روايتي الاولى : (دليسا )

[عازميه ولي فخر]

يا خساره انا ما اعرف الا الحناء والزيت زيتون لو الوصفه تحتاج استمرار عادي موافقه لانه ابرك ما احط الحناء الا لاصبغ شعري والزيت اذاكان جاف بس تشوفيني تقولين متروشه بزيت واخليه يوم وباجر اتروش والله يستر لشعري بعد السبوح يتقطع من المشط

 

[عازميه ولي فخر]

ياليل انا سمراء اليل شفتي اختي شلون عادتها

 

[Lolwa]

سمراء الليل
يمكن انتي شعرج ماينفعله دهن , اذا شعرج أصله دهني مو زين تدهنينه يقصفه ...جربي الكثيره تنباع بالحواي شكلها مثل النايلون الابيض مكسر ينقعونه بالماي ويحطونه يالشعر ماجربته بس سامعه عنه اخذيه من الحواي وبحثي عنه بالنت لطريقة استعماله
والله الموفق

 

[سمراء اليل]

الزيت يفيد مع شعري وشعري مو اصله دهني شعري جاف لاع جبدي بس البي اتزوج واقصه لان بالزواج راح اخذ الحريه بنفسي والي الان ويا للاسف مازالت الوالده تتحكم فيني بس لو تعرفين شي ينعم شعري قوليه لان شعري صار وبالصدفه كشه واهو عمره ماصار ناعم

 

[Lolwa]

الفصل الخامس والثلاثون ​

​

​

بدر يروح بيته اللي مأجره عالمؤجرين اللي كان داق عليهم ومواعدهم ( لأن مو حلوه يقولهم بالتلفون )​

دخلوه عندهم بالدوانيه وأكرموه كضيف ...​

و طلب منهم انهم يدورون على مكان ثاني لأنه مضطر انه يسكن فيه ماعنده حاليا مكان يروحله ...​

وكانوا جدا متعاونين ومتساهلين بالموضوع وطلبوا منه مهله أسبوع علما يدورون مكان ثاني و يدبرون نقل عفش واللاذي مينوه...​

​

ايي بدر من بعد طلعته اللي صارلها ساعتين ​

ويتلاقون كالعاده عند دريشة حبهم ببيت عارضيه​

بدر يتصروع أول مايات وشافها : شنو هاذاااااااااااااااااا؟​

دليسا تتصروع وياه: شنو ؟؟ شفيك ؟؟​

بدر : شعرج ...شعرج ....لأ لأ لأ لأ ..ما أصدق ؟​

دليسا : واي خرعتني طيحت قلبي بالقاع ...​

بدر : ليش جذي ...منو اللي قصه لج ؟​

دليسا : أنا طبعا..يضايقني ..وخاصة بالسالفه اللي صارتلي أمس شجعني اني أقصه ...​

بدر حده ضايق خلقه : لأ لأ ...حرام عليج جذي تسويييين فيني ...​

لفي خن أشوف ....!​

دليسا تعطيه ظهرها وهي تطالعه!!​

بدر : قبل كان واصل لي تحت(....) ..ويتعداها الحين صار فوقها.....​

دليسا : أمبيه عيب شالكلام ؟؟؟​

وتاخذ شعرها وتمسح عليه وتهده يطيح بظهرها :شوفه ...واصل لي نص ظهري ... مو وايد قصير !!! تعمدت ما أقصه وايد علشان يدتي ماتلاحظ ...لوعلي ... ودي أحشه حش و أقصه بوي وأرتااااح..​

بدر : لأ حرام عليج ...لأ ...ويسوي مناحه ويزعل ومايسولف إلا على هالموضوع صارله مده ...​

بدر : لا لا ..لازم نشوفلج شي تاكلينه يطوله ...والا لازم أشتريلج دهن يردلي إياه مثل أول ...بيبلج دهن تطويل مخصوص علشان يطوله بسرعه ويرده لي سالم ومعافى نفس قبل....دخليني بس خن أودعه وشمه ...دخليني تكفين دلووووووس....​

دليسا : شتودع فيه ؟ خلاص قصيته وخلصت ؟​

بدر بكلام جدي: اي بشمه وأمسح عليه بيدي...أكيد تعور من القص ...لأنه مو متعود ينقص من وعيتي عالدنيا ...هىء هىء ...ويحط إيده على يبهته!!!!....​

دليسا قلبها يرق عليه ...وتقول بقلبها : أدخله بس شويونه ...يشمه ومادري شبيسوي اهو مع طقوسه!!!! ويطلع بعدين..وعليا كسر خاطري ..لو أدري والله ماقصيته !!!​

​

وفعلا تدخله داخل البيت​

بدر يقعد يمها بالقتفة ( بس شوي بعيد بناء على طلبها !!!)​

لكنه ماخذ الطرف الأخير من الشعر كله ( لمته فريده وعطته ) ويحضن بالشعر ويبجي ​

فريده مستغربه منه ؟؟؟؟​

بدر يمسح بالشعر : حسافه عليك حسافه....​

ويقرب يمها شوي​

ويقرب بعد ​

وشويوووونه بعد ​

ويكمل :شلون ياتج الجرأه وتقصينه جذيه ؟ ماكسر خاطرج ؟؟؟ما عورج قلبج !!! يالظالمه يالظالمه.....​

وياخذ إيدها ويحطه على قلبه ​

شوفي قلبي شلون يطق حزنان عليه​

ويقرب ويها من ويهها ​

​

ويحط ذراعه ورى ظهرها​

​

ويسدحها عالقنفه ​

​

و يعطيها بوسه !!!!!!​

​

​

نشوفهم الحين عند دريشة ميري!!!!!!​

​

ودليسا شابكه ذراعينها على بعض وهي واقفه وتحرك كعب ريلها اليمين وتطقطق فيه وهي معصبه ورافعه الحاجب!! ​

​

بدر :أنزين لازم يعني أطلع من هالدريشه ...ليش مو من الباب مثلا نفس باجي الأوادم ؟​

دليسا : لأن هذذي دريشة العقاب ياللي تستغل حسن نيتي وحبي لك وتقص علي وتغافلني ..وأنا على ويهي صدقت انك ضايق خلقك على شعري...​

بدر : وربي ضايق خلقي عليه من صج .. وبعدين أنا أتشاغب وياج حبي وأطفرج ليش تاخذينها بحساسيه جذي ؟؟؟؟ ​

فريده :ممممممم؟؟؟ قشمرتك مو مقبوله ​

بدر : وهل مقبول اللي انتي قاعده تسوين فيني ؟​

فريده : شسويت فيك بعد؟​

بدر :كلا امرمطتني تخليني أوقف بره جني عتوي ؟؟؟ ماتخافين علي...الشمس كلت راسي حتى لوني تغير منها...صرت عتوي أسود...​

فريده تحاول ماتبين إبتسامتها وتسكر الدريشه وتكلمه بالتلفون وهي بطريجها لي دريشة حبهم: لي صرت خوش واحد وتوقف عن حركاتك اطفارتك الزايده ...أفكر أدخلك ..وبعدين لاتنسى ...ألحين ماراح أكون بروحي بالبيت بييب يدتي معاي ووياها السسترات والخدم , فماراح تقعد بره بعد اليوم ....​

بعد فتره ​

​

فريده تشوف ساعتها والا تأشر عالوحده ونص​

فريده : وي تأخرت على إيديده ...لازم أروح قبل لا تيي هنادي من دوامها...​

بدر : يا الله..تعالي أوديج ...​

فريده : لا يبا بطلب تاكسي ...مينونه أنا أروح معاك !!واذا شافتك مرت خالي ؟؟؟.ماتعرفك !!..شتبيها تقول عني ؟ مابي أحد يشوفني وأنا وياك ..​

بدر يعزعل :أفا؟؟؟ مشكوره ​

فريده تضحك : قاعده أطفرك نفس ماتسوي فيني ..​

بدر يبتسم:آآآآه تعلمتي مني يعني؟​

فريده تغمزله : تقدر تقول جذي...هههه ...​

بدر :إي يحليلج والله ... ماتقدرين تجاريني بطفاراتي لج ترى..​

فريده : إمبله أقدر ...كا خليتك تعصب ...​

بدر : آها ....(نشوف منو طفارته أقوى من الثاني )​

ويركبون السياره وهم بطريجهم لبيت خالها ​

يسمعون إغنيه ​

فريده تتذكر شغله ميته بتقوله ( وتقصر على صوت الاغنيه) : إي صج !!! الا مادريت ؟ ما قلتلك ؟​

بدر : خير ؟ شنو؟​

فريده :ما صارتلي فرصه إني أقولك وأخبر أي أحد ثاني .. أصلا نسيت السالفه من الأحداث اللي قاعده تصيرلي وورى بعض..​

بدر : قولي يا الله شوقتيني ؟​

فريده : أنا ...أنا... حااااا....​

بدر : حااااامل ؟ لا لا موبهالسرعه ؟ أصلا حتى مامداني ؟ ترى كلها بوستين!!! ويالله بالزور خذتهم بعد !!!​

فريده ويهها حمر: باااس بدر !!! ... شالسوالف ؟​

بدر : قاعد أطفرج هههه ​

بدر بقلبه : شفتي إنج ماتقدرين تجاريني بالتطفر !!!.صج البنات مايستحملون !!!. عيل ماشفتيني أنا وربعي بالدوانيه شلون نضغط على بعض ؟؟؟...​

بدر : ها وين اللي تقول ماتقدر تجاريني بالتطفر ؟​

فريده ماده البوز : ........​

بدريلتفت عليها كل شوي ويلاحظ تكشرها ...​

يجيسها بكوعه : ايممممممممم يالله دلووووس..انتي اللي بديتي بسالفة الضغاط ..وأنا ما أقاوم هالسوالف ..خلي روحج رياضيه قلب ...يالله حبي...كملي ... شنو كنتي بتقولين ؟؟​

دليسا تتكلم بثقل بعد فتره وبتردد : حااااولت مو حامل! حاولت .....​

اني أدور بالنت عن نتايج الثانويه وأشوه ولقيت الموقع و شفت نسبتي.....​

بدر :هههه أوكيه حاولتي ....سوري!​

بدر وبكل اهتمام : جم نسبتج؟​

فريده : 71.3​

بدر : مبروك حبي ...وأخيرا نجحتي ..ونسبتج حلوه بعد مو بطاله ​

ويصفط فيها بأي مكان صاد بين البيوت اللي بالفريج الثاني لبيت خالها ....​

بدر يقرب يمها ويمسك ايدها : والله وفرحتيني حبيبتي انشاء الله أشوفج خريجة جامعه..عن قريب ​

فريده : آمين​

بدر : مافكرتي وين ودج تروحين ؟​

دليسا : مادري ؟ ودي كلية التربية لأن نسبتي حده حده للقبول هناك .. بس بكتبها أول رغبه .. وثاني رغبه علوم إد........ ​

ماقدرت تكمل كلامها لأنه شافت ويه بدر يقرب أكثر من ويهها ومسكر عينه ......​

دليسا تتفاجأ وتبطل الباب بسرعة و تنزل : بروح مشي أحسن مولزوم تسوق فيني لي هناك ...​

​

وتمشي ويمشي بدر وياها بالسياره عالبطيء​

بدر : دلوس سوري حبي ...ما قدرت أقاوم ...شكلج كيوت وانتي كلامج جاد عن مستقبلج و....​

دليسا :أوكي.......​

بدر : والله خلاص ماراح أبوسج مره ثانيه أوعدج ..​

دليسا بصوت واطي : اي صدقت...​

بدر: ركبي لا تتعبين روحج بالمشي ....يالله عاااد​

دليسا : عادي المشي رياضه...​

بدر : حلاة الزعلانين ...​

فريده :....​

بدر : بتحابيني؟​

فريده معصبه : لا ليش أحاربك...​

بدر : آها ؟​

فريده تمشي ومولقيته ويه​

بدر يطالعها :!!!​

إنزين شنو أسوي علشان أكفر عن خطأي هالمره ؟​

فريده تستغل الظرف وببديهية : توديني بيت عمي أييب !!!...​

بدر يحك لحيته الديرتي اللي على خفيف : آهاااا !!! انشاء الله​

​

فريده مستانسه من داخلها... بس تسوي روحها مو هامها ( أم نفس عزيزه وشخصيه قويه ) وظاربه الثقل ....​

​

​

ويوصلون عند بيت خالها لمن فعلا تلقى سيارة مرت خالها صافطه عند مدخل البيت والساعه الحين إثنين ونص!!!​

​

بدر : أروح ألحين وأخليج حبي , إبتسمي علشان أروح ...وإلا ترى وقسما بالله اني بتنقع هني وماني محرك البته ...البتتتته..​

فريده تعطيه الإبتسامه الثقيله ​

بدر يبتهج : أيوااا ...جذي ابتسامتج تعطيني قوه طاقه ...ههه ...يالله باي ...​

فريده تطالعه وتبتسم بثقل لين راح !!!​

​

داخل بيت خالها ​

​

هنادي : لا يبا ..مستحيل...ماخليج تاخذينها...​

فريده : ليش يا خالتي ؟​

هنادي : ماتعرفينلها يبيلها عنايه...​

وبعدين شفيها لي قعدتي معاي ؟؟إحنا نبيكم ويانا تونسونا وتآنسونا ..​

فريده : مابي أحملج عبأنا زياده على اللي عندج ...بروحج موناقصه...​

هنادي : والله أزعل منج وماأكلمج ...شالحجي ؟ عمركم ماكنتوا عبئ ...وبعدين ماتخافين ايي عمج يدور عليج هناك؟​

فريده : ما أعتقد يقدر ...بعد هالسالفه ماراح نشوف ويههم عتبون الباب ...أصلا من مصلحتي أروح بيت ايديده ...هني يقدر اييلي بأي وقت.. ​

وتاخذ مرت خالها وتبوسها على خدها ​

فريده : لا تخافين ...انتي تقولين ان أمي دقت عليج وقالتلج : بقالها جم يوم بس وتخلص إمتحانها هالتيرم وتجي صح ؟....وبخليها تقعد هناك ويانا ببيت يدتي اذا يات من السفر... وحياج الله انتي بعد ببيتنا بأي وقت ...​

هنادي عيونها تدمع : عنيده طول عمرج ..​

يدق تلفون فريده ...التاكسي وصل وناطر بره ..​

فريده : يالله حبيبتي نشوفج على خير ..​

يدة فريده راكبه التاكسي يشيلونها السسترات الاثنين ووياهم ميري وتروح وياهم عند بيت عارضيه​

وتدخل عارضيه البيت ووينهها ينور من شافت بيتها وبانت اسنانها من إبتسامتها : شتقت لبيتي ...حبيبي ... ​

فريده : حياج الله عارضيه ببيتتج مره ثانيه ..​

​

فريده فرحانه لفرح يدتها ...تدري فيها تحب مكانها ماتحب تغيره ...يمكن قعدتها وراحتها وألفتها ببيتها بيساعدون ويعجلون من بعد الله طبعا من شفائها ؟ كانت فريده تتأمل هالشي وواثقه من حدوثه ...بس ناطره الزمن يثبتلها آمالها ...​

 

[sweet.sanfoora]

ويعا بدوور

وبثث

ثانكيوو لولو

 

[Lolwa]

بنات دليسا طلبت من بدر يساعدها اييب سيارتها من بيت عمها

بس مادري شفيها الجمله انمسحت ؟؟؟
لأني ماعدلتها
سويت كوبي وباست كنت مستعيله

سوري
والبارت الياي بعد شوي نطروني

 

[سمراء اليل]

البارت حلو بس خففي الوومانسيه واستري علينا ترانا ما تزوجنا ههههههههه

ومتابعه بعد..................

 

[sweet.sanfoora]

ناطرينج يا بعد قلبي قلبش

 

[Lolwa]

لا بس ماكو رومانسيه بتخف اهي من نفسها مع الأحداث


سوري اني أقولكم هالشي
خخخخخ

 

[Lolwa]

تسلمين ياسويت سنفوره يا سويتي انتي

 

[Lolwa]

الفصل السادس والثلاثون​

بسويت بدر ​

توه بينام والا يدق تلفونه
بدر مل وهو كلا يدقر التلفون وخاصة من جهة الاتصال هاذي​

ويرد​

بدر : نعم ؟
صوت ناعم ومعصب : يعني وبعدين وياك ماترد عالتلفون ؟ الشله ناطرينك
بدر : هديت هالسوالف منزمان.. فلو سمحتي لا تدقين مره ثانيه ؟
النعومه : بس ياحياتي القعده مالها طعم من دونك ...تراني تعلمت حركات حلوه بالرقص يديده ماتبي تشوفها؟؟؟
بدر يصارخ : ليال !! قلتلج ماقمت أهتم بالخرابيط هاذي والله تاب علي ...وناوي أروح الحج هالسنه ...فخليني بحالي ولا تدقين مره ثانيه
ليال : وواي بدوووري يحلوك بيرروح الحج ...عادي روح الحج وتعال لنا نتبارك فيك ... هاهاهاهاهااااااي​

يعصب بدر ويسكره بويهها

بدر : ياربي سامحني ...أنا تبت والله تبت من السوالف وكرهتها ..بس الشله الوصخه مي راضيه تفهم وتهدني ...شسوي ياربي شسوي ...​

يرن التلفون مره ثانيه​

ومن غير مايشوف الرقم وبعصبيه وتنرفز يرد عاللي متصل
بدر : وبعدين يعني ...ياشلة الشياطين ...ماتهدوني أعيش حياتي وبسلاااام ​

فريده تستغرب وماتدري شتقول: أه أه ...​

بدر يطالع شاشة تلفونه وينتبه انها فريده
بدر يرقع : ههه فردود حياتي ..أه أه ..كنت أه...كنت .....
فريده : شنو شلة شياطين ؟
بدر : هذولي ربعي يطفروني ويضغطوني كل مره ..وتنرفزت منهم ..
فريده تضحك : آه ه ه ه ...خل روحك رياضيه ..( يعني صايدته)
بدرمتوهق : اي ..ههه . صح صح ..لازم ماأخليهم يغلبوني بالضغاط ..ههه صح...
فريده : انزين بدووور؟ وينك قاعده أنطرك؟
يدتي نامت والسسترات داخل عندها لاهيين الحين أحسن وقت توديني عند بيت عمي...
بدر : بيت عمج ؟
فريده : شفيك نسيت ؟ بييب سيارتي من هناك!!
بدر توه يستوعب : اي اي امبله سيارتج .يالله كاني مسافة السكه وياي عندج...
بدر بقلبه ( هاذي من صجها ؟؟؟ ماتخاف من عمها ...صج انج بنت عن ألف ريال !!)​

و عالساعه 11 بالليل ​

بس يصفط بدر ووياه فريده يم رابع بيت من بيت عمها
وتمشي دليسا لي بيت عمها
تبطل سيارتها(سيارتها جيب أودي ) وتسكر الباب
وقبل لا تشغل السياره تسمع حس واحد يمشي بالحوش وياي وبسرعه تروح بدبة سيارتها وتنخش فيه
يطلع عمها ورايح لي سيارته اللي لازه بسيارتها​

وفريده ميته من الخوف لا يكتشفها عمها وقاعده متسمره بمكانها من غير حركه
تنطرته يروح​

لكنه طول وهو بالسياره يشوف المستندات ويقراهم ومبطل الليت​

بدر يراقب من بعيد كل اللي قاعد يصير : هذا وقته الحين تشوف أوراقك؟​

تالي بعد نص ساعه يشغل سيارته وهو يتكلم بالتلفون ويمشي فيها​

بدر يدق عليها : تنقز فريده على صوته من خرعتها للموقف ويطيح منها التلفون
بدر : الو
فريده : هلا هلا ؟؟
بدر : يالله حركي بسرعه قبل لا ايي خلاص مشى
فريده : مشى ؟
بدر : أي
فريده : يالله يالله عيل آه آه ..باي​

بدر : باي ...يحاجي نفسه : محد يتمنى انه يكون بمكانج الحين !
ووتروح المقعد الأمامي وتاخذ مفتاحها وتشغل السياره وتبطل الليت وتوها بتمشي الا تلفونها يطق​

وتصفط يمها سيارة عمها مره ثانيه ( كان ناسي شي وبييبه )

تطالعه فريده منثوله ​

وبو أمجد لازق يم سيارتها بس بعده داخلها ويطالعها طاقته البوهه
وتستوعب بسرعه فريده وتعطي سيارتهاrترجع فيها قري بهاللحظه عمها يبطل باب سيارته وينزل منها ويناديها​

لكنها تعطي الـــd وتقحص وتحرك بسرعه هادته بالشارع يناديها ورافع ايده بالسما...​

التلفون ليلحين يرن مو منتبهتله​

وحدها متصروهه
ومومستوعبه اللي توه صار
وقاعده تمشي هايمه ماتدري وين تروح بس بتنحاش من عمها وتحط ايدها على حلجها : أمبييييييه أنا شسويت ؟​

وببيت بوناصر​

الحفله قايمه والمعازيم وايد​

والعروس لابسه الأخضر الفستقي طويل وضيق من تحت بمكياج ناعم وشعرها (اللي لي كتفها ) منهد وبورده بيج مثبتة ورى راسها صوب البف.... ​

وتجي نورا يم العروس تسلم عليها

وفتون تاخذها بالأحضان وتقولها رقمها علىشان تسيفه عندها وتعطيها مس كول تجيك عليه بعدين( لأن امها لهت وكشتت فيها ما عطتها رقم نورا !!!!)
و يوصل المعرس ( رائد ) بروحه وهو ناسف القتره وياي بالدشداشه وصط يباب الحريم
ويقعد يمها ​

وتييب ريم طشت صغير مزين فيه ماي وحنه ويحطون المعاريس ريولهم اليمين فيه وتمسح عليهم أم المعرس وأم العروس حسب طقوسهم وتقاليدهم !!!! وخوات فتون ( فجر وأميره ) يفركون فوق راسها ملح خشن عن العين ...ومنى اخت فتون تييب لهم العسل علشان رائد يحط صبعه فيه ويوكله فتون!!!​

لكنه رفض ...حاولوا يقنعونه مارضى وهدد أمه انه يمشي اذا كرروها وأصروا!!!
فتون استحت من موقفه وطلبت اهي اللي تعطيه بصبعها ...بس طالعها بنظرة شريه ..اللي بعدها خقت ..​

وتخلص الحفله ويطلعون المعاريس ويلحقونهم بسياييرهم ويوصلونهم الحريم لي شقتهم بالسياره وصط يبابهم وفرحهم​

ومن العادات انهم يدشون يزفونهم داخل الشقه بس رفض رائد وبشده
خلاهم يرجعون مكانهم خايبين
بس ظلت أمه واخته وأم فتون
وياهم بالشقه​

أم رائد : ليش يا أمي تسوي جذيه فشلتنا مع الحريم ؟ كانوا بيكملون حفلتهم هني شوي وبيخلونكم بروحكم ...​

ريم : قص ويهي مع رفيجاتي!!
رائد يصارخ : أووووه ..انا أدري منين يايبين عادات اليوم الثالث هاذي بعد ؟؟؟.خرابيط ومرابيط...

فتون بجت بحرقه على صدر أمها
وأمها تهدي فيها​

تلفون فريده ليلحين يرن
وفريده توها تستوعب طريجها ..وهي رايحه صوب البحر
وترد عالتلفون ​

بدر يصارخ : شفيج ماتردين عالتلفون قلبي طار عليج ؟ وين رحتي ؟
فريده : عمي ...عمي !!!
بدر : أدري أدري كنت واقف بعيد وشايف كل شي ...ردي الحين بيتج وهدى ...
فريده : شلون تصرفت جذي ؟انحشت منه جني.... جني حراميه !!
بدر : لازم تسوين جذيه والا ياخذج ويحبسج عنده مره ثانيه ..
فريده تبجي : أنا أحب عمي بس ليش يتصرف معاي جذيه ..ماودي أكدره وأضايقه .
بدر : بس ياحبي قطعتي قلبي ..الأيام بتبين له حبج له ..انتي بس نطري واتكلي على الله ..
فريده تمسح دموعها : آمين ...الله يسمع منك ان شاء الله​

بشقة فتون ​

فتون : انت ليش تسوي جذي وتفشلني يم أهلي وصديقاتي قصيت ويهي؟
رائد : أنا من الأول ماكنت أبي أيي حفلتكم التافهة ..بس أجبروني أمي وأمج!!!
فتون : هاذي حفلتنا احنا الاثنين ...لا تقول عنها تافهه ..​

رائد : الا تافهة ونص ..

فتون تبجي : ليش جذي تعاملني ؟ أنا أحبك والله أحبك حرام تسوي جذيه
رائد كسرت خاطره ..بس تذكر جرأتها يوم الدوانيه غيرت رايه بسرعه
رائد : أووووه فكينا كل يوم بجي ومناحه ..الريال مايقعد ببيته مرتاح كلش...انتي جذي تنحشين اللي يقعد معاج ...
وياخذ سويجه ويلبس نعاله ويطلع
رائد يكمل : هادلج الشقه بكبرها قعدي ابجي وناحري فيها على كيفج ..
فتون : رائد رائد...​

ويسكر الباب حيل وراه​

فتون وبعد مامسحت دوعها تاخذ تلفونها
لقت فيه مس كول​

ودقت عليه كلها امل انها تكون اللي ببالها​

نورا : هلا فتون
فتون : هلا ياحلوه ...هذا رقمج عيل ؟ بحفظه الحين عندي
نورا : أوكي .. ماشاء الله اليوم طالعه تيننين بالبدله الفستقي ..صج واااو عليج مطلعج قمر..
فتون : تسلمين هذا من ذوقج ..وانتي بعد شحلوج اليوم صايره عيني عليج بارده ..
نورا : مشكوره ..يالله عيل أهدج مع ريلج لا أعطلج بعدكم معاريس ههه
فتون : لا لا لا تسكرينه
نورا : هلا ..
فتون : ودي أقعد وياج وأسولف معاج ...شرايج تجيني بيت أهلي باجر ؟؟ أنا بزورهم
نورا مستغربه عروس توها وتزور أهلها حتا ماكملت أسبوع ؟
نورا : وعادي عنده ريلج ؟؟؟
فتون : اي اهو اللي قالي ..علشان ما أفقدهم وحياتي تتغير علي فجأه ...فخلاني أقعد وياهم طول النهار وبالليل أروح شقتي عنده
نورا :يابختج بريلج ..الله بهنيج فيه ..مبين خوش ريال
فتون : اي الحمدلله ..يالله انشاء الله انتي نشوفج عروس
نورا استحت : ههه الله كريم ...يالله نشوفحج عيل باجر العصر باقول حق أمي تيبني عندكم ,,يالله باي
فتون : باي ​

عالساعه الوحده ترد فريده البيت
وتروح غرفتها وهي منهكه بتنام​

فتره​

و تسمع صوت الجرس يرن
فريده : منو هذا ؟ لايكون ؟​

أول شي خافت تفتحه​

لكن اللي يطق الباب مصر ويطق الجرس مده لين قعد ميري والسسترات​

وتروح ميري بتبطل الباب​

تمسكها فريده من ايدها : لأ لأ خليه يولي لا تبطلين!!!​

واللي بره عارف القبند ويبطل الباب من الحديده تحت وتشوف عمها ياي​

فريده تتصروع وتروح غرفتها تقفل عليها الباب

وتحط مكتبها تلزه بالباب ( من كثر الخوف )​

وتسمع طرق عالباب ​

بو أمجد : فريده ؟ فجي الباب ​

 

[sweet.sanfoora]

شتبي يا العم الشرير

واااي اكرهـك

 

[سمراء اليل]

اف فتون للحين خبله ليش تسوي جذي لو ما سوت لعاشو بسعاده صح

 

[Lolwa]

اليوم أنا قاعدت لكم ههههه البارت الثالث بالطريج

 

[Lolwa]

الفصل السابع والثلاثون​

فريده :.....
بو أمجد : يابوج مو ياي علشان أتناجر وياج ...
فريده :!!!
بو أمجد : فجي حق عمج عيب اللي تسوينه ...​

عارضيه يايته من الأصنصير وياها السستر..​

عارضيه : وخر عن البنت ...موكافي اللي سويته فيها ..
بو أمجد : عارضيه أنا ياي بنيه صافيه ..
عارضيه : بنيه صافيه!!! ومدرعم البيت ومصروع البنت !!!والله لوإني بصحتي جان أعلمك شسوي ...
بو أمجد : أنا ...​

عارضيه تاخذ عصاتها وتاشر عليه وهي قاعده بكرسيها : تستغلنا حريم ضعاف بروحنا مالنا ريال يسند ظهرنا و يحمينا ؟ ترى لنا الله ... فوق كل البشر ...
وتتعب من الكلام ..وتطيح منها العصاة وتتنفس بصعوبه ​

السستر : حاجه عارضيه حاجه عارضيه ...وتطالع بو أمجد :...أرجوك علشان صحتها لازيم تروح دلوئتي ...بليز بليز ....
بو أمجد يضطر انه ياخذ بعضه و يروح ويقول حق فريده قبل لا يمشي : انا يايلج بوقت ثاني لين تهدين ​

في اليوم التالي ​

بيت بوناصر ​

تستقبل فتون وام ناصر نورا ويا امها سلوى ​

ويقعدون ويا بعض
أم ناصرتمسك ويه نورا: اسم الله عليج .. قمر ماشاء الله تبارك الرحمن ...​

نورا مستحيه

يجي سالم من الباب الرئيسي ( أمه مناديته )
يشوف الحريم ويفتشل بيطلع مره ثانيه الدوانيه لكن أمه تصيده : سااااالم سلم على خالتك أم أمجد
سالم : قوه خالتي
سلوى : هلا وليدي شلونك وشخبارك
سالم منزل راسه : والله الحمدلله بخير دام انكم بخير
أم ناصر : سالم ...هاذي بنتها نورا
سالم يطالعها : هلا هلا نورا
نورا مستحيه وتطالع الأرض : أهلين
أم ناصر وأم أمجد يتغامزون وفتون تساعدهم : نورا بنيه عاقل وخدومه وأنا حبيتها وايد ودشت قلبي من شفتها أول مره
نورا : منبهره وماتدري شتقول
سالم ينحرج : أخليكم عيل
أم ناصر : وين ؟ خلك ويانه شوي اقعد ودي أسولف وياك
ام ناصر : اي أمي اقعد هني وانتي نورا قعدي هني (القنفات متلازقين ببعض وصايري على زاويه)
نورا بترفض : شنو خالتي ؟ لأ بقعد هني يم أمي
فتون تنقذ الموقف وتقعد بينهم ​

تعالي أم أمجد انتي قعدي هني يمي
وتسولف وياها بسوالف موهامه سالم ...أصلا مايدري شتقول..ومنحرج ومستغرب من أمه وخالته وهم ملزمين عليه يقعد وياهم ؟؟​

لكن نظراته يسرقها من نورا كل شوي يتفحصها وفتون ملاحظه هالشي ​

فتون :تحاول تقربهم من بعض عن طريق السوالف..
تسولف عن التسجيل بالكليات وتاخذ آراء سالم بما انه أكبر منها وعنده خبره ... لمن نورا شوي شوي قامت تاحذ وتعطي وياه بالسوالف لأنها وايد حايره وين تدخل وبأي كليه تسجل مع ان نسبتها 90.1 بس هم حايره ..
ويشرحلها طريقة التسجيل ونسبتها يصلحلها الكليه الفلانيه أحسن من المعهد ذاك ...الخ ...
فتون تستغل الموقف : وي ما أعرف شلون الطريقه ؟ آه ...شرايك تقعد مكاني سالم وتشرحلها...​

وتقوم ويقعد مكانها سالم وهو يشرحلها ومندمج بالسوالف ودشت قلبه بسرعه والأمهات ملاحظين هالشي ويبتسمون حق بعض ​

يمر شهر​

فتون ليلحين ما لمسها ريلها وعلاقتها وياه مشتته وكلا خناق وبجي ويطلع يهدها بالنهار وايي شقته بس علشان ينام بروحه بالصاله !!!​

علاقة فتون ونورا صارت قويه ​

استشارت أم ناصر ولدها سالم اذا يبي يخطب نورا ؟رفض معلل انه ما يأيد الزواج موليه وماراح يتزوج طول عمره !!!!​

صفا مايات الكويت بعد انتهائها من الامتحانات بس تقعدهم على أمل جيتها بعدين تكشت فيهم كعادتها !!!(عذرها شركاتها وادارتها لهم ماتقدر تهدهم ) ​

دليسا وبدر ليلحين حبهم قوي بس من تحت لي تحت محد يدري عنهم​

بدر يطلعون المؤجرين من عنده ويسكن ببيته بروحه !!!​

العم بوأمجد يحاول يحصل فريده لكن كلما ايي تطرده عارضيه وتهدده تنادي الشرطه...لكنه ماحب انه يسويها مشكله كبيره ولا حب يرك على بنت أخوه لكنه مايأس وليلحين يحاول معاها على أمل انها تكلمه ...​

شقة فتون​

توه رائد يوصل الشقه ( كان رايح القهوه وقاعد مع ربعه )
فتون : مو حاله هاذي كل يوم طالع وهادني بروحي !!!​

رائد : موبروحج ...كاتروحين عند أهلج ..

فتون : بس ما احس اني متزوجه كلش !!
يكشت فيها رائد ويجهز الغطاء علشان ينام بالقنفه اللي مجابله التلفزيون ولابتوبه اللي ما يفارقه حتى بالقهوه ياخذه وياه...
تعصب فتون وتشيل منه اللحاف : الحياة معاك مستحيله ...
رائد يطالعها : طلبي الطلاق عيل
فتون تضحك : حريمتك ...هذا اللي تبيه ...
رائد : لا تخافين عندج وايد يعوضوني ... فبسرعه راح تمشين ...وياخذ منها الغطا وينام
فتون : شقصدك !!!!
رائد : مو عندج غيري تكلمينهم وتحبينهم ...أشري على واحد منهم اييج ركض ....وتتزوجين وتعيشين حياة سعيده يعوضج عن حياتج وياي
فتون : انت شقاعد تقول ..أي رياييل وأي خرابيط ؟
رائد : يعني الحين بتقنعيني انج ماتعرفين أحد ؟
فتون تنفعل وتبجي : رائد هذا كلام كبير اللي قاعد تقوله...
رائد : تبجين ؟؟؟
عيل أكو بنت شريفه تحترم نفسها تقط سليب بالدوانيه ؟
فتون : اي أقط سليب وأسوي خطه بس علشانك انت ...والله اني ماسويتها مع غيرك ...أحبك بس انت مو حاس فيني حزتها ...وفكرت أسوي هالحيله علشان تنتبهلي ...​

يحاول رائد ينام وكاشت فيها وهي تقرقر فوق راسه ويتقلب بالقنفه ​

رائد : يعني انتي ناويه تجابليني وقت نومتي ويا ازعاجج وبجيج ؟ تروحين تكملين بجيج بغرفتج والا اليوم دوري أروح الغرفه.... تراني حدي تعبان وموناقصج ...​

فتون تطلع من طورها وتصكه طراق​

رائد :!!!​

فتون : انت ماتحس ؟​

ويقوم من القنفه ناوي يردلها الطراق ​

لكنها وبجنون تتهرب منه​

وتروح عند الاب توب اللي يمه وتاخذه بحركه خفيفه وسريعه وتروح عند الدريشه وتفتحها تهدده ​

تبي الحين أحسسك بشعوري ...تبي تذوق اللي أنا ذايقته الحين
تبي تحس بفقد شي عزيز عليك وينكسر جدامك مثل ما فقدت قلبي وكسرته لي ؟​

رائد يبتسم : ماتتجرأين ؟

فتون تضحك وتقط الابتوب من الدريشه ( من الطابق الرابع )​

رائد : يالمينونه​

فتون ليلحين تضحك بهستيريه​

أكرهك أكرهك​

على قد ماكنت أحبك قبل الحين أكرهك من كل قلبي​

ويقوم رائد ​

ويمسكها ويهفها طراق علشان الجنون وكسر الاب توب...​

وطراق ثاني علشان السليب والريايل ​

وطراق ثالث مقابل يردلها طراقها ويصحيها فيه​

رائد يمسكها من جتفها ويهزها : شفيج ؟ راكبج يني ؟ موصاحيه انتي!!! ​

فتون تطالعه وهي ساكته ماتتكلم ​

رائد ينصرع : فتون فتون​

رائد بقلبه ( توهقت فيها هاذي ؟ شيقولون أهلها الحين علي ؟ اني يننت بنتهم ؟ شالوهقه​

ويرد يكلمها ويناديها​

فتون سارحه بنظرها بجهة وحده ...السراااب​

ويحاول فيها ويطقطق ويها​

لين تيبست ريولها الأثنين وجسمها ينبض وايدها نعكفت وراسها راح لي ورى
ياخذها رائد بسرعه وهو يشوفها بهالحاله ميت من الخوف ويشيلها ويوديها المستشفى ..​

الدكتور : حاشها صرع ....أول مره يحوشها ؟؟ ​

رائد : مادري ...جنه اول مره ..ويتردد ..والله مادري؟​

الدكتور : لازم تظل عندنا يوم نلاحظها ونخفف اللي فيها لأن يايها صرع قوي بغى يشلها ...المفروض ما نتفعل وايد ..عن اذنك عندي مريض ثاني بحاله مستعجله ..​

رائد : اذنك معاك يعطيك العافيه​

رائد بقلبه : أنا شسويت بالبنت ؟ وهل اهي عندها حالة الصرع من قبل ؟ أنا أذكرها بصغرها ماعندها !!! واذا عندها ليش اخدعوني يوم تزوجتها ؟ ليش ماقالولي عن هالمرض ؟
واذا ماكان يايها من قبل وياها بسبتي ؟ وين أودي ويهي من أهلها وأهلي ..أكون قسيت عليها وظلمتها وكلامها عن حبها لي صادق وشريف ...​

ويبجي بحرقه​

والله أنا بحيره ؟ مادري شلون أتصرف ؟​

 

[sweet.sanfoora]

ويي فتووون كسررت خاطري << اول مرة

وبثث

ثانكيوو

 

[Lolwa]

sweet.sanfoora

تابعي البارت اليديد الصبح ان شاء الله
وراح تنصدمين

 

[sweet.sanfoora]

ناطرة الصدمة حياتي

وبث ثانكبوو

 

[39la o f9la]

] way 7ram ftoon ra2ed ra7 y7bha atw83
Bs b3rf bo amjad shno yabi mn fareeda!!

&&& thanQ