طبيب بيطري كويتي

[عود ومسك]

عسى ما يامر عليك ظالم ماتقصر..دوامكم برمضان لي متى؟

 

[دكتور كويتي]

رد عود ومسك. دوامي برمضان يوم واطلع يومين الاربعاء دوامي .

 

[عود ومسك]

نفس الشي لي ال٧ والا يختلف برمضان؟

 

[دكتور كويتي]

من ٧ الصباح للساعه ٥ المغرب

 

[cramela]

ويه يعطيك العافيه يارب وعساك علي القوه شي حلوووو انك تعالج الحيوانات لانها كلها حلوه والتعامل معاها اسهل من الانسان وشكرا

 

[دكتور كويتي]

رد cramela . الله يعافيج يارب فعلا الطب البيطري حلوووو . بس بصراحه الشغله جدا صعبه التعامل مع الحيوانات خطر جدا لأسباب كثيره منها خطورة الحيوان مثل علاج الاسود / النمور / الضباع / الزراف / الفيل / وغيرها وغيرها . بالنسبه للطب البشري يتعامل مع انسان فقط ومع العلم متوفر جميع الأدوات . بالنسبه للطب البيطري اتعامل مع جميع الحيوانات والطيور والصفه التشريحيه تختلف بين جميع الحيوانات . وبالغالب يكون تشخيص الأمراض بالجو الخارجي يوم حر يوم مطر يوم غبار. ومع ذلك قلت الأدوات والمعدات . أشكر مرورك ويعطيج العافيه.

 

[Fairouz]

اخوي ان مفكره ادرس طب بيطري بس الي خايفه منه نفس ماقلت اني لما افحص حيوان يكون وحشي و يأذيني
فبغيت اعرف الدراسه صعبه ولا سهله لان نفس ما قلت كل حيوان يختلف عن الثاني
و يغيت اعرف المعاش يسوا ولا شويه و فيه اماكن زينه اشتغل فيها بحكم اني بنت
و هل الشغله متعبه و خطره
بشنو تنصحني الشغله زينه ولا لا ؟
و يعطيك الف عافيه ماقصرت

 

[دكتور كويتي]

رد فيروز . بالنسبه للطب البيطري الدراسه شوي صعبه خصوصا مواد التخصص. بس طبعا بالمتابعه والدراسه تتسهل ان شاء الله. بالنسبه لأنك بنت في أماكن حلوه واكثر راحه مثل بالصيدليه او دواجن او مختبرات او بالشغل الاداري . أما عن الراتب الحمدلله بدى يتحسن بالفتره الاخيره . شكلنا نقابه جديده وقاعده تتابع مع الديوان حتى يصل راتب الدكتور البيطري مثله مثل باقي الطب. يعني تقريبا بداية الراتب يوصل ١٣٠٠ . وعموما مهنتة الطب البيطري نادره بالكويت ولها مستقبل رائع .

 

[Fairouz]

مشكور اخوي ما قصرت

 

[دكتور كويتي]

رد فيروز . حياج الله . وأي سؤال حاضر

 

[يارضاها]

السلام عليكم

عندي غزال ابي انقله من مكان الي مكان ثاني
وصعب امسكه لانه يخاف وغير موالف
ومره حاولنا نمسكه ماقدرنا وخفت يتكسر
او يصاب بضرر لانه قام يضرب الشبك
وانا حاطته بمحميه كبيره
ماعندك الابره المخدره ؟اللي نفس المسدس ؟
اللي ارميه عن بعد ؟؟

 

[دكتور كويتي]

رد يارضاها . موجود تخدير بالنبدق . شنو نوع الغزال ؟ وين تحبين تنقلين الغزال

 

[عود ومسك]

السلام عليكم

القصه طويله بس مايخالف استحملني شوي :d
عندي غرفه فوق مالت قطاوتي عازله فيها النثايا وقطاوتي ماشاء الله اذكيه فا وحده منهم خفيفه ورشيقه طلعت ذاك اليوم من فتحة التكييف ونزلت من الدور الثالث ببراشوت لا تسألني شلون بس الموضوع يرجع لذكاءها وخفتها ورشاقتها وحجمها
طبعا اختها فرق شاسع بينهم بالحجم والوزن قامت سوت الظاهر نفس الشي
انا مو متأكده لاني لما دشيت الغرفه شفتها طلعت ومادري ردت دشت مره ثانيه والا لأ المهم ان ثاني يوم لقيتها بالحوش بعز الحر والغبار هالكلام ويا غبار امس وقبله
القطوه شكلها سوت نفس اختها
وضعها كأنها نطت وتعورت ..القطوه رجولها اوكي مافيهم شي بس ايدها لما امسكها تطلع صوت القرررررر صوت الخرير لما تكون مرتاحه بس ما تصرخ
طبعا انا ما مداني اوديها الطبيب لظروف خاصه جدا بس باجر بأذن الله بوديها فا ابي حل موقت يطمني الليله ان مافيها نزيف او كسر شلون اعرف؟
انا فتحت حلجها كان عليه رمل ويابس خفت ان نازل دم ومع الغبار يبس المكان وخشمها نفس الشي بس مسحته ونظفته وراح
وعيونها تسكرت ونزل منها وصخ ابيض وحطيتلها قطره وبعد 3 ساعات حطيت مرهم
بس انا بالنسبه لي عيونها عادي لان من اي غبره عيونها تحسس ساعه ساعتين وتروح
ووتطمنت لما شربت ماي وكلت بس كله منسدحه واذا مشت تمشي شوي وتقعد

.. لو القطاوه الشيرازيه يتحملون الحر والغبار والشمس انا قطاوتي ما يتحملون كللش لانهم من ينولدون ما يشوفون الحوش كله بالبيت وحتى الشمس من الدريشه
فا لو طلعو بالغلط بالحوش لو ربع ساعه يتعبون حيل من الغبار والحر لي درجه انهم يلهثون نفس الكلب ويقطون روحهم بالبراد جنهم مرضى او ميتين


الله يعينك على قصتي ويجزاك كل خير

 

[عود ومسك]

ايه ونسيت
انا جيكت على اذنها مافيها شي
حاطه في بالي لو لا سمح الله فيها نزيف ممكن ينزل من اذنها وخشمها وهالاماكن ومسكتها قلبتها ما صاحت معناته ضلوعها ما تكسرو ومافيهم شي بس مادري القطوه بيومين تغير وزنها!

 

[دكتور كويتي]

رد عود ومسك . ان شاء الله مافيها نزيف لأن القطوه ذكية من الصعب تنزل من الدور الثالث إلا إذا في شي يجبرها. ممكن يكون كسر باليد . الكسر يكون واضح بالنسبه للطبيب البيطري . بكل الحالات إذا عندج مضاد حيوي او مضاد التهاب ديكساميثازون . لين باجر . إذا تروحين باجر ارسلج على دكتور يفحصها.

 

[عود ومسك]

امبلا لان اختها نزلت ببراشوت والله جننتني بس اختها رشيقه وخفيفه اتوقع طارت ههههه
أو ممكن نزلت فوق سطح الدوانيه وعقب نزلت من الاول عالحوش
لكن هذي قطت روحها يمكن
والله ياريت واكون شاكرتلك ..انا ناويه اروح بأذن الله باجر وكنت بروح اليوم بس الوقت ضيق حيل وقالولي نفتح من 7 ونص لين ال10 ما يمديني احك راسي

 

[دكتور كويتي]

الحين ارسل بالخاص واقولج وين تروحين باجر

 

[عود ومسك]

اوكي بس اذا المشاركات ما تسمح بلغني ادزلك عشان تقدر ترد علي

 

[دكتور كويتي]

ارسلت بالخاص . زين قامت تسمح بالرسايل الخاصه

 

[دكتور كويتي]