مايصير .. طيب الإنسانة اللي في مكتب الاستعلامات عطتنا الوقت على أي أساس ؟؟!
رنينا الجرس ولا أحد فتح للأسف .. يا حسافة كان ودنا نسلم ونقوم بالواجب دام اننا وصلنا المحل ^_^
جينا بنمشي .. بس لقينا
يا لبى الرياض
وأهل الرياض
ومن كتب إسم الرياض بهالمكان .. مشينا بس نشوف وين تودينا هاللوحة ..
بعد 300 متر .. ولو هي 300 كيلو بنمشي الله لا يقطعنا من شر ..
ووصلنا قصر الأمير سلمان ..
اللي نفس الحكاية ما كان فيه أحد .. بعد حنا الغلطانين مفروض متصلين نعلمهم اننا بنجي اجل فيه احد يطب على الناس هالايام بدون اتصال .. ^_^
حطينا ورقة مكتوب فيها (حضرنا ولم نجدكم) <<<<<< وش دراك انها نصبة قال من كبرها
وعدنا أدراجنا من جديد ..
ودعنا المسجد بعد ما شنفنا أسماعنا بسماع أذان المغرب ..
و رحنا ندور محطة الباص حتى نرجع بعد هذا اليوم الطويل المتعب ..
لكن ..
باقي مشكلة صغيرة .. ان ما معنا قروش للباص .. جلسنا ندور مكان نصرف فيه .. بس المنطقة اللي احنا فيها كلها قصور ونوادي وشارع هاي وي مافيه محلات صاحية ..
محل حاط لوحته بالعربي .. كان ودي أعرف وش يبيع بس كل ما مريناه لقيناه مسكر ..
لقينا مطعم أنيق محترم .. قلنا بنتقهوى ونصرف خمسين .. بس اعتذروا لأن المقهى مقفل والمطعم محجوز اليوم لحفلة خاصة بالتالي ما يستقبلون زباين .. قلنا لكم الحظ متزاعل معنا ..
جلسنا ندور وندور وندور ..
وأظلمت الدنيا واحنا نمشي على غير هدى ..
حتى وصلنا محطة بنزين فيها بقالة .. اشترينا اغراض نقنقة وصرفنا الخمسين أخيراً ..
سألنا عن أقرب محطة فيها باص يوصل لملقا .. قال عندكم المحطة الفلانية يمر فيها باص رقم مدري كم هذا يودي للمحطة الرئيسية .. بس عساه للحين يمر وما انتهت جولته .. يا سلام على هيك خبرية ..
انتظرنا بالنقطة حتى شرّف الباص الحمدلله ..
ووصلنا للمحطة الرئيسية على الساعة 9:30 .. واحنا نقول على الله نلقى باص بيرجع لملقا ..
لقينا باقي باصين .. واحد يمشي الساعة 10:30 ... والثاني 11:15 أظن ..
يعني كان بإمكاننا نرجع نتمشى في البلد ونرجع بعد ساعتين نلحق الباص الثاني .. بس
مافينا حيل نتمرمط زيادة .. قررنا نرجع في اللي بعد ساعة ..
وانلطعنا في المحطة اللي كانت قهوته مسكره من زين الطبايع ..
وكان الباص موب مباشر لملقا .. يرجع من طريق بين المدن بحيث ينزل ركاب كل مدينة ..
استمتعت فيه مع انه ياخذ وقت أطول .. لكنه كان يتمشى داخل المدن اللي ما شفناها .. توروميلونوس و بينالمدينه وغيرها ..
مدن جميلة ومزينة بالنوافير والتماثيل الجميلة في كل ميدان ..
للأسف الصور كلها مو واضحة ليلية والباص يتحرك فـ ولا وحدة كانت مفيدة ..
وصلنا ملقا تقريبا الساعة 12 إلا ربع .. وكل المطاعم مقفلة بالسوق يالله يالله لقينا مطعم إيطالي فاتح اسمه Grupo vips وطلبنا ساندوتشات ديك رومي ..
كان الأكل لذيذ بس ماصورته لأننا أخذناه تيك اوي وصار شكله ما يغري للتصوير
لما وصلت الغرفة .. وجميع عضلاتي متفككة .. اكتشفت انه طلعت لي برجولي خراااايط دموية عجيبة غريبة من المشي!
كنت أسمع بالدوالي .. بس الحين صارت علم مو حلم .. الله يالدنيا قد ايش انتي قاسية وماعندك ذوق ..
* خلاصة الحلقة السابعة *
- الله يرحم والدينكم استأجروا سيارة للتنقل في جنوب أسبانيا
- جيبوا معاكم كريم فولتارين للعضلاااات .. وحبوب بروفين كلوها بالليل بعد المشاوير الشاقة وتصحون الصبح إن شاء الله بدون ألم ومشاكل ..
- ضروري يكون معاكم قروش كفاية للتنقل بين الباصات .. في حال ماهداكم الله واستأجرتوا سيارة يعني ..
- إذا كنتوا عارفين ان فيه باص بيوديكم مباشرة لمكان تدرون انه في مقطعة ومنطقة بعيدة .. روحوا فيه حتى لو كان بيمشي قبل تطلع الشمس ..
- مكاتب المعلومات أحياناً صدق ماعندها سالفة ..
- اتصلوا على الناس قبل تضربون مشوار تزورونهم ^_^
الحلقة الجاية .. مفروض نروح غرناطة ونزور قصر الحمراء .. يا ترى نلحق والا ما نلحق ؟
البارح نمنا مرتاحين بعد إجهاد المشي .. دارين ان ماورانا قومة .. الباص بيتحرك الساعة 12 ومكبرين الوسادة ..
بس الغريب اننا صحينا قبل 10 ونص .. يعني اذا صار عندنا شي مهم ونبي نصحى ما فيه أمل نصحى بالراحة .. واذا صار معانا وقت .. صحينا بدري .. .. صحيح ان الدنيا معكوسة .. تزرع قرع ويطلع كوسة <<<<< لا وتألف أمثال بعد
بعدها رحنا نقضي الوقت في إلكورت إنجليس .. حتى موعد الرحلة ..
شركة Alsa هي اللي بتودينا لغرناطة .. ملينا من باصات بورتيا التعبانة هاللي تحمل الركاب كل خمس دقايق ..
ويمكن الحجز وشراء التذاكر عن طريق محطات الباصات الرئيسية .. أو من خلال موقعهم https://www.alsa.es/portal/site/Alsa/
سعر التذكرة للشخص حوالي 20 يورو ذهاب وعودة في نفس اليوم ..
الطريق إلى غرناطة
شجرة شكلها غريب .. الظاهر مجمعين الأشجار الغريبة بهالإشارة أمس صورت الناحية اليمين واليوم أصور الناحية اليسار حيث جلست
والجبال الخضراء بأشجار الزيتون المصفوفة تحيط بنا على مدى النظر
هذي مزرعتنا على طريق غرناطة .. صغيرة بس تمشي الحال
وهذي غرفة الحارس ^_^
لا وحاطين مرشات مويه بعد .. ما كفاهم هالمطر المستمر يبون أكثر ..
الباص شكله يمشي 100 كيلو بالساعة .. بطيء واخذ المشوار تقريبا ساعتين إلا شوي ..
برضو شغالين في المترو بغرناطة .. متى يجي اليوم اللي نشوف فيه حفريات مترو عندنا .. على ان لهم خمس سنين في نفق تقاطع شارع الملك فهد وشارع الملك عبدالله ولا بعد خلص .. بس ما على الله بعيد .. ^_^
لقينا مركز معلومات بالمحطة .. سألناهم عن قصر الحمراء إذا فيه باص يودي هناك مباشرة قالوا لا .. جابت لي الخريطة وبدت تشخبط عليها .. إحنا هنا .. وعليك تاخذين الباص رقم مدري كم يوديك لوسط المدينة عند الكنيسة الكبيرة .. ومن هناك تركبين الباص رقم مدري كم برضو اللي يوديك للبتاع اللي تبينه ..
استغربت ان مافيه باص مباشر من المحطة .. نظراً لأنه مزار مهم ومفروض فيه خدمات نقل مباشرة ..
قالت إذا تبين الخريطة تراها بيورو .. قلت خليها لك مشكورة منب ساكنة هنا كلها هالمشوار وراجعة أحسن من قالها تتلقف وتشخبط عليها ..
ركبنا الباص وأذينا المخاليق ما بقى احد ما سألناه كم باقي على الكنيسة الكبيرة هههههههه وبالإشارة وحدة تعد على أصابعها تعلمنا كم بقى من محطة ماشالله حافظة المحطات كلها وكم باقي على أي وحدة فيها ووحدة قالت تراني بنزل هناك انزلوا معي .. قلنا تم ..
رقدنا وآمنا .. وجلسنا نتفرج على الشوارع الحلوة ..
بنك أسبانيا .. وقهروني اللي مشخبطين على جداره بهالشكل الغير حضاري
حبيتها .. فيها لوحة الكترونية تبيّن التاريخ والوقت وارقام الباصات اللي تمر بهالمكان .. وكم باقي عليها وتوصل .. يعني أحلى من كذا مافيه ..
وحبيت أعمدة النور شكلها أنيق ..
ركبنا الباص المقصود .. وكان زحمة غير طبيعية .. كنا واقفين وبرضو لازال يوقف عند المحطات ويركب الناس ! الله يحلل بورتيا أجل
بدت تمطر واحنا بالباص .. وكل ماله المطر يزيد ويشتد .. لما وصلنا القصر بعد ما أخذ مشوارنا كله من ركبنا الباص الأول تقريبا ً ساعة إلا شوي .. كانوا الناس لابسين أكياس المطر اللي مدري منين جابوها ..
واحنا .. نسينا نجيب معنا المظلات .. هاهاها
هذا باص بيركب الناس اللي خلصت زيارتهم .. بس باصنا ماكان أحمر ولا مكتوب عليه الحمراء .. مدري هذولي منين جايبين ..
تذاكر الدخول للقصر والحديقة .. وموضح فيها أوقات الزيارة للحديقة ( 2:20 ) وللقصر ( 7 ) ..
رحنا ندور مكان نحتمي فيه لين يخف المطر .. قلنا ننزل في القلعة اللي قدامنا ما ندري وين تودي .. بس فيها أشجار كبيره على جنب وتظلل شوي ..
ايـــــه يا الأندلس .. لكل شيءٍ إذا ما تم نقصان ****** فلا يغر بطيب العيش إنسانُ * أبو البقاء الرندي
والعصافير مبسوووووووووووطة آخر بسطة .. ما تنلام أنا لو كنت عصفور ما أعيش إلا هنا في هالخير والنعمة .. وحتى في موسم الهجرة أجمع لي أكل يكفيني اربع شهور وأتلحف زين وأجلس مكاني ما حدني الله اهاجر وينقطع أثري اذا مريت فوق الخليج ^_^
نوافير القصر
ونوافذه
عجزنا نفك الخط .. بس انه شي كويس
النقش على القبة الخشبية .. والسقوف
مشهد علوي لساحة القصر
وهنا سلالم الماء .. وأعتقد أن فكرتها تقوم على الحفاظ على برودة الماء من خلال القنوات الفخارية مكان الدرابزين هذي ..
زوجي شرب منها قال هذي أصفى وأطعم من المويه المعدنية .. لو معنا غلاية صلحنا بها أطلق شاهي .. ^_^
بس يبي لنا غلاية تشتغل على البطارية أضمن أخاف ما نلقى فيش كهرب ولو لقينا يمكن يصير ثلاثي وغلايتنا فيشها ثنائي ونبتلش ندور محول ^_^ <------ وحده كذبت الكذبة وصدقتها
شوفوا الأناقة
هالجمال يغطي سقف المبنى اللي تحته ..
وظلينا ندور بين الأشجار والنوافير .. حتى وصلنا منطقة مكتوب عليها ساليدا .. يعني المخرج .. قلنا هل هذا المخرج من الحديقة كلها .. والا مخرج قصر جنة العريف ..؟ بس درعمنا فيه
وقابلنا اثنين أوروبيين ضايعين نفس الحالة .. قلنا لهم تتوقعون هذا المخرج من الحديقة ؟ قال الزوج ( I wish so) قلت شكله طفشان من الفجر هنا يدور الفكة ^_^ .. بس نبهني لشغلة .. شلون يعني ياليت ؟؟
يعني الجماعة لهم ساعة يدورون على المخرج وللحين ما لقوه ... يعني يا حلوين انتبهوا للوقت اذا جيتوا بتطلعون من القصر .. ترى الناس ما تعرف وين المخرج من كبر المكان .. وانتو موعد دخولكم القصر 7 .. والباص بيرجع ملقا 8 !! ... هاهاهاها
لما حجزت الرحلة كان فيه رحلة ثانية للعودة بعد الساعة 10 .. وأنا حاطة بالاعتبار اننا لازم نرجع بوقت معقول حتى نجهز الشنط للسفر بكره .. فإذا رجعنا 8 بنوصل 10 وعلى ما نتعشى ونجهز الشنط تكون الساعة 12 وننام .. ما توقعت ان القصر مرافقه بعيدة بهالطريقة ..
لكن يكون خير إن شاء الله .. ونحاول نستعجل في جولة قصر الحمراء .. والرجعة لمحطة الباصات الرئيسية بنرجع بالتكسي أسرع طبعاً .. مستحيل نلحق الرحلة لو تنقلنا بالباصات ..
المهم .. مشينا من هالممر الطويل .. ولما وصلنا آخره صار المخرج من قصر جنة العريف بس .. ولسه تمشي لوسط المكان وتلقى لوحات تدلك وين تتجه ..
جنة العريف من هنا ------------>
<----------- ومن هنا
قصر بني نصر .. وهو المقصود بقصر الحمراء ..
وقلعة القصبة ..
وقصر كارلوس الخامس ..
وها نحن متجهين للقلعة اللي كنا نحتمي تحت جسورها من المطر أول ما وصلنا
والناس مالقوا يكتبون ذكرياتهم إلا على الشجر
ما تسمع الا خرير الماء تجري في قنواته على جانبي الطريق .. وين مارحت
رقينا الدرج حق القلعة ..
حتى نطل على هذا المنظر ..
امممم .. لازال فيه مستوى أعلى .. ومنظر أحلى من فوق أكيد ..
عند الأعلام فوق .. أعتقد أنهم كانوا مخلينه مكان الحراسة والمراقبة أول ..
طالعة طالعة يعني طلعت درج المتحف المقفل ما أطلع هالدرج المفتوح ..
الله ياهو أثري ..
مبني تقريبا في القرن الثاني عشر ميلادي ..
وصلنا ..
أنا الآن على إرتفاع أكثر من 700 متر عن سطح الأرض ..
واضح اختلاف مستويات القلعة في الصورة ..
غرناطة .. ياسفابك على هالصلبان بس ..
لقطة خلال فتحة في جدار الدرج الأثري ..
فن التنسيق ..
الحين كم باقي على موعد زيارة القصر ..؟ تونا الساعة 5 ونص .. يا طول الوقت اليوم ..
رحنا نسأل عن الصلاة إذا فيه مسجد .. دخلنا محل بيع تذكارات وفزع معنا الأجودي اللي فيه .. قام يوصف لنا مسجد يقول تاخذون باص مدري وين ويوديكم من الشارع اللي مدري وين .. قلنا وين ياخي تبي تطلعنا وترجعنا .. مافيه مكان نصلي فيه هنا ؟ قال لا آسف .. قلنا ما قصرت بس علمنا وين الشمال فيه
وصلينا في منطقة جنب باب مغلق .. الله يالدنيا صرنا نتصدد حتى نصلي في مكان كان الإسلام هو الحاكم فيه ..
بعدين جلسنا ندور شي نسويه .. ما بقى مكان ما رحنا له حتى كنيسة كارلوس دخلناها من الفضاوة
.. من جد يا طول هالنهار .. كل ما طالعت الساعة أحس العقارب ترجع ورا .. تونا الساعة 6 .. ونشوف العالم تمسك سرا على مدخل قصر الحمرا .. واحنا جالسين ..
قال زوجي في وحدة من أفكاره الجهنمية .. امشي نمسك سرا معهم .. وش خسرانين يمكن تمر عليهم وندخل قبل الوقت ..؟؟
طالعت فيه قلت يابن الحلال أي نلعب عليهم تحسب اننا في ديرتك إستهبل والا معك واسطة بتمشي أمورك ^_^ هنا مافيه الا نظام .. والوقت مكتوب على التذكره ما كتبوه عبث .. وأعرف انهم صارمين في مسألة الالتزام بموعد الزيارة للقصر ..
قال يابنت الحلال قاعدين قاعدين يا في السرا يا على الكرسي .. تعالي نجرب ^_^
قلت يالله .. بس تفضل انت التذاكر ما عندي نية أتفشل ويرجعوننا لأول الطابور عشاننا بنتذاكى عليهم ..
قلنا بسم الله ودخلنا في الطابور الساعه 6 .. و لما وصلنا الموظفة اللي تشيك التذاكر في بداية الطابور زوجي غطا على موعد الزيارة باصبعه ووراها تاريخ التذكره ..
وقالت يس تفضلوا ^_^
ولا حد يحاكي زوجي من فرحته بإنتصاره العظيم .. شايفه شلون وش خسرنا يوم جربنا .. هذاها مشت عليهم وانتي تقولين لي نظام وكلام فاضي .. وسعي صدرك بس واستعبطي وتمشي أمورك ..
قلت طيب يابو أفكار جهنمية ورنا كيف بتمشي العباطة على الجهاز اللي عند المدخل .. هاهاها
جهاز عند البوابة الالكترونية يقرا الباركود حق التذكره ويفتح البوابة اذا كان الوقت والتاريخ صحيح .. هاهاهااااا
قالي انتي بس لا تبيّـنين انك مسويه شي غلط اذا ما دخلتنا قولي لها ان ورانا سفر وودنا ندخل كلها ساعة قبل موعدنا وش فرقت ههههه ياربيه عليك يازوجي هذي تشتغل بقصر الحمراء موب الرعاية الاجتماعية ! فاضية تسمع وتتعاطف مع حالات الناس خلاص النظام نظام مفروض على الجميع ..
لا وأحلى شي في العالم الثقة ..
الناس كلها تحط ورقتها وتدخل .. ولما جا دوره حط الورقة وصفر الجهاز طلع عليه Error الوقت غلط .. ولا انفتحت البوابة طبعاً .. والموظفة مستغربة تطالع ليش ما انفتحت .. وزوجي الواثق من نفسه يطالع فيها ويأشر على الجهاز انه خربان ههههههه
رجعنا لأول الطابور وسألناهم .. انتو متى موعدكم ؟ قالوا 6:30 ..... والساعة كانت اولردي ستة ونص .. يعني على بال ما يدخلون بتصير الساعة أكثر من الموعد بربع ساعة ياحظي .. يعني متى ان شاء الله بيمدينا ندخل؟
مسكنا سرا حق الساعة 7 جنبهم .. ولما طال السرا وأعقنا الحركة قال لنا الموظف روحوا ارتاحوا على جنب وكل واحد يلتزم بمكانه .. جو بعدين ناس خشوا عرض ووقفوا قبل العالم اللي واقفة .. وقام عليهم شايب أسباني لعن سلسفيلهم ماخلا فيهم مغز إبره ما سبه .. وهم يا جبل ما تهزك ريح .. فيه ناس بجيحة ما همها أحد لا بالنظام ولا بالشرشحة بعد ..
المهم .. أخيراً بدا السرا يمشي ودخلنا القصر الساعة 7 وعشر دقايق .. ياربي يمدي والا ما يمدي ؟؟؟
قررنا اننا نتفرج عليه بأسرع ما يمكن .. وحاولت قدر الإمكان أني أقلص الوقت اللي أقضيه في سنترة التصوير من عشر دقايق لثانيتين لكل صورة ^_^
طبعاً التصوير بدون فلاش .. ونبـّهوا الناس إذا كان معهم شنط خلفية على الظهر يديرونها لقدام حتى ما يخبطون شي بالغلط ..
الشكوى لله ما طلعت الصورة حلوة .. العتب على السنترة
وهنا شغل ترميم وحفريات مترو <<<<<< كنها قوية صح؟
ياحلو الأسقف (الظاهر هي أكثر شي صورته)
زوجي يطالع الساعة .. صارت 7:25 دقيقة .. يالله مشينا
واحنا طالعين لقينا قاعة الأسود بالقصر .. دخلناها يااااه .. مكان يحتاج وقت أكثر .. فيه معلومات و القصائد المكتوبة على الجدران في شاشات عرض بلغات متعددة ومنها العربية .. وممنوع التصوير فيها لكن هذي صورة من النت للنافورة قبل ما يشيلون النافورة ويبقون على الأسود لحالها ..
وصلنا وعيونا تدور التكسي اللي على طول قلنا له ودنا لمحطة الباصات الرئيسية .. ما يعرف انجلش الشيخ .. بس ان شاء الله انه فهم ..
كانت الساعة 8 إلا ثلث تقريباً ..!! ياربيه
يمدي والا ما يمدي ؟؟؟
المهم اننا ركبناه وخلاص .. خلنا نستمتع بالطريق موب نصير لا لقينا ذا ولا ذا ..
ايه هذي الشخبطة صح .. وبالعربي بعد الله يكبر في واجبكم ..
وراعي هالتكسي يتمرمر بين الشوارع الضيقة قهرنا .. ودنا نقول له ترانا مستعجلين رح من اسرع طريق بس ما يفهم لغتنا .. مالنا الا نسكت والله كريم ..
ولاحت لنا المحطة الجميلة
ومجهزين له العشرة قبل يثبت العداد خل الباقي معك بس عسى باصنا ما بعد مشى
الساعة 8 إلا دقيقتين .. والحمدلله لقيناه واقف ينتظرنا ..
وتنفسنا الصعداء ..
باي باي غرناطة .. ومجدنا التليد ..
رجعنا الاوتيل نرتب أغراضنا ونستعد للعودة إلى برشلونة غداً الساعة العاشرة وخمس دقائق .. ياترى وش حصل لنا هناك ..؟
هذا ما ستعرفونه في الحلقة القادمة إن شاء الله ..
* خلاصة الحلقة الثامنة * - اللي يجي الأندلس وما يزور قصر الحمراء .. ما شاف الأندلس ..
- أتصور ان غرناطة فيها مزارات أكثر من القصر .. تستحق المبيت فيها وجوها رائع ..
- إذا كنتوا جايين بالباص .. حاولوا قدر الإمكان يكون بين موعد رحلتكم وموعد القصر ساعتين حتى تلحقون تتمشون في القصر وترجعون بالراحة ..
- برضو أكرر يا زين استئجار السيارة في جنوب أسبانيا .. ولا تستعجل على اعصابك كنك ملحوق ..
- إلتزامك بالنظام دليل تحضرك ورقيك ويحفظ ماء وجهك ^_^
ليلة البارح وكالعادة قبل ما أنام .. شيكت موقع رنفي وعرفت ان القطار بيمشي الساعة 8 ونص .. وكل نصف ساعة يجي القطار ..
صحينا 7:30 .. في الوقت المتفق عليه ولله الحمد ..
آخر صورة للمنظر المطلة عليه الغرفة .. والوقت لازال مظلم ..
لبسنا وصلينا وجهزنا الشنط والأغراض .. ونزلنا نفطر الساعة 8 ..
مابين أخذ وعطا .. وبيض وكراوسون .. وقهوة وشاهي .. صارت الساعة 8 وربع ونبهت زوجي للوقت حتى يستعجل ..
على ما طلعنا الغرفة .. على ما .. على ما .. لا وبغيت أنسى جوالي بالشاحن من العجلة .. نزلنا للرسبشن ..
سوينا شك اوت وموظف الرسبشن فاضي يسولف عسى الاوتيل عجبكم ووش اقتراحاتكم ووش تبون وش ما تبون .. نبي نلحق القطار الله لا يهينك فمان الله ..
وطيراااااان نروح المحطة .. واللحظة اللي كنا عند الشباك بنشتري التذاكر .. سمعنا صوت قطار ماشي بالسكة تحت
قلنا عسى موب هذا قطارنا بس..
وبالفعل .. كان هو قطارنا ..
بيننا وبينه ثلاث دقايق بس ..
ياقلبي لا تحزن ..
قلنا نسألها هل يمدي نلحق على الطيارة .. والا ناخذ تكسي ؟
قعدنا .. وأنا كني جالسة على جمر ماني مرتاحة وهالنص ساعة انتظار كنا نقدر نقضيها بالمطار لو بكرنا ثلاث دقايق بس ..
و زوجي يهدّيني يابنت الحلال تو الناس والرحلة 10 وخمس .. والمطار قريب ربع ساعة واحنا واصلين .. قلت الله كريم ..
محطة زيمبرانو وحضرة القطار الأثير
وداعية .. يا آخر لطعة تجمعنا .. ^_^
.
.
وصلنا المطار الساعة 9 وربع ..
ومحطة القطار برا المطار يبي لها مشي حبتين .. واحنا نسابق الوقت بالشناط حتى نروح للصالة الخاصة برحلات رايان اير .. في T1 ..
ونسرع الخطا .. ونسرع .. ونسرع ....... والصالة الله ياخذها في أبعد مكان من المطار ..
تتذكرون سالفتنا في رحلة البحث عن الشناط اول ما وصلنا المدينة .. كيف كنا رايحين جايين على المكتب حقهم .. هذا احنا نعيد المشاوير ونرجع لمكتبهم اللي في آخر الدنيا ..
نتشوّف لمكتبهم ..
وصلناه أخيراً .. ونمسك السرا حتى جا دورنا ..
شيّك الجوازات .. وختم البوردنق السياحي اللي خبركم .. وسألنا إذا معنا شنط والا لا ..
قلنا هذا الشنط الله لا يعميك وش كبرها ما تشوف ..
قال اهااااا أجل يبي لكم تركضون تلحقون على كاونتر العفش لأنهم مفروض يسكرون امممم .. وطالع ساعته .. الحين ..
ياسلاااااااااااااااام عليك ياسلام
ونطمر ندور بين اللاينات حقت العفش .. ندور رحلة رايان اير المتجهه لبرشلونة ..
وين وين وين ..
ماشفنا أي شي يدل على هذي الرحلة
سألنا الموظفين .. قالوا بح .. خلاص سكرنا .. !!
لا بليز ........ يعني ايش طيب سكرتوا ؟؟
قالوا يعني اذا شناطكم كبيره تجلس هنا الله لايهينها وانتوا سافروا بدونها
.. هذا لو أمداكم ولحقتوا على بوابة الطيارة قبل ما تتقفل هي بعد !!
وش هالخنبقة ؟ شلون يعني نسافر ونخليها !!
الا رجلنا على رجلها ما نتحرك بدونها !
والدبرة الحين شلون ؟!
رجعنا لصاحبنا راعي المكتب لقيناه مو على مكتبه .. وفيه وحده ثانيه ماصلة قلنا لها لقيناهم مسكرين يا أم الشباب.. وش السالفة؟؟
قالت السالفة ان الرحلة فاتتكم خلاص
وبس؟ خوش والله .. طيب وش اقرب رحلة عندكم ؟؟ قالت أقرب رحلة الساعة 6:55 !
لا حول ولا قوة إلا بالله .. وش هالحظ اللي مقطع بعضه .. يعني تأخير ثلاث دقايق .. ضيّع علينا القطار اللي أخرنا نصف ساعة بعد ما طمنتنا موظفة التذاكر وأكدت لنا ان الوقت بيكفي نلحق الرحلة فيه .. وتاليتها ما نلحقها واحنا نشوف النداء عليها بسبب عفشنا اللي ماركب ..
واللي يقهر وينرفز إننا صاحين من سبع ونص وكانت كل الأمور طيبة .. بس ما نقول إلا أكيد إنها خيرة .. يمكن لو ركبنا الطيارة انفجرت فينا والا خطفها واحد وطار بها لمثلث برمودا وانقطع أثرنا مثل الطيور المهاجرة (للمرة الثانية أقول بلاش تنكيت موب في وقته)
طيب .. خلني أركز وأعرف أفكر .. الحين مفروض اروح للاستعلامات وأسأل عن أقرب الرحلات لبرشلونة .. وبأي خطوط ..
رحت للاستعلامات اللي جنب مكتب رايان ..
لقيت أقرب رحلة تقلع الساعة 3:30 .. ! .. و على خطوط Spain Air ..
وهلم بي إلى مكتبهم اللي في الصالة الثانية .. بعد ما مسكت السرا كالعادة .. قالت لي ان المقاعد كلها فل .. .. هلا والله ..
ما فيه الا مقاعد على البزنس .. قلت طيب بكم .. قالت للشخص بـ 300 يورو ..
الحين يوم نجي تذاكرنا ذهاب وعودة للشخصين ما وصلت 160 يورو .. والحين تبيني اروح ذهاب فقط بـ 600 ..... أقعد في ملقا أوفر لي
قلت شكراً خسرتوا روحتنا معكم مالكم في الطيّب نصيب ..
وقلت خل أمشي بين المكاتب وأسأل عن رحلاتهم ..
مريت مكتب خطوط Vueling .. قالوا أقرب رحلة الساعة 5 وبسعر 186 يورو للشخص ..
خطوط ايبيريا على ما اعتقد قالوا الرحلة الساعة 5:30 والسعر 180 ..
خطوط مدري ايش للرحلات الخاصة .. لقيته مكتوب بالعربي ناسية وش اسمه المهم قالوا نفس الشي رحلة لا وقتها ولا سعرها مناسب ..
قلت خل أرجع بس لخطوطنا .. أنا ما سألت عن سعر تذكرتهم أصلاً ..
لما رجعت لقيت نفس صاحبنا الأول الحبوب .. قال يؤسفني ان الرحلة فاتتكم .. قلت طيب بكم التذكرة للرحلة الجاية؟
قال سياسة الخطوط ان التذاكر كل ما تنحجز أبكر كل ما كانت أرخص .. والعملية عكسية .. يعني بتحجزين اليوم .. بتطلع في أغلى حالاتها .. قلت يعني بكم ؟؟ قال الشخص بـ 300 !!! قلت منتب صاحي أقول ..
كان الثلاثمية فيني فيني رحت للخطوط أم بزنس على الاقل اتدلع شوي بدل هالطيارة الاقتصادية ^_^
قال بس أنا بقولك على حل .. انتو حالتكم انكم حضرتوا للمطار ولكن الرحلة فاتتكم .. وهذي الحالة لها اعتبار عندنا .. قلت حلو .. يعني؟
قال يعني خليني اطقطق لك بالجهاز أشوف فيه امكانية والا لا .. امممممم .. ايه فيه .. تقدرون تدفعون غرامة 100 يورو للشخص .. ونغير لكم موعد الرحلة بحيث يصير حجزكم على الرحلة الجاية .. وهالخيار هذا قدامك لين الساعة 11 حتى تقولين لي اذا تبينه والا لا .. وأقترح عليك قبل توافقين عليه انك تروحين المكاتب الثانية وتشوفين أسعار تذاكرهم وأوقات الرحلات .. إن ناسبك شي ثاني خذيه .. وان ما ناسبك ارجعي لي .. قلت ماشالله على النصوح ..
وكتب على ورقة أسماء المكاتب الثانية .. وكنت اولردي رايحة لها إلا خطوط وحيدة باقية ألا وهي Air Europa .. قلت خلاص أشوف وارجع لك .. قال انا قاعد في مكاني منب متحرك ..
رحت للخطوط اللي كانت في الصالة الثانية برضو .. وانا هذي شغلتي أمتــّر في هالصالات ..
لقيت رحلة الساعة 3:30 .. وبسعر 124.5 للشخص .. يقطع ام الدقة بعد ..
وهذي هي الأنسب .. وقتها أبكر من خطوطنا بثلاث ساعات وسعرها مو فارق كثير عنها ..
أحلى شي انه مكتوب (غير قابلة للاسترجاع) .. انا صدقت ألقاها حتى أرجعها .. ^_^
رحت بأجلس أخيراً بعد ساعتين من اللفلفة والمراكض بهالمطار .. قال زوجي شرايك بس نرجع للديرة مالي خلق نجلس اليوم كله بالمطار .. قلت والشناط طيب .. قال إسألي فيه أماكن تخزين للشناط هنا .. قلت ماشكل فيه .. بس وشوله نروح ونرجع .. خلاص متليعة مابي أتزحزح من المطار لين أركب الطيارة .. أما مقلب زي هذا ما أتمناه لأحد ..
قال انا طفشت .. خلينا نسأل .. قلت طيب .. ومالو نسأل وش ورانا ..
قال روحي لخوينا الحبوب هو اللي بيعطينا وجه ..
مع ان وش دخله حتى يدري .. بس رحت له ومسكت سرا برضو .. وقلت له أبشرك شرينا التذاكر خلاص من خطوط يوروب .. ومشكور ما قصرت .. قال الساعة المباركة .. قلت طيب ما تخبر لنا لوكرات في المطار نحط فيها شناطنا لين وقت الرحلة ؟ قال ياوخيتي ماعندي خبر إسألي في مركز المعلومات يعلمونك
يا قلبي لا تحزن ..
وأمسك سرا للمرة العشرطعش لهذا اليوم ..
حتى يقولون لي الإجابة المتوقعة .. لا ما فيه لوكرات في المطار ..
أهم شي ان خاطرك ارتاح يا زوجي الكريم .. ممكن نجلس وأرتاح أنا بعد
*
لو اننا بدل الفلفة والاستعلام ومسك الطوابير .. طلعنا من المطار لنفس الاوتيل وخلينا شناطنا هناك من لحظة ماشرينا التذاكر .. ممكن .. بس الحين الساعة قربت من 12 .. والبوردنق يفتح الساعة 1 ونص .. ما تسوى نروح ونرجع ..
تمشينا في المحلات المنتشرة في المطار
طلعت كتاب وجلست أقرا بكل استمتاع ..
وطبعاً طلعت كميرتي بعد ما ركدت وارجهنيت وصورت الصور اللي شفتوها فوق كلها ..
كل هالصفة كاونترات العفش للشركات المختلفة .. وماشفتوها وهي مفتوحة والسرا واصل آخر المطار ..
وهذي شروط الحجم للشنط اللي تدخل معك الطيارة والخاصة بخطوط رايان اير ..
(ركزوا على الثلاث نقاط اللي تحت ^_^) ودهم يكتبون فاهمة يالمستحيلة أنتي وزوجك ؟!
قررنا بعد هالمقلب إننا لا بغينا نسافر كل واحد ياخذ معه شنطة صغيرونه قد المقاس اللي حاطينه لنا رايان اير .. ونحط فيه الأشياء الأساسية فقط .. واذا وصلنا المحطة الأخيرة خليناها للشوبينق ونشحن الأغراض الزيادة في شنطة بلاستك اللي ماتاخذ وزن ولا مساحة من الشنطة الصغيرونه .. أدري مشروع مستحيل التطبيق خاصة لنا يامعشر القوارير بس ممكن للرحلات القصيرة ليه لا ..
وبعد طووووول إنتظار ..
توجهنا للكاونتر رقم 372 حتى نبدأ طابور رحلتنا على اير يوروبا ولكن الطيارة طيارة سبان إير .. بس لا يكون هي نفس الطيارة أم البزنس وهالخراطة تقول لي فل مافيه سياحي .. .. كلهم إقلاعهم نفس الوقت 3:30 .....
ماشالله علينا واصلين أول الناس هههههههه المؤمن لا يلدغ من جحر مرتين ..
بعدها رحنا لبوابة التفتيش .. وفيها زحمة العالم على طول ماسكة فيها طوابير .. وصار لي فيها مواقف كالعادة ..
عاد أنا من حيني ماخذه منهم موقف بعد المساج التايلندي اللي صار المرة اللي فاتت .. وجايتهم اليوم والرحلة فايتتنا والمزاج آيل للهواش
يعني خل أحد يحارشني بس ..
حطينا أغراضنا وعفشنا وعزلنا اللاب توب لحال والشنطة لحال وشلت الدبوس اللي كان في ملابسي (متليعة ومذاكرة الدرس زين) .. رحت ومريت بالجهاز .. وابشركم ما رن ..
بس جلست الموظفة تحاكيني بالأسباني وتأشر على راسي .. إنا لله يا هالشعر وش تبين يعني ترى مافيه مشابك ولا بنس ولا شي ؟؟؟ لا قولي شيلي الحجاب بعد قولي قولي ؟؟؟
والحرمه لازالت تأشر وتتكلم وأنا مدري وش تبي وهي ما تدري أنا وش أقول ..
راحت شوي وكلمت صاحبها البالغ في الإحترام للأمانة وقال :
" زميلتي هنا تحاول تطلب منك من بعد إذنك إنك تسمحين لها تتحسس بيدها على راسك "
ياحليلها .. ووييييينها وين ذيك العلة حاطة حيلها فيني بدون ما تشاور كني مسوية جريمة .. قلت شدعوى ياكافي أكيد تاخذ راحتها ووصل لها سلامي وتحياتي بعد هههههه
ابتسمت لي ولمست راسي مدري وشوله هالحركة حمدالله .. يعني لو بأحط قنبلة في راسي بيطلعها الجهاز ..
.
.
ولسه باقي موقف ما خلصنا ..
إلتفت ّ بأضفضف عفشي الموزع بكل مكان .. شنطي والكام والنظارة والبوك واللاب توب .. لما أخذته ورفعت راسي لقيت واحد واقف فوق راسي وقال .. عفواً الجهاز هذا جهازي ..
قلت نعم ؟؟؟ من متى ان شالله .. هذا جهازي انا حاطته بنفسي رح دور جهازك على غيري
خير ان شالله مابقى الا هي بيسرق جهازي وانا توي ما تهنيت فيه عياناً بيانا
قلت انت جهازك ماك برو ؟؟ قال ايه .. طالعت بجهاز التفتيش والقى لاب توب ثاني توه طالع طازه ^_^ .. جا الرجال فتح شاشة الجهاز اللي يقول انه حقه وفعلا كان شغال على برامج غير برامجي
ياربيه على المواقف اللي مال أم أمها داعي ..
وبعدين انتبهت اني وين ما وجهت وجهي لقيت أجهزة ماك برو مع كل الخلق
وانا على بالي قاعده بحراج الكمبيوتر بالعليا كلن جهازه مختلف عن الثاني لا شكل ولا لون ولكن مافيه غيري جهازه ماك ..
المهم عدّت ^_^
وبما أننا جايين أول الناس .. فما بعد أعلنوا عن مكان بوابة الطيارة لأن الطيارة نفسها مابعد جت ..
مكتوب على التذكرة D .. لكن ننتظر ونعرف أي بوابة داخل دي ..
رحنا نتقهوى بستاربكس .. و ركدنا الروس المرهقة ..
بوابة ركوب الطيارة .. لرحلتنا هي 68 D ..
.
.
رحنا عند البوابة .. وجلسنا .. وجلسنا .. وجلسنا .. وبقى على الرحلة نصف ساعة ولازالت البوابة خالية من أي شي متعلق بمعلومات رحلتنا .. ! .. وش السالفة يا جماعة ..؟
رجاااااء يكفي مغامرات اليوم شبعنا خلوا شوي لبكره ..
رجعت مره ثانية للوحة أتأكد .. لقيتها 66 !!!
يا قلبي لا تحزن .. كم مره قلتها اليوم .. كدت أن أصدق أني قريتها غلط في المرة الأولى .. ولكن الكام لا تكذب .. رجعت للصورة وتأكدت انها كانت مكتوبة 68 .. شفت يا زوجي مزايا تصوير كل شي عالفاضي والمليان ؟! ^_^
زين اللي انتبهنا بعد قبل تروح وتفوتنا للمرة الثانية .. وتلقوني منتحره من فوق برج المراقبة
ركبنا طيارتنا .. الصغيرونة .. نسبة ً إلى طيارة رايان اير اللي جينا فيها ..
وصلنا بالسلامة يارب لك الحمد .. وباقي حوالي ساعة على المغرب .. قالت ايش بنطلع على رحلة الصبح حتى نستفيد من اليوم .. وضاع اليوم كله في المطارات والطيارة .. والحمدلله على كل حال ..
نزلنا في صالة T1 .. ومنها رحنا بالباص الأخضر للصالة T2 اللي عندها محطة القطار .. بس الحلو ايش .. اننا الحين نعرف البير وغطاه ^_^ .. ومعنا تذاكر المترو أم عشر رحلات وبنستعملها في القطار مقدر على الحركات ياخبراء
سعر الليلة : 118.80يورو .. وكنت حاجزة ليلتين في البداية .. بعد كم أسبوع عدلت في الحجز وزدته يوم ..
فصار سعر الليلة الثالثة 164.16 يورو .. الحجز المبكر بيطلع أرخص طبعاً ..
صور الغرفة
دورة المياة وانتو بكرامه .. الحلو فيها انها مقسومه الشاور لحاله
بس الشين فيها انها مفتوحة عالغرفة على طول .. يعني تطلع من الشاور الدافي لجو الغرفة البارد مباشرة بدون حتى مناشف جوا الشاور ..
المنظر اللي نطل عليه ..
محطة القطار سانتس .. وأوتيل بارسيلو اللي بنفس المحطة .. تحية خاصة مني لأوتيل بارسيلو اللي يعرف يختار مواقعه ^_^
زوووم للجبل والكنيسة في أعلاه ..
ما أمدانا نتوضى بنصلي .. إلا نسمع طقطقه وأصوات تشجيع وهيصة .. طلينا نشوف وش القصة
بنات شكل عندهم حفلة أمهات ومسوين فقرة يتدربون عليها .. ^_^
صلينا وريحنا شوي .. ونزلنا نشوف هيصتهم عن قرب ..
يرقصون استعراض بالعصيان .. وفي اللقطة رامين عصيانهم كلهم يترقبون .. وللحين ما بعد طاحت <------ ان ما تبتي عن ذا الحركة ترى بيخلونك لحالك انتي وتقريرك الماصل
طيب خلاص أتوب ..
بس خلص اليوم .. ما فيه إضافات تسوى .. رحنا ندور نستكشف المكان .. وتعشينا بماك الموجود في نفس المحطة .. بس الله يخرب بيت فرايزهم كله متساوي قد بعض ومقرمش ومافيه ولا وحده محترقه والا حالها مايل .. تتوقعون فعلا له علاقة بمشتقات خنزير والا شي من هالقبيل ؟
باكر إن شاء الله يوم أحلى .. وعسى ما غثيتكم بقوه في هالحلقة ..
* خلاصة الحلقة التاسعة *
- ضرورة الحضور في المطار قبل الرحلة بساعة ونصف على الأقل لتلافي المفاجأت والمواقف البايخة ..
- جلب كتاب ممتع أو لعبة تسليك في أوقات الإنتظار الطويلة ..
- فندق AC sants جيدجداً ومن أهم مزاياه الموقع ، المشروبات تعبأ في الثلاجة مجاناً ، كذلك الشاي والقهوة بإختلاف أنواعها في اللوبي مجانية للنزلاء من بعد الفطور وحتى السابعة ..
- الانترنت مفتوح في اللوبي .. وبرسوم في الغرف ..
اليوم لازم يسجل في التاريخ .. حلقتين في يوم واحد .. توجع
صحينا اليوم على 11 .. شبعنا نوم وارتحنا بعد يوم أمس البايخ .. وقلنا اليوم ما يبي لها كلام .. لازم نخليه أحلى يوم في الرحلة ونمسح كل أثر يذكرنا بالأمس .. معناها إيش ..؟
أكيد بنروح للملعب ما يبي لها كلام .. ^_^
Camp Nou.. Here we go
نزلنا نفطر .. كانوا قايلين لنا وقت الشيك ان موعد الفطور من 8 حتى 12 .. يافرحة ما تمت انا فرحانة بالفطور عشان يقومنا غصب بدري ويجون هذولي يخربون نظامنا بكل بساطة ..
البوفيه ما كان بخيارات اوتيل بارسيلو .. لكن مو بطال .. وخدمتهم ممتازة ودهم لو يحصل يلقمونك ..
لقطات من البوفيه ..
سمينا بإسم الله
ومشينا للمترو ..
توجهنا لمحطة Collblanc على اللاين الأزرق .. هذي أقرب محطة للملعب ..
وعند البحث عن بوابة الخروج منها لقينا
هذي أول و آخر لوحة شفناها توضح لنا إتجاه الملعب ..
استغربت لأني مالقيت لوحات واضحة بالشارع تدلنا وين المكان .. إلا ان كانها موجوده بس مع الفهاوة المعروفة ماشفناها ^_^
شفنا الناس طالعه من المترو وتدرعم .. درعمنا معهم .. الموت مع الجماعة رحمة
بعد ما قطعنا اشارة لفينا يسار .. بناء على وصف أحد المارة .. ومشينا شويتين حتى لاح لنا شيخ المزايين
سؤالي : الحين الملعب مبني له عشرطعشين سنة .. يعني ظنتي قبل المترو .. طيب ليش ما حطوا المحطة قريبة منه وهو معلم رياضي عالمي ومقصد سياحي رئيسي في المدينة؟ و لو كان الملعب مبني بعد المترو .. ليه ما بنوه جنب المحطه ؟ هذي سقرادا فاميليا ما بعد خلصت ومع هذا حاطين لها محطه بإسمها والجدار بالجدار ^_^
والا مقاول سقرادا يعرف له ناس في البلدية والمواصلات.. كل شي جايز ..
رحنا لشباك التذاكر وأخذنا تذاكر زيارة المعرض + الملعب سعرها 18 يورو للشخص ..
فـ لم يحظى ملعب كامب نو بمثل هذا الشرف من قبل .. كيف لا وقد وطأته أقدام آل مستحيل رعاهم الله
جانب لكؤوس الرياضات الأخرى غير كرة القدم (وطبعاً هالجانب ما كلفنا أنفسنا نطل فيه ههههههه)
ولا تكتمل التجربة قبل الدخول لصالة المؤتمرات الصحفية بعد المباريات .. وغرف اللاعبين
غرفة التعبد حقت اللاعبين المطاوعة ^_^ عشان يبتهلون إلى الله انهم يفوزون قبل المباراة
وتخيلوا انفسكم وانتو مكان اللاعبين وانتم تركضون بتدخلون الملعب واصوات الجمهور والتشجيع والحماااااس مالي المكان ..
بتطلعون للناس من هنا ..
وبعد ما شفنا الملعب من الوسط .. ومن تحت .. طلعنا نكمل الجولة واستمرينا نرقى ونرقى بهالدرج .. لين وصلنا مدرجات الدور الثالث .. ودخلنا غرفة المعلقين ..
.
.
.
.
.
.
.
.
وهذا ناصر الأحمد يحييكم من ملعب كامب نو ببرشلونة ..
^
^
^
^
^
^
^
^
احلفوا عاد انكم ما صدقتوا اني مصورته ؟
<--------- مدري وين بيروحون من فنونك تصوير وحرفنة فوتوشوب والخافي أعظم شي شي الله لا يضرك بس
وبعدين الله يسلمكم رحنا لقاعة الملتي ميديا حقت معلومات اللاعبين .. حقيقة أكثر شي أعجبني في المكان .. تقنية عالية وإخراج خطير .. (الناس جاية تطالع الملعب واللاعبين وانتي ماعجبك الا التقنية ^_^)
عبارة عن أعمده أو أعواد كل عود فيه مربع صغير عبارة عن شاشة تستعرض معلومات كل لاعب .. مكتوب عليها ممنوع اللمس .. شكله فيه ملاقيف واجد غيري عاجبتهم هالقاعة ^_^
الصورة مع الفلاش
واضحة الشاشة الخلفية البيضاء .. هذي تعرض برضو معلومات عن اللاعبين بالبروجكتر .. بس طبعاً شكل القاعة الحقيقي هو الصورة السابقة بدون الفلاش ..
في واحد من الجدران المليانه بالصور .. لقيت هالجدار اللي حاطين فيه صور لملاعب واستادات متفرقة من العالم .. وتخيلوا وش لقيت ؟
V
V
V
V
V
V
V
ابحث عن فضولي .. استاد الملك فهد في الركن القصي
هيــــه هيــــه .. أخيراً أحد عبرنا وحط لنا خانة ولو انها صغيرة ويالله تنشاف بدون مجهر .. بس بركة
طبعاً في مكان مثل هذا لازم يستغلون الخلق اللي ماعندهم أي مشكلة في إنهم يقعون تحت الإستغلال ^_^ .. في كل زاوية تلقون مصورين يصورون الجمهور إما مع آخر كأس فاز النادي فيه .. وإما على منصة المتحدث الرسمي للنادي .. و ما يحتاج تحسون ان زوجي موفر التصوير كله لهاليوم ^_^ ما بقى شي ما صور فيه .. وعاد هنا
يمشي وينصب على الناس .. أنا شايف مسي في الملعب ومصور معه بعد .. ^_^ .. طبعاً فكرتها ان الشخص يصور وهو حاط يده بوضعيه معينه .. وبعدين يركبون هم مكان الشاشة الخضراء صورة اللاعب اللي تبيه .. شايفين التكنلوجيا خلاص ماعاد يحتاج الواحد يتحرك من مكانه كل شي يجيه وهو فبيته ..
وانتهت جولتنا المميزة في الملعب ..
يالله لك الحمد .. انبسط أبو الشباب واستانس ووسع صدره .. الحين دوري عاد ..
وش اكثر مكان يوسع صدر المرأة ..؟
نعم نعم
إنه السوق
وأي سوق ..؟
آوت لت لاروكا فيليج ..
هلم بنا يا قوم ..
تنطلق الباصات من ساحة كاتلونيا الجميلة ..
وبالتحديد من نقطة تجمع الباصات أمام بنك كاجا مدريد ..
اشتريت التذاكر من مركز المعلومات السياحي بنفس المكان .. الشخص بـ 12 يورو ذهاب الساعة 4 العصر .. وعودة الساعة 9 ..
علماً بأنه يمكن شرائها من نفس الباص ..
وهذا باصهم شرّف .. الناقل شركة Sagales ..
العالم زحمة كلن يبي يلحق مكان قبل يمتلي ..
طبعاً الخليجيين بشكل عام ألزم ماعليهم التسوق بالسفر .. وأهم مكان للتسوق هو الآوت لت .. عاد أبد تقولون الباص بيودينا مكة موب الاوت لت .. ^_^ .. نصف الركاب خليجيين ماغير نسلم والا نرد السلام ..
حفل لايف عشان مهرجان La Merce مدري وشو .. كنا نشوفهم معلقين اعلاناته بكل مكان والحين السالفة صارت جد أشوف ^_^
وقفنا مع العالم شوي .. الا يجي ورانا واحد معه كلب كبر الحمار *_* الله يعزكم .. قلنا وش الله بلانا بهالمكان .. خل نطلع بس لا وراه طرب ولا سالفة ما وراه الا الصجة فقع روسنا <<<<<<< موب ذا كلامكم قبل الكلب
تمشينا لين دخنا .. و المطاعم حولنا كثير .. قررنا نتعشى باييلا أخيراً ..
ونتفرج على طاولات الناس .. المطعم اللي يعجبنا شكل أكله بنختاره ^_^
.
.
.
.
.
.
ما من فرق بين الصورة والأصل ..
يمي يمي ..
سؤال الحلقة ..
كم عدد حبات الرز الموجوده بالصورة ...... ^_^
العالم سهرانة ومهيصين تقل تونا العصر .. ما كان ودنا نرجع للاوتيل .. لولا ان الساعة تعدت 1 بالليل
وصار لنا موقف بالمترو
أول ما ركبنا كان زحمة .. وفيه شلة شباب موب طبيعيين قاعدين عند الباب .. واحد فيهم بالذات تحسونه مرتفع حبتين ^_^ يضرب الباب ويصرخ وكل ما شاف احد يطالعه نشب له ..
والناس تطالعهم بقرف .. وأنا وزوجي نتصدد لين تجي محطتنا كلها ثلاث محطات ونوصل ..
شوي الا واحد من شلتهم يحوس بأغراضه ويحط في يده شي @@
يا لهوي !! ما هذا يا زوجي ؟!
تشوف اللي أشوفه ؟
في يده أعشاب غريبة (<<<< ياروحي على براءة الأعشاب)
يعني مشتهي نعناع يحطه على بيرته مثلاً؟
الرجال بيلف زقارة حشيش وخاش جو
يممممممممممممه مشينا بس ننزل بأول محطة ونغير المترو ما حدنا الله نركب مع محششين بعد
بس الله يحلل محششين نكتنا ... موب مثل هذولي مهابيل ^_^
وغيرّنا المترو لا عاده الله من مترو تالي الليل لا وليلة أحد الليلة صباحي .. و في طريقنا للاوتيل مغير نشوف العالم تترنح @@ وحالتهم حاله .. واحد رحمته بقوه يمشي بخط متعرج لين آخر شي صقع بالعمود وكمل مشيه عادي ^_^ ياربي لا تبلانا استغفر الله العظيم بس ..
لقطة ليلية لأحد زوايا لوبي الأوتيل
* خلاصة الحلقة العاشرة *
- ملعب كامب نو و آوت لت لاروكا يستحقان الزيارة ..
- يفضل عدم البقاء لوقت متأخر بعد نصف الليل وعدم الخروج المنفرد على وجه الأخص ..
- وبس ما عندي ملاحظات .. اليوم كان حلو وممتع وخالي من الفهاوة ..
ودورت بالنت عن معلومات ملاهي بورتافنتورا اللي في نيتي نروح لها .. لقيت الباص اللي يودي لهناك يطلع من محطة سانتس الساعة 1ونص .. فقدامي وقت إلى أن يصحى زوجي ونشوف وين بنروح ..
برضو دورت معلومات عن الأسواق الحلوة .. وإكتشفت متأخراً كالعادة أن اليوم الأحد .. وعلى حد علمي وعلى حد ما قريت بالمواقع أن غالب الأسواق تقفل يوم الأحد ..
لما صحى زوجي وعين خير بدأت جلسات مفاوضات "وين نروح له" .. قلت له ان الملاهي هي الخيار الوحيد ^_^ بما أن الأسواق غالباً مقفلة .. وبما أني أجلت زيارتنا لها حتى هذا التاريخ لأنهم كاتبين بالموقع حقهم بتكون احتفالات الهلوين وهيصة وهمبليصة..
ولكن
إنتهت المفاوضات قبل تبدأ بقرار لارجعة فيه إنه موب لاعب ..
ان جا فهو بيجي عن قولة لا يسمح بدخول النساء إلا مع محرم بس ^_^
طيب ما ينفع كذا .. يمين يسار .. طيب لوسمحت .. طيب ترانا جينا من الرياض لحالنا حتى ناخذ راحتنا ونلعب سوا بدون ما نتناوب على عربة أطفال.. طيب خلينا نلعب ألعاب خفيفة مب لازم شي عنيف إن شاء الله نركب البطات اللي تدور في بحيرة ^_^ بس أهم شي نركب سوا ..
لكن
صدر القرار .. ودام الرجال ما يبي يلعب .. ما راح أستانس بلحالي كسيرة الخاطر ..
لذلك خلينا نشوف مكان ثاني نروح له ..
قلنا نروح الرسبشن وهي الحكم
سألناها إذا تخبر سوق يفتح الأحد .. قالت للأسف أغلب المحلات تقفل اليوم .. وبعد سؤال وتقصي قالت يمكن يممممكن تلقون سوق ماري ماقنم فاتح اليوم .. بس ترا مو أكيد ..
اممممم .. طيب
إذاً مالنا الا الحدايق .. شرايكم نروح حديقة بارك قويل .. ونمر السوق ان لقيناه فاتح كان بها والا تمشينا بالبورت والرامبلا .. وبالليل نحضر عرض النافورة السحرية اللي ماشفناه في ذكريات أحد المقالب الماضي ..
OK
شايفين الصورة هذي ..
.
.
.
.
.
.
.
.
.
.
.
تتوقعون صورة وحش مثلاً؟
.
.
.
.
.
.
.
.
.
.
.
.
.
.
.
.
.
.
.
.
طيب جربوا تشوفونها بالنهار
.
.
.
.
.
.
.
.
.
.
.
.
.
.
.
زحليقة في حديقة Parc De L'espanya industrial اللي جنب الأوتيل ..
أما انا موعودة بهالزحاليق .. لولا ان مافيها الا صغار والا كان طلعت فيها حرتي من زحليقة اوتيل بارسيلو اللي ما جربتها ^_^
بحيرة اصطناعية كبيــــرة .. والنوافير مسويه جو راااايق زيادة على أن الجو أصلاً رايق
