أشكرج حبوبة على الموضوع الحلو
و انا وحدة من اللي يحبون يقرون الروايات بكل أنواعها
خلوني أشرككم بتجاربي .. يمكن تفيدكم و لو بالشي القليل .. حياكم
البداية مع الروايات كانت من صغري .. تعلقت بروايات الجيب المصرية ... كانت الرواية اهي الصديقة اللي ما تفارقني.. ميولي في البداية اتجه إلى الروايات البوليسية.. الخيالية .. نمت الخيال عندي بشكل كبير.. و الحلو فيها انها ما كانت تخدش قيمنا
قريت قصص كثيرة لأجاثا كريستي .. مثل دماء على الجليد، جريمة في القطار، ذات القبعة السوداء، جزيرة الكنز أعتقد اساميها جذي .. لأن هالشي من زمااان .. و قريت وااايد لأجاثا كريستي فما أتذكر الأسامي بالضبط
- قريت رواية (كوخ العم توم، المعذبون في الأرض)، و (انا كرنينا ما كملتها لأن الطبعة اللي كانت عندي مش و لا بد .. بعض صفحاتها ممسوحة فما قدرت أكملها..
قريت أيام المراهقة كذا رواية رومانسية مثل روايات عبير و غيرها... لكن ما تستهويني وايد .. البوليسية كانت أحلى منها .. لأن روايات عبير مالها علاقة ببواقعنا و لا بعاداتنا و لا تقاليدنا .. علشان هالسبب حسيت بالبعد والجفوة و بحائط جليدي بيني و بين هالنوع من الروايات ... و بسرعة تركتها إلى غير رجعه
((هذي بالنسبة لروايات عبير بشكل عام))
اتجهت بعدها لروايات أكبر من عمري اشوي .. فدخلت مكتبة الوالدة و نبشت فيها .. كنت اخذ من مكتبتها اشوية روايات أقراها و أرجعها بدون ما تحس هههه
من هالروايات:
- بئر الحرمان ... لإحسان عبد القدوس .. حلوة .. مثلتها سعاد حسني بفلم.
- البيضاء... ليوسف السباعي. هم سووها مسلسل
بعدها قريت ألف ليلة و ليلة .. و ما قدرت أقرى شي معاها لأنها طويلة وايد .. بس فعلا ممتعة و تشد .. كان هالشي لما وصل عمري 17 سنة
بعدها اتجهت للقصص القصيرة مثل .. أجنحة النورس من جزئين .. كانت قصص قصيرة جدا و لكن مؤثرة..
في الوقت الحالي اتجاهي منصب على الروايات الخليجية .. لأني أحب أطلع على الأدب الخليجي .. و حابة أعرف أكثر و أكثر عنه .. و استغليت عطلة الصيف و قريت كمية لا باس فيها من الروايات .. راح أعطيكم نبذة عنها، و هي كالتالي:
- (بنات الرياض) ...للكاتبة السعودية (رجاء الصانع):
رواية حلوة و ممتعة بشكل كبير و تمس واقعنا.. لدرجة حسيت اني أعرف شخصياتها .. لأنهم لابد يكونون مروا بحياة كل بنت خليجية.. لأن هالنوع من البنات موجود حوالينا .. لكن نحاول نكذب أنفسنا و نقول غير هالشي .. بس فعلا الرواية حلوة .. أسلوبها بسيط .. و سلس ما تملين من قراءتها .. لدرجة اني خلصتها بيوم واحد
.. و زعلت جدا ان الرواية خلصت .. كان ودي بجزء ثاني منها
.. ملاحظتي على الكاتبة انها متأثرة جدا بأسلوب الكاتب السعودي غازي القصيبي .. مادري إذا هالربط تولد عندي بمجرد معرفتي إن الكاتب غازي القصيبي يصير خالها .. من جذي صار و تولد هالربط .. أو لأنها اهي فعلا متأثرة فيه .. الله أعلم
- رواية (جروح الذاكرة) .. للكاتب السعودي .. (تركي الحمد):
الرواية كانت قصتها تتمحور حول امرأة خليجية تطوف بذاكرتها بفلاشات سريعة على حياتها السابقة .. حياة الفقر و الخوف .. مما أدى إلى ترسبات نفسية و مع الزمن أدت إلى اضطراب نفسي بسبب التناقض الكبير بين الحياتين (الحياة السابقة البسيطة و الحياة المترفة الحالية) .. لأن الشخصية رغم محاولاتها مجاراة الحياة الجديدة .. حياة الترف و البذخ إلا أنها كانت متأثرة بحياتها السابقة و كانت مثل الريموت اللي يحركها.. الرواية تتكلم عن المجتمع السعودي و التغيرات اللي طرأت عليه فجأة.. ماراح أحرق عليكم الرواية .. لكن كانت تجربة حلوة .. عشت معاها و تخيلت شخصياتها بملامحهم و شخصياتهم و طريقة تفكيرهم .. باختصار أنصحكم تقرونها..
- رواية ( 7 ) للكاتب السعودي (غازي القصيبي):
الرواية حلوة و ممتعة .. و تميل إلى الأسلوب الساخر .. تقرينها و انتي تضحكين .. تخيلت نفسي جدام التلفزيون و أتابع مسلسل ساخر .. باختصار الرواية تتكلم عن 7 شخصيات من رجال الوطن العربي الأغنياء الناجحين في عملهم .. منهم الشاعر و الفيلسوف و رجل الأعمال و الدكتور النفسي و العالم الروحاني و الصحفي و السياسي .. تستضيفهم مذيعة جميلة كل على حده .. كل منهم يحبها و يتمناها رغم ان أكثرهم متزوجين .. و يحاولون محاولات مستميتة عشان يوصلون لها .. يكتبون في دفتر مذكراتها أكثر المواقف المحرجة اللي مرت عليهم .. و تواعدهم اخر الرواية في جزيرة مقطوعة .. على انها تمر تاخذ واحد منهم .. و هو اللي يقع عليه اختيارها .. القصة حلوة و تتكلم عن الوطن العربي و الفساد في السبع مجالات اللي يمثلها الأبطال في الرواية ... أنصحكم تقرونها..
- رواية عيون قذرة .. للكاتبة (قماشة العليان):
في البداية ما لاحظت أي شي جديد في الرواية لكن مع تتابع الأحداث بديت أندمج .. و خلصتها بيومين .. تتكلم الرواية عن فتاة سعودية انفصلوا امها و أبوها و كل منهم تزوج .. هذي البنت قضت حياتها في التنقل اهي و أخوها بين 3 بيوت .. بيت أبوها و مرته .. و بيت أمها و زوجها .. و بيت عمتها .. يكبرون البنت و أخوها مشتتين ضايعين .. يكسرون الخاطر الصراحة .. المهم بعدين يكبرون و يسافر الأخ لندن للدراسة و يرفض أبوه انه يصرف عليه .. فيضطر الولد انه يشتغل و يصرف على نفسه .. و أخته تصير فيها حالة نفسية و اتييها حالات مثل الصرع .. لكن مو صرع .. عبارة عن نوبات .. تنتابها بين الفترة و الأخرى .. و خصوصا إذا انفعلت .. تسافر البنت لندن 40 يوم لأخوها .. و من هني تتابع الأحداث و تبدى القصة .. لكن ما أجذب عليكم اني بنهاية القصة دمعت عيني .. و بكيت .. و ليلحين إذا ذكرت النهاية أبجي
..
الرواية حلوة .. اقروها
- رواية (رجل تكتبه الشمس) للكاتبة (خولة القزويني) ..
ما أخفي عليكم .. ما قدرت أكمل الرواية .. وصلت للنص و قطيتها .. كلش ما فيها شي جديد .. أسرة عبارة عن أم و أبنائها الـ3 (بنتين وولد) يتخلى عنهم الاب و يتزوج وحده أكبر منه علشان المادة .. و يتعرف الولد على صديقة الغني .. يشغلهم عنده بالشركه اهو ووحدة من خواته .. و الأخت هذي كانت تحاول تستميل الولد .. لكنها عقب ما تعينت بالشركة حاولت تستميل الأب الغني الناضج .. الأب يطلع كان خاطب أمها من قبل .. المهم الرواية جنها مسلسل عربي مكرر و شبع تكرار ..
النقد الأكبر على الروايه .. من وجهة نظري المتواضعة كقارئة بسيطة .. انها رواية بلا هوية .. تبدى الكاتبة الرواية بأنها توضح للقارئ ان الروايات اللي تكتبها .. ما تحدد فيها الزمان و لا المكان علشان تكون مفتوحة و تمس الكل .. لكن للأسف .. فقدان الرواية للهوية خلاها لا تصل إلى قلوب القراء .. (على الأقل بالنسبة لي ) ..
القارئ يحتاج انه يقرأ و يتخيل الشخصيات علشان يقدر يعيش معاها و يتفاعل معاها على ضوء خلفياتها الثقافية و أشكالها .. و القارئ أيضا يحتاج انه يتخيل الزمان و المكان .. مو حلوه يكون القارئ ضايع .. قعدت أقرى و حاولت أرسم ملامح للشخصيات لكن للأسف ما قدرت .. حاولت أتخيل البيئة .. هم ما قدرت .. رواية باااردة جدا تخلو من الدفء الحميمي بين شخصياتها و القارئ .. يعني من الأشياء اللي يمكن تضحكون عليها .. اني حاولت أتخيل شخصية الأب (أبو الولد الغني) ما لقيت له وصف إلا وصف واحد .. توصفة الكاتبة انه ذو أنف مستقيم و عليه حبة خالة ضخمة .. يعني طول الرواية و انا أتعامل مع حبة خالة ضخمة .. دون أي ملامح أخرى.. حبة الخالة الضخمة راحت .. حبة الخالة الضخمة يت .. حبة الخالة الضخمة قعدت ورى المكتب .. جذي كنت أتخيل الشخصية .. فقط حبة خالة ضخمة هههههه
.. حاولت ألبسها دشداشة ما نفع .. حاولت ألبسها بنطلون هم ما نفع .. وااااي .. لأ لأ لأ مووووو شي كلش.. و الله انا عن نفسي ما اعجبتني الرواية .. لكن يمكن تعجب غيري .. مادري ..
- (الرجل الحائط) مجموعة قصص قصيرة للكاتبة (قماشة العليان) ... قريت كذا قصة و كان لا بأس فيها .. لكن لاحظت كم هائل من الحزن يملأ قلم الكاتبة سواء في هذي المجموعة القصصية أو رواية (عيون قذرة) .. مادري شنو السبب..
- أخيرا و ليس آخراً .. انا الحين قاعدة أقرى رواية (فسوق) للكاتب (عبده خال) .. إذا خلصت منها .. إن شاء الله راح أعطيكم انطباعي
--------------------
.. و اسفة كل الأسف على الإطالة ..
لكن حسيت إن كل رواية لازم أتكلم عنها بالتساوي مع غيرها .. و لو ان في قلبي كلام أكثر بكثير من اللي كتبته
