روايتي الاولى : (دليسا )

[39la o f9la]

Al7een ftoon shno tabi bl '9b6 ?!! Mo 5la9 ra2ed 7bha ??
Shtabi b fareeda al7een

 

[Lolwa]

الحقد ومايسوي .........
وهي مواعده نفسها انها تخرب عليها يعني تخرب عليها حتى لو حياتها تغيرت للأحسن ........

مثل المرض يلاحقها ..

هذا مايمنع انها تطبق رغبتها في انها تخرب على عدوتها وتعيشها العذاب اللذي ذاقته

وخاصة انها تعرف ان دليسا ماخذه قلب زوجها وحبيبها ...وعرفت ان لها حبيب يحبها ويبي يتزوجها


ومع القصه راح تتغير حياة فتون بتعرفون انها راح تتساعد مع احد من شخصيات الروايه ويحمل الكره بداخله حق دليسا...


منو تتوقعون بيكون ؟



أبي آرائكم

 

[sweet.sanfoora]

امجد وليال صح

وبثث

ثانكيوو

 

[a7la_cute_lulu]

قوة انا بنت عم 39la o fa9la وانا بعد اسمي لولوة بس لولو احسن وانا قلت حق 39la o fa9la عن الرواية وقلت حق نص العايله عنها لانها روعة واتمنى انج تنزلين بارت اليووووم بليييز بلييييز بلييز




واتوقع ان اللي راح يساعد فتون يا نورا او عايشة (الناظرة ) او رائد او ميس او امجد

 

[a7la_cute_lulu]

وسوري لان طول الوقت كنت احاول اسجل بس مو راضي ينفتح مالي



اب اب اب اب اب اب اب اب اب اب اب اب اب اب

 

[Lolwa]

وي بعد عمري سميتي والله
أنا اقول ليش المنتدى منور
حياج حياتي ببيتج الثاني ( روايتي )
والحمد لله ياربي انج حبيتيها
ومشكوووووووووووووووره عالتواصل فرحتيني والله
انشاء الله أحاول أكتب البارت وانزله



الله يهديج قلتي كل الشخصيات بالروايه

هههه أنا قلت واحد بس

مبين عليج عسل

 

[a7la_cute_lulu]

واي فديتج انا من اول ما بديتي الرواية من اول بارت قاعدة اسجل بس مو راضي بس مساع دشيت جان يطلعلي يمكنك كتابة رسالة وطرت من الفرحة




واي فديتج انتي العسل الرواية حدها عسل لانها من اناملج الرقيقة



ممكن سؤال محرج  ؟؟

جم عمرج؟؟

 

[Lolwa]

25
وانتي ؟

 

[a7la_cute_lulu]

Bakamil 14

 

[a7la_cute_lulu]

El3omir killa bss la t6awleen 3alaina plzplzzzzzzzzzzzzzzzzzzzzzzzzzzzzzzzzzzzzzzzzz*

 

[Lolwa]

الفصل الواحد والأربعون ​

​

دليسا وهي بالسياره تمسح دموعها​

(توها تستوعب الخبر المهول ...لأنها كانت بصدمه من أول ماسمعت الخبر من عمها !!!)​

تاخذ التلفون وتدق على ميسا​

دليسا : ميوس تجهزي بمرج وبنروح الفنار..​

ميسا :شنو شنو ...!!!!أول شي شفيج ؟؟​

دليسا تبجي بحرقه وتصارخ : مافيني شي بس تجهزي خلصينا..​

ميسا مخترعه: بسم الله ؟؟؟ شنو ؟ شصاير ؟؟​

دليسا : تتجهزين والا أروح بروحي ...​

ميسا : ان شاء الله ان شاء الله!!!! ...مريني يالله ...​

أول ماتوصل بيت رفيجتها ​

ميسا تطلع لها بره ​

دليسا تطالعها وويها كله دموع​

ميسا منبهره من موقف دليسا ومخترعه من منظرها ...أول مره تشوفها تبجي مقهوره بهالطريقه​

تاخذها ميسا بالأحضان وهي قاعده يمها بالسياره​

ميسا : ششششششششش ​

باااس باااس ...سمي بالرحمان خل يهدي سرج ...​

وتقرى عليها آيات​

ودليسا تشهق من كثر مابجت​

الين هدت بعد نص ساعه !!!!​

ميسا : ها أشوه الحين ؟ طلعتي كل اللي بقلبج ؟​

دليسا وهي حاضنتها تهز راسها بعلامه النعم ...​

ميسا : ماودج تقولين الحين شاللي مكدرج ؟​

دليسا تبلع بريجها ...نشف من كثر البجي ​

ميسا : خليني أبدل وياج ...أنا اللي بسوق الحين وبمر الفرع أيبلج ماي​

​

وفعلا تسوق لي الفرع وتعطيها الماي ...​

ميسا : يالله ....مستعده أسمع ...​

دليسا : أبوي ​

ميسا : شفيه ؟​

دليسا : طلع كل هالمده مسجون ...وعمي يدري بس ماقالي ...الا أمس!!!​

دليسا : واللي أفظع من هذا انه مسوي شي جدا خطيروما أقدر أقوله خلوه ينسجن 20 سنه​

ميسا مصدومه : انالله ...حبيبتي دلوس ....الله يصبر قلبج ..صج خبر فظيع ..وهو جم بقاله من هالعشرين سنه ؟؟​

دليسا : ثلاث..​

ميسا : وودج تشوفينه ؟​

دليسا : مادري !!! ...قبل كنت متلهفه بشوفته ..بس من سمعت خبر سجنه وانه مخبي علي كل هالمده ...ماقام ايني الاشتياق يشوفته ...​

ميسا تمسك ايدها : ما عليه دلوس ...هذا من أثر الصدمه ..لي هديتي جم يوم راح تغيرين رايج​

دليسا : تهقين ميوس ؟​

ميسا : طبعا ...أنا أعرفج خبز ايدي ...تزعلين من الواحد ...لكنج ماتحقدين عليه ...صج قليلة أدب ولسانج عوي وكاوليه ...بس بالنهايه بسرعه تسامحين​

دليسا تطقها على جتفها وهي تبتسم ..​

ميسا : اي جذيه ...ضيحكاااي وفرفشاي ...غيراج موشايفين أبوهوم موليياه ...حيمدي رابيج انتي كلهااا ثلاث سنييين وتيشوفين آبوووج !!!​

دليسا تطالعها !!!​

ميسا : شفيييج ؟​

دليسا : انشاء الله ماتردين تتكلمين بمياعه ....مساع كلامج طبيعي موصج كان !!​

ميسا :تاااع هاذي ..ايمبالاه كينت آتكالام بدلع بس اينتي مالاحظتيني ..كينتي قاعداه تبجيين ..​

دليسا تضحك..وتمسح بقايا الدموع​

ميسا : والله شفييج ...أنا ماعمري بحياتي ما تيكالامت غير الدلاع ..لأن دالاعي تابيعي من الله ...​

دليسا : اي هين ..​

ميسا : محتره ميني لأني دلوعه وانتي لأ.....​

ميسا تسوق ورايحه الفنار ..المكان الوحيد اللي يريح دليسا رفيجتها​

​

بشقة فتون​

بعدين ... لأني عرفت الحي​

​

فتون توها خالصه مع ريلها من جلسة الحب ( فهموها عاد )​

فتون منصدمه ​

رائد : ترى اللي سمعتيه ولا شي ...​

فتون : ساكته وتطالع زوجها بحقد...​

رائد : مادري شلون تلخبطت وقلت هالاسم ...كل الناس يتلخبطون ..شي عادي ...​

فتون : بس مو أثناء الـــــــ ....​

رائد : والله ماتهمني ..شفيج​

فتون تنفعل وتصارخ : ليلحين تحبها يالنذل ​

رائد : لا تصارخين..​

فتون : خره فيك ...خره فيك يالقوووووااااد ...يالحقير​

رائد يعطيها سطار : فتون تحط ايها على خدها ....وتطيح بالأرض وتسوي تمثيليتها المعهوده ..​

رائد : اي مثلي مثلي ...حسبالج ما أعرف​

ويشيلها من شعرها خلاها توقف من العوار ​

رائد : تمثيليتج اللي كل شوي تسوينها لي وتهدديني فيها ..خلتني أشك بمصداقيتها ...وياخذها صوب المكتب ويطلعلها الكشوفات والتحاليل​

رائد : شفتي هذولي اللي قلتي انج ماتبين تاخذينهم من الستشفى ؟​

فتون منصدمه وتبجي ​

رائد : رحت اييبهم وسألت السستر عن نتيجتهم ..وتقول انه الدكتور قايل مافيج الا العافيه وماعمره ياج الصرع بحياتج كلها ...​

ويكمل وهو ليلحين يشد بالشعر : بس اذا انتي تحبين هالمرض وايد ..شكلج ودج يصير فيج ؟؟؟ تبيني أشد حيلي معاج وأييبلج اياه​

وويطيحها بالأرض​

رائد : أنا علشان عمي وعايلتينا لا يتفرقون.. سكت عن الموضوع ... وماحبيت أسويها سالفه .....وقلت يمكن اهي تحبني سوت جذيه وتبيني أحبها بالمقابل ...لكن سمعي ...الحين آنا الآمر الناهي بالبيت ...ماتسبين ولا تصارخين وان قلتلج تقعدين بالبيت تقعدين ماتطلعين ...يعني كلامي اهو اللي ماشي هني بس...والا وربي اني اعيشج بجحيم ...بوبس أقول اسمها ...الا أرد علاقتي وياها بس علشان أحرج ...فاهمتني ؟​

فتون تبجي ​

ويروح رائد غرفة المكتب يشتغل بالابتوب !!!​

​

​

وتمر شهرين​

دليسا ليلحين ماتتجرأ تطلب من عمها انها تبي تشوف أبوها وتزوره بالسجن.. ​

​

فتون علاقتها بزوجها ما فيها حب وجامده...حتى حبها له بدى يختفي ...لكنه محافظ على فراش الزوجيه وياخذه منها بالغصب ..ويقولها انه من حقه وانها زوجته والشرع يحلله بأي وقت اذا يبي ( وهو بهالشي ناوي يذلها ).....ومايخليها تطلع حتى بيت أهلها ...لكن أهلها لزموا عليه ...فخلاها تزورهم يوم بالأسبوع ...تنفذ فيه خطتها بأن تقرب راسين بالحب ( نورا وسالم ) لأنها وعدتهم ...​

​

​

نورا وسالم نمى حبهم من المواعد اللي تدبره لهم فتون ..بس ليلحين مايجيب سالم طاري الزواج وكلا يتهرب منه لي سألته نورا !!!!​

​

تحسنت حال ايديده عارضيه ...صج بعدها تقعد بالكرسي ...لكنها بعدت عن السرير وقعدته الممله وقامت تروحله بس وقت النوم ...وقامت تسولف عدل وقدرت تطلع مخارج الحروف وبسهاله وصرفوا الممرضات من عندها لأنها ماقامت تحتاجهم بعد .....​

بدر قنع فريده انها تقول حق يدتها على سالفة الخطبه ...وتقنع بدورها عمها بو أمجد ..يمكن الحين يوافق بعد ما تغيرت معاملته لبنت اخوه !!!​

​

بالسجن المركزي ​

بوأمجد ينطر بره ولده يطلع ​

أمجد ياخذ أغراضه وهدومه من الشرطي​

​

ويبطلونله البوابه​

​

أمجد تنفس : هممممممممم هاذي ريحة الحريه​

بو أمجد يبطله ذراعينه ويجي أمجد يحضن أبوه ...​

أبوه يطقطق على ظهره ​

بو أمجد : حياك الله بالكويت من بعد غيبة السفر ...ويغمزله ..​

أمجد يضحك : الله يحييك أبوي ​

ويمد كف ايده عند أبوه : وينهم ؟؟​

بو أمجد : إستح على ويهك ...عطني مهله شوي ​

أمجد يطالعه بنظره حاده : يبا !!! عندك مهله كان ثلاثة أشهر ...ليش مادبرتهم !!!!​

بوأمجد توهق : دبرتهم ..دبرتهم ...قاعد أتقشمر وياك يابوك ...بس انت الله يهديك ..مو مشتاقلي كلش ؟؟ علطول تبي الفلوس ؟​

أمجد يرتاح :اشدعوه يبا خرعتني ...وليش ما أشتاقلك بعد ؟؟؟ مشتاقلك ومشتاق حق أمي وسلومه بنت اختي ...كلكم كلكم يبا مشتاق لكم​

​

ويوصلون البيت​

سلوى تييله وتحضنه : أمجيد !!! الله يغربل بليسك !! جذي مسافر وماتقولنا ؟ وثلاثة أشهر بعد ...وايد يما ؟؟ مامليت ؟​

أمجد : امبله مليت ولاعت جبدي ...بس شسوي عمل عمل ..​

سلوى : عمل ؟​

سلمى تيي تحظن خالها : مايبتلي صوغه ؟​

أمجد : ها ؟ اي اي ...امبله ..بس الجناط ليلحين مايوا ؟​

سلمى : ومتى ايون ؟​

أمجد : والله يعتمد ...اذا عطوني اللي ناطرهم اليوم بييج اليوم ...اذا عطوني بعد اسبوع بيون بعد أسبوع .......ويطالع أبوه بطرف عين ..​

نورا تجي تسلم عليه بثقل : شلونك أخوي ؟​

أمجد وهو مشتاق : هلا بالإبليسه ...​

نورا معفسه الويه ومرفعه الحاجب : ابليسة وسعري 150 ألف ...​

أمجد لاهي يسلم على نور وأنوار والباجي ...وماسمعها...​

نورا بقلبها : ألحين مو وقته ...بس أعرف شلون استفيد منك لأني عرفت الحين نقطة ضعفك ...​

​

 

[Lolwa]

العمر كله يالولو

وقراءه ممتعه

 

[سمراء اليل]

البارتين رووعه وفتون يماي صايره خطيره وسامحيني على التاخير لاني رحت السوق وبعدها نششتري اغراض رمضان وسوالف طول وعرض لين ما فضيت ارتحت شويه وبعدها مباشر لروايتج

والبارتين رووووووووووووووووووووووووووووووووووووعه

 

[sweet.sanfoora]

شهالعايلة الواطية >> سوري ع الكلمة بس نورا انتي شكووو ! "


وبثث الله يستر على دلووستي فديت خشمها :$

 

[a7la_cute_lulu]

سوري ما علقت مو راضية تنفتح عندي الصفحة فديتج علا البارت واتوقع انه نورا راح تجك فتون وتفتن عند دليسا وراح تصف مع دليسا وعارضية بتسوي عملية تجميل وتصير شباب وتعاون دليسا وامجد بيروح فيها وابو يتبرا منه كله من نورا وبدر مايبتي طارية كلش عاد عزيز على قلبي وشكرا

 

[Lolwa]

البارتين رووعه وفتون يماي صايره خطيره وسامحيني على التاخير لاني رحت السوق وبعدها نششتري اغراض رمضان وسوالف طول وعرض لين ما فضيت ارتحت شويه وبعدها مباشر لروايتج

والبارتين رووووووووووووووووووووووووووووووووووووعه

سمراء اليل
افتقدتج والله
الله يعينا بتجهيزات رمضان والعيد والمدارس

أنا بعد لويه عندي
وتسلمين حبوبتي

 

[Lolwa]

شهالعايلة الواطية >> سوري ع الكلمة بس نورا انتي شكووو ! "


وبثث الله يستر على دلووستي فديت خشمها :$

sweet.sanfoora

هلا والله بالغاليه
نورا مقهوره من ال 150 ألف اللي يايبهم أخوها وهم على قدهم وابوها طرق المعاش وأمها تتاجر بالأطباق
على شان جذيه ودها تعرف من وين يايب أخوها كل هالفلوس وقاطهم على الشاليه وليش شاليه يعني ؟؟؟؟
وحياج الله عمري

 

[Lolwa]

سوري ما علقت مو راضية تنفتح عندي الصفحة فديتج علا البارت واتوقع انه نورا راح تجك فتون وتفتن عند دليسا وراح تصف مع دليسا وعارضية بتسوي عملية تجميل وتصير شباب وتعاون دليسا وامجد بيروح فيها وابو يتبرا منه كله من نورا وبدر مايبتي طارية كلش عاد عزيز على قلبي وشكرا

a7la_cute_lulu

بعد عمري انتي وتوقعاتج الكيوووووووت
وخاصة توقعج عن عارضيه انها تسوي عملية تجميل
ههههههههه

وبدر انشاء الله ياي بالبارت الجاي اجيب طاريه فديته ...انا بعد أحبه هالبدر ...
لأني ماقمت اجيب رومانسيتهم ويا بعض ...حسيت انه أربع بارتات كافي وشبعتكم رومانسيه فيهم ...

وحياج حبي لاتهدين

 

[a7la_cute_lulu]

انزين توقعاتي صح ولا لا

اتوقع ١٠٠٠٠٠٠٠٠٠٠٠٠٠٠٠٪ صح

عندي سؤال
الرواية بتخلص قبل رمضان ولا لا ؟؟


ولا تطولين علينا بالبارت


متى البارت الياي<< فيني دودة لازم اعرف

 

[Lolwa]

الفصل الواحد والأربعون ( أخيرا تحقق اللي ببالي)​

بيت عارضيه بالليل


دليسا تتكلم بالتلفون : هلا بدر

بدر: ها بشري قلتي حق عمج ؟
دليسا : لأ شلون أقوله أستحي ...
بدر : انزين قصدي قلتي حق يدتج علشان تكلم عمج ؟
دليسا : واي موصج انت ...هم أستحي ...شلون أقولها يعني ؟
بدر : عادي ...مثل كل الناس ..قوليلها أنا أحب وحبيبي يبي يتزوجني ممكن تقولين حق عمي انه يوافق يزوجني من حبيبي ...
دليسا :!!!!!
بدر : الجمله راكبه غلط من ساسها لي كرياسها !!!...وما في وحده تقول حق أهلها هالجمله!!!!!!
دليسا : شفت شلون ؟
بدر : أخاف أروح مره ثانيه مع خوالي ...ويندقرون نفس ذيك المره ...
دليسا حايره :!!!
بدر : تدرين شلون ؟ أنا يايكم بعد شوي ..ابي أكلم ايديدتج وأبيها على انفراد...
دليسا : واي بدر من صجك ؟ فشله ؟​

بدر : لا فشله ولا شي ...بنظل ساكتين علبو خايفين ....

وأنا اللي لازم أفاتح يدتج بالموضوع مو انتي ....سوولي درب بس انتوا ...يايكم طياره...باي خن ألبس ​

يسكر الخط : طوط طوط طوط طوط

دليسا منبهره بحبيبها: واي حبيبي صج ينشد فيه الظهر !!!​

بعدها بساعه​

طول النص ساعه وهو بالسياره صافط بره بيت عارضيه يتدرب شيقول
بدر : يالله استجمع قواك يابدير ....ماراح تاكلك المراه ....مراه عجوز وطيبه وتعرفك وسويتلها خدمة العمر ... تشجع وطق الجرس ...​

ويحط صبعه اللي يرجف عالجرس...​

ويسمع خطوات ميري جايه ...وقلبه طاح بالقاع!!! ​

يدش الصاله ويلقى عارضيه بالكرسي ويمها دليسا

وقلبه يقول : قاقاف قاقاف ....​

بدر : شولنج عمتي ؟​

بدر لابس الدشداشه الرسميه المهندمه ويا القتره البيضه اللي ناسفها صارله دهر علشان يضبطها ...ولابس النظاره الشمسيه اللي مطلعته واو ...​

دليسا ذابت وهي تشوفه !!!
عارضيه تطالعه : من انت ؟
بدر بقلبه : هاذي نستني شنو ؟؟؟؟ تكفين مو وقته نسيانج !!!!
بدر : انا بدر ...أنا اللي ...آه !!!! فريده ماقلتي عن....
عارضيه : امبله ذكرتك ذكرتك ...انت اللي تصلح التكييف ؟
دليسا تحط ايدها على حلجها وتقمت الضحكه ...
بدر بقلبه : يعني هذا بس اللي ذكرتيه ؟؟؟؟
بدر : اي ..أنا ..شلونه وياكم ؟
عارضيه : منهو ؟
بدر : التكييف ؟
عارضيه : !!!!!
بدر : عساه قاعد يبرد عدل عندكم ...اذا مايبرد نظفوه وخل تجهز خدامتكم الطشت والطريقه انكم تشيلون الجزء العلــــ​

بدر بقلبه : ( أمبيه شقاعد أقول أنا ؟)​

عراضيه تطالع فريده مستغربه وترد تطالعه : !!!!!!

فريده تسوي حركات بويهها من ورى يدتها... .تعظظ براطمها وتغمزله ...يعني يابدر موهذا موضوعنا والله يخليك ركز شوي ..​

بدر يسكت فتره...مبين متوهق مايدري شيقول​

عارضيه : شنو ياولدي بغيت تكلمني بشغله ...فريده تقول في ريال بييج وبيغير حياتها فوق تحت ...خرعتني مهي راضيه تقول ..وأنا ناطره هالخبر اللي يصروع منك ...دام انك انت الريال اللي تقول عنه ...و الله يستر !!!
وتطالعه...​

بدر ارتبك وقام يتأتأ : أنا اممم جاي علشان ...أخــــ ..أخطـــ ...أخلي فريده تغير حياتها بخطـــ ..
فريده عصبت وقالتها من غير وعي وبصوت عالي : يخــــطبــني ...تالي سكرت حلجها من الحيا ...​

عارضيه وبدر يطالعونها :!!!!!!!!!!​

دليسا تبلع بريجها : اه !!!أنا بروح فوق...
عارضيه : وقفي عندج ...​

دليسا توقف مكانها من غير حراك.... ​

عارضيه : تخطبها مني انا ؟
بدر وأخيرا ياته الشجاعه : اي عمتي ..أتشرف اني أخطب حفيدتج منج بالأول علشان تباركين لنا بعدين أخطبها من عمها ...اذا انتي وافقتي طبعا
عارضيه تطالعه فتره : !!!!
بدر يتحسب بكلامه : بنتج دشت قلبي وحسيت انها هاذي هي اللي بتكون زوجتي وأعيل منها ...وما أتخيل أتزوج غيرها...
فريده ويها حمر :....
عارضيه : اي !!!
يا ولدي انت ريال ماتنعاب ..والحركه الشهمه اللي سويتها لي لمن طحت عليكم بذاك اليوم ما أنساها منك طول ما انا حييت...أصيل وأهلك عرفوا شلون يربونك ...
بدر مستانس :تسلمين عمتي هذا من طيبج ..... يعني عمتي انتي موافقه ؟
عارضيه : وليش ما أوافق ..أنا ماعندي أسباب أرفضك فيها !!!...بس أهم شي فريدة ...انتي موافقه أمي ؟
فريده تنزل راسها من الحيا ووهيا أحمر:.....
بدر :!!!!
عارضيه : السكوت علامة الرضا ....على خيرة الله .....مبروك ياولدي والله يوفقكم انشاء الله ..​

فريده من كثر ماهي مستحيه تركض تروح غرفتها
بدر طاير: مشكوره عمتي ...الله يبارك فيج...ياليتج تعطين عمي بو أمجد خبرعلشان نحدد خطبة الرياييل ..
عارضيه : اعتمد ...انشاء الله أقوله وأعطيك خبر ...
بدر : قواج الله ....استأذن أنا عمتي ..من رخصتج
عارضيه : حياك الله ياولدي ..اسفرت وأنورت ...مع ألف سلامه ياولدي ...​

لمن راح...​

عارضيه : ايا العياره ؟؟؟؟ فريدووووووه​

فريده تييها ومن الخجل تطل من الدري لي تحت​

فريده : هلا ؟​

عارضيه تحت صوب الدري تطالعها وهي فوق : ليش ماقلتيلي ؟
فريده :مادري؟ استحيت ..وخفت ماترضين ...ويصير فينا نفس ماسوى عمي لمن خطبني منه ..
عارضيه : أفا بس ..ليش ما أرضى ...يوم المنى اللي اشوفج فيه متزوجه ومتهنيه ...واذا على عمج ؟ خليه عليه أنا أعرف شلون أقنعه ...
ماوتعوا الا الجرس يطق واييهم العم...
عارضيه : الطيب عند ذكره ...
بو أمجد : شلونج عارضيه ..
عارضيه : هلا والله ...حياك حياك تفضل ..جيت بريولك ...توك طريت على بالي بغيت بسالفه...
بو أمجد : خير شنو فيه ؟ ​

وتقوله عارضيه عن سالفة الخطبه ...​

بو أمجد :.......
عراضيه : ها ما قلتلي شرايك ...خوش ريال وماينعاب ....وفريده تبيه ...أحسن من مانزوجها واحد ماتبيه وتخترب حياتها ....
بو أمجد :يصير خير ...وينها الحين فريده ؟ بغيتها بشي مهم ...​

وتييهم بعد مانادوها ​

بو أمجد :شلونج بنت أخوي ؟
فريده : هلا عمي ...بخير ...شلونك انت ؟؟؟​

بو أمجد : والله الحمد لله ..

فريده تطالعه ناطرته شبيقول .....​

بوأمجد : والله مادري شقولج يابنتي ...مستحي وخجلان منج...​

ويطالع عارضيه
عارضيه افهمت : ميري ... تعالي وديني المطبخ ...عن اذنكم عندي شغله صغيره بسويها ويايتكم ....
وتروح عارضيه ويطالعها بو أمجد لين تأكد انها راحت...​

بوامجد : يابنتي أنا مديون ...و ...مادري شقولج ؟؟؟الحاله صعبه ...وقلت ...
فريده ماحبت تشوف عمها بهالمنظر ويشكيلها الحال : شلون الحاله صعبه ...كاعندك عماير تديرها ....وبعدين عمي انت ليش ماتاخذ مقابل تعبك وانت تدير أعمالي
بوأمجد :!!!!!!​

فريده وبجديه : لا لا لا ..لازم تاخذ ألفين دينار كل شهر ..انت الحين مدير أعمالي ..ولك السلطه تدير اللي تبيه ...انت عمي واهل للثقه ..اذا ما أثق فيك ...من عليه اعتمد ؟
ياعمي انت مرخص ولك الحريه تاخذ أي مبلغ تبيه تحس انه يسد ذائقه ماليه عندك ..أنا ما أرضى أشوف عمي يتسلف من الأوادم وهو مو محتاج ...
بو أمجد ارتاح من كلامها وردت فيه الروح : والله مادري شقولج يا فريده ....بس اذا انتي تشوفين جذيه ...
فريده : اي أنا مصره انك تكون مدير أعمالي ...وتاخذ الفين كل شهر على تعبك وشويه عليك بعد ...عليك تحسبهم من بداية ما مسكت أملاكي وأدرتهم بخبرتك ...قول قبل أربع أشهر ...يعني لك عندي ثمان آلاف غير هالشهر
وتطالعه ...
...: كافيين عمي ؟​

بو أمجد مستانس بس يحاول مايبين لها : كافي وزايد ...بس ليش كل هالمبلغ وايد يابنتي ألفين بالشهر ؟؟ ..​

فريده : لا وايد ولا شي تستاهل عمي أكثر من جذي ...انت عمي وحسبة أبوي ...ومابينا حسابات ..

بوأمجد بثقل : ماتقصرين يا بنت الغالي ....
الا ذكرتيني صج ؟ ماودج تكلمينه؟
فريده : ودي عمي .. بس انت تقول انه مايبيني أدري عن سجنه ...
بوأمجد : ماعليج ...راح أحاول أروحله اليوم وأحصل منه جم زفه لأني قلتلج ... وأمهدلج الطريج علشان تشوفينه .
فريده تبتسم : مشكور عمي ...
بقلبها : يعني أخيرا بيي اليوم اللي أشوفك فيه ؟؟؟؟
بو أمجد يقوم :يالله أترخص أنا .. وين عارضيه ؟
فريده تروح ركض: أناديها لك ....
بو أمجد : اخاف مشغوله ؟ تعالي يابنتي أنا مستعيل ...انتي بس قوليلها إني موافق ...
فريده : موافق على شنو عمي ؟​

بو أمجد وهو يبطل الباب وبيطلع ومعطيها ظهرها : موافق على سالفة الخطبه اللي قالتلي عنها يدتدج ....​

نشوفكم على خير

!!!!!!!!!! ​