تجمع امهات العالمية الامريكية

[mr000]

السلام اشلونكم أمهات..فوز اشلونج شخبارج..مسكين عمج الله يشافيه..والله يعين خالتج بعد بترد تجابله بالمستشفى بس أهون من الغربه..صعب الواحد يهد بيته أشهر..الله يردهم بالسلامه..كراميلا اشلونج طمنينا عليج..بيلا ..ريمان ..نونا اشلونكم..مستعدين حق الدوام..تصدقون دقيت عالمدرسه ..أشوه الهنديه مالت الستور معطيتني رقم نقالها..سألتها عن ملابس الرياضه..قالت ماوصلوا..يمكن بعد اسبوع..اشوه ماقطيت مالوت العام خل يقزر فيهم..مايندرى صج يوصلون هالاسبوع وإلا يطولون أكثر..

 

[mr000]

هلا والله ملكه اشلونج اشلون بنيتج..الحمدلله عالسلامه..والله ليلحين ماجهزت شي حق السفر جنه تو الناس..وكلها سفرة اسبوع مايبيلها تجهيز.. فوز سوووري نسيت أجاوبج..أي هذي أيد كتكوتتنا..بس بغير الصوره..لأن ماشاءالله الكل يدش المنتدى وهي وين ماتروح تراويهم صبغ أظافرها..

 

[ملكة بيتها]

الله يسلمج مروو ..وتروحين وتردين بالسلامه ...الله يخليها لكم الكتكوته ويحفظها من كل شر

 

[mr000]

الله يسلمج حبيبتي ملكه ويخليلج بنيتج ويرزقج اخوان وخوات لها..

 

[N0oNa]

هاي بنات شلونكم؟؟
الحمدلله ولدي صار زين بس مسكين ريله للحين وارمه مع اني حطيتله كمادات بس يمكن ايد النيرس ثقيله
و طبعا انا عقبه على طول سخونه و نشله وبلاعيم و كحه كل شي صار فيني الحمدلله اليوم احسن وايد
وااااي شلون بهده عسى ما يبجي لان اهوا كان يداوم بحضانه قبل بس يمكن المكان يتغير عليه الله يستر
بس احاتي و الله اليهال ياذونه عسى مافي احد معاه شيطان صج احاتيه

 

[mr000]

هلا والله نونا سلامتج ماتشوفين شر..ولاتحاتين ولدج ان شاءالله ماعليه إلا العافيه..والمدارس الخاصه حريصين لاتحاتين..وان شاءالله شوي شوي يتعود عالصف وعاليهال اللي معاه..بسألج نونا ولدج بأي حضانه كان يروح وحسيتي انه استفاد منها؟يعني من ناحية اللغه..وتعلم منهم أشياء..

 

[N0oNa]

الشر مااييج حبيبتي ولدي كان بحضانه عالم الطفل الي بجنوب السره و الله وايد زينه انجليزي و عربي بس ولدي حاله خاصه يعني ما يستفيد نفس باجي اليهال بس يعني صار احسن و انا وديته عشان يعاشر اليهال ويستانس معاهم و يتعلم منهم الكلام و الحمدلله كل ماله بتحسن اكثر و المدرسه وايد زينه و مهتمه باليهال

 

[bella bambina]

السلام أمهات اشلونكم ؟
الله يتمم عليج كراميلا وتولدين بالسلامه ان شاء الله ميخالف تحملي وريحي اهيه فترة وتعدي وتفرحين بالبيبي ان شاء الله
فوز الله يرجعهم بالسلامه والله يشافي عمج ويآجره
الله يعيننا على تعديل نومة اليهال المشكلة يشوفون باجي اليهال يسهرون برمضان بس هم زين نفتك من حنتهم بالبيت قاعدين هاليومين يكملون واجباتهم قبل الدوام
دلول حطوها عند مس ساندرا رفيجة بنتي الكبيرة أمها مدرسه الظاهر شايفه اسمها ما أقول الا الله يعين مس ساندرا

 

[Fouz]

رد : تجمع امهات العالمية الامريكية

السلام عليكم،، شلونكم أمهات

مرو شلونج، عسى الله يحفظها يرب وزين سويتي شلتي الصورة، ان شاءالله تروحين و تردين بالسلامة و تستانسون بالرحلة و لا تكثرين أغراض ودي الجنطة خالية و ردي بأربع

بيلا شخبارج، بيلا متى نعرف صفوف عيالنا؟؟ نقدرنعرف قبل الدوام والا لاز يوم الدوام، لان يتراوالي تصير عفسة اذا الكل بيسأل بنفس يوم الدوام

نونا الحمدلله ان ولدج صار أحسن، انا يوم أطعم بنتي هم ريولها تيبست عاد مرت أخوي عطتني كمادة على الكهربا عجييبة أوصلها بالكهربا شو و تدفى تالي أفصلها و احطها على ريولها فافتكيت من حوسة الماي و الحمدلله خف الورام،، و لا تحاتين المدرسة ان شاءالله ولدج بيتأقلم و يرتاح و اذا حسيتي بشي مضايقه راجعي المدرسة، و لا تتفاجئن بالبجي أول يومين ترى عااااااادي

ملكة حبيبتي الشر ما ييج ان شاءالله و عاذرينج برمضان بس عقب رمضان مرو بتسجل الغياب

كاراميلا شلونج حبيبتي، والله اليوم و انا أدعي عقب صلاتي طريتي على بالي و دعيت ربي يتمم عليج بهالشهر الفضيل

ريمان شخبارج ،، بسئلج تنصحين بكيرفز والا ما يسوى لاني عقب العيد يصير لي 6 شهور فأقدر أدخل نادي قوليلي تنصحين ادخله و الا ما ينفع ؟ لان يقولون اهو حق الدلع و اللي يتنزل كيلو و الا 2 و أكيد هالشي ما ينطبق عليِ

 

[N0oNa]

السلام عليكم
شلونكم؟
والله فوز انا بعد افتكيت من سالفه كمادات الماي عندي كمادات تتسخن بالمكرويف حدها عجيبه و حرارتها تظل و عندي من الي على الكهربا بس تصدقين ناسيتهم ذكرتيني فيهم
بقيت اسال جنه مرا قلتوا في يوم تعارف قبل الدوام متى هذا يصير ولا هالسنه مافيه؟؟

و السالفه اليديده الي اطلعتلي اليوم خدامتي راحت الخدم لو شنو تسويلهم لازم اخر شي يصيرون جلاب و يطلعون اي شي عشان يروحون انشالله ما اتاذى بدونها صج مو وقته برمضان عاد الحين لاعت جبدي من الفلبينيات قلت اقلب على الاثيوبيات و حدي خايفه ناس يمدحونهم و ناس طايحين فيهم الله يستر و انشالله تصير زينه مع ولدي لانه حده دعله

حدي قرقت سوري

 

[jolie_q8]

رد : تجمع امهات العالمية الامريكية

قوه امهات شلونكم

متى بتفتحون الموضوع اليديد؟

والسؤال الاهم الدوام من الساعه جم ؟ حق الكي جي والابتدائي

وعسى استعديتوا حق السنه اليديده

انا عيالي اليوم قعدتهم الساعه 10 الصبح وبنومهم الساعه 11 بالليل << ان شاءالله اقدر

وباجر بقعدهم ابجر علشان يعدلون نومتهم

 

[mr000]

السلام اشلونكم امهات..جولي اليوم بجريدة الوطن المدرسه حاطين اعلان عن الدوام الروضه من 9 لي ال12 ونص والمراحل الباقيه لي ال2 ونص..وان الغياب راح ينحسب من أول يوم دوام..والانشطه راح تبتدي من بعد العيد..

 

[jolie_q8]

رد : تجمع امهات العالمية الامريكية

مشكوره حبيبتي الحين بشوف الجريده

انزين سؤال قريد تو وثري وين مكانهم؟ علشان بوصل عيالي اول مابي يستاحشون باول يوم والمدرسه يديده عليهم

واليهال يستخدمون الاسنسير ولا بس الدري؟

 

[bella bambina]

السلام أمهات اشلونكم ؟
اليوم رحت المدرسه شريت ملابس طبعا زحمه خذيت رقم وطلعت أتمشى بحولي (من زين الجو ) استغفر الله متنا حر خليت بنتي تفطر حرام ماتت من الحر وأساسا اهيه صغيرة وأيام الدوام ما راح أخليها تصوم حرام تموت من العطش
فوز عيالي صعدو فوق الابتدائي قالو لهم يوم المدرسه تعرفون صفوفكم بس أم رفيجة بنتي الظاهر خافت تكون دلول بصفها :dddds: فجيكت اسمها طلعت عند مس ساندرا أيام بنتي الكبيره كانت مساعدة مس ساره بورسلي بكي جي 2

 

[bella bambina]

نونه ما عندهم يوم تعارف أول يوم دوام يكون يوم دراسي كامل بس الروضه يخلون الأمهات يقعدون دقايق معاهم ويمشون
جولي الابتدائي تدخلين معاهم الساحه تلاقين ملزقين أسماء الطلبه وصفوفهم وساعات الأبلات نفسهم يكونون ماسكين أوراق أسامي عيال صفهم وتخلينهم مع أبلتهم وتمشين طبعا يستخدمون السلالم الدور الثاني الأصنصير بس بعض الطلبه المرضى أو المعاقين يستخدمونه

 

[ReeMaN]

سلام عليكم امهات العالميه

شلونكم حبايبي شلونكم مع استعدادت المدرسه ؟؟؟ انشاءالله زاهبين ؟ انا والله مادري شلحق عليه ... المدرسه والا القرقيعان والا العيد ؟؟؟

فوز شخبارج قالبي وصل عمج والا بعده ؟؟؟ انشالله ردهم اتكون سهالات عليهم وعسى الله يشافيه يارب ....

بالنسبه للنادي أي دلع؟؟ أي 2 كيلو ؟؟؟ شوفي بالنسبه لي انا لانى لاامانه ماسويت ريجيم بالمره الا تخفيف وياسلام على التخفيف مرتين

بالاسبوع والله العظيم نزللت سته بشهرين وجسمي حيل مشدود تقولين نازله اكثر من عشره ... واختى بسملله عليها ماشالله عينى عليها بارده

مع الريجيم نزلت 23 كيلو ب 3 شهور واختى الثانيه هم وايد نزلت بس نحيسه ماتعلم وروحي شوفيه تلقين انجازات البنات على اللوح ومو

طول الاسبوع بس 3 ايام بالاسبوع يسوي شغل انا ماقمت اروح الحين لانى الى الحين اعانى من صبع ريلي

 

[ReeMaN]

قوه بيلا شلونج عساج بخير ؟ شلون العيال ماقلتى شنو سويتى في ماريا اول مارديتى الديره ؟ اكيد لميتيييها حييييييييييييل من الشوق

مشكوره حبيبتى على وصف الابتدائي ؟ انا توقعت نفس الحكومه بيسوون حفله حق اولى ابتدائي وعادي الامهات يقعدون اشوي معاهم ..

صج ماعندهم غشمره بالدراسه ..... انزين بسالج شلون على نهايه الدوام هم لازم ادخل اخذه من صفه والا اهمه يطلعون بالهده؟؟

يتراوالي بيصير زحمه هدة الابتدائي مع كل المراحل ؟؟؟

مروو عميدتنا شلونج حبيبتى عسى خلصتى كل امورج من اغراض ولدج وسفرتكم ؟ عاد انشالله هالمره انصيدج من العاااام وانا بخاطري

اشوفج انتى بالذات ومالله كتب انتشاوف

 

[mr000]

السلام أمهات اشلونكم..جولي الطلبه مايستخدمون الاسنسير..ألا الحالات اللي قالت عنها بيلا..ريمان لا والله ماجهزت شي حق السفره..بس أغراض ولدي خالصه إلا ملابس السبورت كل يوم أدق عليهم يقولون ماوصلوا..وشريت له ادوات مدرسيه بس ناطرين ورقة الطلبات ونشتري الباقي..ريمان حبيبتي والله آنا أكثر ودي أشوفكم..ان شاءالله هالسنه نتلاقى..تصدقون ناطره هالسفره من شهر 3 ويوم قربت ضاق خلقي أحس مو وقته أسافر في بداية الدوام..وكلش مو متحمسه للسفره..بس حرام دافعه التذاكر والفندق..اشلون أهون...يلا باي..نشوفكم على خير

 

[N0oNa]

مرووو تروحين و تردين بالسلامه انشالله
واستانسي
بنات بقيت اسال احنا كل يوم اندخل اليهال و انطلعهم و لا احد ياخذهم منه و يردهم؟؟
وفي سالفه 2 بنات انتو سحبتوا من عيالكم دم حق فحرص فقر الدم و لا مو لازم حق كرت الصحه المدرسيه لان صج مو وقته قبل يومين طعمته حرام حده متعقد من الابر
بنات اذا ما وديتوهم و عادي بليز قولوا لان حده كاسر خاطري

 

[mr000]

نونا الله يسلمج ان شاءالله..وشنو هذا فحص فقر الدم.؟؟توني أدري فيه هالفحص ..آنا بروحي قاعده أحاتي تطعيمها والصخونه..نونا آنا أشوف اللي بالروضه أهلهم يدخلونهم لي الصفوف وبالهده يدشون ياخذونهم..واللي عندهم أخوان أكبر منهم معاهم بالمدرسه ..يودونهم اخوانهم..