تنامين عند اهلج نهاية الاسبوع ؟؟ ولا ماسكته من رقبته و لازقه فيه

[بطوووطة$بيضة]

ووحدة من رفيجاتي تحاجي متزوج وياخذ راحته معاها بالويكند لان المرة مو موجودة وتحاجيه بالتليفون عالراحه ....ويكون ابعلمكم يدخلها بيته وغير روحات الشاليه ....واذا حس اذا زوجته ماراح تنام بيت اهلها يقولها روحي ...طبعا يبي الفكة ....وبعد كله يخليها تسافر مع اهلها او رفيجاتها....يعني بللعربي يبي الفكة ...وانتوا امهيتين هالرياييل وقاعدين عند اهلكم ....

 

[*E.B.D.A.3*]

^^^^
وبوجهة نظرج الزوجة اهيه السبب ؟؟

 

[بطوووطة$بيضة]

لا مو شرط الريال اذا بخون يخون ومرته قاعدة ابحضنه ....بس في حريم واااااااااااايد يعطون مجال حق الريال يعني جنه تعود على غيابها .....

 

[بطوووطة$بيضة]

انا امي ماترضى اختي تنام عندها واذا ابوي درى يزفها يقولها روحي بيتج ....اذا تبين سهري عندنا بس راسج ماينحط الا على مخدتج ....

 

[قموشه21]

^

^

ششدعوه خوش رفيجه مرافجتهــآآ .. حبيبتي العيب من زوجهــأأ اهو يخربط سواء كانت الزوجه معاه او عند اهلهــآآأأ السبب ياعمري مو نومتها عند اهلها..

تلاقين السبب اهمالها لبيتها وواجباتها تجاهه.. مستحيل يكون السبب ليش انها اتنام برا البيت شدعوة عليـج جان الكل تطلق ..!!!

شوفي حبيبتي الريال لو يبي يخربط يخربط لو اللي عنده ملكة جمال ومو مقصرة في بعضهم مايقدر الا يخون والا يرافج اكثر من مره جذي عنده..

وتقولين الاجانب مايباتوب برا البيت ضحكتيني علي هالصصبح.. اذا هالاجانب ينامون برا بيوت اهاليهم من سنه 13 سنه ومتعودين علي هالششي وعندهم لازم يطلعون ويرافجون .. خوش قدوه لج !!

انا اقول لاتكبرون الموضوع سويتوها سالفه واهي عاده لكل زوجين .. وحده بتريح بتسهر بتتسوق مع اهلها بتخيم بتطلع بتناااااااااااااااااااااااااااام لو يوم واحد شدعوة ..

وتشكرات

 

[عطاء أنثى]

حلو تهتميين بزوجج بس بالويك اند من حقج ترييحين

 

[بطوووطة$بيضة]

والله يا اخت قموشه هذي وحدة من رفيجاتي وانا شكو فيها انا ما اتدخل ابحياتها وانا قاعدة اقول الشي اللي صاير جدامي ....اللي يعجبه كيفه واللي مايعجبه الحجي هم كيفه .....كل انسان يمشي حياته على قناعاته ...

 

[بطوووطة$بيضة]

حبيبتي ولما قلت الاجنبيات قصدي العربيات ...وحبيبتي كيفج نامي بعد افبيت ييرانكم اذا هالشي يريحج كيفج

 

[mmloo7a]

اي والله

شحقه متزوجة

اذا كل ويكند عند اهلج

ليلة خميس وريلج بروحه ؟

وماتبينه يخون بعد ؟

امركم عجيب

 

[بطوووطة$بيضة]

احنا اهلنا مربينا وامعلمينا ان مانخلي الريال ابروحه والوحدة اذا تزوجت مالها الا بيت زوجها ....علشان الريال يتحمل مسئوليتها وان البنت اطلعت من مسئوليه اهلها انا هذي تربيتني....وكل وحدة وتربيتها تختلف وكل عايله تختلف طريقتها.....وانا هذا رايي وتفكيري ....فماله داعي طواله اللسان .....والاسلوب الخايس وهالمنتدى ما انحط الا كل وحدة تقول رايها واهيا حرة انا ماسبيت وجرحت احد ...راييي وقلته

 

[لمى...]

صراحة مستغربة ليش اهد بيتي وانام عند اهلي شالحكمة احس الواحد مايرتاح الا في بيته شنو اهو دوام كل اسبوع ابي أمي

وأبوي احس اللي تسوي جذي مو مالت زواج

حلات الويكند تطلعون تتونسون مع ريايلكم..........

مرة نتناقش انا وريلي عن بنات في جماعتنا كلله عند اهلهم في الويكند قالي ريلي ان في شباب

من بداية زواجهم يقولون حق حريمهم في الويكند روحي لأهلج عشان يفتكون منهم وم المسؤولية............

 

[ạ7ạśêś ~]

كااااااااااك انا الحين نايمه عند اهلي
حيييييييييييييل مسوين سالفه من لا شي.؟!
بالعكس اشوف هل شي عادي واقل من عادي يعني الحييييييييين ريلي ما يفقدني لأ الخميس
وباجي الاسبوع شنو.!
ولا بيصير منحرف اخر الاسبوع يعني شـ الحجي لوووووووول
انا مع نومه ما تفرق معاي بصراحه

 

[آهات الليل]

لااااااااااا والف لا مانام عند اهلي ماحب صراحه واصلنن ممنوع ههههههههه
ماعرف انام بغير بيتي واصلن ماعرف اخلي زوجي بروحه واهو مومتعود ينام بروحه بالبيت تعود اني مانام ابيت اهلي ازور وارد بي صراحه وهذا افضل شي

 

[أعرفك نفسي]

شوفوا حبيباتي لا افراط ولاتفريط

يعني لاتصيرين لصقه ولا تهملينه كل اسبوع

لا حلو كل شهرين او شهر يوم لكن اكثر لا موحلوه

وفكرة ان ناخذ راحتنا وننبسط بالبعد والفكه قووووووويه

راحته معي وراحتي معه

هذي وجهة نظري

اما اللي يصير فيني ممنووووووووووووووووع تنامين برى البيت منعا باتا

الا اذا كنت زعلانه منه ولو يحصله يمنعني بعد بس عاد مايقدر

وبصراحه امل اوقات وابي اغير جو فاضطر اسوي زعله وهوشه عشان انام لو يوم عند اهلي

شفتي شلون ؟. تتهاوشين عشان تباتين ببيت اهلج ،، عطيه الثقه وصفي النيه واهو بيثق فيج ويخليج
لان على نياتكم ترزقون
واللي ابي اوصله ان ريلي بعد عمري كل وقته يا بالشغل او نايم او معاي سواء في البيت او طالعين
هذا بالويك داي ،، مو معقوله اجبره بالويك اند وامنعه من ربعه ووناسته ،، حراااام والله هذا اسمه تملك
والزواج عمره ما كان تملك وعبوديه وبعدين على شنو لازقه فيه والعذر اخاف يخون
عزو نفسكم يا بنات خلوهم يشتاقون لكم ويعرفون قيمتكم في البيت
واللي يبي يخون عل هالسبب التافه والله هذا ما عليه شرهه وخل يخون عيل باجر لا استمرضت ولا صار فيني شي شنو بيسوي

 

[السيده ام حسين]

انا لا اؤيد ابدا الحرمه تترك بيته وتنام بيت اهلها الا في الضروره مثلا اذا كانت والده تعبانه واجد وماعنده احد يصير معاها زوجها مسافر للعمل فقط

 

[قموشه21]

بطوطه حبيبتي شنو نامي ببيت ييرانكم.. احنا نتناقش ليش يايه بقوووه

حياتي اذا تزووجتي تعالي ناقشي .. شي مو حاسة فيه لاتتكلمين فيه

 

[al-musk]

عدل كلامج وانا ما ايد هالعادة...

 

[حبوبة الأطفال]

يعطيج العافية قلبو انج حطيتي هالموضوع

اولا انا أيد راي كل وحده سواءاً الي تنام عند اهلها او ماتنام

ادري راح تسألون شلون؟؟؟ :eh_s(10):

بالنسبة الي ساكنة في بيت حمولة تكون سالفة أنها تنام في بيت أهلها افضل من الي ساكنين بروحهم
مو أقصد ان في احد يراقب ازواجنا فمايقدر يخون
لأ

اقصد ان عنده أهله يهتمون فيه في وقت زوارتنا لأهلنا

اما الي ساكنة بروحه صعبة انها تخلي بيتها وتنام عند اهلها
هني زوجك يحس انج اهملتيه اذا كان موجود في البيت

وفي نقطة مهمة بعد من طبع الرجل انه مايحب الي لازقة فيه 24 ساعه تراه بمل ويطفر
يعني خلج متوازنه
وبس
:eh_s(22): :​

 

[Gifts&Occaions]

والله هلموضوع توني ادري عنده شكوو ينامون بيت اهلهم من صجهم !!

 

[بطوووطة$بيضة]

انا صحيح مو متزوجه بس اختي متزوجة وماتنام عندنا و رفيجاتي متزوجات وبنات عماتي وبنات خالي هذولي القراب مني ....وماينامون عند اهلهم ....واذا تزوجت راح اسوي مثلهم....وداشه ابقوة على قولتج اختي قموشه لان تشكي المتزوجات زاد ولا انتي اختي قموشه ماتقرين بالمنتدى هالمشاكل !!!!!!!!!!؟؟؟؟؟؟؟؟؟واللي تقولي واثقه من زوجها خل تخليه يسافر بروحه تايلند ولا المغرب وخل تشوف الثقه حتى لو ريلها مو راعي خرابيط ترى بنات الحرام وايد ومايفرق عندهم متزوج ولا مطلق ....