ديوانية بيت العمر

[sara3]

ام وهابى


يعافيك حبيبتى

اشصار على الصبغ؟

 

[سافانا]

السلام عليكم ورحمة الله وبركاته

إن شاء الله تكونون بأتم الصحه والعافيه

أنا مشتركه جديد بالمنتدى ولما قأت موضوعكم وتفاعلكم مع بعض ومناقشتكم مع بعض حسيتكم اهل

ماشاء الله عليكم

[/center​

]



المهم انا قاعده ابني بيت وجزاكم الله خير استفدت شوي من معلوماتكم

وحسيتها مفيده إن شاء الله انتفع منها


ولي عندكم طلبا وليس امرابغيت الشلالات الداخليه الي تكون بالاستقبال انا لقيتها عند شركه بالفروانيه

بس بغيت شركات ثانيه الي تكون عباره عن معجون بارز بالطوفه ويكون منظر طبيعي وشلال في نفس

الوقت يعني اذا ماكنت مشغله الشلا ل يصير منظر طبيعي عادي مايكون بالارض يكون بالطوفه بس

(إن شاء الله اكون وصلت المعلومه)ولكم جزيل لشكر ....​

 

[ام وهابي]

شلونكم بنات عساكم بخير
حياك الله معانا سافانا وانشالله تستفيدين وتفيدينا باي معلومه عندك حتى لو كانت بالنسبه لج تافهه او معروفه
بالنسبه لطلبج والله ما عندي فكره ياريت اذا عرفتي تقوليلنا تجربتج
وانتي وين واصله بالبنيان
ساره حاليا انا في اجازه من البيت ودوخته وراح ابدى اللف والدوران على محلات الاصباغ بعد امتحانات اخر السنه انشا الله
وعل فكره الصبغ اللي حطيتي صورته قبل اسمه فلفيت بالسعوديه بس عندنا مدري شسمونه

 

[sara3]

سافانا هلا فيك


انا مثل ام وهابى ما عندى اى فكرة ماوصلت هذى المرحلة,وياريت تفيدينا واتفيدين البنات باى معلومة


اللة يعطيك العافية ام وهابى الله يعينك ويعينا على اختبارات العيال انا وراى صيحة ولدى قاعد يعلم اختة صدعونى:tek:

 

[sara3]

اى عدل فالفيت يا ام وهابى بس اى شركة اتسوية

الظاهر كل شركة عندها كام حركة فى الصبغ وتطلق عليها اسم انتى اذا عاجبتك شوفى المحلات ووريهم الصورة انا احسهاحلوةتكون على 3 جدران وجدار سادة او تكون على جدار واحد وباقى الجدران سادة

 

[اخت فروحه]

مرحبا يا الغاليات :
اليوم طال عمركم افتريت على المطابخ : روائع الثريا ,توب روك وكذا محل بس بصراحة ما دخل مزاجي غير مطابخ الرياض عندهم الوان وموديلات واايد حلوة الظاهر بسوي عنده,صج راح يكلف على فوق 3 الاف بس خاطري بمطبخ ستايل يشرح النفس لي دخلته لان كل البيت اللي اشوفها والمحلات المنيوم خشب مليت منه
اشرايكم ؟
واعجبتني بعد الابواب عند روائع الثريا وبالنسبه للدرابزين والابواب الحديد المطروق للسور في المحل اللي يم روائع الثريا شكله حلو بس ما شفت اسعاره

 

[sara3]

مرحبا يا الغاليات :
اليوم طال عمركم افتريت على المطابخ : روائع الثريا ,توب روك وكذا محل بس بصراحة ما دخل مزاجي غير مطابخ الرياض عندهم الوان وموديلات واايد حلوة الظاهر بسوي عنده,صج راح يكلف على فوق 3 الاف بس خاطري بمطبخ ستايل يشرح النفس لي دخلته لان كل البيت اللي اشوفها والمحلات المنيوم خشب مليت منه
اشرايكم ؟
واعجبتني بعد الابواب عند روائع الثريا وبالنسبه للدرابزين والابواب الحديد المطروق للسور في المحل اللي يم روائع الثريا شكله حلو بس ما شفت اسعاره

شوفى المطبخ الداخلى لا تتكلفين فية اما المطبخ المفتوح على الصالات اواللى عندك بالدور الاول فحطى علية وبالتوفيق:tek:

 

[sara3]

http://www.al-jazeerapaints.com/Products/Products.aspx?CatID=6


رابط الجزيرة للاصباغ وفية الفولفيت اللى حطيناة من قبل

 

[سافانا]

السلام عليكم ورحمة الله وبركاته

 

[سافانا]

شكرا لام وهابي والاخت ساره اعاالترحيب

انا واصله بالدور الثاني خلصت السرداب والارضي والاول والحين باديين بالثاني

وان شاء الله ادور على هالشلال وراح اجيب لكم صورته وان شاء الله يعجبكم


اما بالنسبه للصبغ انا اهلي مسويين نفسه وراح اجيب لكم صورة الغرفه الي مسوينها يسمونه المحملي في اصباغ الجزيره
وفيه صبغ ثاني اسمه الروشن في اصباغ الجزيره علا شكل ورق جدران


وبالنسبه للمطابخ بالكويت الاسعار نار انا سالتهم من وين الاستيراد قالوا لي من السعوديه الالمنيوم والرخام الصناعي الي يجي قطعه وحده يسمونه( رخام صناعي صب )سعر المتر بالكويت 90 دينار اما بالنسبه للالمنيوم ففيه نوع جديد اسمه الفورميكا ونوع ثاني اسمه الصاج وسعر الفورميكا الدبل 90 دينار وهذا ارخص شي طبعا عند عميل لنا بالشويخ.

رحت السعوديه ولقيت الرخام الصناعي مع الفورميكا مع التركيب مايتعدى السعر مع بعض 90 دينار تعاقدت مع واحد بس قالي مااوصل الكويت بس فيه محلات ثانيه قاعده اتفاصل معاهم الحين .
وانا رحت للمحلات من قبل لا اسوي المطبخ عشان اعرف اماكن الاجهزه والطباخ والذي منه لان مطبخي مسكر مو مفتوح 5في 6وفيه بابين وماراح استخدم منه الا علاشكل حرف الال.

وان شاء الله اكون نفعتكم بشي .(ملاحضه بغيت انزل لكم صوره من المطبخ الي مسوينه بس ماعرفت انزل لاني جديده علا المنتديات). ولكم جزيل الشكر

 

[sara3]

سافانا

هلا حبيبتى البنيان بيقظى على الاولى والتالى صرف صرف والاسعار نار

بس ما قلتى لى مو المفروض تبلشون من فوق بعدين تحت علشان لا تنتلف الارضيات

والشلال اكيد راح تلقينة بس وين مكانة بالضبط بتحطينة داخل ولا برة

ما قلتى شيفك من اسالتى:gathering: لك حرية الاجابة طبعا بوجة عام البيت وين ,واشوية ديتيلز عن تصميمك طماعة صح

موفقة حبيبتى:tek:

 

[سافانا]

هلا والله سارونه

البيت في فهد الاحمد

والشلال انا لقيته عند شركه في الفروانيه بس انا حبيت اشوف شركات ثانيه ودورته في شركات ثانيه بس مافهموا علي

والشلال راح يكون مدخل البيت يعني هو ديكور داخلي

اول ماتدشين مع الباب يكون بالوجه على طول وهو مثل ماقلت من قبل عباره عن منظر طبيعي اشجار خضراء وجبال منحوته في معجون بارزوفي نفس الوقت يكون شلال ويكون فيها اضاءه وتكون مرتفعه عن الارض عشان الضيوف وجبايبناالاطفال مايتعبثون بالماي انا شفت شكله بالمحل صراحه عجبني كثير .

اما بالنسبه للتفاصيل لما تدخلين مع باب الاستقبال راح تلاقين على اليمين صالات الاستقبال وعددها2 واليسار البوفيه وطاولة الطعام ويكون القسم كله مفتوح على بعض وعليه باب يفصله عن البيت كله بعدين يكون المطبخ ومخزن صغير للثلاجات وبعدين ممر يطلع على منور صغير فيه الغسيل وحمام الخدم والمنشر بعدين سويت للضيوف عباره عن 2 غرفه وحمام مع باب خارجي عشان ياخذون راحتهم بالطلعه والدخله .
نروح للدور الاول جناح الاولاد الله يحفضهم علا اليمين وجناحي انا والبنات على اليسار والصاله بالوسط مرتفعه عن الارض درجتين عشان ارتفاع الدريشه راح يكون 50 سم من الارض والدريشه تطل علا الحديقه وطول الدريشه 2متروعرضها4متر وراح يون علا اطرافها دربزين والدرج من النص والصاله قياسها 7في 8

وبجانب سويت الاولاد غرفه راح يكون فيها كاونتر تحضيري وتكون لاي حتياجات ثانيه مثلا انها تكون الغرفه الشتويه وبيتي كله مافيه ولا ممرواحد.

وللحديث بقيه ( السرداب والطابق الثاني ) وشكرا للاهتمامك بس ماقلتي لي انتي تبنين بيت ولا حب استطلاع .

 

[nono78]

سارا تسلم ايدج



اصباغ الجزيره مو طبيعيه جنهم ووول بيبر

في منهم بالكويت ؟؟؟؟



بس يبيله صباغ شاطر

 

[sara3]

سارا تسلم ايدج



اصباغ الجزيره مو طبيعيه جنهم ووول بيبر

في منهم بالكويت ؟؟؟؟



بس يبيله صباغ شاطر

شفتى نونة السايت عجيبة الاصباغ وفى شرح وصورة عن نوعيى كل نوع

اكيد فى شركة فى الكويت معقولة مافي جربى البدالة

صج ولا هذا العنابى انا سالت وحدة تقول اهو صبغ بيس بعدين اييب طبعات انتى تختارين القشة ويغطيها بلمعة ويبتدى يطبع


وانتى شخبارك

انا شريت ارضية المطبخ والسيراميك وداقين يبون يركبون ومحتارة في التصميم انا حاطة فى بالى L شيب

مثل سافانا لان مطبخى صغير
السيراميك اللى خذتة 10×10 رمادى اوكى

وخذيت نفسة احمر قلت ابى احطة بالطول على الجدار الفاضى كديكور منظر يعنى الحين تذكرت ان هذا

الجدار فية 4 بلاكات حاطتهم حق الاجهزة يعنى لازم احط خزاين على الاقل لو ارضية علشان استفيد من

البلاكات وجذى راح يطلع الخط الاحمر مو حلو مو واصل لى الارض.


بنات اللى بتسوى مطبخ من الاسود اتشوف واحد يصمم لها المطبخ ولا اتحوس حوستى:eh_s(14):

 

[sara3]

صباح الخير سافانا

اى ابنى حبيبتى وكنت كاتبة تفاصيل البيت فى بداية الديوانية

واذا تبين اعيد ما عندى مانع يا حلو لمن اتسولفين عن بيت العمر , يارب يرزق كل كويتية ابيت ملك قادر ياكريم


طيب انا عندى اقتراح روحى جوجل وكتبى شلا لات صور وشوفى اللى يعجبك واخذية للشركة وطلبى منهم انة ينفذونة


صالتك اللى فوق شكل شباكها راح يطلع فلتة انا حاطة 3 شبابيك كبار


واشلون الدور الاول ما فية ممرات اشلون اتصير اكيد فى موزع:tek:

 

[sara3]

بين فترة وفترة راح احط صور لغرف من مواقع اجنبية ناخذ افكار لديكورات الغرف

 

[سافانا]

هلا والله سارونه

انا طلبته من قوقل بس ولا واحد نفسه هذا غير غير .....


اما بالنسبه خق الدورالاول مافيه ولاممر ليه لان الصاله بالوسط والاجنحه علا اليمين واليسار وجناحي انا والبنات مثلا متقابله والمزع الي بينهم عرضه 3 متر وطوله متر مايعتبر ممر صاير نفس الفسحه . حمستيني اروح حق محل الشلال واجيب صوره . ويارب تكونون استفدتوا من بعض المعلومات .

 

[sara3]

سافانا

فهمت عليك الحين صح الموزع غير والممر غير الممر احسة دايما مساحة ضايعة حق بيوتنا اللى مساحتها محدودة اما الفلل الكبيرة فشى ثانى


ويارب تلاقين اللى تبينة تبينoster_av1:

 

[ام وهابي]

شلونكم بنات
الله يعينج ساره انا كنت ناصحه البنات اللي يبنون اول ما فتحنا الديوانيه انهم ايصممون المطبخ عند محل مطابخ
ويحدلهم المصمم انسب الاماكن علشان توزريعات نقاط الكهربا ومكان المغسله والطباخ وتصيم المطبخ ككل ووالمطبخ يكون هيكل اسود افضل شي
علشان ما تحوسين بعدين مثلي والله كسرنا السراميك والبورسلان علشان التصميم المطبخ يكون مناسب لان مرات الواحد يحس انه فاهم واهو يحدد كل شي بس تطلع اشياء كثيره مو محسب احسابها وقياسات تختلف لازم احد خبير بالمطابخ ينبهك عنها والله اكثر شي اخذ مني وقت وفراره المطبخ صج صج يعقد
حبيبتي سافانا شلون الدور الاول مافيه موزع او ممر مو داشه مخي السالفه لازم ممر للحمام كرمج الله على الاقل والا انتي الحماماتت داخل الغرف وكم غرفه في الدور الاول وتحياتي لك

 

[سافانا]

هلا والله أم وهابي

بالنسبه للدور الاول الحمامات في الأجنحه

وفيه 4 حمامات وفيه 6غرف وصاله 6 في 7

ولوسمحتي أم وهابي بغيت تقولين لي اشلون انزل صور مع الموضوع لاني بكره ان شاء اه ولا بعده بروح لشركة الشلال وابي انزل صوره وعندي كم صوره من بيت اهلي بغيت انزلها .


وشكرا لاهتمامكم وتفاعلكم