وشورت حق الرياضة والدوام علشان ما اتوهق بس باقي البلايز

وعلى فكرة منهج الاسلامية اليديد للصف الخامس احسة صعب كلماتة واسئلتة و استدلال وقيمة
وعيالنا استيعابهم بالعربي مونفس الانجليزي
لازم يبسطون لهم صيغة السؤال

 

[روحي تحب]

هلا عزيزتي ...بشرينا عنج فقدناج من غير شر....ها بشري اختاروا ولدج ولا لأ ولدي ينطر النتيجه اليوم يعلقها مستر( هيه) وتصدقين آنا مادققت في منهج الاسلاميه بس

مشكوره نبهتيني لانه كان الوضع عادي مع القرآن الكريم فنسيت ادقق وصاجه والله بس تدرين والله اي اقتراح مثل فكرتج انهم يبسطون لهم

الصيغه قوليها حق استاذ بسام رئيس القسم والله خوش واحد ودايما يرحب بالافكار ويقول هذا يحسسنا بحرصكم على عيالكم واهتمامكم

 

[زهر وردي]

هلا بناااات
مساكم الله بالخير
شلونكم وشلون عيالكم
بسألكم عيالكم لما كانو رسيبشن عطوهم رياضيات؟؟
دازين ورقه مع الولد يقولون لنا عن منهج الحساب اتصدقون فيه جمع وطرح وضرب وقسمه
انا مو داش راسي شلون بيفهم وهو بالهعمر الصغير


روحي تحب بشرينا شلون بنيتج ان شا الله اشوه

 

[عزيزتى]

روحي تحب == مشكورة على السؤال وتدرين هالايام كل بيت لازم فية واحد مريض ولازم ايينا الدور, وكنت لاهية معاهم قاعدة اعابل بنفسي
والحمد اللله الحين احسن

انشاالله يوم الخميس الاجتماع بروح حق استاذ بسام واقول له وانا الي نبهني للموضوع ان ابلة عبير طالبة منهم يحلون اسئلة الدرس

ولدي اقبلوة حق فريق كرة القدم اليوم( الفرحة مش سايعاه)
زهر وردي ==انا ما اتذكر ان عطو عيالي ضرب وقسمة بس انا من الجيل القديم يمكن الامهات يعرفون اكثر مني

 

[ملكة بيتها]

شلونكم أمهات عساكم بخير
عزيزتي مبروك قبول ولدج بالفريق وعقبال ولد روحي تحب
روحي تحب ...اليوم عطو بنتي كتاب العربي

 

[روحي تحب]

امهات شلونكم وشخباركم ......صرنا امهات المدرسه الموبوء ههههههه

زهر وردي ... والله الحمد الله احسن بس من هالبرد مرضت مره ثانيه والحمدالله على كل حال اي زهر ماشفتي شئ رسبشن راح ياخذون الماث
اللي ياخذونه الامريكيه بجريد 2 وولدي كان ياخذه بyear 2 والله السنه اللي طافت انصدمنا ووايد صعب بس الله يسهل على وليدج واول
باول عيدي عليه لانه مترتب عليه دراسة year 1 تصدقين السنه اللي طافت وديت عيالي العالميه كنت بنقلهم انصدموا شلون بنتي بريسبشن
وتدرس هذا المنهج وصاجه عزيزتي هم آنا ولدي يوم كان بريسبشن ماكو يعطونهجذيه اهو منصدم يقولي ماما قاعدين يعطونها اللي آنا خذيته
بYEAR2 بس ماعليه سهالات انشاء الله وكله

عزيزتي ....مايشوفون شر انشاء الله والحمد الله على سلامتهم وصاجه هم آنا بقوله بعد اي رايين احسن من راي واحد ويشوف انه كذا ام ملاحظه هالشغله ومشكوره على التنبيه ومبرووك على وليدج وآنا هم ولدي انقبل وعساهم فرحانين دوم يارب عقبال مانشوفهم خريجيين

وعيالكم كلهم ياامهات يارب

ملكه ....شلونج بخير عساج بخير دوم يارب والله يبارك فيج ياقلبي اي ولدي انقبل وبنتي هم اليوم سلموها كتاب العربي بس نسيت اقولج ذاك اليوم مت من الضحك على روحي يوم اقولج بس عطوها الفراشه ماعطوها درس امل ماادري شفيني كنت دايخه خو الفراشه اهي امل ههههه:krkrkr:

 

[ملكة بيتها]

روحي تحب هههههه لا عادي أنا صارت فيني ليش ما عندنا الكتاب وأنا ما أعرف عن المنهج تيشر العربي معطيه بنتي واجب ترسم فراشه كبيره وصغيره ووحده بيضاء ووحده ملونه ههههه أقول حق ريلي مبين التيشر كلش ما لها خلق تدرس اليهال ....تالي عرفت ليش:ch12:

 

[زهر وردي]

وااااي بنااات والله لووويه
شلون بدرسه كل هذا ترى صعب عليه وهو بس يبي يلعب اذا عطوه يلون غصب ياللا يلوون
الله يعينا
بناات ابي اسئلكم شلون تقسيم الوقت عندكم بعد مايرجعون عيالكم من المدرسه يعني شنو نظامكم
ينامون يدرسون يلعبون ومتى ينامون بليل ؟؟

هلا روحي تحب == مبروك قبول الولد وان شا الله تشوفينه دايم باحسن حال يااارب وماتشوف شر بنيتج وعلى طاري العالميه ممكن اسئلج ليش فكرتي تنقلينهم وليش ما نقلتيهم ؟!
يعني شفتي او سمعتي على الخليج شي والا اسباب خاصه
و الله يعينا بس اذا الرسيبشن جذي عيل شخلو حق البريمري

هلا عزيزتي == مبروك قبول ولدج بالفريق والله يوفقه يااارب

هلا ملكه == شلونج ، ياليت تفيديني بتجربتج مع بنيتج بالرسيبشن كونها سم الله عليها توها خالصه يعني شلون درسينها وشلون تنظمين وقتها

 

[روحي تحب]

ملكه ... الله يعينا

زهر ..شوفي حبوبه لاتحاتين ترى مدرستنا وايد شديده حتى لو الياهل يحب اللعب راح يعلمونه شلون وقت اللعب لعب ووقت الدراسه دراسه
وآنا بنتي بعد كانت نفس الحال وتالي تعدلت وقامت تحب المدرسه وهم يعتمد على التييشر لاتحاتين

وحبوبه بالنسبه لي السنه اللي طافت يوصلون عيالي الساعه 3 البيت تالي الغداء وبعدها يريحون شوي وبعدين ابدي معاها واجبها ولانه الكبير الحمد الله شايل عمره بس آنا اتابعه كل شوي ولاتحاتين الواجبات مو كل يوم يعني العربي راح يطرشولج ورقة الخبره شنو راح ياخذون والقرآن هم شنو قاعدين يحفظونهم من سور علشان انتي تتابعين بالبيت والماث هم مو كل يوم بس يركزون على القراءه القصص اللي يطرشونها
مع الياهل وتكوين كلمات بصراحه اللي صج ماتحسفت عليه العربي وايد اسسوها بضمير الحمد الله

ايه لا انسى ههههه النوم على حسب الياهل بس بنتي عسره احطها بالفراش 8 تنام 9

والله يبارك بعمرج حبيبتي تسلمين على هالدعوه الحلوه اللي مثلج ولج مثلها ياقلبي

وعلى طاري العالميه لما بغيت انقلها كانوا موافقين عليها لانه النقل قبل الجريد 1 وايد اسهل من بعد الجريد 1 خصوصا من الانجلش للامريكان وبصراحه حسيت انه وايد قاعدين يضغطون على اللي بعمرهم وحتى اللي بالامريكيه تقولي ليش جذيه حرام شنو هو حشي معلومات وخلاص ماادري محتاره للاسف ناس تمدح وناس تذم بس ولدي الكبيرعيى لاينتقل مع اخته وصار صعب علي ولأني افكر حق بعدين ماكان ودي عيالي يكملون بالانجليزيه ودي بالامريكيه اسهل لاني قاعده اشوف الصعوبه من الحين يعني اللي وبالذات حق السينير والتخرج بالذات بس ماادري وايد محتاره عطيت نفسي فرصه هالسنه علشان اقرر والله يسهل محد يدري وين نصيبه

وبعدين ماادري لازم ناخذ راي الامهات القدامى مثل عزيزتي بس بالنسبه لي والكل يقول المدرسه وايد اختربت وايد صار تخبط بالاداره فصارت مو مثل قبل

ابيه توني استوعب شنو مقاله ماخليت شئ إلا وكتبته عيل يتبع ههههههه ناطره تعليقكم واكمل باجر

 

[عزيزتى]

الله يبارك فيكم كلكم ومشكورين ويارب تفرحون بعيالكم وبتخرجهم صج ونستوني جنة ولدي متخرج

وبالنسبة للدراسة ترى اهما عندهم طريقة التكرار يعني نفس المنهج ياخذة لغاية year2والمعلومة اذا ماعرفها الحين بيعرفها بعدين انا لما كان ولدي year1كنت حامل ولهيت مع الولادة طاف اشياء وايد بس جابلتة بالصيف ومع year2اركزت المعلومات لان تقريبا نفس الشي جمع وطرح وباقي المسائل
حتى الساينس مثلا المواضيع نفسها تتكرر مع اضافات بسيطة وزيادة بالكلمات
يعني لو تلاحضون الساينس العام year4نفس الدرس الشمس والشدو والرض نفس 5السنةوراح ياخذة في 6
انا كنت اراجع المعلومات حق ولدي لما كان 6من اوراق 4و5
لان المعلومة ابسط والكلمات اسهل كل مايكبرون يصعبون الكلمات
وصدقوني لو تشوفون كتب 6بتلقون نفس المنهج انا ما ادري ليش مايخلونا نطلبهم من اولى ترى وايد بنفعون وطريقة عرضهم بالصور والالوان روعة وفيها الحين درس الساينس نفسة الي ياخذونة وهم الماث والانجاش شامل

الزبدة لا تحاتون الي مايفهمة الحين بيعرفة بعدين
والامريكية انا سمعت ان متطلبان التخرج عندهم اسهل من الانجلش سستم

 

[زهر وردي]

روحي تحب
مشكوره عالافاده بس الظاهر فعلا يبيله مجابل
عسى الله يوفق عيالنا وعيالكم يااارب
انا سمعت الامريكيه احسن حق اللي ناوي يدرس بجامعات امريكا لانه يوم ما ينقبل بجامعه امريكيه جنه لازم يقدم اختبار قدرات تصلح هناك بنت اخوي خريجة نيو انقلش راحت قدمت امتحانات بالامريكيه العالميه علشان تنقبل بجامعة ميامي علما انها انها خريجة نظام انقليزي
فقالت لو دارسه عندهم ابرك
بعدين في ميزه بالخليج انها تخرج بعد يير 11 يعني خلص الطالب وهو صغير


عزيزتي مشكوره عالافاده بس هم يبيله متابعه من اللحين صح ؟؟
ومثل ماقالو الاولين لبنه على لبنه ويكبر المبنى


الله كريم

 

[زهر وردي]

بنااات اليوم الصبح انصدمت من صبيان كانو بالممر اللي عند المسبح والمسرح قاعدين يقولون حق بعض كلام وصخ حددده
الصراحه شي ماينقال وينادون بعض بالفاظ سوقيه وصخه
مع انهم كبار لابسين تي شيرت ابيض بس مادري ليش جذي

استغفر الله شالاخلاق

‏!‏!!!!!!!!!!!

مصيبه اذا فيه اخلاق جذي وساكتين عنهم المدرسه

 

[روحي تحب]

بنااات اليوم الصبح انصدمت من صبيان كانو بالممر اللي عند المسبح والمسرح قاعدين يقولون حق بعض كلام وصخ حددده
الصراحه شي ماينقال وينادون بعض بالفاظ سوقيه وصخه
مع انهم كبار لابسين تي شيرت ابيض بس مادري ليش جذي

استغفر الله شالاخلاق

‏!‏!!!!!!!!!!!

مصيبه اذا فيه اخلاق جذي وساكتين عنهم المدرسه

ابيه ....عاد آنا بروحي معصبه منهم ومنقهره :eh_s(14):من سالفة انهم الصبح مخلوطين مع بعض يعني ممكن الاصغر منهم يسمعون هالكلام بس شنسوي الحمد الله والشكر هم البيت اهو اللي يربي بالاول والاخير وترى حتى آنا مره ولدي قالي عن واحد معاه يسب قلتله يقول حق التييشر لا والسب بالانجليزي يعني ينسمع وغير الحركات بالايد قلة ادب بس بصراحه كنت اقوله على طوول قول حق التييجر ومره قالها وطوفت عادي التييشر مالته عيوز قمت رحت وقلت للوكيل مستر ووتر هاوس المفروض تتعامل بشده اكثر من جذيه قام اهو وعاقب الولد وقالي اعذريها نست قلتله هذا شئماينسكتعنه بنفس الوقت
شنو هذا عاد هالولد معروف بقلة ادبه انزين قولوا حق اهله

وتدرين آنا هم في شغله مضايقتني سالفة ماكو كاميرات على الاقل بالبريك مثل NESوBSK كنظام انجليزي خو خلي الامريكيه على جنب

يعني امس بنتي تقول صبي من year2 طق رفيجتها بالبريك وظلت البنت تبجي وبعدين يت التييشر ومالقت الولد انحاش عاد نفس هالسالفه صارت حق ولدي يوم انه صغير بس على ايام (رجاء الصالح ) الله يذكرها بالخير عصبت على الاشراف اللي بالبريك وقالتلهم وينكم لازم تكونون حريصين اكثر من جذيه .....بس الله يستر على عيالنا

 

[زهر وردي]

ايه والله شفتي يا روحي تحب قلة ادب
عاد انا واحد من الاسباب اللي ماخلتني ادخل الولد حكومه اني ابي ناس اخلاقهم سنعه

وصح كلامج ليش مافيه كاميرات تدرين اول مره اسمع منج انه الخليج فيه كاميرات مراقبه على الطلبه

بس الواحد شيقول غير الشكوى لله

 

[ملكة بيتها]

زهر وردي حياتي لا تحاتين التدريس وايد المهم تجابلين يوم بيوم لازم تراجعين معاه اللي خذاه بالصف وتفهمينه عدل ولازم يحفظ الكلمات والأهم إنج تكلمين الطفل بالإنجليزي عشان تزيد حصيلته باللغه وهذا بيساعده إنه يفهم بالصف من التيشر ...بنتي ما كانت بالخليج بس كانت بالحضانه لحد الريسبشن بالبلاي جروب وطبعا كانت المعلومات نوعا ما متكرره بس بالريسبشن زاد عليها إنها كان يكون عندها هوم ووركس
عاد هني فهمتها يعني شنو دراسه وإن لازم نقعد بغرفتها ومحد يدخل علينا وندرس مو لعب ...الحين نرجع من المدرسه عالساعه 3 بس تتغدى وأحطلها كارتون في نفس الوقت عقب أقوم أصلي العصر وأقولها بس أخلص صلاه نبدي ندرس وأعطيها بريك بنص الدراسه وعقب ما نخلص أخليها تلعب أو نزور أمي أو أوديها مطعم للعشا وبس وتنام على 8ونص ..
وبالنسبه لقله الأدب بصراحه المشكله بالأهالي اللي ما تربي

 

[روحي تحب]

ايه والله شفتي يا روحي تحب قلة ادب
عاد انا واحد من الاسباب اللي ماخلتني ادخل الولد حكومه اني ابي ناس اخلاقهم سنعه

وصح كلامج ليش مافيه كاميرات تدرين اول مره اسمع منج انه الخليج فيه كاميرات مراقبه على الطلبه

بس الواحد شيقول غير الشكوى لله

زهر..... حبوبه كل مكان بنصادف هالاشكال حتى لو بالمجتمع الخارجي غير محيط المدرسه آنا مرات بالسوق اسمع المراهقين يقولون اشياء والله قلبي يعورني على هالجيل الياي شراح يطل بس الله يستر على عيالنا احنا نربي ونسوي اللي علينا والباجي على الله وربي مايضيعلنا تعب

وزهر أخاف فهمتيني غلط الخليج مافيها كاميرات آنا اقصد المدارس الثانيه فيها هالوقت صار يخرع احس محتاجين هالسوالف

 

[روحي تحب]

وشلونكم امهات عساكم بخير اعتقد مريحين شوي باجر ماكو دوام ....وانشاء الله كلكم تردون من الاجتماع مستانسين

 

[عزيزتى]

وناسة اخر يوم بالاسبوع,جنة انا الي عندي دراسة

اليوم انشاالله الاجتماع بروح حق استاذ بسام واقولة عن الاسلامية علشان يبسطون لهم صيغة الاسئلة بالامتحان

وبالنسبة لموضوع قلة الادب ياما بنسمع ونشوف انا العام ولدي قال كلمة انا ماعرفت معناها ولا هو عبالة كلمة عادية بس ابوة كلمة وقالة مو اي شى تسمعة تقولة وها الشى عانيت منة اكثر في النادي لان اغلبهم مدارس حكومة بس شنسوي لازم تمر على اذنهم هالكلمات لانها موجودة في كل مكان
بالنسبة حق قسم الثانوية وايد شادين عليهم حتى يكتبون بالدايري اذا اساذن بالحصة وراح تكرمون الحمام واللبس بعد هالسنة ولدي يقول متشددين .اي واحد بنطلونة ضيج يكلمونة والبنات مكلمينهم عن طول ملابسهم والاساور
بس مو ملحقين عليهم عيال هالوقت شطانة
yrae5وقعوهم على خوش ورقة هالسنة عن الاحترام وحسن التعامل (الي طلبو توقيعنا بعد عليها) اول مرة اشوفها
لما قريتها حق ولدي وشرحتها اهتم واخذ الموضوع جد

 

[عزيزتى]

سالفة الكاميرات وايد مهمة لان انا ولدي مرة طقة واحد على السلم استغل عدم وجود المدرسين لان اغلب الوقت يكونون في الساحة

 

[ام عبوشى]

مرحبا ا مهات جم رسوم الكي جي 1 و2