ديوانيـة --> بجريآت <-- : تعالوا نفضفض ونسولف !

[om_ibrahim]

انا توهقت دكتوري بيسافر بولادتي وما ادري شسوي
:"(
وبالمواساه ما يمدحون الا اهو كنت بروح للافغاني بس يقولون كبر وما قام يولد مثل قبل !

وقلت بروح السلام عند دكتور الاتربي بس انا الحين بالثامن واهو طالع اجازه ويرجع وانا اكون بداية التاسع

ناس تقول ما راح يستقبلج لانج متاخره بالمراجعه :/ مو انا من زمان براجع عنده بس اهو اجازه شسوووي:"(وصج ما يستقبلني !!اقصد يعني يولدني

 

[أمورته]

فيلسوفه
الحمدالله يوم عن يوم يفرق
بس الصدر ورم من الحليب ياذي حيل يضيق الخلق
مادري شالحل وياااه
صرت اشفطه كل شوي
متى يوقف تقرييا فيلسوفه ?

 

[لؤلؤةالكويت]

اموووووورته


دام صدرج غرز جيبي مشط الشعر الطويل وامشطي صدرج كله من فوق لتحت بس والله اختي مجربتها بولاداتها


سبحان الله يدر الحليب ..

وهم بعد اذكر اختي اكلت حبوب تنشيف الله يجعل لج بكل الم اجر وتكفير وغفران لج وسبب لدخولج الجنه اللهم امين

 

[المشتاقة لجنة]

http://www.q8yat.com/t1167134.html

 

[أمورته]

لؤلؤ الكويت
يزاج الله خير ع هالدعوه الطيبه ولج بالمثل ياعمري
شريت حبوب تدر الحليب وقاعد اشفط وجنه صار احسن
لان مرات اقوم من نوم من ثقله يارب لك الحمد

 

[مذهلة2013]

امورته
الحمدلله على السلامه حبيبتي ومبروك ماجاج

انا نفس قصتج بس انا نزل الماي كله الصبح وحاولو يعطوني طلق صناعي وتحميلتين ماكو فايده الرحم مسكر
لين 9 الليل وبنتي اتعبت عطوني اكسجين وحولوني قيصري بابره الظهر لاني انا كنت ابيها

القيصري بدايته حيل صعبه من المشي والحركه بس نصيحه امشي امشي كثر مااتقدرين
واخذي المضاد والملين لانه موزين المساك للعمليه عزج الله
بالنسبه للاعشاب انا ماخذه ام خالد واخذهم واهي كاتبه على العلبه
انتي ماخذه من منووو؟

 

[فيلسوفة تتفلسف]

امورته صح الله يعينج الحليب يأذي صدرج ينتفخ والم وتحسين جسمج حراره ماتقدرين تقومين انا كنت اقول بتحمل وارضعه بس ماقدرت كافي الم العمليه تعبت وقطعته اذا مارضعتي يخف بس كل يوم غسلي بماي دافي والحبوب زينه اللي تنشف انا الحين صالي ١٤ يوم نشف ورد صدري طبيعي ارتحت وايد

مذهله شنو اخذتي من ادويه انا مااكلت ولا شي يقولون مو زين الا بعد عشرين يوم واحس خلاص بعد عشرين يوم ماله فايده

 

[فيلسوفة تتفلسف]

مافي تجمع حق اللي مسوين قيصريه ؟

 

[لؤلؤةالكويت]

امووووووورته

الحمدلله انه خف معاج عوار الصدر واجر وعافيه


بنات انا لي يومين احس بثقل بأرحامي ونغزات من تحت وجنبي اليسار يعورني

وظهري عوار وحراره صرت انسدح وارفع ارجولي بمخده ..

مره يخف ومره لا باجر الصبح قلت بروح لدكتورتي خوفتني مرت اخوي قالتلي يمكن نازله معاج المشيمه قلتلها انا ماينزل معاي شي تقول انا مثلج
باخر الرابع وماكان ينزل معاي شي وطلعت المشيمه نازله


الله يعين

 

[لوولوو_88]

الحمدلله اللذي بنعمته تتم الصالحات

ولدت اليوم الصبح و يبت أغلى ولد ربي يحفظه .. و قصتي قريب بنزلها ♡

الفال للباجي ربي يسهل عليكم

 

[لوولوو_88]

قائمة بجريات 2014 و 2015
♡---------------------♡




1- اهذريبك~ ( 14/10 )

2- مهابه ( 21/10 )

3- بدون بس مغتربه ( 24/10 )

4- ( BaRBya ( 26/10

5- طهر ( 27/10 )

6- الفوز الحلو ( 28/10 )

7- سكره ( 14/11 )

8- أم عبو_د ( 15/11 )

9- ام_حوريه ( 19/11 )

10- دآآآنه ( 28/11 )

11- ام احلى بيبي ( 7/12 )

12- ( 12/12 ) th7awe

13- ( 21th ( 14/12

14- مايو 95 ( 4/1 )

15- شوكة رنانة ( 7/1 )

16- maha26 ( 7/1 )

17- غزل ( 18/1 )

18- بنت الكويت 90 ( 30/1 )

19- زمرده ( 2/2 )

20- لؤلؤة الكويت ( 23/3 )
♥♥♥♥♥♥♥♥♥♥♥♥♥



الف مبروك ولادتي لوولوو_88 ههه الحمدالله على سلامتي و سلامة وليدي حبيبي و ربي يجعله من الذريه الصالحه ♡


الفال ل اهذريبك و مهابه و بدون و باربيا ربي يرزقهم الولاده الميسره و يا رب تهون عليهم و تقر عيونهم ابيبياتهم بصحه و عافيه يا رب ♡

 

[اهذريبك~]

لولو الف الف مبرووووووووووك و الحمد لله على سلامتج و يتربى بعزكم يارب

الله يستر انتم السابقون و نحن اللاحقون ههههههه

 

[بدون بس مغتربه]

الف الف مبروووك لووولووو ويتربى بعزكم ماجاكم والله تابعت معاج من بدايه حملج..
والحين صار رقمي الثالث معقوله مو مصدقه يارب سترك..

 

[لوولوو_88]

قصه ولادتي بوليدي حبيبي ربي يحفظه ..
تاريخ 30/9 .. مستشفى السلام .. دكتورة بادمسري ..

طبعا مثل ما تعرفون انا نزلت علي السدااده من تاريخ 19/9 و بآخر فحص لي كنت 2 سانتي .. و كنت فرحانة على أساس قربت الولاده بس مع الأسف ما كنت أحس بأي شي اللهم الثقل .. و طنشت الموضوع و مشت الأيام و كليت اناناس و كيوي و ببابايا و ماكو شي .. حاولت امشي هم ماكو شي .. لين يأست و قلت بخليها على الله .. في تاريخ 28 بديت اتعب ثقل على عوار بجسمي و ثقل براسي و بدت تنزل علي خيوط دم و إفرازات و هم طنشت .. لين تاريخ 29 انصحوني البنات اشرب كف مريم لاني فاتحة جزاهم الله خير و بعدها ياني عوار بظهري نفس المطرقة الي اون منه تقريبا 3 مرات أو 4 غير عوار الدوره بالبطن و نزل دم و يابلي طلوق و أنا صابره على نفسي على أساس لا يتعبثون فيني .. المهم رحت يومها أزور امي و شرحت لها العوار قالت طلوق قتلها ما عليه شي يحتمل قالت مو شرط و قامت تحن الوالده روحي المستشفى قلبي حاس انج فاتحة و تترجى فيني خل اطمن عليج ولا رديتها .. و فعلا رحت سبحت و تنظف و قبل لا اسبح و انتو بكرامه اشوف الدم مغرق الكير فري اول مره هالكثر اخترعت سبحان الله امي حاسة .. المهم و رحت المستشفى للطوارئ الساعه 12 و تسويلي سونار و تخطيط كل شي تمام و معاي طلق و فاتحة 3 سانتي .. و تقولي دخووول الله يا فرحتي شكبرها بفتك من الحمل و العذاب و الظيم .. و فعلا دخلوني الولاده و لبست لبس الميانين ههه و عطوني حقنة شرجيه المعفنا و بعدها ركببو البربيش الي اشوفه ارحم من الحقنة الشرجية الخايسه .. و بعدها ابتدى المشوار ..

و قعدت سوالف مع اختي العوده و ريلي يتناوبون علي و الطلوق دلع يهال و قلت للسستر ابي إبرة ظهر على الإتفاق و بعد الاستخارة .. طبعا مخلين الكمام يمي على ما يخلص التحليل كان وضعي تمام و شي اتحمله .. و تنطر لولو الفرج و تنطر وين الإبرة و فجأة ولا دكتور التخدير داق .. و تصيييييير الصاعقة

كلم اختي و قالها ما نقدر نعطيها إبرة ظهر لأنه لها سابقه جلطة و ممنوع عليها @@ .. و اختي تساحل فيه شالحل و الجلطة لها 8 سنين و اختي تشافت الي أهي انا و كان شي بسيط ما رضى ..

و ابلش انووووح و ابجي شلووووون بتحمل شلوووووووون .. و ينقطع قلبي من البجا .. و بلشنا جد و بدأ الطلق يزيد و بطو الماي و زاد العذاب و انا اشفط بهالكمام يدوخ بس أحس بكل شي .. و يروحون و يردون علي على الفحص زاد 4 بعدها 7 سانتي و ما قصرت الدكتوره يتني على 4 الفير تطمنت علي و تواسيني على الإبرة انه ليش ماراح أخذها و مشت .. و زاد الطلق يا بنات و بديت اهستر لأني حسيت بكل شي و اصرخ من قمة راسي و كل ما رد قلت يا رب يا مخلص النفس من النفس خلصني .. و اختي تبجي و امي بعدها تهديني و حطو الطلق الصناعي قمت افرفر يا بنات و أقولهم تكفون قيصري و الدكتوره المناوبه أتكلم ابرود ماله داعي يا حبيبتي دنتي 7 سانتي قتلها كيفي بفلوسي ابي قيصري هههههه فصلت عليها .. و اصرخ بمووووووت و يحطون الكمام و أقولهم مابيه يخنقني و ارد اون و أن زاد صرخت يا بنات اااخ شي لا يوصف اببدددددد .. و اشيل الاكسجين و أحاول أقوم لا شد العوار و أقول لأمي يما حسي فيني ما اقدر أتحمل والله لو ريلي يشوفني بهالحال يرضى قيصري تهلوس هههه .. طبعا على 8 سانتي يت دكتورتي و صبرت علي صبر شديد لاني بدعت بالصراخ و غيره و لين يا وقت طلعت الرأس و شلون لازم اسوي بوش وقت الطلق ربي نزل علي قوه طبعا حسيت بالمقص و حسيت بتفقص البطن و اسوي بوش مرتين و 3 و 4 و طلع ولدي حبيبي .. قطوووه على صدري و نمت و ردو نظفوه و بسته حبيبي و متنحه فيه اقول حبيبي حبيبي .. و نممممممنتتتتتت و قعدت و أقول الحمدلله قبل و بعد .. و مادري شلون استحملت ..

و أخيرا المستشفى روعه و اهتمام ما خلتني السستر و دكتورتي يتني قبل الولادة و حزت الولاده شي حلو فيها .. و سلامتكم

 

[مايو95]

حمدلله ع السلامه لولو ويتربى بعزكم يارب

 

[شوكة رنانه]

الحمدالله على سلامتج لوولوو واااي وانا اقرا بغيت ابجي .

مبروك وليدج يتربى بعزج ان شاءالله

الفال للبقية

Waiting,,,

 

[بنت الكويت90]

حمد الله على سلامتج لولو ومبروك الافي ويتربى بعزج وعز ابوه

 

[لؤلؤةالكويت]

الحمدلله على السلامه لوو لوو


وخطاااج السوووووووء والله يصلحلج ماجبتي .. اختي سؤال شنو معناة انفتحت السداده بالرحم مو فاهمتها


ياليت اي وحده تعرف معناها تفهمني

 

[ام عبو_د]

حمدلله ع السلامه لولو ويتربى بعزكم يارب

 

[سكرررة]

مبروووك لولو والف الحمدالله على سلامتج وسلامة بيبيج الحمدالله قرة عينكم بشوفته قصتج اثرت فيني حيل

والله يسهل علينا جميعاً انا الحين نهاية الاسبوع 33