تجمع امهات العالمية الامريكية

[bella bambina]

صباح الخير أمهات
مرو اي قمت أتأخر لأن قبل الشغاله الثانيه كانت تساعد بتلبيس اليهال الحين آنا ألبسهم وأجهز أغراضهم والشغاله تسوي لهم الريوق احنا آخر يوم دوام 24 / 6
مبروك كراميلا تستاهلين اشعليج تدلعي سوري ما شفناج الحر كان عامل عمايله وسلامته ولدج ما يشوف شر صح كلام مرو محد امرض اليهال غير الجو والتكييف
هلا والله فوز دلول أمس رسمت القمر طبعا رسمها فظيع يفشل فعشان أرقعه حطيت زري فضي بكل قمر

 

[mr000]

السلام اشلونكم أمهات..وي فوز الله يعينج كله شربي سوائل دافيه..ماتشوفين شر سلامتج..وعليه كسر خاطري دكتور شمساه الله يشافي ولده..فوز احنا عندنا الناس إذا ماتتدخل بشؤون غيرها مايقدرون يعيشون يعني ذاك اليوم وحده ساعه وهي تسألني ليش جنتي ماحملت عالبنت خلاص كبرت..جنه صارلها عشر سنين مو توها سنتين انتي شكو ومولازم أشرح لج الأسباب وظروف ولدي وبيدرس..خو كيفهم..والله آنا ودي أعيش بنفس طريقة وحده أعرفها انجليزيه وعايشه بلندن من الغزو لأن زوجها متوفي. كانت بالكويت قبل..وبس مالها شغل حتى بعيالها يعني يزورونها بالأيستر والكريسمس وعطلة الصيف..وتعيشين وتسلمين..حتى بزواجهم مالها شغل كل واحد أخذ اللي يبي من جنسيات مختلفه ماخذوا كويتيات..وشاريه دماغها على قولة السوريين...إحنا هني حنه ومشاكل وعوار راس ولاأحد راضي عنج ...

 

[mr000]

جنه هالموضوع ماله علاقه بالأولي بس قصدي الناس ماتجابل بيوتها وعيالها ومشاكلها لأ قاطين كلشي عالخدم و عينهم مبققه على غيرهم وبيعرفون كل شي

 

[ReeMaN]

سلالالاالام امهات شلونكم شخباركم عساكم بخير الف الف الف سلامات المراضى فوز ماتشوفين شر انتى وبناتج ماكنت ادري انج مريضه بس امس من صوتج كسرتى خاطري قلت مرييييييييييييييييييضه المسكينه بس سؤال بيلا وهقنى ردانى 30 سنه ورا خخخخخخخ بغيت اقول ماعطونى هالدرس هههههههه
كاراميلا شلون وليدج خنت حيلي مايشوف شر الغالي .... وبعدين تعالي شنو هذاااااااااااااااااااااا بتخلص المدرسه وانا ماشفتج !!!!
مايصير جذي يابنت الحلاااال ,, ماكو الا اقول حق عصابتى ياشرون لي اي وحده فيهم كاراميلااا

 

[ReeMaN]

اليوم ودوهم الاكواريوم وااااااااااااايد استانسو اليهال حتى الابلات مستانسين من الرحله ....

واليوم وزعو عليهم ورقة سمر كامب عطو عيالكم امات العالميه وفي احد جرب السمر كامب والا لا فرصه يشترك فيها بس اللي مخلينا نترردد ان من 3 سنوات الين 14 سنه بنات وشباب شدعوا الين 14 احس كبار وايد ان ينحطون مع يهال انتو شرايكم بتسجلون عيالكم؟

 

[mr000]

والله زين في سمر كامب ترى جنه أول مره يسوون..اشدعوه ولدي يرضى لو أقوله ..والله جان يفضحني لو أقوله اشترك ألحين هو حفلة التخرج ومايبي يروح لها..ريمان كم الرسوم؟؟ ماتدرين إذا بس حق طلبة المدرسه وإلا حتى من بره؟؟لأن بنت أختي كانت تشترك بمدرسة الكويت الأنجليزيه بس ألحين قاموا مايقبلونها علشان عمرها 14..

 

[mr000]

على فكره ترى بدى التسجيل بالسمر كامب مال مدرسة الكويت الأنجليزيه..

 

[mr000]

ريمان آنا ودي أشوفج بس مادري اشراح تقولين أخاف تنصدمين....عاد لي شفتيني ستري على ماوايهتي...

 

[ReeMaN]

هلا مروو الله يسلمج التسجيل راح يكون في منتجع النخيل وبرنامجهم وااااااااااااايد حلو كله وناسه ...يعنى فان كامب مو مدرسه ..والمدرسين راح يكونون من مدرسة العالميه مو من برا ويبدي من 13 يونيو الين 8 يوليو ومن الساعه 8 ونص الي الوحده وربع .... ويوميا من الاحد الي الخميس ..... وفي كامب ثانى بدبي بس حق اللي اعمارهم من 8 سنوات الين 14 سنه

والاسعار 4 اسابيع 250 3 اسابيع 220 اسبوعين 200

وشوفي هالموقع في كامب الكويت www.campozaustralia.com

 

[caramella]

السلام أمهات
إشلونكم وشخباركم إنشالله بخير
مشكورين عاللي سألو عن ولدي ما قصرتوا
الله يسلمكم اليوم ما داوم بعد لأن امس بالليل إرتفعت حرارته لي 39.1 فا عشان جذي عور قلبي إني اوديه بعده تعبان
دقيت عالدكتور الصبح قالي مني لي السبت إذا ما خفت الحراره معناته المضاد مو ماشي معاه لازم تيبينه اشوفه
يا حبيبتي مروو إنشاله يا رب نلتقي على خير
الله يسلمج ريمان حبيبتي والله آنا اللي متشوقه اشوفج بعد بس تدرين ما باليد حيله إنشالله يا رب تعدي الأمور على خير
وانشالله يصادف يوم امر المدرسه و اشوفج ولي شفتي وحده مدربحه تتقلب ترى هذي آنا:tomato2:
فوز صاجه صعب ترتاحين على دكتور آنا اراجع حق ولدي عند دكتور ياسر القحف كان بانترناشيونال كلينك وراح مستشفى السيف آنا وايد ارتاح له حق ولدي وانا الصراحه عقدتي بالدنيا ادش على دكتور ناسيني او ناسي ولدي فالريال الله خير يذكر حالة ولدي على طول بدون ما اذكره

 

[mr000]

مادري ريمان جنه غالي..يعني بقيمة أسبوعين أسجله بتشامبينز عندهم سمر كامب وكله رياضه ورحلات..

 

[caramella]

السلام حبايبي
اشلونكم امهات ؟؟
فوز و بيلا ولدي ياب ورقة القمر اللي يرسم فيها يومين انلطع بره يدور المون ما لقاه فا لاعت جبده من السالفه و ما رسم شي و غير جذي كان غايب الخميس فا ما وده الورقه عفيه غششوني خل اخليه يرسم اشلون كان اشكالهم بالأيام اللي فاتت
وبعد شي بليز شنو احرف الأسبوع الياي عشان إذا بحيل الله داوم الأحد اطرش معاه الأغراض

 

[mr000]

السلام أمهات اشلونكم..كراميلا أحنا وعليه عيالنا من هالغبار لايشوفون قمر مثل الناس..ولارينبو..والله أذكر لما رحنا لندن وكان ولدي عمره 4 سنين قلتله شوف هذي ليك وهذا ريفر وهذا رينبو وهذي بارك.. شوف عدل واحفظهم ترى بس نرد الكويت بس ماعندنا هالأشيا..حتى الحديقه كان مايعرفها ماقط رحنا حديقه بالكويت إلا حديقة الشعب ..

 

[Fouz]

السلام عليكم أمهات شلونكم
المنتدى يطفر مو قادرة ادخل
كاراميلا شوفي هالسايت
http://www.kwathabeng.co.za/travel/moon/moon-phase-calendar.html
راح تلاقين كالندر حق كل يوم بشهر 5، طبعا من 11-17 ماكو شي فحطيت دائرة سودة و تالي يبدي يكبر شوي الى تاريخ 20 تشوفينه نص دائرة
أحرف الاسبوع الياي الله يسلمج Y and Z
دزوا لنا ورقة يبون سناك حق اليهال اللي بالصف، انا بودي كب كيك و تقدرين تودين فطاير او بيتزا و سلامتج و ان شاءالله ما يطلع لي جاري تطوير الموقع و تقرين مشاركتي

مرو صاجة هالاوادم ما يرحمون و ما يدرون ان من راقب الناس مات هما، بس والله ما اشوفهم ميتين هم الا مستانسين باللقافة و التطفل اعوذ بالله

ريمان الشر ما ييج حبيبتي و صوت لما الحين يلوع الجبد باجر بروح الطبيب مرو ثانية لان الكحة كل مالها و تزيد

بيلا شلونج ، شنو بتودين ويا دلال؟؟

 

[Fouz]

سوري كاراميلا من تاريخ 11 الى 16 ماكو شي و من تاريخ 17 يبدي يبين شوية، عموما تأكدي من السايت، و سوي نفس فكرة بيلا حدها عجيبة حطت زري على القمر

 

[bella bambina]

صباح الخير أمهات
اشلونكم مرو وريمان وفوز وكراميلا ؟
أمس المنتدى ما يفتح كله يطلع لي جاري تطوير الموقع
فوز دلولو ما عطوها ورقه تييب سناك أي يوم راح يكون ؟
ذاك اليوم قالت لي الأبله دلول كانت تركض بالممر ويت أبله قالت لها لا تركضين عاندتها فلما زفتها قالت لها بنتي انتي شيطانه وبعلم أمي عليج وقالت لها مس سارة اعتذري حق الأبله قالت ما بي أقول سوري فلما خذيت دلول قلت لها روحي اعتذري من الأبله راحت لها صفها واعتذرت ولا جنها مسويه شي
السنه ما راح أدخلهم أي كامب ان شاء الله راح تكون سفرتنا يوم 28 - 6 وبنقعد شهر بنفتر بالنمسا مع أهلي وباخذ معاي ماريا بس خل توصل لا توهقنا

 

[mr000]

السلام عليكم ..اشلونكم أمهات.. بيلا يحليلها دلول بدعت سلم قلبها..الله يعينكم على عنادها..بس ماعليج تتغير لما تكبر..عاد تصدقين آنا ولدي عنيد من صغره بس خواف..مادري اشلون متناقض

 

[mr000]

أفااااا موضوعنا بالصفحه الثانيه لييييييش؟؟ وينكم ,,عسى ماشر

 

[Fouz]

السلام عليكم أمهات شخباركم
بيلا كاتبين تاريخ 23 - 5 يبون سناك حطيت لها ميني كب كيك و ميني دونت، يمكن مو طالبين من كل اليهال بنفس اليوم أو يمكن نسوا يعطون دلال الورقة، ههههه يحليها تينن الله حفظها مطفرتهم عدل

هلا والله مرو ، مو منا من هالمنتدى لوع جبدي أمس شكثر حاولت ادخل مو راضي بس اشوة بالاخير فتح على الاقل اكتب حق كاراميلا المعلومات اللي تبيها بس ان شاءالله فتح معاها و استفادت

كاراملا ريمان ملكة و ليالي شخباركم

 

[ReeMaN]

صباح الخير صديقاتى :ch12:

شلونكم شخباركم؟؟ انشالله استانستو بالويك اند .... سوري مروو ماقدرت اشارك من هالمنتدى اللي يعلق كل شوي طفشنا ولما ادش القى الكل مشارك بالحزه اللي عندي ايرور ومرات لا والله يطلع جاري التطوير ماادري متى يتعدل هالمنتدى ويشتغل عدل

ياحليلها بيلا بنتج اتونس هالنقطه تطلع منها كل هالشطانه الله يخليها لج وتتربى بعزج