حوامل سمينات

[حياة ريلي]

السلام عليكم يا بنات
امس تفطرت ربع صدر ديايه مشوي بالفرن و طاسة سلطه و طاسة شوربة خضار بدون دهن او شي. . كله انا مسويته طبعا عشان اتاكد ان بدون دهن
زرت حمولتي و عيزوا فيني اكل موالح و كبب و حلو و انا ابد ما قبلت الا بالشاي
و تالي مريت امي الغاليه اكلت عندها ثلاث تمرات و استكانة شاي
و تسحرت الساعه 1:30 طاسة روب خالي الدسم و شريحتين اناناس فرش.
و شربت ست قلاصات ماي بس يبيلي ازيد.
اليوم كانت مراجعتي و الدكتور استانس وايد اني ما زدت و لا جرام و قالي البيبيات كبار و صحتهم ممتازه ربي لك الحمد و سالني شلون محافظه :eh_s(9):
اليوم فطوري بيكون ستيك ان شاء الله مع طاسة شوربة عدس و سلطه. طبعا عالفطور ما اشرب الا ماي ماي ماي و اكل ثلاث تمرات

 

[Aloe Vera]

مبروك حياة ريلي و الى الامام


انا قاعدة اشوف نوتة اكتب فيها وزني كل اسبوع

شفت ان خلال الشهرين اللي طلفو زدت كيلو و نص
اعتقد ان هالشي زين لان بالعادة ازيد كيلو او كيلوين بالشهر
فا قاعدة اقول الحمدلله و ان شاء الله ما ازيد لين اولد

 

[Aloe Vera]

سويتلي اليوم سلطة وايد لذيذة فيها جرجير و بقدونس و خيار و جزر و زيتون و جبنة اريش
رشيت عليهم شوية زعتر و صوص كان خل و زيت زيتون

حلوة و اعتقد فيها وايد فايدة

 

[حياة ريلي]

بالعافيه الوفيرا احب السلطه اليونانيه تهبل
فطوري مثل ما قلت لكم ستيك و كوب شوربة عدس و سلطه
و الساعه عشر اكلت تفاحه خضرا و توني تسحرت شريحة توست مع قفشة جبن ابيض خالي الدسم و طماط و جرجير و خس و فلفل بارد و كوب شوربة كنور ام ٥٠ كالوري اللي نسويها بكوب بس نصب عليها ماي حار

 

[7alaty]

صحبكم الله بالخير وتقبل الله طاعتكم

 

[7alaty]

كل يوم كنت إدش من فوني واتابعكم وايد وايد استانست الأغلبية محافظين

١- حياة ريلي
٢- تبطئ عظم
٣- الوفيرا
٤- برد بؤ ذهب <<<<< ويبيلج طق ليش جذي تخربطين وايد !!!! تبين تدشين ال١٠٠؟!


انا أصنف نفسي مع تبطئ عظم ههههههههه

ولله الحمد ماشية تمام بس خربطة بسيطة وما قست وزني الا قبل يومين يعني من بديت صارلي ٣ أسابيع والحمدلله نازلة نص كغ

استانست لأني الحين بنص السادس تقريبا بدش السابع ووزني ما زاد الحمدلله



بنات حبيباتي

انا قطعت لأني مريت بظروف وكانت نفسيتي شوية تعبانة بس بالدايت منظمة نفسي الحمدلله


خل اقولكم نظامي برمضان

 

[7alaty]

الدكتورة وجدان حددت لي قواعد أساسية اتبعها برمضان ' و يارب تستفيدون :

١- ابتدي ب٣ حبات تمر مع ( كوب حليب او ماي ) او استغني عن التمر والحليب ويكون البديل عصير برتقال او فيمتو قلاص>>> الافضل التمر طبعا

٢ بداية كل فطور عقب رقم ١ شوربة وسلطة لازم وضروري

٣- بعد ١ و٢ تاكلين أللي تبين بحيث ما يتعدىون مقدار قوطي الروب او كوب يعني اقدر اشكل من كل شي قفشة او صنف واحد مقدار قوطي الروب

٤- طبعا اللحم والدياي مسموح بشرط يكون شوية

٥- بين الفطور والسحور لي ٥ حبات يا اما سمبوسة او كبة او قطائف او لقيمات وتختار ين بالاصناف

٦ - السحور يا كورن فليكس فيتنس مع حليب او خبز شعير وجبن وسلطة

طيعا نكثر سوائل من الفطور لين السحور

 

[7alaty]

ان شاء الله راح اقيس وزني ٧/٣١ باقي أسبوعين ويوم لان عندي مراجعه

 

[Aloe Vera]

نظام الدكتورة وجدان معقول


انا امس للاسف كثرت وايد و انا الغلطانة
كان عندنا غبقة و ماسويت كنترول و ما حددت الكمية

و قبل لا انام كنت مكثرة بالاكل و الشرب فا نمت كلش كلش مو مرتاحة و حاسة اني ابي ارجع باي لحظة يعني جني مو نايمة

ان شاء الله ماراح اكرر هالغلطة

 

[حياة ريلي]

ميخالف الوفيرا لا تحسين بالذنب بعد هم النفس تشتهي و ان شاء الله ما ترجعين و عليج بالعافيه ما اكلتي
حلاتي نبي مشاركات اكثر انت صاحبة الموضوع
برد بو ذهب قامت تلتزم الحين ولا اول يبيلها طق

 

[حياة ريلي]

حلاتي نظامج مع وجدان تثبيت ولا ينزل ؟

 

[حياة ريلي]

لان انا لو اكل هالاشياء ما انزل اثبت اذا ما ازيد

 

[حياة ريلي]

اليوم مراجعتي عند الاخصائيه هبه
بين معاها نزول هالثلاث اسابيع كيلو ونص الحمد لله و بين نزول بنسبة الدهون بالجسم
عطتني نظام كالتالي بس ادري ما اقدر اكل جذي و قلت لها بس قالتلي حاولي
الافطار ثلاث تمرات و نص كوب شوربه و ماي
ننطر نص ساعه و بعدين الفطور ربع خبزة و سلطه و بروتين نص صدر دياي مثلا او ما يعادله
بعد الفطور بساعتين حبتين لقيمات او قطايف او طاسة محلبيه او جلي صغيرة او كاكاو صغير ... قلت لها ما نسوي حلو محد ياكل جان تقولي عيل حبتين فاكهه
و السحور توستتين و جبن او لبنه او بيضه او بروتين
او كورن فليكس و حليب
و قبل النوم موزه و ماي
انا مستحيل اقدر اكل كل هذا لاني انام الساعه وحده ما يمديني
بعدين الاكل يقعد على قلبي و ما اقدر اتنفس فما اقدر اكل كل هذا

 

[تبطي عظم!]

قووه


ماشاء الله الله يتمم عليكم وعلي ودي اشوف وزني جم من زمان مو قايسه



امس ماكليت شيء عدل احس ماكو وقت ومو ملحقه

ع الفطور

٣ تمرات نص قلاص لبن شربت منه شويه وهريس جم قفشه

وشوربه جم قفشه وقطايف ٣ حبات وكبه وحده وسمبوسه وحده



بعدها بساعه شربة ماي ع الساعه ١٠ يالله قدرت اكل قبلها ماقدرت احس شبعانه

شربت فنجالين قهوه مع سويت اختي مسويته قطعه صغيره

وسحوري كان عنب اخضر مع موزه وماي

حصيلة الماي امس ٤ اكواب بس مااقدر اكثر من جذي احس منغثه

 

[حياة ريلي]

اليوم تفطرت ثلاث تمرات و قلاصين ماي و اخذت بريك عشر دقايق ، تالي اخذت مرق الدياي انا اسويه من غير ولا قطرة دهن و اكلته مثل الشوربة قصصت فيه نص صدر الديايه مع بيديان و جزر و كوسا و اكلتهم بالقفشه كان لذيذ بس ما قدرت اكل لا خبز ولا سلطه و شربت قلاص ماي ثالث
و توني بعد ساعتين اكلت لي شريحتين ونص اناناس و عشر كرزات و قلاصين ماي
قاعده اشرب ماي اكثر والطبيب حرص اني اشرب ماي صافي ثمان قلاصات غير لتر سوائل اضافيه عشان جذي ازيد و الصراحه اموت عطش وانا صايمه احس بغشي من العطش .
سحوري ما قررت شنو يمكن توست و يمكن كورن فليكس

 

[Aloe Vera]

ماشاء الله عليكم زين تسوون

انا اليوم كثرت عالفطور يايتنا نقصة عجيبة هههه

بس صج شعور لمن اكثر اكل مو حلو خصوصاً مع الحمل

 

[Aloe Vera]

استغفر الله صاير اكلي ملخبط
ودي انظمه حيل قاعدة انغث و اتعب


خلاص ان شاء الله من باجر بسوي نظام اللي اكل قد حجم ماعون الروب

الصحن العادي يلخبطني

 

[((غنج))]

الله يجزاكم خير ياخواتي على هالنصايح انا ان شاءالله معكم وكل يوم بنزل يومياتي شنو كليت وشنو خبصت
وبالنسبه للمراجعه هذا اول حمل لي وماعندي اي خلفيه عن الموضوع والله يسامح والدتي هي اللي قالتلي مو من الحين تراجعين من الثالث انا حاليا عند اهلي وزوجي مو معي

بس حبيت اسالكم حبوب الفوليك اسيد عادي انا اشتريها واكلها من غير ماروح دكتوره ؟! والله يعطيكم العافيه

 

[لمساتـي]

اب اب

 

[Aloe Vera]

غنج

بالنسبة حق حبوب الفوليك اسيد ممكن تاخذينهم من الصيدلية