هل لديكم طفل يعاني من التوحد- خلونا نتجمع

[ريمه الكويت]

هلا سنع عمره 3 سنين ونص اهو فيه شي غريب بصغارته من عمره ايام وايد يحرك ايده ويطالع الشفاط الي بالحمام هذا الي لاحظته فيه من ولادته بس كان طبيعي حبى بعمر طبيعي وقعد وسنن وكان ينطق كلمات بلاشهر اما المشي مشى بوسنه واربع شهور يعني ماتاخر وايد بس كمل السنتين ومايركب جمل بس كلمات قلت عادي يكبر شوي ويتعلم لما كمل 3 سنوات اشوف الي بعمره يتحجون عادي عاد وديته الحضانه الانجليزيه ماشالله قام يتكلم انجليزي ويقول كل الاحرف الانجليزيه والاشكال الهندسيه ويعرف حق الكمبيوتر يعني فيه ذكاء بس الاحظه الجمل مايقولها الا قليل مونفس الي بسنه والابله تقول انه مايحب الازعاج يسكر اذنه وفيه ملاحظات وايد اكتبها لكم بعد الصلاه ونسيت اقول اني رحت الطب التطوري وراح اكتب شنو قالت لي الدكتوره

 

[Emanova]

ناطرتج انا

 

[ريمه الكويت]

سامحيني تاخرت سارتلي طلعه
اقولج بين فتره وفتره اسال ابلته بالحضانه شنو ملاحظاتج عليه تقول اهو يتكلم بس مومثل الي معاه الاطفال الي بعمره من تسالهم على طول يجاوبون اهو لاء بكيفه يقول الاسماء والاحرف مع انه يعرف كل الاحرف الانجليزيه ويحب يكون معاه طفلين اوثلاث اذا سارو وايد يسكر اذنه وكان بالبدايه مايقعد مع الاطفال كله بروحه بس على اواخر السنه بدا يلعب معاهم وبعد الحمام مايبيه الى اللحين بامبرس لو مهما اسوي مايبي يدش الحمام يبجي
وبعد من ملاحظاتي عليه اذا مايبي الشي لو اعيز مايرضى فيه مثلا بعز الشتا والبرد مايبي جاكيت ولاقبعه تخيلي حتى بالمطر البسه القبعه يحذفها الجاكيت معافر انا معاه مايبيه بس يبجي وبالسوق ساعات اذا بقى الشي ومااخذته له ينسدح بالارض يبجي ويصرخ يفشلني يخلينا فرجه للناس

وديته الطب التطوري قعدت الدكتوره معاه مده تسال اهو بالبدايه ساكت ويلعب باغراضها وسالته عن بعض الاشكال جاوبها بمزاجه ومرات يحقرها لما مل قام يبجي ويصرخ يبي يطلع وعطته موعد بعد ست شهور طبعا قالت فيه نسبه بسيطه من التوحد بس بوديه عند د عبير الي بالسلام اشوف شنو تشخص حالته

بعد نسيت اقولج يوم كان عمره سنه ونص الى عمر سنتين وايد يناقز بس يدش بيت اهلي بس ينط مايركد ماادري عادي ولا هذي من اعراض التوحد

 

[ناني سيكرتس]

ناني ... شرووط مركز الخرافي سهله بس اخذي منهم الاوراق و عبيها..

عندج حق الصيف مدرسة التربية النموذجيه فيها برنامج يا صبح يا عصر اهو حلو بس المشكله ان فيه حالات صعبه

التربيه النوذجيه اهي نفسها الي بدسمان يم الجمعيه..؟

 

[ناني سيكرتس]

خواتي ما تلاحظون شي ؟؟
ما عندنا هني بالكويت نفس الدول الغربية .. عوايل تقعد مع بعضها تساند بعضها بعض .. يسولفون مع بعض عن تجاربهم .. يستفيدون من خبرات بعض .. والله شي يضيق الخلق ..
يعني انا ولدي من تشخصت حالته .. ما لقيت اللي أسأله وين أروح وشسوي ؟؟ من وين أبدي شنو الصعوبات اللي بتواجهني .. طبعا الدكتورة عبير ما قصرت كنت أدق عليها واسألها بس التجارب العائلية غير .. لما الواحد يحس انه في أحد معاه على نفس الخط ونفس الدرب غير .. يحس بمعاناته و يشاركة اللي يمر فيه .. ولا شرايكم ؟؟؟؟
توني طالبه dvd من amazon اسمه autism yesterday .. والله ما قدرت أشوفه الا الحين والساعة 2 بالليل اسم الله عليهم ما قدرت أشوفه الا لما ناموا اليهال
المهم يتكلمون فيه 5 عوايل عن ان شلون عيالهم تعالجوا تماما من التوحد ..
يمكن الفيلم ما فيه شي زايد بس انه يعطي أمل ..
ولو تفتحون النت وتكتبون autism recovery stories وااااااايد راح تطلع لكم قصص أمهات وآباء عالجوا عيالهم من التوحد ..
صج الواحد لاااااازم يكون عنده أمل .. وثقة بالله ان هالشي له علاج ..
وباذن الله في يوم من الأيام .. راح أدخل هالمنتدى وأكتب شلون عالجت حبيبي ولدي من التوحد
قولوا آآآآآمين ..

امين ان شاء الله بكتب قصتي مع علاج ولدي ورا قصتج ان شاء الله, انا عاد قاعده ادور اي مكان يعطينا دورات اشلون نتعامل فيها مع هالحالات, بس اهني بالكويت ماكو مكان بعلمنا, يعني مالنا الابعضنا .شكلنا بنسولف اهي ونفضفض..

عموما اشكر كل الخوات الي قدمولي الدعم معنويا, واقولهم ان شاء الله نتيمع ونتقابل ويصير لنا مكان نتلاقى فيه.


على فكره البنات الي كلموني عالخاص مشكورين وماقصرتوا وانا خزنت معلوماتكم عندي وان شاء الله لنا حديث اخر.:tek:

 

[ناني سيكرتس]

هلا سنع عمره 3 سنين ونص اهو فيه شي غريب بصغارته من عمره ايام وايد يحرك ايده ويطالع الشفاط الي بالحمام هذا الي لاحظته فيه من ولادته بس كان طبيعي حبى بعمر طبيعي وقعد وسنن وكان ينطق كلمات بلاشهر اما المشي مشى بوسنه واربع شهور يعني ماتاخر وايد بس كمل السنتين ومايركب جمل بس كلمات قلت عادي يكبر شوي ويتعلم لما كمل 3 سنوات اشوف الي بعمره يتحجون عادي عاد وديته الحضانه الانجليزيه ماشالله قام يتكلم انجليزي ويقول كل الاحرف الانجليزيه والاشكال الهندسيه ويعرف حق الكمبيوتر يعني فيه ذكاء بس الاحظه الجمل مايقولها الا قليل مونفس الي بسنه والابله تقول انه مايحب الازعاج يسكر اذنه وفيه ملاحظات وايد اكتبها لكم بعد الصلاه ونسيت اقول اني رحت الطب التطوري وراح اكتب شنو قالت لي الدكتوره

شوفي حالة ولدج نفس تقريبا حالة ولدي بس انا ولدي كان غرامه البنكات, المروحه مالت قبل, كل مايروح بيت اهل ابوه بيتهم قديم ففيه بنكه كان غرامه يبطلونهه له ويسكرها, وعادي يقعد جدامها واهو مستانس, وبعدين تطورت حالته, وقام يجابل المايكروويف مال بيت اهل ابوي, تخيلي من نزورهم اول ما ندش سيده يروح المطبخ ويجابل هالمايكروويف.
وهم وديته الحضانه الانجليزيه وكان فلته بالانجليزي بس العربي مو شي كلش, وتدرب هناك عالحفاض يعني الولد من تشوفينه جنه طبيعي بس لا يتكلم لان في من كلامه مو مفهوم, وفي جمل وايد واضحه يعني حالته نص نص..

 

[استغفرك يارب]

الله يصبركم ويشافي عيالكم

 

[سنع ومنع]

اليوم كان لي حديث طويل مع صاحبة الموضوع emanova .. الصراحة الأخت عسل ..
واااااااااااااايد واااااااااااااايد وااااااااااااااااااايد استفدت من مكالمتي معاها ..
ما تصدقون شكثر .. واهيا ما شاء الله خبرة صج يا بنات احنا محتاجين نلتقي مع بعض الوحدة فينا تفيد الثانية ونتبادل الخبرات .. كل وحدة تقول لنا خبرتها .. وشنو اللي شافته نفع مع ولدها ..شنو آخر العلاجات اللي سمعتها عن هالمرض ..
يا ريت يكون لنا لقاء
آنا أخر شي قاعدة أبحث فيه وأشوف انه علاج ممتاز واستفاد منه وايد يهال .. العاج بالخلايا الجذعية .. بس للحين قاعدة أدور مستشفيات غير الصين تعالج فيه .. اذا صار عندي شي يديد بحطه ان شاء الله ..

 

[رمانه كويتيه]

ولد اختى حبيبتى فيه توحد ياربى اعيال اختى بصوب وهالولد بصوب اموت عليه وهو يحبنى ايسمينى بيت خالتى خوخه يعنى من كثر مايينى بيتى اقوله حبيبى شسمى ايقولى اسمج بيت خالتى خوخه بس حبيبى هالايام ايسوى حركات امه الله يصبرها ان شاءالله على تصرفاته اينرفزها دايما يمشى ويطالع وراه ولا يطقطق بريوله جنه يسوى دبكه لا وتقول اذا ييت من الدوام بحط راسى بنام استلمنى ياربى ليش مايخففون ساعات العمل عن امهاتهم ترا عن جد يتعبون خاصه اختى حبيبتى اتجابله وطلعه كل مكان معاها وتخاف عليه لكم الجنه ان شاءالله على صبركم

 

[Dancing^Queen]

بنات ان شاءالله بحطلكم عن خوش دكتور قريب
بس ناطره النتيجه

احد جرب مدينا؟ للنطق؟

 

[ريمه الكويت]

شوفي حالة ولدج نفس تقريبا حالة ولدي بس انا ولدي كان غرامه البنكات, المروحه مالت قبل, كل مايروح بيت اهل ابوه بيتهم قديم ففيه بنكه كان غرامه يبطلونهه له ويسكرها, وعادي يقعد جدامها واهو مستانس, وبعدين تطورت حالته, وقام يجابل المايكروويف مال بيت اهل ابوي, تخيلي من نزورهم اول ما ندش سيده يروح المطبخ ويجابل هالمايكروويف.
وهم وديته الحضانه الانجليزيه وكان فلته بالانجليزي بس العربي مو شي كلش, وتدرب هناك عالحفاض يعني الولد من تشوفينه جنه طبيعي بس لا يتكلم لان في من كلامه مو مفهوم, وفي جمل وايد واضحه يعني حالته نص نص..

الظاهر يحبون اي شي يدور
انشالله يارب نشوف كل عيالكم كبرو وصارو دكاتره ومهندسين ونسولف عن طفولتهم ونطقهم طراقات _03BA::tomato2:

 

[ريمه الكويت]

مشكوره اختي استغفرك يارب على دعائج\

الله يصبر اختج خوخه عاد تدرين انا احس جذي ان الي فيهم توحد يمشون وجنهم مسبهين ياحايشهم الباب ياطاق راسهم الكرسي مادري ليش

دانسنج اي والله ياريت تقولين منو احسن دكتور

 

[Emanova]

صباح الخير...

انا الظاهر كل ما ادش ما القى احد ............ ما شاء الله عليكم انا وايد استانست لما شفتكم اتسولفون ..

ناني : التربية النموذجيه اهي الي يم الجمعيه ... بس فيها حالات صعبه و خالطينهم

انا ودي ادخل ولدي سباحه فودي اشوف فندق او مكان نظيف و اقولهم ان عندي توحد تاخذونه ولا لأ.

 

[Emanova]

ريم الكويت : د- مدينه صادق اهي معالجه نطق ... انا ما جربتها بس في وحده اعرفها بنتها ما تسمع و زارعه سماعه ... تعدل كلامها اشويه وياهم

 

[ناني سيكرتس]

جان زين يابنات نتيمع كلنا, شوفي خل نروح باي مكان, خصوصا ان المعاش الاسبوع الياي .

قرروا وقولولنا..

 

[Emanova]

يالله انا حاضر ... سنع و همسات ما عندهم مانع

 

[Emanova]

اشلونج ناني و اشلون ولدج؟

 

[خبيرة اعشاب]

هلا

انا ولدي عمره 5 سنوات و ما فيه اي شي مو طبيعي ,,, يتكلم عادي و كل شي طبيعي ... بس فيه فرط نشاط و حركة زايدة .....

بالروضة كلمت الابله مالته قالت لي ولدج ما يقعد مهبل فينا بس يلعب و حركته زايدة و الشي هذا انا ملاحظته قبل ... يعني حتى لو اقعده يطالع التلفزيون مدة 5 دقايق ما يركز لازم يقوم يتنطط على الغنفة بعدين يرد

شغلة ثانية : اذا شاف ناس ما يعرفهم يا اما يسكر اذانه و يقعد يا اما يقوم يستعرض و يتنطط و يسوي حركات

اذا طقه احد بالروضة ما يتكلم ابدا , يعني تخيلوا بنية اصغر منه مشمخة وجهه و لا حتى حاول يمنعها مع انه بالبيت عدواني و يكفخ اخوانه الي اصغر منه

الابلة قالت لي وديه مراجعة في عيادة بالصباح عشان فرط النشاط و قلة التركيز

بس ابوه عيا و قال لي انا ولدي ما فيه شي ... و ما وديته

و بعد مدة طلعناه من الروضة بس سجلته السنة هاذي ان شاء الله بعد

الحين السؤال :

هل من الممكن فرط النشاط هذا يعتبر مرض ؟؟ و هل اوديه مراجعة و لا لأ؟

بعد لاحظت شغلة ولدي يتعلق بنوعية معينة من الالعاب مثلا بي بليد هاذي في صندوق كامل متروس منها و كل ما احاول اغير له اقول مثلا تبي سبايدرمان و لا شي ثاني يصيح ... و هذا لفترة معينة بس غير الحين قام يلعب بالعاب مختلفة

الحين في احد نفس حالة ولدي و راجع و طلع فيه شي ؟؟

انا حتى الابله يوم كلمتني قلت ولدي فيه شيطنة زايدة نفس العيال الي بعمره و اعتبرت الشي هذا طبيعي

لا و بعد بالروضة ما يتكلم ابدا , و اذا احد كلمه سكر آذانه .... بس استيابه عادي و يحفظ بشكل طبيعي

 

[Emanova]

انا اقولج جربي معاه تقليل السكريات و اكل المطاعم ... و المنكهات مثل اللي في البفك و الشبس و العصاير الجاهزه .....

و المواد الحفظه و الملونات اللي في الحلاو و المصاص و المحليات الصناعيه مثل الاسبارتيم و السكريين ...

البيبسي .... الكاوكاو .... المقالي مثل الشيكن ناجيتس .... و خليه يتعود على الفاكهه و العصير الطبيعي ... و اختاري الشبس الساده اللي بدون مواد حافظه مثل ماركه فيكو .... و حاولي انج تكونيين صديقته .. و تعلمينه انه يقولج كل شيء...

و سويلج لوحه في البيت فيها اسامي اعيالج و كل ما واحد فيهم كان عاجل و مؤدب ياخذ ستيكر و اللي يسوي شطانه شيلي منه الستيكر .... و اللي يحصل وايد استكرات يحصل الجائزه الاولى( يعني كلهم راح يحصلون لكن بمستويات)

الاكل يلعب دور قوي لان هذي الاشياء كلها مواد كيميائية ضاره ....

 

[Emanova]

و اي شيء تبين احنا في الخدمه ... و جابليه ... ماكو احسن من المام ان تعلم اعيالها