عندج حكومـة شحقـة تروحين خـاص ؟

[المرتاحة]

الله يكافينا شرهم اثنينهم

انا وحدة اشتغلت بالمستشفى و شفت بعيني اللي يصير بمستشفياتنا

ووالله ما اثق لا بحكومة ولا بخاص ولا اثق بالدكاترة الا جم دكتور و ينعدون عالأصابع من كثر التخبيص و الجذب ما اصدق احد فيهم

اوكي اذا التحليل على جهاز اصدق التحليل لانه الجهاز ما يجذب ..اما استشاره من دكتور ما اثق و خصوصا اذا ناقشت الدكتور و حسيته يتهرب او يجاوبني اجابه مبهمه يا ساتر

.. و عسى الله يبعدنا عنهم قولوا امين

 

[أم حورية]

انا معاج بكل كلمة قلتيها

انا جربت 3 ولادات بالحكومة ولاااعت جبدي مع ان حق الحالات الخاصة اووووكي وييبون احسن الدكاترة والاختصاصيين اما الحالات العادية السستر اهي اللي تولد

والتحاليل ع قولتج الموجود بالحكومة وبنفس الوقت ليش اروح الخاص اسويه ؟

بس الصراحة في شي بيبط مرارتي وجبدي

لهدرجة وصل فينا الدلع اللي مالنا خلق ننطر ساعة ولا ساعتين ؟؟

عيل شلون نعلم عيالنا الصبر وشلون بنصبر ع امور اكبر اذا ماالنا خلق انطر

انا ما اتحجى عن المواعيد المتاخرة اتحجى عن النطرة بو ساعة وساعتين !!!!

المفروض الواحد يجرب تالي يروح المكان اللي يعجبه يم

يعني انا مثلا لاعت جبدي من ولادة الحكومة واخر شي رحت خاص

بس الصراااحة مراجعاتي وقت الحمال كانت بالحكومة وكان لاا يعلى عليه بس عيبهم بالتحاليل اللي كانت تضيع

بس دكاترة شطار واهتمام ونفسية حلوة واحيانا كنت اسوي سونار عندهم وكان احسن من الخاص بالف ممرة مع ان الخاص اوضح بس مرة رحت الهادي وبسرررعة بسرعة جنة احد لاحقها بس تبي تلحق عاللي وراي يعني مااامداني شفته عدل بس لما سويته بالمستوصف كانت تطول وتدقق وجاوبتني ع كل اسئلتي والحمال الاخير كنت واايد تعبانة و دكتورتي بالمستوصف الله يوفقها واايد اهتمت فيني ومع اني كل شوي رايحتلها بس ع طوول كانت مبتسمة ولا ملت ولا شي وهذا واهي بالحكومة

اما بالنسبة حق المستشفيات الخايسة مثل العدان والفروانية ماالومهم بصراحة صج الوضع كسيف عندهم

بس هم المفروض الواحد يعلم نفسه الصبر واروح الحكومة واجرب حظي واشوف الله شكاتبلي لان هالمواقف اهي اللي تعلمنا واذا ما عجبني اروح خاص

اما بالمسبة حق اللي تقول انها تفضل الجلدية بالخاص ترا بعض العيادات عشان تهتم بالجانب التجميلي ع قولتج تتجه حق الغلط عشان توريج انها تهتم بالتجميلي يعني مثلا عاااادي يعطونج كورتزون لمدة طويييلة او يعالجونج بفترة اقل بس تركيز الادوية اكثر

يعني مرة دكتورة جلدية بالخاص تسولف تقول يتني وحدة
تبي تعالج بشرتها مادوي شنو فيها وعطتها موعد ولما يت عالموعد جان تقولها انا ليش طولت ع ما تعالجت واعرف وحدة نفس حالتي بمدة قصييرة تعالجت قالتلها الدكتورة اذا تبين اقدر اسوي نفس هذيج الدكتورة بس جذي راح ارهق بشرتج واتعبها لان تركيز الكورتزون اكبر او شي حذي

فديرو بالكم لا يغركم الظاهر ترا وااايد عيادات هدفها الفلوس والربح وانج تتعالجين باقل وقت وما يهمها المضاعفات

 

[جِراحُ الغَرام]

شوفي انا تفكيري يقارب لتفكيرج ومخصله تعليقااات من الطرفين الطرف اللي يفضل الخاص والطرف اللي يفضل الحكومه شي غريب صح
في اشيا اروح الحكومة عااادي اذكر صار عندي مشكله جلديه مستوصف القرين الدكتورة شاطره وعرفت المشكله وتعالجت والحمدلله
الاسنان حكومه ومو لسبب بس لان زوجي هواللي يعالج اسناني هههههههه ويعرف الدكاتره الزينين
الحمل انا تاخرت بالحمل وبعطيج مثال ان مو مل خاص تمام ( وتراني حاطه قصة حمالي بقسم تاخر الحمل) راجعت دكتورة الله يسامحها سدت بويهي ابواب الامل تقول مع الانابيب نسبة حمالج ٣٠ مادري ٤٠ بالميه هذا اسلوب بالله ؟ الثانيه قالت خلي ايمانج بالله وماعليج عموما لما حملت كملت مراجعاتي كلها عند هابدكتورة والتحاليل لان عندها مختبر لان حملي كان متعب ما اطلع ويد بس حق الولاده انصحوني اللي يشتغلون بالخاص اذا ولدت قبل التاسع اروح الحكومة لان سعر الحضانات راح يطلع غالي بالليالي حق طفلين غير سعر الولاده والغرفه وهذا اللي صار ولدت بالحكومة بالثامن قيصريه قعدت ٥ ايام واليهال ١٠ ايام وطبعا اللي ساعدني ان حماي كلم الدكتورة اللي ولدتني لانها زميلته واخوي وصى صاحبه كان حزتها روتيشن بالولاده وما قصروا الدكتوره قالت لي ليش قيصريه لان اللي نازل اول مو قالب بعده والثاني كان يوصل الاخبار حق اهلي برا وعناية السسترات حلوه لاني قيصريه حتى الحمام تكرمون كانوا يمسكوني لان بعدي تعبانه وينطروني عند الباب اخلص ويطلعوني وصار عندي كحه وكنت اختنق لان يعور مع خياط القيصريه فكانوا بسرعه يعطوني ماي دافي والدوا لين يتأكدون اني صرت احسن عيب الحكومه مواعيد الزياره البايخه زوجي كان وده يقعد يسليني لان ملل بس ممنوع وماهمني الاكل وايد لان اكل منهم وامي ما تقصر باكل الولاده
ومره كان عندي عوار ذابحني حماي اخذ لي موعد عند دكتور جراح بمبارك وقال لي لازم سونار عشان يتأكد لان شاك بحصوات المراره وكان يوم اربعا يعني ما يمدي اسويه بالحكومة فرحت سويته بالخاص عشان اعطي الدكتور النتيجه بسرعه وصج طلع عندي حصوات وهالدكتور شاااطر اهوا سوا العمليه حقي زارتني وحده تقول ليش ما رحتي خاص ؟ انزين هذا جراح معروف ببلاش وانا قعدت ٥ ايام بالمستشفى لان سوا عملية المرارة وفتاق بالسره ماكنت ادري عنه مره وحده هذا غير ان ما طلعني الا بعد ما تأكد لان كان عندي الم مو طبيعي بعد العمليه
بس حق بناتي وديتهم مره حكومه وهم صغار كحتهم كانت تخرع بدعت الدكتوره كحه عاديه ووصفت دوا وما فاد رحت الخاص طلع عندهم التهاب بالشعب الهوائيه وعلى هذا ظليت سنه اراجع خاص محد عرف حق بنتي الا دكتور شمساه لما كان بدار الشفا قال حق زوجي تدري ان فيها ربو قلنا لا قال طول هالسنه تراجع محد قال لك ان فيها ربو وصج من خذت الكمام هدت كحتها وااايد الحين عمرها ٥ سنوات حاجتها للكمام قلت حييل الله يجزاه خير اهوا والدكتورة اللي قالت فيه علاج وقائي
اختي كانت بتولد بخاص وحطيت قصتها بس بهدلوها اخر شي زوجها قال ودوها الصباح بغوها من الله شالوا عنها الكمام وكل شي المسكينه ولدت بالاسعاف وجهاز اللي ينظف خشم الياهل ما اشتغل الا عند بال الصباح والياهل توفى
والحين انا حامل وماودي اقط مبالغ خياليه حق ولادة الخاص زوجي مو راضي عشان وقت الزيارة ياخذ راحته ما يطردونه
بالنهايه الحكومة اذا تعرفين احد يوصي عليج او تعرفين دكتور يقول لج منو الزين تمام غيره الله يعينج
والخاص حظ مره ومره وبالنهايه كل ينام عالجنب اللي يريحه

ادري سولفت وايد

 

[مشتطـه]

جراح الغرام
عسى الله يتمم عليج حملج يارب

وصاجه كل مكان فيه الشين والزين



ام حوووورية اي والله صاااجه شفتي الفسق شلوون
عشان النطة ساعه يقطون مبااالغ خياليه استغفر الله

 

[جيرازksa]

حبيبتي انا اعتبر الحكومي افضل من ناحيه العلاج ومافي استغلال

بس من ناحيه العنايه والاهتمام افضل الخاص

انا طول عمري اتعالج بالحكومي بس اخر مره انقرصت منهم تخيلي شهر مريضه بالدرن ومو عارفين يشخصوه يقولو سخونه سخونه

واول مارحت الخاص وشيكولي قالو درن رجعت الحكومه تقوم نفس الدكتوره تقول ايوة صح مانتهبت للاشعه تمام

الحكومه اروحلها للعلاج الطويل بس لو حاله طارئه اروح خاص

 

[مشتطـه]

جيراز

انا هذا اللي اقصده الشغلات العادية نسويها بالحكومة

والخطرة نروح الخاص مو مشكله

حياج الله

 

[كيكااا]

خوش موضوع بطلع الي بجبدي لأني صج كارها مستشفيات ومستوصفات الحكوما كذا موقف صار فيهم وصج كرهناه اول موقف زوج. أمي الله يرحمه راح مستوصف كان في ربو قام الدكتور وعطاه ابرتين بالغلط تخيلو توفى بطريج يم أمي ماكلف الدكتور نفسا يسال عندك ربو ولا لا ثاني شي بنت اختي لصغيرة كانت طالعتلها ورما قالها وديها هذا ورم خبيث يوم ودتها اختي مخترعه قالها الدكتور شفيه هذا شكو ورم هذا خاز باز مادري شسما و ثالث شي ولدي صدرا كان يطلع صوت وديتا العدان لعبو فيه لعب يخمطون فيه ويفقصون بريلا حييل عشان يحطون درب وهو ميت بجي زورق ويها عصبت قلت وين الدكتور ابي خروج يؤديه خاص لان كنا مسوين دخول تخيلو شقال بسرعا وديه الأكسجين قاعد يقل بمعنى ان راح يموت بدقايق تخيلو وضعي شلون ع أعصابي كنت ركضت في مستشفى لندن قلت حق الدكتورا كيت كيت قالي الدكتور ضحكت قالت شدعوى مافي شي لاتخافين مولدرجة ان مختنق بس صدرا تعبان ونتو بكرامة نازل البلغم ع صدرا ومطلع صوت صج كان أكشن يومها يعني صج من عقبها حطيت أكسااات ع الحكوما وللعلم أنا ع قد حالي بس الي شفتا من مستشفيات الحكوما خلاني اطق بريك *

 

[الجوهرا]

انا طهرت ولدي بخاص وكلفني اكثر من المبلغ اللي ذكرتيه وكنت بطهره بحكومي بس سوهها سالفه وقصيده قالو روحي لمستوصف اخذي موعد للمستشفى واذا عندج واسطه بيخلصون شغلج بسرعه انزين ماعندي واسطه شنو اسوي يعيني وولدي كبير لازم بنج كامل قلت حط فلوسك بالشمس واقعد بالظلال ولا هالعباله وسالفة التخطيط كنت رايحه اسوي بالحكومي ودكتور الطوارئ قلت له اني ابي اسوي تخطيط ولايقول والله اليوم انا موقف التخطيط مافي تعالي بعدين يعني وحدا تعبانه وحامل بالذمه شنو تسوين اكيد بتلاحقين روحج وتسوين بالخاص الحكومي ياقلبي اذا عندج واسطه تصيرين مدلعه عندهم الله يسلم فلوسج هي اللي تخدمج ولامنت اللي يسوى واللي مايسوى الحكومي للي يشتغلون فيه ولربعهم ومره صارلي موقف بالحكومي ورحت لمدير المستشفى اشتكي واقف مع ربعه لاتقولين حكومي الحكومي بعد المواقف اللي مريت فيها كرهتهم

 

[جلكسيه اس 3]

عاد من زين الحكومه
انا يوم ولدت بالخاص أشزينهم كافي العنايه و الاهتمام من تدخلين عندهم ليما اخر دقيقه بتطلعين من عندهم و اما بالحكومه حتى حمام تكرمون ثلاث مرات و انا انادي و طايحينله سوالف و طبعا الحمام بعيد لو قريب عادي اروح بروحي طبعا اخرتها رحت بروحي و هم نفس الشي وديت بنتي للحكومه عشان اشوف صحتها في التخصصي و طبعا الطبيب من كثر ما هاو شاطر قال ما فيها شي و من دون ما يسوي حتى فحوصااات !اما اذا في شي زين بالحكومه اكيد بروح عموما مشكوره يا صاحبة الموضوع

 

[( ~[ وتــين ]~ )]

اصلا معروف أطبة الحكومة أحسن من الخاص ..

الحين الناس قامت تقط الووفات عشان تحجز غرفة استقبال حق ولادتها

 

[روان المطيري]

اي والله صح السانج وفوق كل هذا تشوفين ريلها منتف مايلحق يدفع للقروض ولا للاجار ولا مصاريفها ومصاريف البيت
الله يكون بالعون ناس تدور لقمه عشان تعيش وناس تعيش عشان تجاكر وتقط فلوسها بالخرابيط

 

[كافي صمت]

الله يهديج ليش جذي اسلوبج مع البنات !
فظيعين / الظاهر ماقريتوا الموضوع ومدري ايششش !
شوي شوي

 

[سوزي الشرقية]

اني من مجربين الخاص والحكومي
المستشفيات الصراحة الحكومية ساعات عندهم امكانيات اكثر من المستشفيات الخاصة بس للأسف مافي كوادر كافية مدربة للعمل ومن جهة الأطباء المستشفيات الحكومية عندهم اطباء كفاءة ودرجة عالية حتى شهادتهم من افضل الجامعات بس هيبهم شنو مواعيدهم طويلة هذا اول شيء ينرفزني فيهم واذا جيتي تكلمي الموظفة من طرف خشمها تردعن نفسي جربت المستوصف الحكومي حق أسناني ياعالم اسناني يبي لها تنظيف اسبوع الجهاز مختربـ وباموت من الوجع ادفع دم قلبي المهم ارتاحـــــ والحوكمية يبي لها واسطة ولامايمشي الحالــــ...
متابعه الحمل حاليا اني بمستشفى خاص في الخبرافضل لي من الحكومي
بس الولادة ان شاءالله اخذ تحويله لمستشفى الولادة والأطفال بالدمام الحكومة فتحته جديد يلق من برا بس الله العالم من جوكيف؟؟؟