كل يوم في بلد وانتي في مكانج(تقارير مصورة منقووولة)

[دلوعة أبوي**]

ظاهر جدول رحلات القطارات ..

كان فيه معرض لوحات .. و معرض لليونيفورمات والقبعات العسكرية والبحرية والعسكرية العالمية ..

دورت علينا بس .. لقيتهم حاطين قبعات العراق و ماحطونا ..

.
.
.
.

الصور كلها أخذتها بيوم ثاني .. والا تخيلوني مسنتره بالكاميرا وأنا ساحبة شنطتي وراي ..

.
.
.

الطريق إلى أوتيلنا الجميل ..


**** Barcelo Malaga

 

[دلوعة أبوي**]

صفحة الموقع :
Booking.com: ظپظ†ط¯ظ‚ Barcelأ³ Malaga, Mأ،laga, ط£ط³ط¨ط§ظ†ظٹط§ - 539 ط¢ط±ط§ط، ط§ظ„ظ†ط²ظ„ط§ط،. ط§ط*ط¬ط² ظپظ†ط¯ظ‚ظƒ ط§ظ„ط¢ظ†!


سعر الليلة العادية : 101.15 يورو
والغريب أن سعر يوم (الخميس) هو اللي أغلى .. شكله صاحبه خليجي .. الخميس سعره 122.40 يورو ..

نوع الحجز غير مسترد .. وبالإفطار ..

اللوبي ..

أما هذي ..

بدايتها بالدور الأول عند المطعم .. حاطينها للمستعجلين يخلصون فطورهم وينزلون بسرعة <<<<< تخيلوا بس

غرفتنا في الدور قبل الأخير .. واستغربت ان فيه اوتيل بهالادوار العادة ما تزيد عن اربعة ..

 

[دلوعة أبوي**]

الناحية الثانية من الغرفة .. ويظهر المدخل وعلى يساره دورة المياه (باب سحاب)

دورة المياه

كنت اشوف الشاور في اوتيل كرام يستحق الاشادة .. بس هذا فوق مستوى الإشادة ..

.
.

الثلاجة والخزنة ..

بقي شي ما صورته؟؟

أكيد ..

v

 

[دلوعة أبوي**]

المنظر اللي نطل عليه ..

إلكورت إنجليس يالله من فضلك ..


رحنا السوق .. لقينا مكتب معلومات سألناهم عن الأشياء السياحية اللي في منطقة ملقا .. قالت ان ماعندها الا خرايط .. ومعلومات بسيطة عن مدينة ملقا .. وليست منطقة ملقا .. قلت طيب منين اعرف معلومات أكثر .. قالت إسألي في الأوتيل يمكن عندهم معلومات .. والا في مكتب السياح اللي بشارع مدري وين .. قلنا دام فيها عنوة نتفرغ لها بعدين الحين بنروح ناكل لنا لقمة ونتقهوى .. وين نلقى ستار بكس يالشيخه ؟

قالت هاهاهاها مافيه ..

قلت وشو؟؟ مافيه ستار بكس ؟ قالت لا .. أدري ان كلامي موب معقول .. بس ترى ملقا كلها مافيها ولا فرع ..

الله من زين الحظ .. واحنا بالمطار شايفين له فرعين على الأقل .. كل مارحنا صالة لقيناه .. واحنا رايحين جايين بينهم ولا وقفنا نتقهوى مع هالربكة .. يقالك نبي نقعد على رواق اذا ركدنا بالديرة ..
طيب شكراً على الإفادة .. شكل مالنا إلا البارات .. والله زمن ..

.
.
.
.

رحنا الفود كورت فوق .. لقينا مكدانلدز وهذي الجلسات عنده

ظاهر بالصورة الكوفي اللي ما ربّحه أحد كثرنا .. ( من حيث أرباح الشاهي طبعاً

) .. والا مابقى لعبة قمار ميب فيه ..

ولا عندهم احد يعرف انجليزي .. تعلمنا الاسباني على يديهم

مرة جينا نتقهوى كالعادة .. ويلقى زوجي خمسة يورو معفطه ورايحه فيها بالأرض شكلها طايحه من جيب احدهم ما حس فيها.. ومافيه احد بالجلسات برا .. والبياعة داخل .. كل ما جينا لقيناها داخل مدري وش عندهم هناك يوم جت وقلنا لها طلبنا المعتاد ألا وهو "T".. ومد لها الفلوس واحنا نحاول نشرح لها انها كانت بالارض طايحه .. هي اخذتها تحسب اننا بنحاسب بها ونقول لالالالالا يابنت الحلال طايحه بالارض ونقعد نمثل لها المشهد والله البلشة احنا وهالذمة اللي مدري وش تبي كان خليناها طايحه في حال سبيلها

بس قلنا لا .. خل نوريهم اننا يالمسلمين عندنا ذمة ونحرص على الأمانة ترجع لراعيها ..

يوم فهمت الموضوع أشرت بيدها انو خلاص دام مافيه احد سأل عنها .. خذوها لكم ..

وانا ما عرفت امشي ومعنا خمسة الحرام ذي ههههههه صرفناها يوروات ووزعناها على شحاذينهم المساكين صدقة وثوابها لراعيها

(أمحق ثواب وأمحق شحاذه يجني الواحد منهم في الساعة راتبنا في شهر أحنا اللي تحل علينا الصدقة مب هم

)

 

[دلوعة أبوي**]

رجعنا الغرفة على اننا بنريح ساعتين .. وصارت خمس ساعات .. هذا وجهي ان نمنا بالليل

يعني نسافر بدري نسافر متأخر النتيجة وحدة .. اليوم اللي نسافر فيه بيضيع علينا

قلت خلنا نروح نستعلم عن العرض اللي مفروض يكون اليوم ومفروض اني جاية عشانه .. سألت بالاوتيل .. ماعرفوه

وانا اللي اعرفه عنه انه ماجيك شو .. ويقام في مدينة ما حول ملقا .. قال الموظف بالرسبشن الأفضل تسألين بمركز استعلامات السياح الموجود في ميدان Almeda .. هناك بتلقين معلومات أكثر عن منطقة ملقا كلها ..

طيب شلون نوصله ؟ قال عندكم الباص قريب .. ونبدا معمعة الباصات .. واللطعات .. والخرايط اللي تقلب الراس ..

هذي خريطة شوارع ملقا

الاوتيل تحت باليسار عند النجوم الحمراء .. ومركز الاستعلامات داخل المستطيل الاخضر جنب شارع ألميدا برنسبل ..

تلقونها واضحه هنا

http://www.traveldodo.com/webmaster/spain/malaga/



نظام حركة الباصات ..
فيه شبكة مترابطة من خطوط الباصات بحيث تغطي المدينة كلها .. ونقاط انتظار الباصات بالشوارع مسجل عليها أرقام الباصات اللي تمر في هالنقطة وتركـّب الناس ..
يعني ..

اذا بتروح مشوار معين حدد أولاً أقرب نقطة باص لها على الخريطة ..
وشف أرقام الباصات اللي تمر من هالنقطة ..

ودوّر أقرب نقطة باص لك .. إذا كان رقم الباص موجود فيه .. معناها توجه لهالمحطه واركب الباص واجلس فيه إلين ما ينزلك بالمحطة المطلوبة .. بس لازم تنتبه وتسأل الناس متى بتكون هالمحطة .. عشان تنبه السواق انه يوقف لك فيها وتنزل ..
أما اإذا ما كان فيه باص بيتوجه مباشرة للنقطة المطلوبة .. أركب أي باص يتوجه إلى نقطة فيها الباص اللي يوديك لمحطتك .. ومن هناك انزل وانتظر الباص بالرقم المطلوب ..

شغلانة صح ؟

بس هذي وسيلة الانتقال الأوفر والمفضلة هناك .. والناس متعاونة وتعلمك أي باص مفروض تركبه.. و متى مفروض تنزل .. حتى لو ماكانوا عارفين اللغة بس ورهم الخريطة وهم يعلمونك بالإشارة ..

واذا مالك خلق على المرمطة بس انك ما تبي تسوق .. الله يقويك على التكاسي .. العداد يحسب في أوقات الانتظار والاشارات .. واتوقع كل كيلو يقطعه بيورو تقريباً .. وغالبا بيروح لأبعد طريق يوصلك للنقطة اللي تبيها عشان يحسب عليك أكثر ..
والتكاسي غالية عموماً لأن البنزين غالي ..

هذي خريطة توضح أسماء الشوارع وارقام الباصات اللي تدور فيها ..
Malaga Bus Route Map - Maacutelaga Spain • mappery

تشبه اللي عطونا اياها بالاستعلامات .. لكن اللي معنا موضح فيها وين نقاط انتظار الباص بالشوارع .. وعندها أرقام الباصات اللي تمر فيها ..


للمعلومية .. سعر تذكرة الباص ثابت لأي وجهه داخلة في نطاق الباص ما تفرق بتنزل بأول محطة والا بتنام معه لليل وانت تدور .. على ما أظن كان سعر التذكرة 1.20 .. ولازم يكون معاك قروش دايم .. لأن سواق الباص ماعنده وقت يصرف لك ..

مرة صار لنا موقف بالباص في ماربيا (وياكثر مواقفنا مع الباصات) .. بس بخليه لين تجي حلقة ماربيا .. <<<< كنها الدعايات اللي بنص المسلسلات تخرب الاندماج على الفاضي

.
.
.
.

نرجع لملقا ورحلة البحث عن باص شارع ألميدا ..

طلعنا برا الاوتيل .. ولاحظنا الشارع كله لفات وتحويلات بسبب حفريات ..

شغالين شغل جامد في المترو .. كذا الشغل والا فلا ..

.
.

رحنا الشارع عند نقطة انتظار الباص .. وجا الباص رقم 6 على ما اظن .. حسب ماكان موجود بالخريطة وأكدوا لنا الناس انه يوقف بهالشارع .. ركبناه متجهين لشارع ألميدا ..


الحفريات لاحقتنا بكل مكان

وكل شوي نسأل الناس وصلنا المكان اللي بنزل فيه والا لا .. .. الله من البثاره .. ليتهم يحطون بكل نقطة باص لوحة كبيرة بإسم المنطقة .. عشان الناس اللي أول مره بحياتها تعيش مرمطة التنقل بالباصات ما تغث اهل البلد بالأسئلة ..




وصلنا الميدان ياحميدان ..

 

[دلوعة أبوي**]

و مشينا نحوس و ندوّر لين لقينا مركز المعلومات اللي ما فادنا بشي ولله الحمد ..

ما عندهم معلومات عن الأنشطة المقامة في ماربيا مثل زيارة قصر الملك.. وما يعرفون شي عن عرض السحر.. وسيرك نيبا أنا اللي علمتهم انه بيقام بالفتره الفلانية في مسرح أعرف انه قريب من المنطقه بس ما كنت متذكره اسمه .. راحت تبحث بالجهاز وتحوس شوي وقالت الا صحيح في مسرح سيرفانتس صح ..؟ قلت ايه صح ياحظي .. الساعة 9 شوفي مسجل عندك والا سجليه عشان تعلمين الناس اذا جو يسألونك

قلنا نطلع بس ما وراهم الا الدجة <<<<<< نعم نعم انتو بس اللي وراكم العلوم الغانمة

وتمشينا بالحديقة اللي حوله ..


نخل نبتة سيف

النوافير بكل زاوية

تمثال جد أمي روبرتو السابع عشر

.
.

رجعنا الاوتيل .. و قعدنا ندور بالسوق شوي ..
بعدين قلنا نروح للسوبرماركت .. بس يوم وصلناه كان ما يستقبل أحد بيسكر .. الساعة 9ونص ..

ومحلات السوق كلها تسكر الساعة 10 .. ياشين الكآبة

رحنا بنتعشى .. مشتهين بيتزا ما بعد اكلناها هنا ..

 

[دلوعة أبوي**]

من Tele Pizza

بآخر المطاعم على اليسار .. قعدنا ساعة نشرح لهم اننا نبيها خضار بالمكونات هذي وبدون خامون .. بس لا يغركم شكلها طعمها الله يعز النعمة .. شاكين في الجبن حقها طعمه شحم خنزير <<<<<< والا ذايقته يومك تحكمين

سؤال الحلقة : كم السعر المكتوب بالفاتورة؟ والجائزة هالمرة قلم مون بلان آخر موديل ..

المطاعم السريعة فاتحين لين 11 كذا .. وفيه كم مطعم يفتحون لين 12 أو أكثر بنصف ساعة .. وبعدها ما تشوف الا

قوارير ومعتق شغل عدل ..

رايحين للمقهى بكل ثقة بنشرب شاهي آخر الليل هههههههههه لما جت البياعة كن ودها تقول الله يصبرني على هالمهابيل والا أحد يشرب شاهي هالوقت؟ .. بس مسكت اعصابها وقالت سوري ضفوا وجيهكم ما نقدم الشاهي الحين ..

يعني وش يبي له الشاهي صناعة هو ؟ مويه وكيس شاهي احمر نوعه الله بالخير بعد ليته تلقيمه .. دام انكم فاتحين وش ضركم لو شبكتوا الكهرب في الغلاية ..

رجعنا الاوتيل .. وجلسنا نقلب بصفحات النت والتلفزيون .. وفجأة طرأت على زوجي فكرة حضور مباراة لنادي برشلونة !
ياللجمال ..
قرارك جا متأخر شوي يا زوجي العزيز لأن المباراة الجاية بتكون يوم 22 سبتمبر في مدينة برشلونة .. واحنا بنكون وقتها في ملقا ..
هو ما كان ناوي يحضر أبداً لما كنا في مرحلة التخطيط والحجز.. بس لما جا وشاف البلد والناس والهيصة .. حس بالأكشن وتحسف انه ما يعيش جو المباراة فعلاً ..
وللأسف حجز الأوتيل في ملقا هو الوحيد اللي مدفوع مقدماً وغير قابل للاسترداد .. وتذاكر قصر الحمراء محجوزه في يوم 23 سبتمبر موعدنا نروح لغرناطة .. قايلين لكم الحظ مزاعلنا وين ما نطقها عوجا

* خلاصة الحلقة الخامسة *

- حاولوا تكون رحلاتكم الداخلية مابين الساعة 10 إلى 1 الظهر بحيث يكون معكم وقت للنوم وتوصلون المدينة الثانية بوقت مبكر لاستغلال باقي اليوم في التمشي ..
- لا تستعجلون على الشناط عند استلام العفش .. جاية جاية بحول الله ميب ضايعة ..
- للمرة المليون أقول لا تركبون القطار إلا وانتو متأكدين من الاتجاه اللي بيروح له (المشكلة انك عارفة

)
- إستئجار سيارة أفضل طريقة للتنقل في جنوب أسبانيا .. وهالنقطة بتتكرر في كل الخلاصات الخاصة بأيام الجنوب نظراً لأننا تمرمطنا مرمطة محترمة

- أوصي بفندق بارسيلو ملقا .. ممتاز من جميع النواحي .. الغرفة مريحة وواسعة مقارنة بفندق كرام برشلونة ، كذلك مقاس السرير أكبر .. والهيدرومساج شاور فعال لإراحة العضلات بعد مشاوير المشي .. وموقعه بالنسبة للي مامعاه سيارة يعتبر أحسن موقع جنب محطتي القطار والباصات الرئيسيتين ..
- عند حجز الفنادق إختاروا دااائماً الحجز القابل للتعديل والإلغاء .. الواحد يغير رايه وما يضمن الظروف ..
- لمشجعي كرة القدم : لا تصدقون انكم ممكن تروحون لمدينة ناديكم المفضل .. وما تتحمسون تحضرون مباراة .. .. لذلك احرصوا تكونون موجودين في المدينة اللي بتقام فيها المباراة في حال غيرتوا رايكم وتحمستوا تحضرونها بتلقون الملعب قريب ..


طولت عليكم بالسوالف في حلقة اليوم .. عساكم بس طلعتوا من خرابيطي شي مفيد .. وإعتذاري الشديد للي حس اني ضيعت وقته ..

قراسياس سنيورين وسنيورات ..

 

[دلوعة أبوي**]

لحسن حظي.. محد حاول يجاوب لغزي ..

والإجابة الصحيحة هي :

وفرتوا علي القلم الله يغنيكم ..

.
.

فيه موقف مدري شلون نسيت اقوله في الحلقة الماضية ..

في مطار برشلونة .. عند مرور الشنط الشخصية على الجهاز لتشييكها .. طلعنا الجوالات والنظارات والساعات وحاسونا بشنطة اللاب توب قالو لازم تدخل مره ثانية كل حاجة لحالها اللاب توب نطلعه وندخله لحاله والشنطة تدخل لحالها .. ومرينا بالبوابة .. زوجي مر ما فيه مشاكل .. وأنا رن الجهاز معي

يا لهوي ..
استلمتني الموظفة تفتيش حاست مريري .. تقل مساج تايلندي موب تفتيش

مابقى الا تتوطاني .. وتلمس حجابي وتشييك جيوبي وتشوف عند رجولي .. وطبعاً لغة التفاهم بالإشارة توديني عند جهاز أول مره أشوفه للجزم الله يكرمكم

ترفع رجلي تقول حطيها هنا .. وتصور والا توزن والا مدري وش تسوي بهالجهاز العجيب .. وتجي ترفع رجلي الثانية يعني بدلي بين الرجلين الحين بنشيك الثانية .. لاحول ولا قوة الا بالله يختي افصخها هالجزمة وخذيها تفداك قوليها صريحة مايحتاج هالحركات ..

و زوجي يقول اكيد يوم شافوك محجبة بيستلعنون في التفتيش .. قلت الا أكيد يوم اني لابسة مشبك بشعري بيرن الجهاز وبيفتشون احتياطاً ..

قال المهم لا تمشين جنبي وتجيبين لي الشبهات

*
.
.


الصباحية الأولى في ملقا

صحينا على 10 .. الله يبارك في الفطور اللي خلانا نصحى بدري

الظاهر يبدا الفطور من 6:30 أو 7 .. ويتوقف استقبال الناس على 10:30 ..

الخيارات منوعة .. وممكن يصلحون لك الاومليت على طلبك بس ماعمرنا لحقنا على الطباخ .. ماصورت البوفيه للأسف .. بس كان جميل ومرتب ..

جانب من الطاولات ..

ماحبيت اصور الناحية الثانية فيها ناس .. كانت أحلى من الناحية الفاضية ..



وهذي بداية الزحليقة اللي تخبرون

 

[دلوعة أبوي**]

لولا قلة قليلة باقية من الركادة كان الوعد عند الرسبشن .. (الا قولي لولا هالمملوح اللي يسحبك من خلاقينك قبل تتهورين وتفشلينه)

.
.

اليوم النية نروح السفاري سلوو افنتورا .. رحنا محطة الباصات على 11 وشوي .. مسكنا سرا يمكن ربع ساعة بس عشان تذاكر باصات portillo اللي تودي للمدن القريبة ..
قالت الباص اللي يروح دايركت على استبونا أقرب محطة للسفاري يطلع الساعة 10:30 .. ويطلع الساعة 2:30 .. تبون تصبرون لين 2ونص .. والا روحوا على الباص اللي بيطلع بعد خمس دقايق لماربيا .. ومن هناك اركبوا باص ثاني يوديكم الى استبونا لأنها قريبة من هناك .. قلنا يالله نطلع على باص ماربيا ونشوف ..

سعر تذكرة الباص لماربيا على ما اتذكر خمسة وشوي للشخص ..



باصنا الجميل على الرصيف 21

والطريق الأجمل إلى ماربيا

كانت غيم ومطر خفيف .. والجبال الخضراء من كل جانب سبحان الخلاق ..

.
.


الصورة هذي مافيها مناظر طبيعة .. بس عجبني انعكاس يد اللي قدامي وصورته ^_^ ..

أدري ما يمديكم على الفن بس ..

.
.

وصلنا المحطة بعد ساعة الا ربع تقريبا .. لما فكرنا قلنا الحين الساعة 12 وربع .. على بال ما يتحرك الباص الثاني مدري متى .. على بال ما نوصل السفاري بتصير يالله 2 الظهر .. ليه ما نجلس نتمشى بماربيا وبكره نصحى بدري ونطلع على الباص المباشر لها ..؟ و هيّـا بنا إلى الدرعمة ..

ركبنا باص قلنا وين نروح وين نروح .. ألزم ما علينا بورت بانوس طبعاً

واحنا في الباص .. لمحنا هذا الشي ورا الشجر اللي يشرح النفس

 

[دلوعة أبوي**]

يا هووووووه .. مسجد الملك عبدالعزيز آل سعود .. وأخيراً مكان ينسمع فيه الأذان في هالبلد ..

كان فيه سيف أبيض بوسط الثيل الأخضر .. شكله يجنن .. بس الباص مسرع وما لحق يطلع باللقطة .. ويا سلامي عليكم يالسعودية .. طن طن



نزلنا عند هذي اللوحة

لقطات من المكان

مدخل الشاطئ .. ويظهر اوتيل بينابولا في الصورة ..

 

[دلوعة أبوي**]

جلسنا نتمشى فيه وبين الأسواق والمحلات الكثيرة ..

فكرنا نروح للكورة اللي يقولون عليها هذي (سفير مينيا) أظن اسمها .. اللي تدخل بوسطها ويرمونك .. قريت ان فرعها في بينالمدينة مقفل .. وموجودة في ماربيا .. رحنا لتكسي سألناه عليها ما عرفها

قلناله طيب تعرف قصر الملك فهد وينه؟ برضو ما عرفه

قال أعرف المسجد .. قلنا ايه اكيد انه عند المسجد .. بس قلنا محنا رايحين وبس خلنا نسأل في مركز معلومات أفضل من هالتكاسي ..

لما رحنا .. قالت لنا بعد بحث ممحص ان حديقة القصر تفتح للزوار يوم الثلاثاء من الساعة 7-9 بالليل .. واليوم الإثنين .. قلنا مو مشكلة نجي له باكر إن شاء الله ..
وقالت ان الكورة مقفلة مدري ليه .. قلنا عادي لا تزعلين على حالنا متعودين على رداة الحظ ..

قالت ليه ما تروحون تاخذون لكم لفة بالبوت ..؟ قلت ممتاز .. وعطتنا الخريطة وورتنا ان البوت يطلع للناحية الثانية من المدينة وهناك موجود السوق المدينة القديمة (old town) ..


رحنا عند القوارب ..

مدة الرحلة نصف ساعة .. والشخص لمشوار الاتجاه الواحد أظن بـ 8 يورو .. واذا كان رايح راجع 15 ..

انحمست بالشمس شوي لأني ركبت بالجزء المكشوف (أصلا قاصدة اني أسوي تان ^_^).. بس لما حرك البوت .. واو ..

وحدة مسكينة احترقت على طول وجابوا لها كريم واقي .. وجهها وجسمها أحمر وحالتها حالة .. مساكين الخكاريا اللي ما قد شافوا شمس

وصلنا الناحية الأخرى من المدينة .. بعد رحلة بحرية ممتعة ..



وهذا الممشى المنسق بالتماثيل والازهار في كل جانب Avenida del Mar

 

[دلوعة أبوي**]

ثم
حديقة Paseo la Alameda >>> مدري وش قصة ألميدا معهم

كان فيها مهرجان فنون مدري ايش .. وفيه مصور لمحطة تلفزيون يقابلون الناس .. اعوذ بالله هالصحفيين والباباراتزي الله يقلعهم لاحقينا بكل مكان وش دراهم اننا هنا

كرسي سيراميك مملوح

رحنا ندور شوي بالسوق القديم .. كله سكك صغيره ما تدخلها السيارات ..

أحد المداخل له ..

وهالعربات الحلوة بكل مكان ..

دورنا نقطة باص نبي نروح لمحطة الباصات الرئيسية حتى نطلع منها لأي مكان ثاني ..

قالو لنا انتظروا باص رقم 27 هو اللي يودي للمحطة الرئيسية ..

جلسنا ننتظر ..
وننتظر ..
وننتظر..

لقيت محل ماكياج وعطورات قدام المحطة .. واذا دخلت محل انسوني هناك

اكتشفت انهم لاعبين علينا لعب هنا بهارفي نيكولز ودبنهامز

على سبيل المثال عطر نارسيزو المركز اشتريته من هناك بأقل من 70 يورو يعني 350 .. وهنا يبيعون ماء التواليت بـ 480 ريال .. والمركز طبعاً أغلى .. واللي بأوروبا أصلي ومعبأ بباريس .. أما اللي عندنا الله أعلم باريس والا دبي والا عزبة بنقالية

جا زوجي يقول ترى الباص جا وراح وانتي ما خلصتي

قلت تعال خله عنك وخذ لك كم عطر بس

لما جيت أحاسب .. طلبت التاكس فري .. وبعد ماجلسنا ربع ساعة نعبي البيانات وننتظرها تسجل وتشيل وتحط ... طلبت الجواز اللي ماجبته معي هاهاهاها ومن زين الطبايع محتفظه برقم الجواز القديم في جوالي وما سجلته بعد التجديد .. قالت مافيه لازم بالجواز لأنهم يحتفظون بنسخة كربون من التاكس فري .. قلنا شكراً خلاص نجيك باكر ان شاء الله ونجيب معنا الجواز .. فوّتي علينا الباص على الفاضي

.
.

قررنا نروح فنخرولا ونكمل اليوم هناك ..
ركبنا الباص على اساس انه بيروح دايركت مثل ما جينا دايركت من ملقا باص الظهر يا زينه ..

ولكن كرهنا أبو الباصات على أبو الساعة اللي ما استأجرنا فيها سيارة .. صار يمشي ويركب الناس بكل نقطة انتظار باص يوقف !

كل كل كل نقطة !! يعني المشوار كله ثلاثين كيلو يمكن وأخذنا فيه ساعة ونص واحنا كل ميتين متر وقف وركب ناس .. والباص امتلى ومع هذا يركبهم ما يقول لا الله يقطع الطمع

.

 

[دلوعة أبوي**]

دخلنا المول الظاهر في اليمين .. لقيناهم مسكرين الدرج الكهربائي لأن الدور العلوي مكان بيع الخضرة في النهار .. قلنا أجل هذا أحسن مكان نروح نصلي فيه ..

صلينا وطلعنا ندور البحر بنتمشى هناك قبل تغرب الشمس ..

لقينا محل أبو يوروين (<<<<< على وزن ابوريالين)

ولقيت فيه أخو الفيش اللي جبته من الرامبلا .. بـ 3 يورو

المرة الجاية إن شاء الله بنجي نسكن في فنخرولا الله يديم الرخص ..

.
.

شفنا على الشاطئ واحد مولع نار للشوي .. قلت لحظه لحظه لحظه .. انا شايفه هالرجال في واحد من التقارير

أذكر انه يمدح السردين عنده ..

بالفعل لقيناه يشوي سردين .. عرفنا وش عشانا الليلة

كان بسبعة يورو .. قلنا لكم الله يديم الرخص

لذيذ .. بس زهقنا من الشوك

وما نكد علينا الجلسة إلا أننا تذكرنا ان ورانا رجعة للديرة .. وما ندري عن القطار متى آخر موعد يتحرك فيه ..

لأننا جايين مدرعمين من ماربيا بالباص لو اننا جايين بالقطار كان سألنا متى آخر قطار .. بس قلنا الأسلم نستعجل ونروح قبل يفوت الفوت ونفرش ننام في المحطة

وصلنا المحطة 9:30 .. وحرك 9:33 دقيقة .. يالله الجنة ايه هذي الوسيلة اللي تنركب موب الباص اللي يوقف كل خمس دقايق

.. وأعتقد انه كان هذا القطار الأخير اللي بيمشي من فنخرولا لملقا ..


وصلنا الاوتيل بعد ساعة الا ربع .. والدنيا ليل مافيه شي ينراح له بملقا .. قلنا أحسن حتى ننام بدري ..

عاد مرة مرة نمنا بدري ايه هين ..
* خلاصة الحلقة السادسة *
- استأجروا سيارة للتحرك في جنوب أسبانيا ..
- يعطونك التاكس فري في ملقا إذا شريت بقيمة أعلى من 80 يورو .. أما برشلونة 90 يورو فأكثر ..
- من الضروري الاحتفاظ برقم الجواز وتاريخه معك .. ولو جبت الجواز بكبره أفضل في حال توفر شنطة فيها جيب آمن تحسباً ..
- الحرص على معرفة مواعيد تحرك الباصات والقطارات من وإلى المحطة اللي بتروحون لها .. انا كنت ماخذه معي مواعيد تحرك الباص من وإلى استبونا .. بس وش الفايدة واحنا مارحنا لها حتى قرارتنا تتغير 198 درجة كل عشر دقايق ..

إلى حين لقاء ..

 

[دلوعة أبوي**]

قبل ننام ليلة الحلقة الماضية .. بحثت وتمحصت في المواقع والبروشورات عن حركة الباصات اللي توصل للسفاري .. قلت لزوجي فيه باص مباشر ينزلنا في نفس السفاري وبيطلع الساعة 8:30 .. قال بدون نقاش شوفي غيره مانبي شي الصبح @@

طيب طيب .. أجل مالنا إلا الباص المباشر لاستبونا ويطلع الساعة 10:30 .. وترى بيحطنا بمحطة بالشارع ونبي نطقها رجلية لين الموقع .. قال خير إن شاء الله ..

.
.

وكما جرت العادة ..

.
.

مافيه أمل نقوم وننفذ الخطط المتفق عليها .. قمنا على 10 وعشر .. على ما تجهزنا ونزلنا نفطر .. بعد ما استقبلونا على استحياء على أساس موعد الفطور انتهى (*_*) وعلى ما خلصنا .. وصلنا محطة الباص 11 .. يعني نفس سالفتنا أمس ! ونفس باصنا أمس ! .. أجل ليش ما رحنا أمس ؟!
مالنا إلا نروح ماربيا باص 11:30 .. ومن هناك نركب الباص لاستبونا ..

ودام اني في المحطة .. خليني أشتري تذاكر سفر غرناطة بالمرة ..

.
.

صور من الطريق
شجرة جذعها غريب سبحان الله ..

مبنى الكونجرس في ملقا .. ويظهر انعكاس باصنا عليه

هذا المدخل حقه ..

لو سبحان الله واحد منكم صار عضو مجلس الشورى وبغى يحضر اجتماع .. عاد لا ينسى ان لولا الله ثم اني دليته عليه كان فاته الاجتماع وهو حايس يدور بالشوارع ^_^



أح ياللون الأخضر زاهي كأنه مغسول بفانيش للملابس الملونة (<<<< تكفين لاعاد تشبّهين)

وحنا نفرح بالثيّل الأشهب اللي نفرش به الاستراحات ينقاله طبيعة
كلها ساعتين بالشمس والا يوم بدون مويه ..... ويعرف ان الموت حق ..



وصلنا ماربيا

 

[دلوعة أبوي**]

وغيرنا الباص إلى استبونا اللي مشى على طول الحمدلله ما انلطعنا ..


احنا عندنا بعارين وغنم في الخطوط وهم عندهم
v
v
v
v
v
v
v
v
v
v
v
v
v
v
v
v
v

يالله من فضلك ..


بعد شويتين كمان .. نزلتنا سواقة الباص في الشارع العام (هاي وي) عند مكان قريب من هاللوحة

على الساعة 1:40 تقريبا .. وشمرنا عن رجولنا واستعنـــّــا على الشقا بالله ..

نكست إقزت يعني نكست إقزت .. ونمشي ندور هالمخرج الجاي ..

ونمشي ..
ونمشي ..
ونمشي ..

اثر السالفة مطولة .. للحين نشوف هاللوحات تقول امشوا قدام .. والطريق صاعد .. وكل ماله يرتفع زود .. آآآآخ بس آخ ..


وينك يا سلوو افنتورا وين ..

ولازلنا نتبع اللوحات ونمشي ..


ولقينا هالبرشومي في طريقنا

يحتكون بالطايف ..

 

[دلوعة أبوي**]

دارية ان الصورة مدري وش تبي .. بس اني أدور أي شي أتلهى فيه وأضيع وقت بينما أمشي

.
.

ولاااااااازلنا نمشي

.
.

حتى لاح لنا الفرج من بعيد

بعد نصف ساعة كاملة من المشي الدؤوووووب

ورحمة من رب العالمين ان الشمس ماكانت طالعة صح .. والا كان حرمت أسافر بعد كذا خير شر !

يعني كل هالأشياء أنا عارفة انها بتصير .. وش الفايدة من التخطيط دامنا ما راح نستفيد منه؟

بس ..

اهي عدّت ووصلنا الحمدلله ..

مواقف السيارات .. لو معنا سيارة كان دفعنا لموقفها 3 يورو .. خيرة اننا ما معنا والا كان فلّسنا <<<<<< هذا مايسمى بتعزية النفس ^_^


كنت ماخذه معي كوبونات تخفيض من مكتب المعلومات .. بقيمة 5 يورو للشخص .. فـ صار رسم الدخول للشخص بـ 19.50 يورو .. وإذا تبي خريطة تشتريها بـ نصف يورو .. أخذناها بس شرهتكم على اللي شافها .. لأن المكان كله لوحات توضيحية وأمش ودرعم وبتلقى شي تشوفه في أي اتجاه رحت له ..

كنت أظن ان سلوو مارينا جزء من المكان أو قريب منه على الأقل .. لكن لما سألت قالوا انها نصف ساعة من هنا .. قلنا أجل سلموا لنا عليها مافيه أمل نمشي هالمشي مرة ثانية عشان شي قريت من تعليقات الناس انه ما يستاهل .. ولو معنا أطفال كانوا بيفرحون فيها أكثر .. لذلك قلنا بكيفها ..

ودخلنا للسفاري أخيراً ..

المكان هذا راااااايق ..

وكله وز وبط وحيوانات <----------- احلفي ياشيخه


شوفوا هذي البجعة الحلوة تسبح من بعيد

 

[دلوعة أبوي**]

وهنا الاوتيل حقهم .. للي يحبون ماوكلي وودهم يعيشون حياته

والشلالات حولك وحواليك

قابلتنا في الجانب الآخر من البحيرة هالعائلة الكريمة

ماشين بالدور .. وبالنظام .. (ليت بعض البشر يتعلمون من الحيوانات والطيور.....)

معلقين حبل بين نقطة أعلى الجبل ونقطة في الجانب الثاني تحت .. والناس تتعلق بالحبل وتنط

ياااااه على الوناسة .. خطييييييرة هاللعبة ..

وحدة نطت ...... وووووووووووي ..

حمدالله عالسلامة ..



كان ودي ألعبها بس .. في الجنة إن شاء الله .. ^_^


بعدين الله يسلمكم رحنا للمكان اللي نركب فيه سيارة السفاري اللي تتمشى فينا بين الحيوانات .. تسوي جولة كل ثلث ساعة .. وآخر جولة الساعة 4 ..

مستر أبو قرن ..

 

[دلوعة أبوي**]

الوضيحي .. والريم والمها وكل الغزالات الحلوات الأمامير

وقابلنا هالحمير الوحشية ..

قلنا خير وش عندكم مجتمعين؟ قالوا بنروح لنفاس بنت عمتنا توها والده .. قلنا والله ما تروحون الا واحنا معكم حق وواجب




مرينا باتشي جبنا لها صينية تبن محترمة

بس هجموا عليه قرايبها المشافيح

وزرنا الأم ووليدها وتحمدنالها بالسلامة

ومرينا في انواع الثيران والجواميس والبقر .. حسيت اني بحديقة حيوان جد (وانتي وين يالشيخه)

وقف فينا السواق في منطقة الاستراحة والمطاعم ..

بعدين رجعنا للمحطة الرئيسية وقال من هناك اركبوا السيارة الثانية هي اللي توديكم عند الحيوانات المتوحشة ..

هذيـــــــــــك السيارة في وسط الشجر بالجبل تسوي نفس الجولة اللي كنا فيها قبل شوي

سيمبا متربع بين حريمه ..

ماشاء الله يؤمن بالتعدد .. بس يحق له تراه ملك .. لا صرتوا مثله سووا اللي تبون ^_*



وهنا النمور تسوي تان .. لاقينها هالنمور أحلى مكان في الحديقة لهم موب سهلين ..

 

[دلوعة أبوي**]

أما هالفيل الضعيف رحمته ..

طفشااااااان .. كل شوي يدخل غرفته ويطلعه الموظف .. اجل الناس جايه عشان تشوفك وانت تتخبى عنهم الله يفشلك كانك ماتعرف تحشم الضيف ..


واحد من الجسور اللي ماليه المحل

صح مايمديكم على الزوايا والحركات ..

هالرشيق في آخر روقان .. ماء وخضرة ووجهٍ حسن .. لا ويطير بعد.. كملت

ياكبر الحديقة .. ولسه باقي محمية الطيور والثعابين مابعد شفناهم .. بس خلاص تعبااااااانين نبي نرجع ..
المشكلة
وين الباب معه بس

ندور أي Salida .. <<< أحلى يا لغات


واحنا ندور المخرج .. لقينا منطقة الطيور .. ودرعمنا رب صدفة ٍ خير من ألف ميعاد ..

بوابة صادّة فوق الجبل الظاهر ماحد لقاها غيرنا



ياحليل دجاجهم ملون موب مثل حقنا <<<<<< ماعرفت وش اسم الطير قامت تألف عليكم

وطحنا على المزرعة الصغيرة

ديك رومي ودجاج صدقي يبيض مثل حقنا بالضبط ^_^

لا وبعد ديكهم مسلم الله يجزاه خير يأذن



بطة يابطة شيلي الشنطة

هنا إناث الطواويس الشيون .. عجزت أدور عن زوجهم المزيون بس مالقيته مايق علينا بذيله ..

على انهم شينات بس انحاشوا من يوم شافوا الكام هم ووجيههم .. ترى ما صورتكم إلا بأتعبر بصورتكم اسم اني جيت المكان لا تشوفون حالكم علينا ..


هذي وحدة محترمة حالها ومبتسمة للكاميرا

سحلية صغنبوووووووووطة قالت وانا بعد صوريني والا مش أد المآم ؟!

قلت أفا عليك بس .. Cheeeeeeeeeez

 

[دلوعة أبوي**]

ولقينا المخرج الحمدلله .. جينا بنطلع على الساعة 5 إلا تكة .. ونلقى الباص اللي يودي ويرجع مباشرة لملقا قدامنا !
يا ذا الهنا .. موب معقول هالحظ مبتسم لنا لالالالا أكيد الموضوع فيه سر ..

رحت لراعي الباص بأسأله وين بينزل بضاعته .. قال أنتي كنتي جاية معي الصبح؟ قلت النية ايه .. بس الواقع لا
قال أنا آسف لأني بأرجع معي اللي جبتهم الصبح فقط .. قلت يكون خير يالطيب ..

رحت للاستعلامات أسأل .. قالت وريني تذاكرك لوسمحتي بأعرف هل يحق لك تركبينه والا لا ..؟ قلت وش دخل تذاكري بالموضوع .. قالت يابنت الحلال وريني .. قلت خذي
قالت آها .. لوكانت تذاكرك كامله كان يحق لك تركبينه .. بس انتي تذاكرك مخفضة بالتالي لازم تدفعين 10 يورو عشان تركبين هالباص .. قلت وش تقولين انتي .. اذا هي على الدفع مو مشكله ندفع .. بس السواق يقول ما يركب الا اللي جاي معه .. قالت امممم أجل مدري عنه هو ابخص ..
قلت شكراً ..

وش الراي يا زوجي الفاضل؟

قال النزلة أهون من الطلعة ..

^_^

سألتها طيب ومحطة الباص اللي ترجعنا لماربيا شلون نوصلها .. قالت تحت الكوبري بتمشون شغلة ربع ساعة وتلقونها عند محطة البنزين ..

ياسلام لو كان معنا زلاجات .. ويييييييييييييييو الا احنا واصلين ..


مشينا مشي ذاك اليوم لا يقل عن 5 كيلو .. وصلنا المحطة وتعديناها بعد .. واحنا ندوّر اشارة الباص .. ريوسنا نتأكد لا نكون انعمينا عنها كالعادة ... وبالفعل

شفتوا العلامة الصغيرة الخضراء فوق الزبالة الله يكرمكم؟ هذي هي .. حتى ما تكرموا يحطون كراسي ومحطة انتظار زي العالم والناس .. الله لايفقرنا بس ..

اخذنا لنا 25 دقيقة لين وصلناها .. يعني أرحم شوي بخمس دقايق من مشوار الروحة الصاعد .. قالت ايش قالت ربع ساعة !



واضح بالصورة أسعار لتر البنزين والديزل .. عشان تعرفون النعمة اللي انتو فيها يا أهل السعودية ..
لتر البنزين بالسعودية ما يكلف 60 هللة .. وهناك بـ 7 ريال ..
اللي بيجي ويستأجر سيارة يجيب معه بنزينه في جراكل هههههههههههه <<<<<< تخيلوا بس تصير !!


انلطعنا لطعة حلوة واحنا جالسين عالأرض مانقصنا الا قبعة قدامنا ولوحة (Help me please) .. لين أقرب باص جا الساعة 6 تقريبا ..

مزحووووووم .. وشكل الناس اللي فيه يلعنونا في سرهم لأن الباص يوقف كل شوي حتى يجمعنا احنا واشكالنا


ووصلنا ماربيا بعد رحلة متقطعة كل خمس دقائق كالمعتاد ..

من المحطة الرئيسية .. ركبنا باص ثاني قلنا ندور فيه لين نشوف محلنا اللي اشترينا منه أمس .. وناخذ التاكس فري ..
وبالفعل نزلنا في نفس المكان (ينقال لكم صرنا خبراء نعرف متى ووين ننزل لحالنا)

عطيتها الجواز وسجلت البيانات واخذت النسخة الأصلية .. وهي أخذت الكربون ..
رحنا نتغدى ببرقر كنق .. وعندهم شي للحين خاطري فيه كان ودي أذوقه وهو (أبل فرايز) شرائح تفاح مقطعة بشكل الفرايز .. مدري شلون بيكون طعمها بس شي غريب وأكيد ماراح يجي عندنا ..
بس كنت شبعانة بعد الوجبة الرئيسية وما بغيت آخذه تيك اوي واحنا بندور بالشوارع الحين ..

صارت الساعة حوالي 7 .. والمفروض الحديقة حقت القصر فاتحة الحين للزوار ..

رحنا لنقطة الباص وكل ما مر باص قلنا له تعرف قصر الملك فهد.. يقول لا
نقول ياخي قصر كبير شلون ماتعرفه ! (ينقالكم عرفنا نوصف الحين)
طيب تعرف المسجد .. يقول لا

طبعا قليل اللي يفهمون الانجليزية بس أهم شي نقول المعلم اللي نبيه وهم اذا بيروحون لهالمكان بيركبونكم ..

مر باص ثاني قلنا له نفس الحكي قال وش قصر الملك فهد مدري هل تقصدون النادي مدري وشو .. قلنا مدري عنكم ياخي وش تسمونه بس طيب تعرف المسجد .. موسك .. موسكي <<< بكل اللغات قلناها

قال ايه يالله اركبوا لا تعطلونا بس .. قلنا أخيراً

النكبة لما جيت بأطلع القروش مالقيت معي فكة كفاية :s

والرجال حرّك وانا للحين أعد في قروشي هههههه طلعت له خمسين يورو .. قال فاضي لك ..
وكلن جالس وانا واقفة احوس بالشنطة لعل وعسى ألقى يوروات طايحة هنا والا هنا ..

و شافتني في هاللخمة أمريكية وش حليلها .. جاية مع شلتها حريم كلهم فلة .. قلت لهم لوسمحتوا ألقى معكم صرف خمسين؟ قالوا لا .. بس مفروض تخلين معك فكة قروش للباص يالشيخة .. كم باقي لك الحين؟ قلت وشو؟؟
اممممم باقي لي يمكن يورو .. (اقرب رقم والا الصحيح انه أقل بس منب فاضية اعد واجمع كم باقي)
قالت بس ؟ خذي @@

وافشيلتاه بس .. تالي عمري تتصدق علي امريكية بيورو !
بغيت اقول عطيني رقم حسابك عشان احول لك المبلغ إذا رجعت

قلت لها (You owe me one) ينقالي انكت .. قالت وانتي الصادقة يو أو مي ون ..

وخويتها تقول لرفيقتها الثانية .. طراره وتتميلح وما تعرف تتكلم بعد .. <<<<< هاهاها هذا لو كانوا خوياتها مثل ربعنا .. كل شغلنا حش بحش اعوذ بالله ..

نزلنا السواق في المحطة (ولسان حاله يقول روحوا ولاعاد تتعودونها)


ومشينا شويتين حتى وصلنا غايتنا .. مسجد الملك عبدالعزيز آل سعود رحمه الله ..

المدخل ..

مبني على نفقة الأمير سلمان الله يجزاه خير

لقينا حارس اظنه مغربي .. سألته عن مصلى النساء لأن الباب كان مقفل ..

قالي تعالي من مدخل الرجال .. وفيه باب جانبي للنساء ..

سوري عالصور المظلمة .. بس المكان كله إضاءته قليلة وخفت اشغل الفلاش وينقال لي ممنوع التصوير بالمسجد وأتحطم عاد ..

صلينا .. يارب لك الحمد ..

رحنا نسأل الحارس عن القصر وحديقته .. قال وشو..؟
وش حديقته وش زواره ؟!

ماخبرت ان الحديقة تنزار ..؟؟

يارجال قل غير هالكلام !!

قال أبد .. هالقصور مافيها الا بوابات مقفولة وما حولكم أحد تسألونه .. ياشيخ !! حرام عليك ما تدري احنا جايين مخصوص اليوم عشانها ..!
قال روحوا جربوا وشوفوا ..

قلنا عادي نجرب .. ما بدهاش ..

نصينا هالقصر الجميل ..