موضوع حلو بس يبيله صبر
ولو اني حبيت يكون في قسم التجارب والخبرات الاستثماريه عشان تستفيدون اكثر
أنا ربي ولك الحمد والشكر موظفه صارلي تقريبا ٩سنوات ودشيت اول تعييني بأقساط على ٤٠٠ وجذيه وتهوت مره وخذيت قرض بس كان تسديده على سنه ونص
ومره بعد تهوت وفتحت فيزا بمبلغ كبير وقعدت اسدد سنين لين صكرتها
حالي حالكم أصرف وأتشرى وأهادي وأحب اذا رحت لأهلي أطلع اخوي الصغير واختي واتشرا لهم مارد شي بخاطرهم ابدا
وبالنهايه بعد تقريبا ٨ سنين اكتشفت انه رصيدي صفر وتصرفاتي تصرفات المراهق الي طاح بيده مبلغ !!!
ما افكر الا بالمظاهر وبالمطاعم وبلبسي واذا تطورت شوي فكرت بسفره اسبوع واحرق فلوسي وارد لديرتي مفلسه
الحمدلله يارب بنات صارلي سنه متغيره حيل
غيرت اشياء كثيره
كنت اول ماينزل المعاش اروح البنك واسحب بشكل عشوائي ولما اوقف مقابل الجهاز الا ماكو مبلغ ببالي مثلا اقول بسحب ٥٠ بعدين اقول لا يمكن احتاج اكثر واسحب مثلا٨٠ واخليها في بوكي
وتطير وانا نوعي مادقق على الفلوس الي عندي وعشره ورى عشره يا مطاعم يا موديه ولدي بوميه وبعدها كنافه والا وجبات حق البيت
يعني تصرفات عشؤائيه
هالشي الغيته
لدرجه اذا نزل معاشي مرات يعدي اسبوع ماسحبت الا عشرين او ٣٠ حق بانزين واحطهم بسيارتي
واذا بغيت جمعيه بالكينت
وصار يعدي اول اسبوع ولحين ماتغير حسابي تطورت حيل قبل من اول اسبوع ماكو الا ٦٠ والا٨٠
شوفو بقول لكم عن سر مايعرف الا الي قدر يوفر
مجرد يصير عندج مبلغ وانتي براسج تكونين تبينه للتوفير راح يعز عليج تصرفينه على تناتيف لاتذكر وبيصير عندج دافع هالالف يصير الفين
ولاتقولون زين وبعدين واذا جمعنا شنو الهدف !!! اعذروني بس الي يفكر جذيه مانضج للحين
احنا نوفر لضروره ولصكات الله يبعد ايام الشر ونوفر لبيتنا بالمستقبل ونوفر لعيالنا ونوفر لراحتنا اذا كبرنا يكون عندنا خير اقلها نعتمر اي وقت والا نسافر نقاهه طبعا مو كل المبلغ ينصرف جذيه لا انا اعطيكم امثله
استغرب من الي توفر سنين وبعدين تفتح سياره اوكي صج كلنا نحب الكشخهوالرزه بس معقوله جذي طموحنا احرم نفسي وبالنهايه اقط كل المبلغ على حديد ممكن احط جزء منه لسياره بس يستحيل اصفر حسابي عشان سياره
............... وجهة نظر ...........
والشي الي غيرته ما اروح السوق وانا متكدره والا بخاطري شي لاني اكتشفت وانا معصبه ادخل العطور واشتري اثنين ثلاثه واطلع ب٩٠ مثلا
وادخل المكياج واشتري مكياج بعضه لحين بكرتونه
وبجذيه ارد البيت وانا مرتاحه احس اني فضفضت شوي مع العلم اني اكون محرقه كرتي وانا اشخط فيه بالكينت
قطعت هالعاده ماروح السوق وانا متضايقه صرت ادخل نت واحضر دوره والا اروح لامي فديتها اتقهوى معاها
والا ارتب شقتي هههههه
والشي اللي غيرته بعد اذا صار عندي مناسبه او عيد او مثلا دراريع رمضان ابلش فيهم من بدري موحده حده
يعني كنت مجهزه لرمضان ٥ دراعات وقبل شهرين والله بنات ارتحت حيل ولو كنت مخليتهم حده حده كنت راح ادفع اكثر
الترتيب اساس الحياه وكنت قبل اوفر دايم اردد بقلبي اقول انا اطلع يوميا لدوامي الصبح وارجع الظهر طول الشهر عشان يروح معاشي باكل ولبس
دايم مو مره ولا مرتين فعلا تغيرت والحمد لله قدرت اوفر بهالسنه مبلغ كنت أحلم يكون عندي بسنين
ومايمنع كل شهرين اشتري خاتم والا سوار ذهب كيفج اصفر والا ابيض اهم شي حطيه بشي ثمين
بنات ترى ماكو شي صعب انا الي اكتب لكم كنت اشتري الجنطه على ٨٠٠دينار و٦٠٠ ولو تقول امي اشتريلج شي ثمين اقول شحقه اهم شي اخذ اللي بخاطري
الحين تغيرت وعقبالكم ان شاء الله
اعذروني طولت بس فعلا احنا الكويتيات يبيلنا وقفه عدله وكل وحدة تعيد حساباتها ونصيحه مني دشو منتدى الخبرات الاستثماريه وتبادل التجارب اليوميه راح تستفيدون اكثر
