تجمع امهات العالمية الامريكية

[mr000]

الحمدلله عالسلامه ريمان..ولاتخلين نفسج جذي عابو متحمله العوار..ردي سوي اشعه تاكدي اخاف ليش فتحتي الجبس ومشيتي عليه ماطاب الكسر بعده..ريمان لا جنه الابتدائي مايبدلون بالمدرسه آنا جني شايفتهم يروحون بملابس الرياضه..بس المتوسط والثانوي هم اللي يبدلون..صعب على يهال الابتدائي يبدلون بالمدرسه..وجذي يتاخرون عالدروس إذا كان ولدي عود وبيروح الثانويه..ويلبس ملابس الرياضه تحت اليونيفورم يقول اخاف اتأخر والمدرس يعطيني ديتينشن..بس بالصيف علشان حر ويعرق..فيفصخ بلوزة الرياضه لما يخلص يحطها بالجنطه ويلبس القميص..

 

[N0oNa]

هلا اختي فوز انا عندي ولد ة الله يستر على طناقره كل يوم الصبح
حدي احاتي لان صج مزاجي و اذا ما حب المكان خلاص بعد يعاند كثر ما يقدر عشان ما يدشه مرا 2
و بصراحه صج مو حلو دوامهم برمضان الواحد شقعده الصبح مبجر و ريلي ماخذ اجازه يعني بطقها نومه و معتمد علي

 

[ReeMaN]

هلا والله مروو شخبارج شلون وليدج ؟؟ الا بسالج اهو سوا اشعه ؟؟

وبالنسبة الى لبس الرياضه انا مااشوف اليهال يلبسون لبس الرياضه او يمكن انا مو منتتبهه انشاءالله بيلا تفيدنا بهانقطه

ونونا شخبارج انشالله وليدج يستانس بالمدرسه صدقينى اهتمامهم باليهال موطبيعي وانشالله يطيح على ابله سنعه وبالنسبه للعساره لاتحاتينه انتى بس من الحين هيئيه قولي له عن المدرسه حببيه فيها وكل يوم سولفي له عنها وخل يشتري اغراض المدرسه على ذوقه وقبل لاتبدي المدرسه بعشر ايام ابدي معاه العد التنازلى كل يوم قولي له باقي عشؤ ايام تسع ثمان ولا مريتو على المدرسه سووللها بيباي وانتو مستانسين
واهم من هذذا كله لازم ينام مبجر ويششششبع نوم ويقعد الصبح يمديه يلعب اشوي ويطالع التلفزون ويتريق عشان يصير له خلق يروح المدرسه ومايتعسر عليج وهذا كله كنت اسويه حق ولدي والحمدلله يموت على مدرسته وحده ولهان عليهااا كل يوم يسال متى اروح المدرسه مااااااجرب الابتدائي وواجبااتهم ياويلي ويلااااه خ خ خ سوري على القرقه قمت اثق اشوي بالمنتدى وصرت ادلو بدلوي

 

[mr000]

هلا والله ريمان ..أي والله سوا أشعه قاله مو كسر..وبس لفوها ماجبسوها..والله ريمان على لبس الرياضه..مادري يمكن آنا بعد مو متأكده..بس أذكر أولت العام لما نقلته قالتلي السكرتيره مو يداوم بلبس الرياضه ترى ممنوع..قلتلها ليش احسنله لايبدل ويتعطل عالدرس قالت لا بس الروضه والابتدائي يداومون بلبس الرياضه..والكبار إذا كانت حصة الرياضه هي الاخيره موضروري يبدل قبل لايطلع....وإذا كانت الحصه الاولى هم ممكن أيي المدرسه بلبس الرياضه تالي يبدل حق باجي الحصص..أحسن تأكدي لما يدوام أول يوم

 

[caramella]

رد : تجمع امهات العالمية الامريكية

السلام عليكم أمهات
إشلونكم و شخباركم عساكم بخير
يا حبيباتي اطمنكم علي الحمدلله الأمور مستتبه لأني منحكره حكره عدله ما شم ريحة الشارع إلا للمواعيد فقط :denya:
زهقت و يوزني الشيطان ساعات إني بطلع بس يا احصل لي زفه يا اتعوذ من ابليس بروحي قبل لا افتح حلجي
الله كريم إنشالله والله لا يضيع التعب
مرووو سلامته ولدج و نعيما عليج السباحه :q8: هذي الكويت صل عالنبي ما بقى شي على لندن انشالله تستانين هناك عاد الجو حلو شهر 9
عاشو الصامدين ليالي :rerrerek:
ريمان سلاماتتتتتتتتتتتتتتتتتتتتتتتتتتتتتتتتت طلعت من جبدج هالصيده مصيده ما عليه اجر وعافيه إنشالله ولازم تراجعين لا تسكتين على نفسج الله يكون بعونج إلا عوار العظام يذبحححححححححح
الحمدلله على سلامتج نورت الديره
فووز اي والله الطلعه ما تنطاق بالنهار و على حظي مواعيدي بالنهار ولا بعد لازم يوم اللي عندي موعد فيه يكون رطوبه وباجي الإسبوع اللي منحكره فيه الجو زين :denya:
نوونا نصايح ريمان فل الفل واهم شغله النوم مبجر هذا يسوي شغلللللللل لأن إذا ما نام عدل يسويلج هوايل وانشالله ولدج يرتاح بالمدرسه
حياج الله جولي واقتراحج حلو على فتحة تجمع يديد سيري و نحن نسير من وراج
كوكو مري المدرسه و انشالله يا رب تحصلين مكان تصير وايد تغيرات على بداية الدراسه خصوصا من عيال الدبلوماسيين لأن اهاليهم مو ثابتين بديره فا تشوفينهم حزة الحزه تتغير محطاتهم و يسحبون اوراق عيالهم عشان بيسافرووون مكان ثاني

 

[mr000]

السلام امهات اشلونكم شخباركم..كراميلا الحمدلله طمنتينا عليج..وميخالف حبيبتي تحملي قعدة البيت والحكره لي الله يهون عليج وتولدين بالسلامه..واصلا الجو حار ورطوبه والله مايساعد عالطلعه كلش آنا لو ماعندي مواعيد طبيب جان ماطلعت كلش وامخليه اكثر مواعيدي العصر مااحب طلعة النهار..أي والله كراميلا ناطره هالسفره على نار..خل نرتاح شوي قبل لانرد على حنة المدارس..صج قايله بروح المدرسه هالاسبوع آخذ ملابس الرياضه..نسيت شنو وصيتيني فوز؟؟سوووري والله وايد أنسى جنه قلتيلي أسأل عن شي؟؟

 

[mr000]

السلام اشلونكم امهات ..اليوم اتصلت عالمدرسه..ترى الستور مال الملابس فتح وموجودين من ال7 لي ال3 ..اللي تبي شي تروح من ألحين قبل الزحمه تالي لي قرب الدوام..واللي تبي مقاس معين موجود عندهم توصي من ألحين..تقول عندهم طلبات وايد ويالله توصل الهدوم قبل الدراسه بيومين او 3..ملابس ولدي الرياضه ليلحين ماوصلوا تقول يوم 22/8 يعني حده حده حق الدوام!!

 

[Fouz]

رد : تجمع امهات العالمية الامريكية

السلام عليكم أمهات
ريمان الحمدلله على سلامتج، و ما تشوفين شر ان شاءالله
بيلا ما بينتي ولهنا عليج
كاراميلا حبيبتي صمدي بالبيت وايد أبرك من الرطوبة، عاد يوم الاحد كنت طالعة الصبح و الا رطووووووبة قلت عسى كاراميلا ما عندها موعد طبيب بهالجو
مرو مشكورة حبيبتي انا كنت أبي أعرف متى يفتح الستور، عاد انا بالشاليه اليوم اذا رجعت الخميس الصب يمكن أمر و الا مالي الا يوم الاحد

نونا الله يخليلج ولدج و اتبعي نصايح ريمان

ماشاءالله عندنا أمهات يدد و ان شاءالله تجمعنا يرجع نشيط مثل قبل و أكثر

 

[mr000]

السلام أمهات اشلونكم ..اشلونج فوز واشلون بنياتج..كراميلا شخبارج ..بيلا وريمان اشلونكم..الامهات اليدد اشلونكم ..تصدقون من أول العطله وآنا أقول بودي ولدي طبيب الاسنان أجيك عليه قبل المدارس وأتعييز عن طلعة الصبح ألحين خلاص لازم من باجر نوديه قبل رمضان..دوامهم برمضان راح يكون من ال9 لي ال2 ونص..جنه وايد مساكين حر وزحمه علما يوصل فوق ال3 تقريبا ..بس الروضه اعتقد لي ال12 أو 12 ونص

 

[caramella]

رد : تجمع امهات العالمية الامريكية

السلام امهات
اشلونكم جميعا
والله يا فوز بعدي صامده بالحكره بس امس خلاص يتني البجيه لان قلبي انقمت ماكو احد اسولف وياه عاد قررت اني اشيل قشي واروح بيت اهلي بالويك اند اغير جو اشوي
الأحد طلعت العصر كان عندي ابره عند دكتورتي بالعاده مواعيدي ايام السبت انشالله كل سبت ماكو رطوبه
جهزتوا حق عيالكم حق العيد ولا بعد؟
انا قلت حق اختي اشتري حق ولدي لي مريتي السوق تجهزين حق عيالج

 

[caramella]

رد : تجمع امهات العالمية الامريكية

هلا والله مروو إشلونج
إي والله الله يساعدهم الشباب والبنات الحليوين صيف و صيام و دوام طويل
بغيت اسال عن دوام اليهال يالكيجي لي 12 ولا 12.30 ابوي قاعد يسألني لأن إهو الله يحفظه بيوديه و إيبه بأيام رمضان
عطونا ورقه بآخر يوم فيها ساعات الدوام بس فاقدتها
جنه كان من 9-12

 

[bella bambina]

السلام أمهات اشلونكم واشلون عيالكم ؟ اشتقت لكم جميعا
أخيرا home sweet home مادري شللي حادنا عالسفر ليبغينا نشوف طبيعه نحط قناة ديسكفري ونقعد ببراد التكييف ترى ما فقدتو شي الجو السنه بأوروبا كان حار وما عندهم مكيفات بالفلل اللي أجرناها واذا بطلنا الدرايش اشتغلو علينا الحشرات أشكال وأرناق وهذا غير ان أكلهم لوعه حشى النعمه والله مالكم الا الكويت ياحلو حرها وغبارها مع ان والله من ييت ما شفت هالحر واحنا ما نطلع بالحر هناك الجو شويه أحسن بس طول يومنا تحت الشمس خصوصا ان الشمس ما تغيب الا فوق ال9 بالليل

 

[bella bambina]

الزين ايجو ما يشتغل عندي ييت بيت أهلي عشان أكلمكم
الحمدلله على السلامه ريمان ما تشوفين شر
وما يشوف شر ولدج مرو
كراميلا الله يعنج على الحكره ما يخالف تحملي وان شاء الله تولدين بالسلامه
فوز تشتاق لج العافيه آنا والله بعد اشتقت لكم جميعا

 

[bella bambina]

بالنسبه حق لبس الرياضه عيالي اللي بالبتدائي يلبسون من الصبح بس ملابس السباحه كانو يحطونهم بجنطه ولا مرة أحد قال لهم لا تلبسون لبس الرياضه من الصبح وساعات ما يكون عندهم رياضه ويلبسون لبس الرياضه باختصار كيفنا وحتى تكرمون جوتي المدرسه أي شي بس تدرون هابين بالنايك اهني أشتريه حق اليهال ب 24 دينار وبألمانيا ب 12 دينار أيدد واحد واهني قاصين علينا بآثليتس فوت

 

[mr000]

أهلين بيلا اشلونج شخبارج..الحمدلله عالسلامه..بيلا بالنسبه حق لبس الرياضه كلامج عدل بالابتدائي يداومون فيه بس اذا بنتج رايحه الميدل سكول هالسنه ترى غير مايرضون تداوم بلبس الرياضه إلا إذا عليها بي اي الحصه الاولى ولاحتى تكمل فيه باقي الحصص إلا إذا كانت الرياضه الحصه الاخيره.. إذا بنص الدوام لازم تلبس لبس المدرسه فوقه أو تبدل..

 

[mr000]

بيلا حتى بلندن العام شريت الجوتي تكرمين حق ولدي ب17 دينار وتالي يابوه عند فوت لوكر ب40 دينار

 

[jolie_q8]

رد : تجمع امهات العالمية الامريكية

مشكورين على المعلومااات المفيده

يعني مو ضروري (الجوتي) يكون اسود؟ يعني عادي يلبسون جوتي رياضه؟

والجنطه اخذ لهم جنطه عوده والا وسط ,, يعني كتبهم وايد والا شويه ويخلونها بالمدرسه؟

 

[mr000]

السلاام اشلونكم امهات شخباركم..مابقى شي عالدوام..جولي حبيبتي لا مو ضروري جوتي اسود..عادي يلبسون جواتي رياضه.. بس بالنسبه للجنطه والله ماعندي فكره عن الابتدائي ولدي رايح الثانويه ان شاءالله..ودورتله أكبر جنطه لأن كتبهم ماشاءالله من المتوسطه كل واحد اشكبره..على فكره الجناط القويه اللي تتحمل آنا جربت نوع ايستباك ,وجينز سبورت واستغليت فرصه التنزيلات أخذتله 2 من الافنيوز ب17 دينار الجنطه ...كانوا ب25 قبل.

 

[N0oNa]

هاي بنات شلونكم؟
مشكورين على النصايح الحلوه شكلي بقعده على السبع عشان مزاجه على ما يتعدل و يبدل
امس رحت الستور و حده فاضي مافي غيري جابلتني عدل الي تشتغل و طلعتلي المقاسات الي ابيها
و افتكيت من الزحمه الي بتصير بعد جم يوم
بنات بغيت اعرف انا عقب ما سجلته و دفعت عطوني ورقه بس ضاعت كان مكتوب فيها ان لازم اوديه المستوصف و اخذ منهم ورقه ما ادري شنو يسمونها عشان اييبها لهم بالمدرسه و يتسجل بوزاره التربيه ان مداوم عندهم بس شنو اسم الورقه ما ادري و شنو الاشياء 2 ما اذكر بعد بس جنه يبون صور زياده على الي خذوهم بليز بنات الي تذكر الطلبات تقولي عشان اوديه المستوصف قبل رمضان مالي خلق طبيب وقتها

 

[ReeMaN]

صباح الورد امهات العالميه :nbptr:

اشلونكم شخباركم حبايبي .....شخبارج كاراميلا يالله تحملي اشوي مابقى شي على الولاده الله يسهل عليج يارب كل شي

بسبيل الضنى يهوون فوز رفيقه الدريشه سابقا بس بيلا خذت اللقب منج قمت اشوفها اكثر منج شلونج قلبي شلون

فوز مع اختها عسى خفت الغيره اشوي

الحمدلله على السلامه بيلا شخبارج عساج بخير جان دلعتى من النمسا رحتو المانيا او هولندااو الدول الي حواليهاا عاد

يقولون المانييا اشوي ابرد من النمسا اختى تقريبا رايحه قبلج بجم يوم اول الايام قالت حر موت وراحت كذا ديرره تقول حر

بعدين عقب جم اسبوع اتقول واااايد صار الجو حلوو ....

مروووتنا عميدتنا مالنا غناة عنج حووبي شلونج وشلون ولدج عسى صار احسن الله يعينهم على الصيام بالحر مساكين بس اشوه الدوام مو

من اول رمضان جنى اذا مانى غلطانه بس عشر ايام من رمضان