مشاركة: تقرين روايات؟؟ تعالي قولي رايج ..
السلام عليكم ...
مشالله عليج تفاخيه عليج مواضيع خطيرة
1- شنو نوع الروايات اللي تحبين تقرينها ( رومانسيه - بوليسيه- إجتماعيه.. إلخ ) )
أحب الروايات الحزينة والجرايم ومرات أميل للرعب والالغاز بس أكره الروايات الرومنسية أحس أنها مضيعة وقت
2-منو (الكاتب/الكاتبه) اللي تحبين تقرين له ؟
يمكن اجاثا كريستي .. بس بشكل عام أنا ماحرص على كاتب معين ..
3-شنو الروايه اللي مهما تعيدين وتزيدين فيها ماتملين (تقرينها أكثر من مره ) وليش ؟
ماجدولين للمنفلوطي .. على الرغم من أنها رومنسية نوعًا ما ... بس أسلوب الكاتب مو طبيعي .. وخاصة لما يوصف الطبيعة تحسين جنج تشوفين المشهد من كثر البلاغة بالوصف لا بجد إبداع ..
وهم رواية أنثى العنكبوت للكاتبة قماشة العليان .. دراما تتكلم عن العادات والتقاليد ووضع المرأة الخليجية ولو أنه فيها مبالغة شوي ... بس تاثرت فيها حيل وتعاطفت مع البطلة ..
4- إذا بخطارج نقد على روايه سواء بناء أو هدام قوليه لنا يمكن يكون راينا من رايج
كثير الروايات اللي أحب أعلق عليها ..
بس أكثر رواية قهرتني هي رواية بنات الرياض ... ياااي شنو حقدت على الكاتبة .. حسيت الرواية إباحية وفيها مغالطات وجذب مال أمه داعي ... يعني تحسين كلام فاضي ماله هدف والادهى انها كاتبتها بالعامية ...
لكن للأمانة أعجبني أسلوب الكاتبة حسيت عندها موهبة بس ما استغلتها بشي يسوى يعني الرواية كلها عن بنات يغازلون ووصف عن علاقاتهم بربعهم .. والناتج ولا شي وفوق هذا كله الأحداث مصطنعة زيادة عن اللازم يعني تتخيلين وأنتي تقرين الرواية أن الكاتبة مو خليجية ولا تتكلم عن مجتمع خليجي ...
بنات منو قرت رواية مرتفعات وذرنج ؟
