اهم الشغلات إلي تجهزينها حق البيبي والمستشفى خل نستفيد

[بنات حواء2]

هلا حبيبتي استبرق انا بخير تمام الحمد لله

اما بنسبه حق البطن لأنها صارت ثقيله عشان جذي تنزل و هذي علامه حق قرب الولاده بعد شدي حيلج و انا سامعه انه إلي قربت ولادتها لازم تتغذى عدل عشان تقدر تدفع حزت الولاده

و علبركه حق اختج و الله لو انا منها عادي بعدين البنات حلوين شحلاتهم بس يمكن هي ملت تبي صبي ثاني الله يعطيها انشاله في الحمله اليايه خلاص الله كاتبلها بعدين انا عندي البنات حلوين لأنهم لي كبرو يشيلون امهم يطلعون و يروحون و يردون معاها بس لصبي لي كبر كله يبي يطلع مع ربعه

و الله كلهم حلوين و خير نعمه و كل شي يي من الله حياه الله

و بنسبه حق هموسه اي و الله جان زين تكون ولدت و فتكت و تي تقولنه شصار معاها الله يسهل عليها مسكينه كانت خايفه وايد ترى الخوف مو زين احنه لازم ما نخاف لمن نيي بنولد و الله امس مرت اخوي قالتلي اذا خفتي تستعسر الولاده عليج قالتلي اذا ياج الطلق استانسي قولي خلاص بولد و بفتك و بشيل البيبي و بشوفه اخيرن و جذي يعني هيأي نفسج على هلكلام مو تقولين يعور او شي و الله احنه نعسر على نفسنه من كثر ما نحاتي و نفكر


بنسبه حق الحليب الحين اصلن خلاص في حليب بصدرج اتوقع من الثامن يكون في حليب بصدر الام او من آخر الثامن


صج انا امس مرت اخوي قالتلي رضعي من ثاني يوم و اول يوم قالتلي شفطي بالشفاطه ترى مو زين جذ لازم يطلع الحليب عشان يشرب البيبي و عشان لا يقعد في الصدر انا بذات في الرضاعه متعقده و السبه اختي فمن اول يوم باخذ الشفاطه معاي المستشفى عشان اشفط و ثاني يوم بحاول ارضع

و انتي متى ناويه تبلشين انشاله رضاعه ؟؟؟

 

[إستبرق]

هلا فيج حبوبه اي امبلا قالولي ان البطن لي نزل لان الولاده تقرب انشاءالله والله كريم يارب
والله يبارك بحياتج حبوبه والفال لج انج تعرفين شنو الي فبطنج
لا هي عادي عندها بنوته بس الصبي الي عندها هو البجر وكله بروحه قالت يعني اييب واحد معاه ولا حلاتهم بنوتاتها الله يخليهم لها
واي والله صج مشغول بالي عليها هموسه والله اليوم الصبح بس قعدت من النوم يات على بالي قلت المسكينه شنو صار معاها لو نعرف ولدت ولا لا يارب يسهل عليها
والرضاعه والله ما ادري انا بصراحه ما ابي ارضع وايد بس اسبوع ولا اسبوع وشي وانا خواتي قالولي لي ان كلهم مايظل حليب بصدرهم بسرعه ينشف وقلت لهم على الشفاطه قالوا اذا انتي مثلنا ماراح اصلن تحتاجينها انشاءالله بس اذا غير عنا لا تحتاجينها
عاد الله كريم يارب ويكتب الي فيه الخير يارب

 

[بنات حواء2]

صج انا نسيت اقولج مها اناوايد ناس يقولولي اذا تبين تضعفين و يصير جسمج حلو رضعي البيبي على الاقل اشهر يقولون الرضاعه الطبيعيه وايد زينه انا الصراحه ابي ارضع كثر ما اقدر لأنه حليب الام ترى فيه شغلات مو موجوده في الحليب المصنع

و سمعت انه الرضاعه الطبيعيه زينه حق الام من كل ناتحيه و حق البيبي

يعني حاولي ترضعين لين يجف الحليب من صدرج

انا يعورون قلبي البيبيات إلي ما يرضعونهم احس انه الله يابهم و ياب حليبهم معاهم سبحان الله

بنسبه حق هموسه انا توقع اولدت و افتكت انشاله عن قريب راح تمرنه و تقولنه شصار معاها

و انا انصحج تاخذين الشفاطه ترى تفيدج انا باخذها انشاله

 

[Om eLkakawiya]

هلا والله بنات شلونكم ؟
اليوم احس النفسيه عندي كلش ..
بنات انتو مثل خواتي تكفون ادعولي ريلي اييه قبل الولاده و ينزل شوي من كبرياءه عشان هاللي في بطني ما يضيع .. اول ما يطلع ع الدنيا على الاقل يشوف امه وابوه مع بعض .. حسبي الله ونعم الوكيل .. مابي اكدر عليكم ..
المهم نبي سوالف الحمال .. بنات حواء ايي حبوبه أنا أدري في سوالف الحريم يخزون خز وما يذكرون ربهم أنا ناويه ان شاء الله أرضع بنتي أكثر وقت ممكن لأني بعدها لازم أداوم ..
والصراحه أنا ما أحب اللي يقعدون بين الحريم وقت الزوارات وعادي ترضع جدامهم فما حبيت شكلي يكون جذي وتعالي شوفي تعليقاتهم وي ارضعت الياهل وايد وي ما تعرف ترضع بنتها وووووو .. ما عندهم سالفه .. من جذي ودي بهالسدريه .. مع انه امي تقول عادي ياما رضعنا أنا أمي استحي جدامها شلون الأوادم وخاصة إنهم يقولون لما يرضع الياهل راح يرد الرحم مكانه فراح يعورج شوي عاد بقعد اتألم جدامهم ..
ايي شريت الستيانات من مذركير ..

بس بنوتات للمعلوميه السائل اللي يطلع قبل الحليب واااايد مفيد للبيبي حرام تحرمونه منه انتو جربو ترضعون قبل لا تشفطونه .. ترى والله يا بنات على دراستي قبل.. حليب الأم يفيد البيبي وااايد واااايد وحتى لما يكبر تشوفين فرق بين الياهل اللي كان راضع من أمه والياهل اللي حليبه صناعي .. سبحان الله .. فتحملو هالجم شهر عشانهم واذا وقف الحليب فهذا مو منّا ..

مسكينه هموسه احسها تعبت من ولادتها هذي.. ليش ما يحطولها مثل ما قالت بنات حواء تحاميل الطلق أحسن من هالشغلات الله يعينها ياااارب ويقويها ..

 

[إستبرق]

هلا جنان اي ادري والله ان الرضاعه الطبيعيه احسن للبيبي والام من جميع النواحي اصلن الكل يقول ان حليب الام يسوي مناعه من الامراض عند الياهل سبحان الله والله ما ادري الله يكتب الي فيه الخير يارب



الحامل هلا حبيبتي واكيد ان مثل الخوات وليش شنو زوجج مسافر ولا شنو مو عارفه السالفه انا عالعموم انشاءالله ماتولدين الى وزوجج عندج واول واحد تشوفينه ورى الولاده زوجج ومعاه بيبيج انشاءالله يارب
وامبلا والله ما احب شكل الي ترضع جدام الناس مع ان الوضع طبيعي عند الاغلبيه بس ما احب ما ادري ليش وصح ترى الوحده تتألم انا شفت اختي وزوجه اخوي يصير عوار بالبطن لان الرحم يبي يرد مكانه
الله يكتب الي فيه الخير يارب ويعينا ويسهل علينا انشاءالله

 

[love love]

قوه بناااااااات جهزتووو


انا ماشيت شي حق الموالييد كله اشتري حق بو 3 اشهر اتصدقووون

قلت المواليد انشاءالله اشترييهم مع امي على هالشهر

عاد شنو اشتري

 

[احلى كويتيه]

عالم حواء حبيبتي اذا انتي ولادتج بالصيف فالسوق للمواليد مفتوح طبي وتخيري احنا ولادتنا بالشتاء فصعب مرات نلاقي شي حلو للبيبي

 

[احلى كويتيه]

وي بنات انا اموت ولا ارضع البيبي جدام احد كلش حتى امي ويييييييي استحي اخجل خخخخخخخخخ
اروح بغرفه بروحي واقفل الباب واخذ راحتي على الاخر

 

[احلى كويتيه]

الحامل الحزين الله يرد ريلج لج ويهديه ويرجع وما يشوف غيرج ويكبر غلاج بعيونه ويوديج المستشفى ويحضر ولادة بيبيكم قولي امين

 

[love love]

عالم حواء حبيبتي اذا انتي ولادتج بالصيف فالسوق للمواليد مفتوح طبي وتخيري احنا ولادتنا بالشتاء فصعب مرات نلاقي شي حلو للبيبي

اي بالصيف انشاءالله اخلص امتحانات واروح اتسوق

 

[إستبرق]

وي عالم حواء تشترين ل3 اشهر وتخلين الي للولاده ههههههههههههههه والله غريبه
بس اذا ولادتج بالصيف وي عيل تو الناس الحين منزلين كله شتوي الحين اخذي الاشياء المشتركه الي عادي للصيف والشتى واخذي السرير وهالسوالف والله يسهل عليج يارب



احلى كويتيه اي والله صج فشله استغرب من الي جدام العالم والامه كلها ويرضعون وعادي خخخخخخخ انا استحي والله هي ترضع وانا مستحيه

وامين يارب ماتولد الحامل الى وزوجها عندها يارب

 

[Om eLkakawiya]

استبرق واحلى كويتيه مشكووورات حبيباتي على دعاءكم ..
حتى استقبال طلعت نفاسي اللي تمنيت اسويه مثل اي وحده اول مره تحمل ماراح اسوي حق منو اسوي يعني ..
ودي اقول ودي اتكلم بس انا مو من هالنوع حدي كتومه ..
الله يهني كل وحده مع ريلها ياااااااارب ويبعد عنهم العين والحسد ..
أنا بس عرفو الناس اني حامل انقلب حالي وحال زوجي .. الحمدلله على كل حال ..
صج العين حق ..
حدي مالي خلق شي .. وهالبيبي اللي في بطني اهو اللي ماخذ كل تفكيري ..
حمدوا ربكم مليون مره يا بنات على النعمه اللي انتو فيها .. لا تخافون انا عيني مو حاره
******************
احلى كويتيه انتي معانا بالثامن ؟ ولادتج شهر 12؟ .. امبي انا ترى شريت مخامل الحين حقي وايد قالو هوا النفاس يعذب .. الله يبعد عنا هالهوا ويسهل ولادتنا ...
بنات انا شريت انتركم مادري شنو يسمونه هذا اللي نفس اللاسلكي واحد احطه عند البيبي وواحد على طول معاي عشان اذا قعد من النوم وانا مو بالغرفه او عند الضيوف الا ما احاتيه بس حسافه يشوش بروح الحين اقولهم شلون اخليه عدل ..
عاد هلا هلا بنات بالرضاعه ترى البيبي محتاجها وام استبرق لا تتدلعين يلا رضعي بنتج خليها تقول : ون حليب ماما تو الحليب الصناعي ههههه
*****************
الحمدلله على كل حال ..

 

[احلى كويتيه]

وي الله يعينج الحامل الحزين تعوذي من الشيطان وذكري ربج واقري المعوذات وخلي احد يقوله انه يقرا على نفسه او روحوا للمشايخ يقرون عليكم وادري العين حق ومصيبه صابتهم الي مايذكر ربه عمى بعنه وحسبي الله عليهم يعني بس انتي الي حملت قطيعه تقطعهم ابيه خليتيني اعصب وي احتريت عليج والله يعينج

ابيه انا ريلي يدرس بره وخايفه ما يحضر ولادتي وانتي الله يهديه ويرده لج

 

[إستبرق]

يقلبي الحامل اي والله اعرف عيون الناس يالله يارب الله يبعد كل حاسد عنكم يارب وماتشوفين الى الخير انتي وريلج وبيبيج حبوبه اقري على نفسج انا من الناس الي نصكيت عين وجربت والله ان جسمي كله يصير يرجف واصارخ واطيح وما ادري عن نفسي كلش وبعدين ياب زوجي ملا وقرى علي والحمدلله صار الخير
الله يبعد عنكم العين يارب ويهدي زوجج وماتولدين الى وهو عندج يارب انتي ادعي فالسجود وادعي بصلاه الفجر وبين الاذان والاقامه والله انشاءالله يستجيب دعائج يارب
وامبلا اعرفه الاسلكي حلو بعد بس اخاف منه من افلام الرعب سوو عندي ازمه منه خخخخخخخخخ
والله كريم ويكتب الي فيه الخير يارب ويسهل عليج وعلينا وانشاءالله يالله يارب ماتولدين الى وزوجج عندج يااااااااااااااااااااااااارب وتسوين ورى طلعتج الاربعين احلى استقبال انتي وزوجج وبيبيج يارب


واحلى كويتيه يارب بعد انتي تولدين وزوجج عندج ياااااااارب وكل وحده منا ماتولد الى زوجها عندها ومساندها ويبعد عيون الناس
امييييييييييييييييين

 

[بنات حواء2]

هلا حبيبت يالحامل لا تقولين جذي انتي الحين لازم نفسيتج على احسن ما يكون لألأنج في آخر مرحله و لازم تكونين مرتاحه نفسين و جسدين عشان تولدين بسهاله فديري بالج على هلموضوع و انشاله يارب ييلج و يشوف ضناه


و بنسبه حق مسألت الدوام ترى صج انا الحين وايد احاتي لأني في الكليه و على اساس اني ما ابي اضيع على نفسي كورس كامل على الاقل ابي آخذ حتى لو 4 او 3 مواد عشان اسلي نفسي فيهم يعني ما اداوم كل يوم يمكن مرتين في الاسبوع بس لأنه ولادتي 2 -3 و الكورس يبلش من آخر شهر 2 يعني انا شوي قاعده احاتي الغياب تدرين بعد راح اكون في الاربعين و الحاله كسيفه و الله ما ادري شسوي ابي من يشور علي بحل وسط و انا ما لقيت غير هلحل و بنسبه حق ستيانات مذركير وايد زينه زين سويتي شريتي

و بنسبه حق الرضاعه شي أكيد لازم المره ما ترضع جدام الناس مو زين اصلن و الله عيب و بعدين انا استحي ما احب شنو هذا كل من هب و دب شاف

 

[بنات حواء2]

هلا حبيبتي مها اشلونج و اشلون استبرق انشاله بخير و اشلون الثقل اليوم اول ما قمت من النوم تذكرتج لأني توني احس بثقل بس طبعن على خفيف يعني مو وايد

و بنسبه حق الرضاعه نصيحه مني رضعي كثر ما تقدرين على الاقل شهرين انا مسكينه اختي ما قدرت ترضع و بعدين مسكينه رحمه نزل يعني لو مرضعه يمكن يصعد بس مسكينه الله ما كتب لها ترضع لا حول إلا لله

فحاولي ترضعين شوي

 

[بنات حواء2]

حبيبتي عالم حواء انتي سويتي العكس او تشترين من الحين تفتكين احسنلج و بعدين عقب الربعين عاد تتشرين على راحتج



حبيبتي احلى كويتيه بنسبه حق السوق عدل كلامج انا شفت في محلات يبيعون اقطان

حتى اليوم سمعت انه سنتر بيونت مسوين تنزيلات و ملابسهم كلها قطنيات قلت انشاله بروح يوم الخميس و يشتري

 

[بنات حواء2]

هلا حبيبتي الحامل الحزين زين تسوين خليج كتومه على اسرارج الزوجيه و سمعي كلامي بهنصيحه و ما تضعين لو شنو صار بينج و بين ريلج لا يطلع لا حق اهله و لا حق اهلج انا الحين ما خذه ماده زواج و علاقات اسريه نسمع قصص بلاي و السبه تدخل الاهل

و بنسبه حق اللاسلكي إلي انتي ما خذته مفيد بس الحين ما راح تستفيدين منه وايد بعد شهر شهرين يمكن تحتاجينه اكثر انا انشاله بشتريه انتي من وين شاريته ؟

ودي خيبدلونه حقج ليش يوش وش المفروض يطلع واضح

 

[بنات حواء2]

صج حبيبتي الحامل الحزين ترى العين ما ترحم و الله لو اقولكم ما تصدقوني انا وريلي كل ما نطلع الناس يطيحون فينه خز جنه نازلين من كوكب القرده و اول ما نركب السياره معنه ما فينه شي لازم نجره و مشكله و الله بعدين بروحنه بروحنه تعوذنه من ابليس و نرد عادي طبيعي

و اول ما دروا اني حملت هبت المشاكل من كل مكان و قامت تطلع شغلات غريبه

 

[إستبرق]

هلا والله جنان والله انا بخير الحمدلله واستبرق بخير
وانا والله اليوم ما ادري شفين ابي اكل شي باااااااااااااااااااارد ابي ايس كريم ولا فربتشينو توني قلت لزوجي هو يبي يروح بعد شوي يلعب كوره قلت له ييب معاك ايس كريم ولا فربتشينو
والله يكتب الي فيه الخير يارب