كل يوم في بلد وانتي في مكانج(تقارير مصورة منقووولة)

[دلوعة أبوي**]

موظف الرسبشن يقول : مبروك على الانيفيرسري

انا ناسية الموضوع .. كنت كاتبه بالملاحظات لما حجزت الغرفة ان الرحلة توافق عيد زواجنا .. بس ما توقعت احد ياخذها بمحمل الجد لأني دايم اسوي هالحركة ومحد يعبرنا ههههههه

قلت الله يبارك فيك وعقبالك قل آمين <----- ياكبر الارنب

قال بهالمناسبة بنغير لكم غرفتكم من الدور الأول لغرفة ثانية بالدور الثالث لأن المنظر أجمل من هناك .. قلت قدام الله يقويك .. تونا مافكينا شناطنا وبالمرة جابك الله حتى نسألك عن الاتجاهات

شلنا عفشنا من الغرفة اللي حتى ما شفنا وش تطل عليه .. ورحنا للغرفة الثانية اللي لقيناها أوسع شوي من اللي قبلها .. ولقينا الجزء الثاني من المفاجأة

.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.
.

حاطين لنا قزازة شمبين يحبها قلبكم ينقالهم هدية ههههههههه

قلت وش ذا الله لايهينك ؟ قال هدية الاوتيل لكم بهالمناسبة .. قلت نشكر لكم لطفكم ومبادرتكم الرقيقة بس شلها على دربك وانت طالع

الحين حنا جايبينك نبي نسألك عن الاتجاهات بنصلي وتقول لنا خذوا اشربوا على حساب الاوتيل !! واخذها طبعا يسهر عليها الحبيب الليلة .. طيب كان حطيتوا لنا علبتين كولا اوفر لكم ياخي ههههههه

هذي غرفتنا الجديدة

وهذي الطاولة اللي كانت قزازتهم عليها ما امداني اصورها قبل ياخذها

أزرار التحكم في الاضاءة

ودورات المياه متشابهة في الحجم والتصميم ..

*
*

نمنا بعد التعب .. على أساس بنريح شوي .. اكتشفنا اننا ما صحينا الا على المغرب الساعة 8

والدنيا مطر شديد .. هذا المنظر اللي تطل عليه الغرفة

 

[دلوعة أبوي**]

أول شي انتبهت له في الغرفة هو شكل الفيش .. ثنائي من النوع اللي داخل بحفرة

وفيش شاحن اللاب توب ثلاثي هاهاها .. ومابي اسوي اي شي قبل لا اجيب فيش لأني ما اعرف اتنفس بدون لاب تب

صلينا .. واخذنا خريطة المدينة من الرسبشن .. وبعد ما حددنا عليها موقع الاوتيل .. طلعنا نبي نكتشف المكان وندور فيش.. بس ما قدرنا نشوف شي بهالمطر .. خذنا مظلة من بقالة قريبة من الاوتيل .. وقلنا نمشي لعله يوقف .. ولكنه ما وقف وكل المحلات مسكره .. حسنا بهالمطر لين اكتشفنا اننا وصلنا الرامبلا .. بالليل والمطر .. موب الرامبلا اللي خبركم

موحش وكئيب .. بس لقينا كشك iHola عنده فيش يونيفيرسال .. يركب على كل الأشكال وبكل الطرق .. اخذناه بحوالي عشرة يورو .. وتهزأت طبعاً كيف ما جبت معي فيش .. الافياش بريالين بالرياض وهنا بخمسين ريال !! بس تبون الجد .. وقعت في غرام هذا الفيش ما يقول لأ لأي نوع من الكيابل والمخارج ماشاء الله .. ما ودي ألقى واحد مثله في ساكو بعشرة ريال وأتحطم فـ بليز خلوني على غرامي فيه

صورة صاحب السمو الفيش حفظه الله وأبقاه

كحلوا عيونكم من جميع الزوايا

دورنا ماك اللي بشارع الرامبلا .. وتعشينا فيه وجبات دجاج .. والحكي بالإشارة في غالب المطاعم السريعة .. أهم شي مافيه خامون وعطونا اللي تبون

عطونا صلصة مع الأكل .. لما قريت المحتويات لقيت فيها خل الكحول .. الله يبلشهم ما خلونا نتهنى بشي كل شي دخلوا فيه كحول وخنازير

مرينا بقالتنا اللي اخذنا منها المظلة جنب الاوتيل بنجيب سناك وعدة الفطور لقينا فيها بنقالي يبيع واستانس علينا قال يعرف ناس كثير رايحين يشتغلون بالسعودية ويعلمنا ان الجبن الفلاني ما ينفع للمسلمين وخذوا من هذا لأنه خالي من الخنازير وأنا تراني مسلم .. فرحان فينا ما يدري اننا نبي الهجة من طاريهم الله يعطينا خيرهم ويكفينا شرهم ..
بغيت انشب بحلقه لا صرت مسلم وشوله تبيع أشياء كلها خنازير و خمور ؟؟ بس اكيد محد بيشتري منه وبيخسر وبيقفل محله ويجي مع ربعه اللي جايين للسعودية يبيعونها عندنا في البطحا خله يبيعها في العلن على غير المسلمين اصرف *_*

طلعنا الغرفة صار عندنا فكة الحين.. وبدت تكثر قروشنا

أحس انني كثرت حكي (<----- زين والا حسّيتي؟) ... والكتابة والصور تاخذ وقت طويـــــــــــل .. وبالتالي بأتوقف عند نهاية هذا اليوم ونكمل بالحلقة الجاية إن شاء الله ..

* خلاصة الحلقة الثانية *

- تذكرة مترو برشلونة 10 passes أحسن شي بالعالم
- حجز الفنادق في اوروبا بدون إفطار أفضل.
- اوتيل كرام كنظافة وترتيب حلو ولكن غير مناسب مع الأطفال (يوجد قنوات فاضحة)+ الغرف صغيرة.. والموقع بعيد نسبياً عن محطة المترو universtat (حوالي 10 دقايق مشي) .. بما ان مداخل الغرف جنب بعض فنسمع أهل الغرفة الثانية وكأنهم جالسين معنا وكم مرة نصحى من النوم على صوت فتح بابهم كأنهم يفتحون بابنا ..
- الشاور يستحق الإشادة في حد ذاته ..
- لضرورة خرمات الشاهي والقهوة .. من المهم إحضار غلاية الموية معاك بالشنطة ولا تضطر تلتزم بالقهاوي ولا غيرها..ومو كل الاوتيلات توفر الغلاية ولو وفرتها بتكون برسوم ..
- قراءة محتويات الصلصات والأجبان في المحلات والمطاعم والتأكد من خلوها من الكحول والخامون
- لاتنسون تجيبون معكم فيش أبو حفرة

 

[دلوعة أبوي**]

ما قدرنا ننام الليلة الماضية .. (نايمين النهار كله وتبون تنامون بالليل بعد

) .. الين جت الساعة 6 موعد الفجر .. وما أتذكر بالضبط متى نمت .. بس اللي متأكده منه أننا صحينا على الساعة 2 الظهر

وتخلل النومة هذي عشرين فزه بسبب اصوات الجيران والباب .. حقيقة هذا أكبر عيب بالأوتيل ..

وين نروح اليوم ؟ .. بما ان الجو صحو .. قررنا نتمشى في البورت .. ونروح للاكواريم ..

طبعاً أختكم المستحيلة الخبيرة المخضرمة ما يحتاج تسأل الرسبشن وش أقرب محطة مترو لوجهتنا وحركات العليمية ذي ..

مسكت الخريطة عملاً بمبدأ الدرعمة

وطابقتها بخريطة المترو وقلت بس هذي هي بالنظر المحطة المطلوب الوصول إليها اسمها Barceloneta .. ورحنا من محطتنا Univestate وغيرنا المترو في محطة Urquinaon ووصلنا لمحطتنا الأخيرة في ظرف ربع ساعة كل الرحلة .. وللمعلومية دخلتك للمترو تنحسب رحلة وحدة بغض النظر عن عدد المحطات اللي غيرتها أو المدة اللي قضيتها وانت حايس بين القطارات .. واذا وصلت محطتك اللي تبيها تلقى اجهزة مثل اللي دخلت منها أول مره .. ويكون خروجك منها .. بعض المحطات تحتاج انك تدخل فيها تذكرتك عشان ينفتح لك الباب .. وبعضها فيها بوابات حديد عاديه تنفتح بمزلاج .. وبعضها فيها بوابات زجاج تنفتح تلقائياً اذا وقفت قدامها ..

عاد بعد ما مشينا شوي وسألنا الناس عن مكان البورت بالضبط .. اكتشفنا اننا بنمشي شويتين كمان بعد الاشارة .. إلى أن نوصل للمينا ونشوف القوارب والاكواريوم وما جاوره .. وكان الجو شي خرافي سبحان الله .. عكس أمس المطر العنيف .. اليوم صحو و غيم وديم ..

مشاهد من المكان

وحمامة السلام هذي تشرب في أمان الله ..

شفت مصور ياباني مسنتر بنص الشارع يبي يصور هالنورس .. قلت مابدهاش خل اصوره انا بعد موب أطيب مني

*
*

وأخيراً .. وصلنا الرامبلا دي مار والجسر الشهير

 

[دلوعة أبوي**]

اللي يوصلنا بالاكواريم .. وسوق ماري ماقنم.. وسينما الآي ماكس ..

يظهر على يمين الصورة اوتيل W ..



وفي الجهة المقابلة .. نشوف هالمنظر

ياحلوهم ..


اخذنا فشار وكولا والذي منه من احد الاكشاك ومن الطبيعي ذكر ملاحظة أن الأسعار مضاعفة هنا عن البقالات .. سعر الكولا مثلاً يمكن كان ب 2.80 يورو .. وفي بقالة البنغالي كنا متغالينه بـ 1.20 يورو .. وفي سوبرماركت إلكورت إنجلس .. أظن كان سعر المجموعة نصف الدرزن بثلاثة وشوي .. يعني أول ما تجون تقضوا من إلكورت إنجلس نقنقة الرحلة كلها وخذوها معكم بطلعاتكم

دخلنا الاكواريوم

سعر تذكرة الدخول للكبير 17.50 يورو .. والصغير ناسية بكم بس يمكن 13 ..

مكان جميل .. مناسب أكثر للأطفال بيفرحون فيه جداً .. ولكن ما يمنع اننا استمتعنا فيه .. وخصوصاً في القنوات اللي نمشي فيها تحت المويه .. تمر القروش فوقنا .. أول مرة أدخل اكواريوم فيه هالحركة ..

التصوير بدون فلاش .. والناس أكثرها ما تلتزم .. بس أنا أسمع الكلام
وأصلا انعكاس الناس والنور يطلع بالقزاز والسمك يتحرك بسرعة و تطلع الصورة مهتزه .. نادراً ما أطلع بصورة تعجبني .. لكن هذي مجموعة من الصور اخترتها لكم ..

المدخل ..
وعند نهاية الممر يصورونك داخل فك قرش ويبيعونك الصورة عليها شعارهم للذكرى .. قيمتها كانت 8 يورو .. بس ما اخذناها اشكالنا ما طلعت حلوة أبد .. دوروها يمكن تلقوننا للحين بالستاند

جاكم الاعصار ما شي ٍ يعيقه

تجمعوا الربع .. منشنين على واحد من الجمهور بيتعشون عليه

 

[دلوعة أبوي**]

هذي سمكة الخفاش .. سبحان الله شكلها خطير .. وجاية مسفحة كنها بتطير

حضرات الركاب الرجاء ربط الأحزمة تأهباً للهبوط

نرجو منكم البقاء في مقاعدكم حتى إطفاء المحركات

حطت بسلام ولله الحمد ..




سقف القناة اللي نمشي داخلها ..

هنا كائنات غريبة عجيبة سبحان خالقها .. شفافة وتشوف شي بعروقها أزرق يمشي مثل الدم ..

تمازج لوني بديع .. للأسف ما ظهر بالصورة مثل الواقع .. السمك لونه رائع ..

هنا الضفدع كامل

والسيد البطريق وحرمه ..

لقينا باب كان فيه مطل على الأجواء الخارجية .. واجهرتنا الشمس حتى وهي ورا الغيوم .. بعد الظلام الدامس داخل

أما الكورة هذي نطيطة اشتهييييييييييتها بقوه .. بعد ما طلعنا من المكان نصيتها على طول بزعمي بألعب .. وزوجي يقول لالالا انهبلتي انتي .. بتلعبين لعبة بزران .. قلت والله بخاطري ألعب بعدين وش دراك انها للصغار يمكن فيها كبار يلعبون عادي ترى ماحنا في فانتزي لاند والا قرية الألعاب

ودرعمت كالعادة لقيت أكبر لاعب فيها عمره 10 سنين

ونظرات السخرية الطاغية بعيون زوجي لا تبشر بنسيان هالموقف

*
*
نرجع للمطل ..

أعلام بعض الدول .. ويظهر علم إسرائيل متربع بين أعلام لبنان ومصر

 

[دلوعة أبوي**]

طلعنا من الاكواريم .. وقلنا نرجع لمحطتنا ثانية (ناس ماقد ركبوا مترو وطاحوا في النعمة) .. عشان نروح مكان ثاني ألا وهو شارع الرامبلا .. (ملاحظين معي ياللي زرتوا برشلونة اننا أذكياء جداً؟)
الشاطر يقول لي ليه حنا أذكياء

والجواب بالحلقة الجاية ..

في طريقنا للمترو قابلنا كلب كأنه من فلم مئة مرقش ومرقش ^_^
بس انه حرررررررك .. عجزت القط له صورة راكزه ..

توجهنا لساحة كاتلونيا الأثيرة .. اللي تقريبا كنا نمرها كل أيامنا ببرشلونة

وحدة صدقت انها فنانة وقامت تلعب بالإخراج

يظهر في الخلف سوق إلكوت إنجلس ..

*
*

وبدأ إبداع الشحاذين في الرامبلا ..

ما يتحرك ولا حركة لين تحط له فلوس يقوم يرقص رقصة آلية ..

هذي رحمتها وانا اتخيل شكلها كل يوم تقوم الصبح تزبرق عمرها وتتصبغ وتلبس هالقراشيع .. عشان تثبت في مكانها واذا حطيت لها فلوس حركت أجنحتها يقال لها فراشة وصورت معك ..



وفي احد زوايا الشارع .. لقينا سوق الخضروات والفاكهة المفتوح .. ودرعمنا كالعادة

تمر خلاص وبرحي وسكري <-------- مشوها لي تكفون

 

[دلوعة أبوي**]

اذكر اني قريت مدح للعصير بالمنتدى .. فجربت عصير فراولة بالموز ماكان فيه خيارات ثانية .. بس ما كان ذاك الزود .. الموز مخرب الطعم ..

*
*

سمعنا هيصة برا وطلعنا نشوف وش صاير .. لقينا مجموعة شباب فلــّـة .. مجمعين عليهم الناس ويرقصون .. كأني أشوف So u think u can dance

فيه ملف فيديو لرقصهم .. بس سيرفر المنتدى ما رضى يقبلها .. إذا احد عنده الطريقة لرفع ملفات الفيديو ياليت يمدني فيها بليز ..

وكانوا الرسامين متوزعين بكل مكان .. مابين الرسم الكاريكتوري والرسم المشابه للحقيقه والرسم اللي تشك بينه وبين الحقيقة من دقة الرسم والفن اللي في أصابعهم ماشاء الله ..



وصلنا لنهاية الرامبلا عند محطة Drassanes وتمثال كريستوفر كولمبوس ماغيره

وختاماً .. سيارتنا الهامر اللي رجعنا فيها للأوتيل ^_^

* خلاصة الحلقة الثالثة *
- سوبرماركت إلكورت إنجلس أفضل مكان لعروض المواد الاستهلاكية ..
- الخريطة أحياناً ليست كل شيء

السؤال يختصر عليك لفات كثيرة .. ومن يسأل ما يتوهش على قولة المصريين
- تصبحون على خير

 

[دلوعة أبوي**]

شايفين الصورة هذي ..؟

سقطت "عمداً" من صور الحلقة الماضية .. ألتقطت بالتحديد بين صور البورت عند البحر والنوارس .. من الشاطر اللي يقولي وش تمثل الصورة ؟
.
.
.
.
.
.
.
.
.
.
.
.
.
.
.
.
.
.
.
.
.
.
.
صح عليكم شطورين
تمثال كريستوفر ماغيره .. اللي كان الصورة قبل الأخيرة في حلقتنا الماضية ..

أنا للحين ماني مصدقة أني وصلت لهالمستوى من الغباء يعني مصورته وانا في البورت .. وشلون ما ربطت انه هو بذااااااته النصب اللي مركوز نهاية شارع الرامبلا واللي لي شهرين أقرا تقارير الناس وحفظته حفظ؟ ما أدري

أحاول أعصر ذاكرتي لعلنا لما رجعنا محطتنا البعيدة اللي كنها أذن جحا .. كنا مقررين نروح للاوتيل نريح شوي قبل نروح للرامبلا .. أدور لي عذر يشفع هالغباء .. يعني كان الشارع قدامنا وشوله نروح للمحطة البعيدة ؟؟.. عشان تودينا لبداية شارع الرامبلا في ساحة كاتلونيا .. جايز برضو .. لأني قريت نصيحة واحد من الأعضاء كان يقول أنا أشوف ان الواحد لما يتمشى بالرامبلا يبداه من أوله بكاتلونيا .. وينزل لآخره نزول لأنه منحدر شوي .. بالتالي عندي قناعة تامة ان الواحد ما يبداه من تحت لفوق ^_^

المهم .. فاز الشيخ سعود بالجائزة وهي عبارة عن شيبس تسالي بنكهة الكتشب على حسابك .. الرجاء استلامه من أقرب ميد لبيتكم ..

يوم مشمس آخر

اليوم الأحد .. والشمس مشرقة وشقشقة العصافير تشنف الآذان <<<<< كنها مقدمة إذاعة المدرسة ..
كان ودي نطلع رحلة لجبال Pyrenees .. قريت عنها وشفت صورها وأكثر شي عجبني واشتهيته هو ركوب الخيل .. اشتهيت كذا اركب فرس أبيض في مكان كله خضار و جو بديع

<-------- هذي آخرة متابع ليدي ليدي ما أروعها

ولكن .. كالعادة .. ما صحينا الا 2 الظهر .. محنا وجه رحلات الصبح ..

طيب وين نروح وين نروح .. قلنا نوصل المترو وندرعم إلى أينما وجهنا وجوهنا .. في البداية كانت الوجهة لسقرادا فاميليا .. بس لما جلسنا بالمترو اكتشفنا اننا راكبين بالمترو الماشي بالطريق المعاكس .. بالتالي قلنا بدل ما نقوم ونغير ونحوس بهالقطارات .. خلنا نختار شي ثاني نروح له ويكون هالمترو رايح رايح له ما يحتاج نكلف عليه

بناء عليه .. توجهنا لمحطة Espanya حتى نتمشى بين القرية الأسبانية والمتحف الوطني والقرية الأولمبية في جبل منجويك ..

وكان لنا موعد مع المقالب وتعب المشي اللي على غير سنع ..

(تراها مقالب على خفيف لا تغركم فلاشات الإعلام .. ^_^)

المقلب الأول..
كنت مخططة نطلع بالتلفريك فوق الجبل .. ونتمشى هناك وننزل مشي إذا كان فيه طريق للمشي .. ولكن زوجي العزيز قال تلفريك ماني راكب .. تبين اركبي انتي وانا انتظرك هنا .. @@
شلون يعني ؟
أتمشى أنا لحالي فوق؟
لا طبعاً ما يصير
معناها نطلع للجبل مشي .. .. عادي رياضة مافيها شي .. و لا اننا نركب التلفريك الخطير

آمنت بالله .. وقلت يالله .. خل نبدا المشوار

تماثيل مقابل مبنى فيرا برشلونه .. اللي أحس ان وراه سالفة بس مدري وشهي

*
*

المتحف الوطني .. بيننا وبينه مليون درجة

..



ولازلنا نصعد

*
*

 

[دلوعة أبوي**]

ونصعد

حتى كان

v
v
v
v
v
v
v
v
v
v
v
v

المقلب الثاني ..

يوم الأحد إجازة ياعمتي المستحيلة ونعمة انهم فاتحين لكم لين 2ونص الظهر .. وحضراتنا ما وصلنا المتحف الا 3 وزيادة ..

اجل احنا وجيهنا وجيه متاحف وثقافة شعوب ؟

بس قاهريني عقب هالتعب والدرج كله .. توهم يذكرون يحطون أوقات الزيارة !! وش ضرهم لو حطو الأوقات تحت عند أول عتبة ؟
بس توووووبة ينقطع لساني إن طريت متاحف عقب هالمقلب

إلا إذا عرفت أوقات الزيارة قبل <<<<< ماش ما تصمل ..

واضح انه مو لحالنا اللي أكلنا المقلب ^_*

تظهر في الصورة النافورة السحرية .. مغلقة برضو .. عرفنا انهم ما يشغلونها الا الساعة 9 بالليل .. يا لجمال الحظ ..
كان خاطري فيها بقوة .. كأني قريت أنها كانت أجمل النوافير عالمياً .. أو أول من بدأ بدمج الموسيقى والإضاءة مع الماء .. المهم إنها حلوة يعني .. بس قلت إن شاء الله نرجع لها بعدين ..

الطيور آمنة مطمئنة في الموية دارية ان محد بيشغل النوافير قبل الليل ..

 

[دلوعة أبوي**]

والحين بنكمل درعمة ونحوس ورى اللوحات الإرشادية ندور هالقرية الأسبانية

ونمشي ..
ونمشي ..
ونمشي ..

وكل شوي يرقى بنا الجبل زود .. ويزيد انحداره ..

وأول من تعب زوجي .. كل شوي يجلس يرتاح .. ماش مامن لياقة .. عشان تعرفون ميزة السعسعة في أسواق الرياض ^_^ عندنا الرجال لو بيوصلون البقالة في مدخل الحاره يجيبون خبز شغلوا السيارة عجز لا يمشون.. (طبعاً لا أعمم وإنما أستظرف لا أكثر )
وأنا ماسكة بهالخريطة تقل من علم الحين .. وش بترجين من الخريطة يا عمتي؟ بساط سحري يطير بك مثلاً ؟؟ المشي ولا غير ذلك بيوصلك للقرية
ومازاد الطين بلة .. أن الشمس مشرقة من قلب .. والجو نوعا ما حر قياساً باليوم اللي قبله .. بس كان فيه غيوم تجي وتروح .. ونعمة انها ميب مطر شديد ينكد علينا الطلعة صح واحنا ماجبنا المظلات ولا حولنا شي نحتمي فيه من المطر ..

قابلنا في طريقنا هالفيل المنقلب على عقبيه

وأخيراً .. وصلناها ..

الجنادرية على الطريقة الأسبانية

رسم الدخول : 8.90 يورو للكبير ..
وفيه سماعات تزودك بمعلومات عن الأشياء داخلها بثلاثة يورو .. وترجعها قبل تطلع بكاونتر عند الباب ..

عطونا خريطة .. بس ما فهمنا منها شي لأنها بالأسباني .. مخلصة الخريطة اللي بالإنجلش ..

الساحة .. اللي يصفون فيها الطلاب طابور الصبح

دخلنا محل أعمال زجاجية .. عجبني ..
نماذج من أعمالهم الغريبة ..

هذي الصحون مخلوط فيها فضة

تخيلو هذي الصحون وانا مقدمة فيها مرقوق (هماه تراث) .. ياسلام عالاتيكيت

بئر الأماني .. مقفلين عليه بذمة الله أعلم من بياخذ الألوف المرمية داخله

 

[دلوعة أبوي**]

لقينا باب لمبنى فيه درج يحيط بهالمنظر

ومبنى ثاني فيه معرض لأحد الرسامين .. لوحاته رسمات طبيعية .. ما شفت فيه فن خطير ..

*
*

Kato >>>> من قال ان الأسبان ما يتكلمون عربي

والله فقدناهم بهالسفرة .. من جينا ما نشوف الا كلاب الله يعزكم .. يوم شفته فز قلبي وحن لديرتي ^_^ ..

*
*

باقي المحلات في القرية.. إما مطاعم وقهاوي .. وإما محلات تبيع تذكارات .. فقط .. لا ومن زين الطبايع ممنوع التصوير .. يعني بأصور تذكارات سقرادا فاميليا مثلاً وأسوي مثلها بالصين؟ راسمالها صورة بأحطها بالمنتدى دعاية لكم انتم ووجيهكم .. .. وين اللي يسوون فخار قدامك ؟ واللي تشوف تراثهم ومدري إيش .. ما أدري توقعنا اننا بنلقى أشياء أكثر من كذا .. والا اننا طفشانين وما دورنا زين .. الأكيد أنه ما عجبنا بذيك الدرجة .. وحسينا وقتنا وتعبنا ضاع هدر .. قلنا نطلع لعلنا نلحق شي ثاني نتونس فيه ..

وبما أننا للحين بهالجبل .. قلنا نكمل لين نوصل الملعب الأولمبي ..

وينك يالملعب الأولمبي ؟؟

نمشي ونشوف

حطوا لنا سلم كهربائي الله يجزاهم خير ..

ونقرا بهاللوحات وندور .. ونمشي .. نمشي .. نمشي ..

حتى لمحنا شي .. من بعيد

.
.
.
.
.
.
.
.
.
.
.
.
.
.

ماهذا الشيء ياترى ؟؟ ^_^



نزلت وقربت أكثر .. ياعيـــــني ياعيــــني

هذا وانا ما حطيت لهم قرش في بئر الأماني .. أجل شلون لو اني حاطة


جابه الله عوض يوم اننا ما قمنا الصبح ورحنا لرحلة الجبال .. صح ان راعيه موب مركبني عليه .. بس شوفته لحالها تسر الخاطر ..

وكملنا مشي إلى أن لاح لنا الملعب ..

 

[دلوعة أبوي**]

وما جاوره ..

ودخلنا من البوابة المفتوحة للجميع ..

معلومات عن الاستاد وتاريخ الاولمبياد

الترجمة عشان لو أحد سألكم وش مكتوب ما تنحرجون ويبين انكم ما تعرفون كتلوني:

(في عهد صاحبة الجلالة الرئيسة المستحيلة تم إفتتاح هذا الملعب ليكمل مسيرة الأولمبياد الذي سمح به جدها في عام 1936)

قلنا لكم تعلموا لغات ياخي لاحد يطالعني كذا

باقي أشياء داخل الملعب .. بس ما شفناها طلعنا على طول .. ما تحمس زوجي أبد أبد .. وتحطمت عن جد .. توقعت انه بيبدي شوية إهتمام بالرياضة بناءً على عشقه للمباريات والكورة .. بس على قولته الأولمبياد لا يعني كرة القدم ..

مشينا بالشارع شوي .. خلاص بندور طريق الرجعة .. وين أقرب محطة مترو .. اكتشفنا ان مالنا إلا حبيبنا الأولي

بنرجع نفس المشوار لنفس المحطة .. لأن الثانية يبي لها عنوة بالخريطة .. وحمار ً نعرفه أحسن من حصانً نجهله <<<<< حكمة بليغة

على الأرض كان فيه أسماء اللاعبين وآثار رجولهم .. موب لو أننا بهوليود أصرف بدل محنا نطالع جزم لاعبين ما نعرفهم ..

هذا شكل مقاس رجله 103


*
*

نفس الدرج اللي رقينا به .. نزلنا به ..


كان فيه هيصة وناس مجتمعة بهالمكان من زمان اول ما جينا .. وقفنا نشوف وش عندهم .. صاروا يلعبون بالزلاجات .. حاطين حاجز وعلى اللاعبين ينطون فوق الحاجز بدون ما يطيح .. الله من واحد تكسر وطاح وجهه ..

صفينا نتفرج .. ونريح شوي من المشوار ..



مندفع الأخ بكل ثقة ..

ولكن

هاهاها إضحكوا عليه إضحكوا عليه ..

.

 

[دلوعة أبوي**]

ومن جولة لجولة .. كل شوي يجي واحد وينط وتطيح .. وانا مسنتره بالكام وأصور من قبل ينط عشان يمدي الصورة تنلقط بوقت النطة
مسكت معي ماني متحركة من مكاني لين أصور واحد يجيبها صح

.
.

وجاااااااابها لابس الأزرق

وصلنا مستوى الأرض يااااالله لك الحمد والشكر .. وعدنا من حيث أتينا

متى نوصلك بس يا هالبرجين الحمر وبعدك المحطة ..

.
.

الحين وين نروح يا زوجي العزيز .. وين نروح ..
قال ترى فيه مباراة اليوم إن حصل أشوفها بالاوتيل عز الطلب .. طيب متى تبدا .. 7 بتوقيت أسبانيا .. والحين الساعة 6 .. قدامنا ساعة .. وش نسوي فيها؟؟
قلنا نروح سقرادا فاميليا .. وناخذ لنا تيك اوي من اي مطعم سريع هناك .. ونرجع لأوتيلنا ..


وها نحن في حضرة كنيسة العائلة المقدسة

شغااااالين فيها طقطقه لهم 120 سنة .. الله من زين المقاول

مساكين ما عندهم سعودي أوجيه كان تنفذ لهم المشروع بثمان شهور ^_^

.
.

بس يا عليهم فــــــن شي مو طبيعي .. يخرب بيت كنيستهم .. الله يهديهم وينير بصائرهم للإسلام ..

طابور التذاكر .. ناسية بكم يمكن كانت بخمسة يورو .. بس ما دخلناها طبعاً لأن فلوس التذاكر لدعم الكنيسة .. وأكيد ان المسلمين كلهم مثلنا ما كانوا يدفعون ويدخلون بالتالي عرفتوا ليه الكنيسة للحين ما اكتملت ؟

<-------- والا ما عاقهم الا خمستك انتي وربعك


أخذنا وجبة من كنتاكي اللي جنب المترو .. ودايركت عالاوتيل .. وصلنا يمكن 7 ونص هيك شي .. ريّحنا وأكلنا وجلس زوجي يقلب بالقنوات ويقلب بالنت يدور محطة تنقل المباراة .. بس لا حس ولا خبر .. قلنا يمكن المباراة بتوقيت شي ثاني غير أسبانيا بتوقيت السعودية 7 يعني عندنا 6 .. بس تأكدنا ان توقيتها كان بتوقيت أسبانيا .. وناسية كانت برشلونة مع مين .. المراد إنه ما شافها ..
قلنا نطلع نكمل الليلة في الرامبلا ..

بس قبل ما نطلع كنت أدور بالنت عن حجوزات قصر الحمراء في غرناطة .. لقيت موقع الحمراء يبيعها بس كان فيه مشكله عند الصفحة اللي أختار فيها وقت الزيارة .. ما يتحدد عندي البوكس مدري وش المشكلة في المتصفح .. أحسن هذا اللي يجيب له ماكنتوش قبل يسافر بأسبوع

هذا وقت أتعلم فيه؟
قلت أسأل الرسبشن لأن رحلتنا لملقا بكره .. وأبي أضمن تذاكر القصر ..

سألتهم وقالوا تقدرين تشترين التذاكر من أي صراف لبنك لاكاشيا .. قلت ياهلا ومرحبا بس كذا ؟ وانا أحسب لازم أروح بنك BBV مدري وشو .. وكل ما مريته بساحة كاتلونيا لقيته مسكر ويفتح لين 12 الظهر ..
وين أقرب صراف طيب؟ قالوا عند راس العاير وانتي بطريقك للمترو تشوفينه ..

لا تغركم الجدران المقشعة .. تراه شقردي والتذاكر أصلية


والحمدلله أني رحت وحجزت قبل نسافر .. لأن تذاكر بكره وبعد بكره واللي بعد بعد بكره كانت مخلصة .. أقرب موعد كان بتاريخ 23 سبتمبر والساعة 7 بآخر العصر .. يا إلهي .. ما يذكركم بشي هالتاريخ

نعم نعم .. إنه المقلب الثالث .. نفس يوم عرض السيرك اللي كنت مخططة أحضره

وهذي فيها سفر لغرناطة ساعتين رايحين ساعتين جايين ومافيه أمل نرجع قبل وقت العرض وأصلاً بنرجع تافلين العافية ما يحتاج احنا خلقه نتعب من تنقلنا بين المحطات ومتابع الخرايط شلون عاد واحنا جايين بعد مرمطة سفر ومشي بالقصر ..؟

عادي عادي .. يعني هو أول شي خططت له ولا صار ؟ أنا أريد وأنت تريد والله يفعل ما يريد ..

وقصر الحمراء أولى من سيرك لا راح ولا جاء <-------- أسلوب تعزية النفس شغااال على ودانه طول الرحلة ..

المهم .. وصلنا الساحة الجميلة .. ونافورتها الرايقة بالليل

 

[دلوعة أبوي**]

أول مرة شفتها فيها .. كنت أحسبها هي النافورة السحرية ^_^ على نياتي ما دريت ان بكل قرنه طاقين لهم نافوره ههههههه



إليكم هرقل زمانه شايل على عاتقه الكره الأرضية

هذا واحد يرسم على اسطوانات الأغاني .. ويركب عليها عقارب ساعة .. ويبيعها بعشرة ..

حركاتهم رهيبة تنفع لمعارض الفنية تبع المدارس ..


واحد ثاني عارض بضاعته

لاحظت أن كل يوم يجون ناس مختلفين .. وصنعات مختلفة .. يوم فيه رسامين .. يوم فيه بياعين ساعات .. يوم بياعين طفايات سجاير .. ما ادري هل فيه نظام يحدد الصنعات لكل يوم .. عشان يصير فيه تنافس بينهم .. صارت تجارة مو شحاذة ذي ..

مرة من المرات شفنا الشرطة واقفة عند واحد يبيع مثل هالساعات .. قاعد يشيل عفشه بسرعه .. والشرطة كملت طريقها لقدام .. واحنا وراهم نلحقهم بنشوف هل انهم محددين ساعة معينة للناس عشان يشيلون عفشهم ويروحون كناحية أمنية يعني .. والا كيف .. سبقناهم ورحنا للكشك القريب iHola قلنا بنسوي نفسنا نشتري ونشوف .. جلسنا نسأل وكذا .. وصاحب المحل دخل جوا شوي .. لين مر الشرطي .. اللي مر قدام المحل وراح ما قال لهم شي .. قلنا عجيب ! وش الحكاية؟؟

راح للي بعدهم مر فيهم ولا قال لهم شي ..

اممممم أجل وراهم على الضعيف ابو الساعات شيّلوه عفشه ؟ نروح نسألهم؟<------------- اللقافة في قلوبنا

أكيد أكيد ما معه فسح بالبيع وقالوا رح ابسط بعيد

.
.

أخيراً لقيت محل الفلافل اللي يقولون انه بالرامبلا

اللي مضيع سعودي يجي يلقاه هنا ^_^


قائمة الأسعار والمنيو

زوجي جرب الفلافل قال حلوه .. وانا ما كنت جوعانة .. فأخذت سوربيه ليمون

ما عجبني .. كله ثلج وسكر
حطوا عصير برتقال الربيع بالفريزر ويطلع أحلى منه مية مرة

*
*

وبأختم حلقتنا اليوم بهاللقطة الفنية الإحترافية .. اللي ما تغلى عليكم

.
.
.
.
.
.
.
.
.
.
.
.
.
.
.
.

صورة البدر المشع في ليلة برشلونية فاتنة

<----------- الحين معطلة الخلق وصاجتنا اصغر في الصور واشيل واحط والناس تنتظر بس وش هاللي بتخترعينه .. عشان نقطة بيضا مشهبة في خلفية سوداء ؟؟

معليش .. إن شاء الله انكم على أجر .. وصبركم وتحملكم إياي تكفير ذنوب بحول الله

* خلاصة الحلقة الرابعة *
- لا تدرعمون لأي مكان إلا وأنتم دارين متى يفتح ومتى يسكر خااااصة يوم الأحد ..
- أعزائي المصابين برهاب الأماكن المرتفعة ومن يتخيلون أنهم مصابين به .. اعتبروا التلفريك شر لابد منه *_*
- زوروا في مزاراتكم الأَولى فـ الأولى في قائمة الإهتمامات .. لازال إحساس ان اليوم راح بدون فائدة تذكر مسيطر علينا .. وبرشلونة مليانة أماكن للزيارة .. ضاقت نروح ملعب اولمبي ومحد فينا مهتم فيه ؟ .. كامب نو كان أولى بنظر زوجي .. بس لو رحنا كامب نو .. يمكن ينتهي الغرض من السفر خلاص يقول رجعنا السعودية ههههه
- القرية الأسبانية إذا هي على الشكل اللي شفناها فيه.. تنحط بآخر قائمة المزارات .. أروح أسوي شوبينق صح من مولات أصرف منها مية مرة ..
- الحرص على شراء تذاكر قصر الحمراء بالنت مع حجزكم للسفر .. أو من صرافات بنك لاكاشيا قبل الموعد المتوقع بثلاث ايام ..
- حاولوا تنامون بدري عشان تصحون نشيطين شبعانين نوم ومرتاحين بدري .. اليوم طويل ويمدي الواحد يقضيه بأشياء كثيرة ويحلل الرحلة .. لاحقين على النوم ..

وتصبحون على خير .. أي تصبحون؟ .. تظهرون .. أو تعصرون ..
مابغيت أنام قبل ما تخلص هالحلقة .. عاد من زينها عاد

سيو

 

[دلوعة أبوي**]

البارح .. كنت حاسة أني فاقده صور .. أتذكر زين أني مصورة ساحة كتلونيا مثلاً صور أكثر من كذا .. وين راحت الصور ؟
وكان فيه مبنى بعد غريب شكله .. عمارة عادية بس حاطين في سطحها أسلاك شائكة (أسيام بمعنى أدق ^_^) ملفلفه على بعض بإرتفاع عالي .. وصار شكل فني .. أول ماشفته صورته بس ما كنت أدري وشهو .. بعدين لما قلبت بأحد الأدله السياحية اللي كانت في الأوتيل .. لقيته هناك .. ولازلت ما أدري وشهو <<<<< هذا شكل وحده بتستفيدون منها؟

وفي موجة التفكير والتذكر .. ذكرت اننا مرينا بالبيت اللي صممه المهندس والفنان قاودي .. وخلوه متحف "كازا باتلو" .. أول ما وصلنا برشلونة لأننا لما جينا بالقطار نزلنا بمحطة قراسيا وهو جنبه .. و ذكرت اننا رحنا نزوره في بداية الحلقة السابقة قبل لا نروح لقرية أسبانيا ومقالب الأحد الشهير ^_^ .. كان قريب من الاوتيل وطلعنا للقرية من محطة قراسيا نفسها ..

وأذكر جداً اني صورته عشرطعشر صورة .. .. بس وين راحوا ؟؟ عسى ما حذفتها من الكام على اساس اني ناقلتها للجهاز وسقطت سهوا؟ .. كلش جايز والفهاوة ميب بعيدة عن حالاتي ..

وغرقت في موجه عارمة من الأحداث المتلاحقة وتذكرت اني في لحظة ٍ ما غيرت الميموري حقت الكاميرا وانا في المترو .. طيراااان رحت وجبت الميموري الثانية ونقلت الصور اللي فيها .. بس ما لقيت غير صور بيت قاودي .. أما صور المبنى أبو أسيام شكلنا نسيناها عندهم ^_^

صورة له ولبيت جيرانهم

بيعجب المهتمين بهندسة الديكور والهندسة المعمارية .. أما احنا ماجينا نتفرج على تصاميم بيوت محد بيعرف ينفذها عندنا بالرياض فـ ليه نروحله ^_^
ياحسرتي عليك يا قاودي رحت ما دريت اننا بنمر على إبداعاتك مرور الكرام ولا احنا مقدرين فنك .. اشوى انك ميت والا كان انتحرت من الحسرة <------------ الا بينتحرون هاللي منتظرين التقرير عشان يقرون هالمصالة

طيب خلاص اتوب

نبدأ حلقة اليوم .. مع

* صباح الخير يا ملقا *

كانت الشنط جاهزة من الليل .. ومشيكين على كل الأغراض وأننا ما نسينا شي وكذا .. شيكت في موقع رنفي عن القطار متى يمشي الصبح .. على أساس ان رحلتنا الصباح بدري الاقلاع الساعة 7:55 .. فلازم نكون في المطار قبلها بساعة على الأقل .. فلقيت انه بيكون موجود في محطة قراسيا الساعة 6:30 الصباح .. وبعدها بنص ساعة القطار الثاني .. قلنا مناسب .. يبي لنا نقوم على 6 أجل .. علماً بأن الساعة وقت اتخاذ ذاك القرار كانت 2ونص .. ..
وخبركم زوجي القدير إنسان ليلي ما عجبه اني حاجزة هالوقت المبكر (اجل ماخذ اجازه من الدوام عشان يقوم يداوم هنا؟^_^) .. لكن ما كان فيه رحلات صباحية غيرها .. واقرب رحلة بعدها الساعة ست العصر ..

شخصياً أفضل ان الواحد يسافر الصباح بدري .. عشان يكون طلع بوقت الشيك اوت .. ووصل مراده بوقت الشك إن في الأوتيل الثاني .. ويكون معه اليوم كامل يستغله .. أما اللي يسافر العصر لاهو اللي استانس هنا ولا هنا ..

صحينا الصباح فعلاً الساعة 6 .. والدنيا ليــــل .. توه الفجر أصلا ست وعشر ..!! .. وما تشرق الشمس الا 7 وزود ..
كنا جاهزين عند الرسبشن على 6 و20 دقيقة .. يا سلام سلم .. ياترى يمدي والا ما يمدي ؟؟
أخذ موظف الرسبشن البريطاني البطاقة الائتمانية وسحب المبلغ .. وعطانا فاتورة بالمبلغ وخيرنا بين يكون السحب بالريال أو اليورو .. قلنا خله بالريال .. كذا شي نفسي الريال أريح .. ولا ندري شالفرق ؟ اللي عنده معلومة يدلنا ويدل غيرنا معنا ..

قال ان عليكم فاتوره بمدري كم قيمة مشروبات من الميني بار .. قلنا أي مشروبات؟ ما خبرنا اننا ماخذين شي .. إلا كانهم حاسبين علينا قارورة الشامبين اللي راحت في بطن الموظف اللي استقبلنا وكانت في الأصل هدية <<<< كنها سالفة الشيبس والبي ام حقات الشيخ سعود

قال غريبة .. والا ما اخذتوا شي ؟؟ قلنا لا كل اللي عندكم فودكا ومارتيني وحنا ما يضبط مزاجنا إلا البن الهرري والهيل شوفة عينك مسلمين ماعندنا ذا الخرابيط .. قال موب شرط مشروبات .. يمكن شوكلت والا فصفص .. قلنا يابن الحلال ما لمسنا اغراضكم حتى رح تأكد .. قال اجل خلاص وسامحونا على اللخبطة مدري شلون الشباب حاطين انكم ماخذين شيئين بعد ناسية وش كانوا .. المهم شال المبلغ الزايد بكل أريحية وطبع ورقة ثانية بمبلغ الغرفة فقط ..

طيب يابوالشباب ترى ورانا قطار وانت كن ما ودك اننا نروح ^_^ قال متى قطاركم ؟ قلنا بعد خمس دقايق .. قال أبشركم ترا مستحيل توصلون للمحطة .. يبي لكم عشر دقايق مشي .. وأنا من رايي تاخذون تاكسي للمطار أضمن .. قلنا خابرين انه أضمن بس لو انك مخلينا نمشي على طول بدون هذرتك ولخبطتك كان حنا واصلين المطار الحين ..

وللمعلومية هنا في أسبانيا الجميلة مافيه شي اسمه تكسي تأشر له بالشارع وتركب .. يا تركب من المكان اللي يتجمعون فيه التكاسي والا ينطلب من الاوتيل وهذا اللي صار .. وكلها دقيقتين وهو واقف عند الباب ..

صورة واحنا في الطريق للمطار .. والدنيا ظلام دامس

وصلنا المطار على الساعة 7 إلا عشر تقريباً .. يا سلام على الفلة ..
بس أخذ مننا التكسي 30 يورو .. وهالسالفة كااااشخه فيها عند زوجي شفت كيف وفرتك لما قلت لك خلنا نجي بالقطار ههههههه
يوم نجي تكلفنا 6 يورو .. والحين 30 يورو .. وعليكم حساب الفرق .. قايلة لكم اني ذيبة وعندي نظر لا تغركم الفهاوة المؤقتة ..

نزلنا التكسي عند الصالة اللي فيها خطوط Ryan Air .. في Terminal B .. يجي وصف الصالات بالمطار بالتفصيل في رحلة العودة إلى برشلونة إن شاء الله ..

المطار فاااااااااااضي .. شالسالفة الظاهر ربع زوجي واجد محد يسافر هالحزة تقريبا مافيه الا عشرين شخص ..

هنا طوابير تحميل العفش وقص البوردنق (الطبيعي)

 

[دلوعة أبوي**]

وليش قلت طبيعي .. لأن هالخطوط عليها نظام اقتصادي ماقد شفت مثله ^_^ .. لما تحجز اونلاين يقولك لازم تسوي تشك إن بالنت .. إلزامي .. وتطبع البوردنق لكل راكب في مدة تبدأ من قبل الرحلة ب 15 يوم .. إلى قبل الرحلة بكم ساعة ..
إذا ما طبعت البوردنق تفرض عليك ضريبة قدرها 40 يورو تدفعها عن الراكب في المطار *_* طيب ابفهم وش مزعلكم لهالدرجة؟ خلاص أبطبع في البيت راسمالها ورقة ترى ..

رحنا بالبوردنق وبالشناط قالت لنا الموظفة خذوا بوردنقكم وروحوا لمكتب الخطوط تلقونه الناحية الثانية .. قلنا طيب

ونروح لمكتبهم .. اخذوا الجوازات وختموا على البوردنق الكشخه حقنا .. وقالوا ارجعوا لخويتكم اللي جيتوا منها ..

رحنا وخذت الشنط .. واحنا كنا مشترين الوزن مسبقاً وقت الحجز على اساس يكون 15 كيلو .. وفيه خيار ثاني 20 كيلو ..
بس بعد ما تحدد خيارك خلاص تلتزم فيه .. الكيلو الزايد ينحسب بعشرين يورو .. وماعندهم تفاهم في هالمواضيع ..

أما بالنسبة للشنط اللي تدخل معك بالطيارة .. محددين انك تجمع اغراضك كلها وتحطها بشنطة وحدة .. يعني لاب توب وكام وشنطة يد واكياس من هنا وهناك ... حطهم سوا بشنطة محدده ابعادها 55 سم في 40 سم وما تتجاوز 10 كيلو ..



رحلتنا طالعة الأولى على الرحلات عشانها تنام بدري وتذاكر أول بأول

توجهنا لصالة بوابات السفر ..

والنور بدا يطلع ..

شفنا سرا طويـــــــــــــــــــــــــل ملياااان عالم .. كن الناس تاركين المطار كله و تجمعوا فيه .. ومن البديهي أي شي فيه نحس بيصير لنا علاقة فيه بالتالي كان السرا الطويل في بوابتنا ..

وقفنا معهم .. وباقي على الرحلة نص ساعة .. شلون طيب مفروض نركب وش ينتظرون .. بس عشان يعجلون بالناس كانت الموظفة تمشي على اللاين وتشيك البوردنق أسرع .. وصلتنا وشقت الورقة ياروحي على هالبوردنق الإكه ..


البوردنق اللي مايمديكم عليه ..

ركبنا الطياره بسرعه الحمدلله .. وكان ودي أصور المقاعد بس كانت تغص من كثر الناس وما فضلت اصور..
المقاعد جلد .. وكبيرة نسبياً .. بشكل عام حليوه .. بس كل شي فيها اقتصادي حتى مضيفاتهم لبسهم كنه من الهرم هههههه ولا فيه بهرجة مكياج وألوان كلش هادي ..


مطار برشلونة من الشباك

وبدت تتحرك الطياره .. وتسرع شيئاً فشيئاً .. وانا مسنتره بالكام أترقب اللحظة المناسبة للقطة جيدة


وأخيراً قنصت برج المراقبة بدون ما تهتز الصورة

 

[دلوعة أبوي**]

وأقلعنااااا هيـــــــــه

ودااار بنا الكابتن حتى يحطنا على السحابه اللي تودي لملقا

الحين لو تكرمتوا اسمحوا لي أفرد عضلات الفخر والاعتزاز بالنفس .. لأني صورت صور أعتبرها من أجمل إن لم تكن أجمل صور أخذتها بحياتي .. وترى حتى لو ماهي شي خطير بنظركم أنا مبسوطة فيها وبأستثنيها من طلبي لكم في بداية التقرير انكم تعتبرون تصويري تحت خط السيء


احترت وش اختار منهم ولقيتها صعبه على قولتهم كنهم بناتي مقدر اختار بينهم فقررت احطهم كلهم وانتو اختاروا اللي يعجبكم ..

.
.
.
.
.
.

.
.
.
.
.
.

سبحان خالق كل شيء ..

.
.
.
.
.
.
.
.

.
.
.
.
.
.
.
.
.
.

( ............................. )

الصمت أبلغ من الكلام ..

.
.
.
.
.
.
.
.
.
.
.
.
.
.

.
.
.

 

[دلوعة أبوي**]

.
.
.
.
.
.
.
.
.
.
.
.
.
.
.
.
.
.

يااااااه .. ياربي على هالجمال ..
شايفين البقعة الحمراء على اليسار ..؟ هذا نور الشمس الساطع بين الغيم .. على الغيم ..... شي راااائع .. ولا جابت الصورة شي من اللي شافته العين على الطبيعة .. يارب لا تحرمنا لذة النظر إلى وجهك الكريم ..

.
.
.
.
.

وشوي شوي صارت الشمس تسطع بالقزاز .. فقفلت الستاره وطلعت كتاب اقراه ..

.
.

لما قربنا لملقا .. شفت هالمنظر ..

جامعين المويه فوق الجبل .. .. سد يعني مثلاً ؟
يخافون ما يجيهم مطر مثلاً مثلاً ؟


شوي إلا تجيني المضيفة تقولي قفلي الكام حقتك مادمنا بنهبط ..

طبعاً فيه واحد متشقق من الفرحة قاعد جنبي ههههههه

مسكها علي كل ماشافني مطلعتها قال دخلي الكاميرا بلا مشاكل .. والله ياخي ما تسوي شي وكل الناس تصور بالطياره وش بينك وبينها


لاتقول تفضحني المضيفة والا ترى بتطيح بنا الطيارة .. مصورة هالمنظر مصورته الله لا يعوق بشر

كل الجبال مزارع زيتون مصفوفة بالملي ماشاء الله .. كان ودي أزور مصانعهم بعد .. لكن ما شفت شي يدل على زيارة السياح للمصانع ..




غيم وبحر وخضار .. وش بقى

.
.
.
.
.

وحطت الطائرة أخيراً بعد رحلة آسرة ....

كانت الساعة تقريباً 9 وربع لما نزلنا .. مبسوطين جايين بدري بنحلل اليوم صح .. رحنا ندور المكان اللي نستلم فيه الشنط ..

مشينا مشينا مشينا ورى اللوحات .. لقيناه تحت ونزلنا .. جلسنا ندور من سير لسير

ولكن !

مالقينا حق رحلتنا ..

أفأ ياذا العلم ..

لا يكون ضاعت الشنط ؟ مقيولة تحصل بأحسن العائلات شدعوى عاد حنا حظنا يكسر الصخر ؟

لالالا يابنت فاولي خير .. دام ما بعد لقينا السير الخاص بالرحلة ليه نقول انها ضاعت ..

رحت ادور باللوحة اللي يكتبون فيها الرحلات .. لقيت قدام رحلتنا انها في السير رقم 42 .. رحت له مع اني كنت عنده ماشفت اسم الخطوط عليها .. وش لقيت ؟

لقيت نفس رقم الرحلة .. بس الخطوط لشركة Spain Air ..؟؟

وش السالفة ..؟

سألت موظفة كانت عند السير .. قالت وش خطوطكم قلت رايان اير .. قالت هذي الشنط تبع شركتنا فقط .. روحي اسألي عن شنطكم عند مكتب شركتكم .. قلت طيب وين ألقاه ؟ قالت شوفيه هناك مقابل السيور حقت الشنط .. طيب طيب ..

رحت .. لقيتهم حاطين ورقة مكتوب عليها اذا عندكم استفسار حول شنطكم الرجاء مراجعة المكتب تبع الخطوط الموجود في الصالة رقم T1 (الظاهر)

قلت وين ألقى هالصالة .. قالوا ترقين فوق من هالدرج (وياكثر درجهم وياتشابه محلاتهم) وإسألي عنه قلت يافرحة ما تمت ... وعلى بالنا جايين بدري .. طيب طيب

ونرقى فوق .. ونمشي نمشي نمشي قطعنا اللي مشيناه في جيتنا كله .. ورجعنا للصالة اللي كنا فيها أول ما نزلنا من الطيارة .. وسألنا عن المكتب وينه .. وبرضو أمشوا أمشوا أمشوا يا عساهم اللي منب قايله حاطينه آخر مكتب في آخر صوح بالمطار .. يوم وصلنا قالوا .. آه الشنط تلقونها بالسير اللي تحت .. !!!

تبون اصفقها والا اصفقها ؟

قلت توني جاية من تحت لا كان فيه سير شغال رغم انه مكتوب على اللوحة .. ولا كان مكتبكم مفتوح ..

قالت لا الحين مفتوح المكتب .. إسألي هناك .. احنا فقط مسؤولين عن الحجز والتشك إن للمسافرين المغادرين هنا بهالصالة .. قلت وانا جايبة الكلام من راسي انتو اللي حاطين ورقة تقولون ارقوا فوق !
قالت ايه رفيقتي توها الحين تفتح المكتب لأنه يفتح الساعة 10 الصبح .. والحين صارت عشر .. روحي بتلقينها تحت ..

يا صبح ما اطولك ..

رحنا تحت

ونفس السالفة تنعاد وتنقال لكل موظفة .. قالت بالنهاية .. بتلقونها بالسير حقها ؟
قلت وين السير حقها طيب ... كان مكتوب باللوحة 42 وما لقينا اسم الخطوط عليها .. قالت لا من قاله؟ السير حقنا رقم 40 !! يا عزي لحالنا بس ..

شكله .. والله أعلم .. اننا كنا واصلين بدري شوي .. ومستعجلين وكنا نحسب اننا متأخرين ..
لأن اللوحات ماهي صحيحة دائماً .. تتغير المعلومات على طول .. يمكن بالوقت اللي قرينا فيه ان سيرنا كان 42 .. بس لأن الشنط ما كانت جاهزه حطوا شركة سبان إير مكانها وغيروا السير لواحد ثاني ..

المهم .. رحنا للسير اللي كان في الركن القصي من الصالة (موعودين بالمشاوير) ولقينا شنطنا تلوح لنا من بعيد .. وحيدة .. تنتظرنا بكل شوق .. وكان اللقاء حميماً بعد هذا البحث الدؤوب .. ساعة كاملة من وصلنا واحنا ندبك بهالمطار .. بس الحمدلله انها ماضاعت ..

.
.

الحين وين نروح ؟

نروح للقطار طبعاً ما يبي لها مشاور عقب نصري الساحق ..

رحنا ولقيت فيه محطتين بملقا .. فسألت الموظف عن اوتيلنا أيهم أقرب له .. قال روحوا محطة زيمبا مدري وشو ماريا ... انا حفظت ماريا وزوجي حفظ الاولى <<<<< ذكية وهقته بالصعبة وطلعت منها هي
وشرينا التذكرتين بـ 2.70 يورو .... الله يديم الرخص يا هوه

نزلنا الدرج ولهينا في اغراضنا .. كان فيه مجموعة من السود شكلهم شبهه .. وزوجي حريص خلقه موب ناقص يقابل سود .. طول الوقت ينبهني دخلي البوك انتبهي لا تفتحين الشنطة .. والجوازات دخليهم زين لا يطيحون .. إلخ إلخ .. لين جا القطار وركبنا في مكان بعيد عنهم ..



يا شين التقليد ..

عندهم ايكيا مثلنا القلودين .. ^_^




طيب الحين مفروض على حسب الجدول اللي شفته .. ان محطتنا تكون الرابعة بعد ما حرك القطار .. واحنا تعدينا السادسة ما جت .. ..

لا لا لا ....

بليز ..

...... بليــــــــــــــــييييــــز

لا احد يقول لي اننا راكبين القطار الثاني .. :*_*:


انا اكتشفت لحالي ..

مكتوب على الباب خط السير متجه لـ فنخرولا .....
واحنا مفروض يكون سيرنا بإتجاه ملقا .... الاتجاه المعاكس .....


عادي عادي .. أول محطة تجي ننزل ونغير فيها القطار .. تعودنا على الفهاوة ماعد تأثر فينا ..

.
.
.
.
.
.

نزلنا في >>>>> توررومي مدري كيف ينطقونها Torremuelle

 

[دلوعة أبوي**]

لقيناها خلا .. أجل هذي محطة؟

صح انها ديرة ربيع وعاصمة التكنلوجيا لو قارنتها بمحطاتنا .. بس بالنسبة لهم هذي بر ومنطقة نائية ..

طيب احنا الحين شلون بنروح بشناطنا للرصيف المقابل .... ناظرنا الدرج مالقينا درج كهربائي .. يقطع ام الحالة .. والله ما نشيل الشنط بهالدرج عشان نرقى بها مره ثانيه .. ناظرنا بعض .. ورا ما نطب بس ونروح مباشرة للناحية الثانية بلا نزلة وطلعة بهالدرج والشنط .. ^_^ .. بس بسرعة قبل يجي القطار ويصدمنا ونبلش العمر واحد محد معوض عنا وعسى ما يرفعون على اهلنا قضية عشانا خالفنا النظام وقطعنا السكة الحديد وخربنا قطارهم ..

وبينما نحن نتجاذب أطراف الحديث بهالخصوص .. مر في الناحية الثانية شايب وش حليله .. شافنا بشناطنا واقفين .. قام أشر على المصعد اللي ورى الدرج ......... بكل بساطة



<------------------- ياربيه وش خليتوا لطاش ماطاش !!



المصعد اللي انعمينا عنه

ترى الواحد إذا مانام زين .. ما ينشره عليه .. وعز الله اننا ما نمنا ابد .. (مثل حالتي الحين وانا اكتب الحلقة.. لذلك لاحد يشره)




الناحية الثانية من المحطة .. تتضح انها ميب محطة .. تنزل من القطار وتدخل على المدينة أو الضاحية هذي على طول ..

وتشتري التذاكر من مكينة جنبنا .. استغربنا قلنا شلون يركبون الناس وبس .. مافيه احد داخل القطار يفتش .. ولكن اكتشفنا ان محطة الوصول مطلوب منك تدخل التذكرة حقتك في الجهاز عشان ينفتح ..


خلاص .. الحين وصلنا المحطة الجميلة .. فياليا ماريا زمبرانو ..

رحنا بنسأل وين نلقى الاوتيل .. واكتشفنا ان الاوتيل في نفس المحطة .. .. عليه موقع فتـــــاك ..




عن إذنكم الآن بطلع عندي موعد مستشفى .. وأرجع إن شاء الله أكمل باقي الحلقة إذا أمداني وكان فيني حيل .. كان بإمكاني أصبر وأخليها كلها مرة وحدة .. بس عشان يلقى الشيخ سعود شي جديد يقراه بعد انتظاره .. وقسم بالله لو تدري بالحالة من الإرهاق اللي انا فيها الحين .. كان تحلف علي ما أحط إلا حلقة كل شهر ..

​

 

[دلوعة أبوي**]

المقصود الحلقة الخامسة وليست الرابعة .. بس انتهى وقت التعديل كالعادة .. عدلوها انتو .. ^_^

.
.
.

نرجع لباقي حلقتنا ..


عشان أثبت لكم مدى الارهاق وعدم التركيز اللي كنت عليه .. كنت كاتبه تعليق على صورة بدون ما احط الصورة

الله يخلف على أمي بس ..


والمنتدى ما يسمح بالتعديل بعد مرور ساعة على الرد ..

*** نداء للمراقبين والمشرفين الكرام

معليش ياليت تزيدون المدة وتصير يوم على الأقل .. نظراً لظروف المفهين اللي ما ينامون زين ومضطرين يطلعون برا البيت .. ^_^
ولاهيب حالة أراسل المشرف عشان يعدل لي حرف والا لينك والا صورة كل شوي .. عز الله معزبنا الليل والنهار بيصكني بلوك من كثر الازعاج



صورة الناحية الأخرى من المحطة - مدينة Torremuelle

وكان هذا التعليق عليها


اقتباس:
الناحية الثانية من المحطة .. تتضح انها ميب محطة .. تنزل من القطار وتدخل على المدينة أو الضاحية هذي على طول .. وتشتري التذاكر من مكينة جنبنا .. استغربنا قلنا شلون يركبون الناس وبس .. مافيه احد داخل القطار يفتش .. ولكن اكتشفنا ان محطة الوصول مطلوب منك تدخل التذكرة حقتك في الجهاز عشان ينفتح ..
.
.

بأتكلم شوي عن قطار ملقا هذا ..

يربط بين ملقا من الشرق ... مروراً بعدد من المحطات منها المطار .. ومدن توررومولينوس .. بنا المدينة .. وسوق Plaza Mayor اللي كل ٍ يمدحه بس للأسف ما كان فيه وقت نزوره .. حتى آخر نقطة مدينة فنخرولا .. لو كملوا جميلهم ووصلوه بماربيا .. كان يطلع أطلق شي .. .. هو ما عجبهم على أساس انه مو مهيأ لاستخدام ذوي الاحتياجات الخاصة .. وناوين يسوون واحد ثاني شغالين فيه بقوة في المطار .. والنية انه يوصل لماربيا .. حسب ما قريت

أما هذا كله وما عجبهم .. لو يجيبونه عندنا بدل قطارنا اللي يكحكح .. كان يقعدون يكتبون عنه بالجرايد سنتين كأضخم مشروع تم انجازه بعد مشروع توسعة الحرمين ..

التعامل معه سهل .. نفس طريقة المترو ..

بس الله يعافيكم انتبوا أي اتجاه القطار بيروح له قبل تركبون ^_^ حسافة يروح الوقت بين انتظار القطار وتغييره وخاصة اذا معكم عفش ..


.
.
.
.

بوصولنا لمحطة ماريا زامبرانو .. لقيناها داخل سوق كبير والاوتيل بنفس المكان ما يحتاج نطلع للشارع ..


صورة خارجية للمحطة ..

السوق ..