تجمع اولياء امور مدرسة الخليج الانجليزية في السالمية

[lyale]

ههه ملكه والله انا بعد بنتي باجر عندها سبلنغ تيست ومن كثر ما احاتي كل شوي ارووح اكتب الكلمات ههه لا قصدي ودي اقعدها من نومها امليها مسكينه لاعت جبدها مني اول ما تفتح عيونها الصبح اكون بويهه ويلا تدريس ههه ماكو لعب باسم الله الرحمن الرحيم تقول هذاك اليوم خرعتيني شفيج بتريق هههه

 

[mr000]

سلام أمهات الخليج جميعا أشلونكم موفقين عيالكم يارب! ليالي سالفة التدريس الصبح ولما أوصل عند المدرسه أطلع الأوراق اللي ملخصتها حقه أراجعه هذي مابطلت عنها ألا بس العام لما قام يقولي بس خلاص آنا دارس بالبيت ولاتراجعيني بالسياره جني ياهل مع أنه معاه ولد لبناني كبره والله ليلحين أشوف أمه الصبح لازم تراجع له بالسياره يالله ينزل!وفي شغله ان شاءالله حق غريد 2 بس خل أقولها لكم من الحين أنتوا بالنظام الأنجليزي سابقين الأمريكي يعني جدول الضرب راح ياخذونه بالكورس الثاني أعتقد من غريد 2 حسب ماقالتلي مدرسه كانت معاي بالدوام وولدها كان بمدرستكم وكان ولدي توه بغريد 3 بدى ياخذه فعلشان يحفظ جدول الضرب كنت شاريتله شريط انجليزي فيه أناشيد على جدول الضرب وايد تساعد الياهل أنه يحفظ ويوميا أحطه له بالسياره الصبح لما أوديه المدرسه وبكل طلعه هالشريط نشغله ويقول معاه لما حفظه فجربولهم هالطريقه أحسن لأن ولدي كان مايحب طريقة النسخ علشان يحفظ!!

 

[روحي تحب]

شلونكم امهات واي حسافه ويني عنكم اليوم تجمعتم يوم طلعت مبجر بس ماعليه ملحوقه انشاء الله .....مبروك الفوز

زهر ......ويه مت من الضحك على نفسي البدليه قويه ( يتجمعون)

وملكه والفرسان وعزيزتي ....والله تفاجئت اليوم بانه ولدي رد البيت وماراح المباراة خانقته العبره يقولي طلعوني انشاء الله من باجر بكلم مستر هيه ....يمكن يتفهم

وام مشعل...... حبيبتي مشكوره على المعلومات ولاتقطعين خليج دايما متواصله معانا تشرفنا فيج ومشكوره على الدعوه الحلوه

وليال....... حياج وينج انطرج صارلي جم يوم جان زين قريتي المشاركات اللي قبل

مروو.......حياج الله ايه ياحلو طلاتكم علينا مشكوره والله على النصيحه بس هالشريط وين نحصله الحين

 

[الفرسان الثلاثة]

mrooo مشكووورة وايد على نصيحة الشريط مال الضرب ببس ياريت نعرف من وين نحصله عشان نشترييه و ندعييلج بالخير الله يوفق عيالج يارب و يسهل عليهم و عليج دراستهم

 

[الفرسان الثلاثة]

ملكه و ليال ... موفقين ان شاء الله اليوم في السبيلنغ تست

 

[زوزو الحلوه]

انشاالله الله يسهل مسكين ولدي عارف الكلمات وحافظهم بس انا وايد احاتي مادري شسوي زوجي يقولي لا تضغطين عليه بس انا ما اقدر كل وحده تبي ولدها متفوق وشاطر

 

[زهر وردي]

هلا باحلا تجمع
شلونكم بنااات وشخباركم

ملكه مشكوره والشر مايجيج

عزيزتي == مبرووك فوز فريق المدرسه وفوز وليدج اكييد الفرحه مش سيعاه قوليله زهر تقوله والله كفو ورفعتوا روسنا

روحي تحب يا حلوج وحلو بدلياتج يا نوارة التجمع
وان شا الله يارب يتفهمون ويرد وليدج يلعب بالفريق ياعمري ضايق خلقه ليش طلعوه

مرو مشكوره على فكرة الشريط بس صج وين نحصله والله يوفق عيالج ويسعدج يارب

ليال حراااام عليج شمسويه بالبنيه رعب ههههههه
الله يوفقها يارب

زوزو الحلوه لاتحاتين وان شا الله خير وترى بالاخير كلمن ياخذ نصيبه ويارب يكون نصيب وليدج مثل ماتتمنين وتبين

 

[عزيزتى]

ام مشعل == حياج اللة قي تجمعنا انتى الحين مرجع لنا اي معلومة مانعرفها بنسالج
والله يخليلج عيالج يارب وتفرحين بتخرجهم

شنوالفرق بينa level-as level

 

[زهر وردي]

الفرسان الثلاثه
الله يتمم على وليدج ويوفقه يارب
بس بقيت اسئلج ولدج يكتب الاعداد واسمه وكلمات اللي طلبوهم منا نعلمهم مثل كات ومات وسات وبوب وموب
لانه ولدي مطفرني الاعداد يكتبهم بس مو كلهم عدل
الحروف يعرف يرتب الكروت ويكتب بس كات واسمه
حتى العربي امس طفرني يالله كتب شاشه وروضه وقلم
مادري انتي جذي بعد طفرانه مثلي والا انا عصبيه بسرعه اعصب عليه وازفه والنتيجه انه هو بعد طبعه مزاجي ويتنح ومايرضى يفهم يقوم يلعب ويخلي كل شي
ادري انه طريقتي غلط اني اعصب عليه بس قولولي شسوي
اختي تقولي خلي ابوه يدرسه خليه يطلع بويه ابوه بس مادري انا ما يعطيني قلبي اهده ويا ابوه
احس مايعلمه عدل
بنات انتوا شرايكم ؟؟؟؟؟؟

 

[الفرسان الثلاثة]

اختي زهر وردي ... ترا اللي قاعدين يطلبونه من عيالنا مو سهل هم يبيله مجهود ومو معقوله توهم مايعرفون الاحرف على طول شاشة روضه قلم !!!! اليوم كلمت تيشر العربي تقول عادي شوي شوي يتعلمون هذي البدايه خليه يرسم الكلمه و مع الوقت راح تاخذ ايده على الكتابه يبيله تدريب ..انا قاعده اقعد معاه وهم مطفرني بعد بس مو قاعده اضغط عليه المفروض اشد عليه ... الله يعينا .. وبالنسبه للانجليزي يعرف يركب كل الكلمات الحمدلله بس الكتابه مو ذاك الزود يبيله تدريب ويعرف يكتب اسمه بس اسم ابوه شوي صعب مو عارف يكتبه كله
تيشر العربي قالت لي اييب دفتر حق البيت و اخليه كل يوم يكتب الكلمات واوريها اياه عشان اشجعه .. عاد انا قلت بييبله دفتر على سبايدرمان مع ستكرز ونجوم يمكن يتشجع
قالت لي لازم اتشدين عليه عشان الياهل إذا شاف امه راخيه مايتعب نفسه ومايكون جاد ... الله يعينا ويسهل على عيالنا بالتوفيق حبيبتي ..

 

[om mishaal]

ام مشعل == حياج اللة قي تجمعنا انتى الحين مرجع لنا اي معلومة مانعرفها بنسالج
والله يخليلج عيالج يارب وتفرحين بتخرجهم

شنوالفرق بينa level-as level

الله يسلمك حبيبتي ربنا يسلمك لك عيالك إن شاء الله
وتفرحين بتخرجهم من المدرسة والجامعة

IGCSE هذه تعتبر الثانوية العامة لكن بالكويت ما يعادلونها لكن تلاقين دول تقبلها وهي تكون الصف التاسع+ العاشر للخليج الانجليزية لكن مثلا للمدرسة الانجليزية الحديثة فهي للصف 11 ويقدر بعدها بعض الطلاب يعادلون شهاداتهم بالثانوية العامة مثل المصريين جامعاتهم تقبلهم مباشرة وفي بلدان مثل الاردن ولبنان وأعتقد الكويت ما تقبلهم الا لما يخلصون AS أو 12 سنة دراسية مو شرط a level بالكويت لمعادلة الشهادة

AS level بالنسبة للخليج الانجليزية فهو صف 11 ومواده تكون اختيارية مثلا ياخذ 4 مواد ولازم يجيب فيهم فوق D وبعض الجامعات تعادل كل مادتين AS ب مادة وحده A level

توضيح أكثر لبنان مثلا عشان تدخلين الجامعة لازم تنهين 12 سنة طبعا الخليج 12 سنة تخلصين a LEVEL لكن مثلا الانجليزية الحديثة ال AS صف 12 و A صف 13

لذا أغلب الكويتيين اللي يدرسون في الانجليزية الحديثة يدرسون صف 13 اللي هو A LEVEL ولما يسافرون لندن أو امريكا يعادلون هذه السنة بسنة أولى جامعة يعني يسقطون عنه عدد ساعات كثيرة مثل ما صار مع ابني انا حطيته بجامعة أجنبية بس بدولة عربية فسقطوا عنه أكثر من 35 ساعة وبهذه الحالة بينهي دراسته ب 3 سنين ويحسبون له باقي الساعات انه نجح وتجاوز فيها لانه قدم شهادة A LEVEL

A level هو صف 12 بالخليج الانجليزية وصف 13 بالانجليزية الحديثة ويقدر ياخذ أقل شي مادتين يقدم فيهم امتحانات وشرط يكون الفيزيا أو الرياضيات وحده منهم وبهذه الحالة تحسب ساعات دراسة بسنة أولى جامعة.

طبعا في دول كثيرة منها الأردن تجبر الطلبة تقديم 12 سنة دراسية كاملة وشرط a levelعشان تعادل شهادتهم أما مصر تاخذهم من as أو صف 10 ما عندهم مشكلة

اذا شي مو واضح حاضرة لكل سؤال لاني كنت أعاني قبل عشان أحد يفهمني بس لما وصلوا أولادي لهذه المراحل استوعبت تماما

ابني الصغير حاليا بصف a level ماخذ فيزيا + كمبيوتر يعني صف 12 بالخليج الانجليزية ولو مثلا راح لندن يعادلون له هالمواد ويخصمون عليه ساعات لانه تحتسب كمواد تأسيس بسنة اولى جامعة

أي سؤال تامرووووووووووون الله يوفقكم إن شاء الله

 

[om mishaal]

نصيحة لكم بالنت تلاقون كثير مواقع تعليم للمراحل المبتدئة بالمدارس الاجنبية أتذكر أولادي كانوا وهم صغار يتدربون عليها ويستوعبون منها أكثر من ما يستوعبون علي لما أدرسهم غير انه الطفل يستمتع بالدراسة عن طريق الكمبيوتر

الله يوفق عيالكم إن شاء الله

 

[الفرسان الثلاثة]

مشكوورة يا اختي bkramadan صج المواقع وايد تفيد بس شلون نوصل لها انا وايد احاول اسوي search وما احصل شي يسوى الا نادرا ياريت اللي تعرف اشرطة او سيديات او مواقع تفيدنا
هذا موقع للاطفال ال كي جي والريسبشن مفيد جدا ومسلي ولدي استفاد منه وايد:
http://www.starfall.com/

 

[ملكة بيتها]

ليال ...واي صج إحنا الأمهات ما نرحم أنا نفسج اليوم الصبح بس خلصت بنتي لبس قتلها تريقي عشان أسويلج تيست قالتلي مابي ريوق قتلها يلا تيست وعقب ما خلصت راحت ويا أبوها المدرسه عقب ما طلعوا تذكرت إني ما حنيت عليها عشان تتريق واي حسيت إني مجرمه عاد دقيت عليها قتلها تتريق بالمدرسه وحرصت عليها إنها تاكل أكلها ..
مرووو ......حبيبتي إي جذي طلي علينا وصج ترى الرياضيات عندنا وايد صعبه وإبتدو ياخذون دبل العدد وهذا مدخل لجدول الضرب ويلا مروو قوليلنا من وين نحصل هالسي دي ..
bkramadan... مشكوره على المعلومات والنصيحه ..
الفرسان الثلاثه ...صاجه هذا خوش موقع وايد بنتي تستانس منه ..
روحي تحب .. لازم تروحين تكلمينهم عشان ولدج لا يتحبط ...

 

[الفرسان الثلاثة]

عيالكم اللي ب year1 وفوق جم عدد الطلبه بالكلاس؟؟؟

 

[عزيزتى]

ام مشعل مشكوووووووووووووورة والله يغطيج العافية وماقصرتي - من زمان ابي احد يوضحلي هالموضوع والله يسهل على اولادك دراستهم يارب
انا ولدي year8وماكنت عارفة النظام بس انتي ماقصرتي
ممكن في الخليج يتخرج منyear10

 

[om mishaal]

ام مشعل مشكوووووووووووووورة والله يغطيج العافية وماقصرتي - من زمان ابي احد يوضحلي هالموضوع والله يسهل على اولادك دراستهم يارب
انا ولدي year8وماكنت عارفة النظام بس انتي ماقصرتي
ممكن في الخليج يتخرج منyear10

هلا وغلا حياك الله عزيزتي والله يوفق عيالك إن شاء الله
معناه ولدك السنة القادمة يبتدي IGCSE وهي تسمى الثانوية العامة الانجليزية يعني حسب الخليج الانجليزية وأغلب المدارس الانجليزية صف 9+10 لانه IGCSE هي هالسنتين مع بعض مو سنة وحده وبمعدلات لست مواد أساسي منهم العربي و ( الفيزياء أو الرياضيات ) وبمعدل لا يقل عن 6 مواد بدرجة D
طبعا لو بيدخل الجامعات الخاصة بالكويت أو جامعة الكويت يحتاج صف 11 وهو AS level ومعدل لا يقل عن E
إلا لو بترسلينه يتخرج من دول مثل أمريكا تحتاج 12 سنة أو أغلب جامعات لندن نفس الشي 12 سنة وفي بعض جامعات بأمريكا أو لندن تاخذ 11 سنة AS بتخرج 4 مواد وهذا يعتمد على الجامعات اللي بتراسلينها وعلى معدله العام.

الله يوفق عيالنا كلنا إن شاء الله

 

[زهر وردي]

صباح الخير يا بنااات شلونكم
الفرسان == مشكوره وايد والله كلامج شال هم في قلبي وايد احاتي واخاف يكون غير عن اللي مثله ويزاج الله خير لانج قلتي عن فكره الدفتر انا بعد بسوي جذي بحطله دفتر وستكيرات وبعد مشىكوره على الموقع وايد يونس

ام مشعل مشكوره وعسى الله يوفق عيالج يارب
بس ممكن نعرف ولدج الكبير شنو يدرس اللحين ووين وشنو جامعته
اذا حابه تجاوبين قولي واذا موحابه ترى عادي

 

[om mishaal]

هلا وغلا زهر وردي منوره صباح النور
أنا عندي ولدين الصغير يدرس بصف 12 بالخليج الانجليزية
والكبير مشعل يدرس في جامعة NYIT جامعة نيويورك للتكنولوجيا فرع الأردن ويدرس إدارة أعمال (إدارة عامة)
وهذه الجامعة الأصل بأمريكا ولها فروع في البحرين و أبو ظبي و عدة دول أوروبية وايضا على وشك يفتحون فرع في مصر
يحصل فيها الطالب على شهادتين وحده من الجامعة الأم بأمريكا والثانية من الفرع اللي يدرس فيه
وبما إنه يدرس الجامعة في الأردن لذا كان لا بد يحصل على A level و 12 سنة دراسية شرط لمعادلة شهادته من وزارة التعليم بالأردن
ويقدر يتخرج من الجامعة الأم بأمريكا لو يحب وطبعا هو هدفه الماستر بعدين وهذا المهم بالنسبة لي
تسلمين

 

[أم عبووووود]

ربي يوفق عيالي وعيالكم يارب