اللهم لك الحمد كما ينبغي لجلال وجهك عظيم سلطانك
:nbvppw:الحمدلله رب العالمين ولدت يوم الأربعاء الماضي تاريخ 7/7/2010 ويبت أحلى نورة بالكون وعسى الله يسهل على باجي البنات من تجمع مواليد شهر 7و8 وتفرحونا بالأخبار الطيبه يارب ويرزق كل محرومه الأمومه والحين اقولكم تفاصيل قصتي فرحتي بنورتي اللي تنفع فلم إثارة ورعب على كوميدي على كل شي وتره الفلم طويل يعني اللي عندها مشوار تخلصه وترجع تكمل الفلم او تخليه فلم السهره والحين نبدي
بسم الله الرحمن الرحيم
آنه كان بخاطري اولد بتاريخ7/7/2010 يعني على بو أنه تاريخ حلو وهم آنه مليت وتعبت من الثقل غير إني من آخر الثامن قايلين لي إن سداده الرحم نازله وإحتمال الولادة بأي وقت وكنت متهيئة من آخر الثامن دشيت التاسع مر أسبوع أسبوعين ماكو فايدة فأتفقت مع دكتوري إن يحط لي طلق صناعي وأولد وأفتك وقالي نسوي دخول يوم6/7 بالليل عشان مع الطق وانتي بجر يعني تلحقين على7/7 المهم سبحان الله يوم 5/7/2010 الساعه 10 ونص ياني طلق ذبحني وقمت ابجي منه وامي تقولي إذا ياج الطلق وقدرتي تنامين يعني مو ولادة كان المفروض اشرب شي يحرض مثل دارسين او خروع بس ياني رعب وقلت لأ مابي بس رحت غرفتي وخذيت معاي دولكه ماي وكنت ساحبه من النت آيات تسهيل الولاده قريتهم على الماي وشربته ومسحت فيه على بطني قلت إذا ولاده الله يسهلها إذا مو ولاده خلاص بيروح العوار وسبحان الله استمر ساعتين او ثلاث تالي راح وقدرت انام
صبحت على6/7 وآنه مستخيره ومهونه لأني خفت من الطلق والولادة ورحت الساعه 5 مراجعه عاديه حق مستشفى دار الشفاء حق دكتور مصطفى تومسو وقلت له إني استخرت وخفت من الولادة وقلت له على العوار اللي امس قال دام في عوار يجي ولادة قبل انتي موعد قلت اوكي الله يسهل وفحص قالي الرحم لي الحين مفتوح1.5 سم ماكو ولادة وللعلم آنه اول اسبوع من التاسع فتح الرحم 1.5سم ووقف مافتح اكثر وطبعا ماخليت مشي ولادارسين ولاخروع إلا خذيته وموقف 1.5سم المهم قلت له خلاص مابي اولد 7/7 وخل الأمر بإيد الله سبحانه متى ماربي كتب تطلع بتطلع
رجعت بيت أهلي لأن زوجي يومها كان عنده زام بالليل وقطني عند امي كانت كل الأمور طبيعيه وكانت في زواره في بيت أهلي وولد اختي بعد نام عندنا عمره17سنه وكل شي تمام و طلعوا أهلي كلهم بقيت آنه وامي وولد أختي الكبير
لين الساعه10.30 بديت احس بعوار الطلق إيي ويروح إيي ويروح وآنه اقول لا ماكو شي نفس امس خلني اتعوذ من ابليس والعوار موجود 11.30 حطينا العشا آنه وولد اختي أبي اتعشى ماني قادره آكل لقمه واييني العوار المهم ولد اختي خلص وآنه مااااقدرت اخلص والعوار يزيد ويزيد وآنه عند امي جان تدق على زوجي وقالت له إن فيني عوار موراضي يفج وخايفه ان ولاده تعال بسرعه ومسكين بسرعه طلع من دوامه وياني آنه خلال هالفتره دقيت على دكتوري تومسو وقلت له السالفه جان يقول روحي الطواري خلي يسوي فحص إذا الرحم فاتح اكثر سوي دخول قلت اوكي طبعا اكلم الدكتور وماني قادره آخذ نسمي وصج رحنا كلنا آنه وزوجي وامي وولد اختي الطبيب وصلنا الطواري وتيي الدكتوره جان تقول 4سم دخول الحين وياخذوني مشي لي الولادة لأن احسن وطلبت غرفه خاصه عشان اهلي يكونون معاي وإهني يبدي الجزء الثاني من الفلم
دخلت الولادة الساعه 2 الفير وكانت السستر أسمها عايدة مصريه شنو حلييييوه وتذكر الله وتسمي وكل ماتبي تسوي شي تقولي تره بسوي جذي وجذي وآنه اقول اوكي
اول شي قالت لي بنحط لج الحقنة الشرجيه بعد مالبست لبس العمليات الأخضر وقطيت هدومي
حطت لي الحقنة الشرجية يعني 10 دقايق ولا آنه عزكم الله الحمام مره مرتين تالي قالولي خلاص قعدي وركبولي الدرب وبربيش لأن خلاص ماراح اقدر اروح الحمام بعد
وعطوني تالي إبرة تطري الرحم وإبرة ثانيه عشان تنظم الطلق لأن طلقاتي مومنتظمة حده عاااالية ووحده ميته وقالوا موزين على الرحم ونظمولي الطلق وفحصتني السستر قالت لي مو 4 سم تقريبا 2ونص إهني اول احباط وقعدت انطر من ال2 لين6 طبعا السستر كان ودها تقعد معاي وكانت تقولي شدي حيلج عشان تقولين قبل لا ينتهي دوامي ودوامها ينتهي 7 صارت 6 ودق الدكتور واسمعها تقوله هذا مو أسلوبك دكتور خلاص اوكي اوكي شوي جان تقولي شكلج مطولة وشكلي ماراح ألحق عليج وقالت لي الدكتور يوصل 8ونص دوامه يبدي قلت لها فرصه سعيده حبيبتي وقالت لي الدكتور قال
ولا اقولكم خلني اروح لبنيتي الحين وأشوف إذا قصتي عجبتكم أكملكم تو النااااس والقصة لي الحين في بدايتها وإن شاء الله ارد لكم تالي
