حوامل سمينات

[7alaty]

تبطئ عظم :
من كتلة الجسم الحمدلله انتي بالطبيعي حاولي تحافظين على هالمستوى

نظامج حلو بس زيدي روب او جبن لان لازم كالسيوم كمية عشان عظام البيبي.

وضيفي جرجير مع الغدا عشان الحديد او سلطة خضرا

وحلي السناك برتقال وتفاح عشان فيتامين سي اكثر او عرموط

العشا صيفي خيارة او خس

ترا الياهل يحتاج كميه اكبر من الفيتامينات حاولي تعوضينه بالأكل المفيد

 

[7alaty]

في الصباح : ماي/شاي/قهوة/حليب وممكن اضافة سكر

الإفطار: خبزة فيها ألياف او نخاله مثل خبز الشعير الخفيف مال المطاحن + جبن او لبنة او بيض او فول +خيار وطماط وزيتون وخضار ورقيه

سناك: ماي شاي قهوة

الغدا: كوب شورية اي نوع بدون كريمة / دجاج او سمك مشوي بالفرن + خضار سوتيه+ سلطة بليمون وزيت زيتون وممكن خل تفاح

سناك : روب او لبن قليل الدسم + حبتين فاكهه

العشا : نفس الريوق + سلطة



او. من مطعم صب وأي نص صمونة باختياراتج من الصلصات الدايت بشششششرط بدون مايونيز

 

[7alaty]

النظام السابق من دكتورة وجدان الشمري اسمه ريجيم الألياف


من بكرة بإذن الله راح اتبعه بالتفصيل

 

[تبطي عظم!]

حلاتي نظامج حلووو

انا ماحب التزم بجدول معين هههه احس اني مقيده

بس الحمد لله من الصبح ماخربطت مشيت على جدولي الي كتبته امس

الحين بتغدى ماادري شنو الغدا لان للحين مارفعوه لي حمولتي بقلل الكميه الي اكلها بالمعتاد

ولبن

 

[تبطي عظم!]

الباجي وييينكم شنو سويتو اليووم !!!

 

[Aloe Vera]

الله يوفقج و تلتزمين فيه و تشوفين نتيجة حلوة

 

[Aloe Vera]

انا اليوم ريوقي خبز ايراني مع لبنة و هم قيمر و عسل بس كمية قليلة
و بعدها سناك تفاحة خضرا
و الغدا باستا سمرا مع دياي و سبانخ و ذرة و شوووووية كريمة ههههه احب الكريمة بس اخفف الكمية و مو كل يوم اكلها
بعدها جاي مع قفشة صغيرة شكر و هيل و زعفران

و بشوف روحي شنو راح اشتهي بعدين في الغالب سلطة مع صوص شغل بيت
او حليب خالي الدسم مع بسكوته الياف

و احب انام خفيفة و لا يحوشني حارج و لوعة و حالتي حاله

و بشوف وزني باجر شلون ان شاء الله زين

 

[Aloe Vera]

بنات انا بس احب اوضح انا مابي انزل وزني بس ابي انظم الزيادة انها ماتتعدى الحد المسموح و انا على الحدود و باقيلي شهرين تقريباً عالولادة

و انا من قبل لا احمل وزني طبيعي

عشان جذي يمكن تحسون اكلي مو حيل مال رجيم

 

[تبطي عظم!]

الوفيرا

انا نفسج اساساً ضعيفه وللحين مازدت ولا كيلو من حملت بس مابي اتعدى الوزن الطبيعي المسموح

مو مهم اضعف المهم مااتعدى الوزن الطبيعي


حمالي الي طاف زيادتي كانت ١٩ كيلو بس ماااأثر علي كلش لان كنت عصاااااقل وماكنت متحمسه اسوي رجيم لان اساسي ضعيفه وصرت مليانه فقط

وكان حلو علي

بس بعد الولاده صار عندي ٥ كيلو تعبت يالله تخلصت منهم


فعلشان جذي قلت اتدارك نفسي الحين علشان مااتعب بالكيلوات الي مو مرغوب فيها

 

[حياة ريلي]

قوة يا حوامل
انا الحمد لله ملتزمه بالاكل الصحي و المشي و وزني قاعد ينزل

 

[Aloe Vera]

حياة ريلي

ماشاء الله مبروك و الله يتمم عليج هالنتايج الحلوة

 

[Aloe Vera]

تبطي عظم!


انا اول حمل كنت عصلة و زدت ١١ كيلو و بعد الولادة ظلو ٨ كيلوات قعدت جم شهر انزلهم و رديت عصلة
و ثاني حمل لااا زدت ١٧ كيلو و هم نزلتهم بس انا نوعي انزل بس ٤ كيلو بالولادة لان بطني صغير و بناتي اقل من ٣ كيلو

و الحين وصلت ١٥ كيلو عن وزني المثالي بس انا طويله و مو مبين عليي زايدة هالكثر الحمدلله بس مالي خلق اتعب بالرجيم بعدين
عشان جذي بس خلاص مابي ازيد

 

[Aloe Vera]

و بعدين انا حملي هذا صار بدون تخطيط سبحان الله و كنت ابي انزل ٣ كيلو قبل لا احمل عشان احمل عالوزن المثالي
يعني المفروض انا زايدة ١٢ كيلو مو ١٥ بس بسبة الزيادة من قبل قاعدة احسبها مع زيادة الوزن و نفسيتي قاعدة تتعب

 

[حياة ريلي]

اليوم تريقت قلاص حليب و تمره بس ﻷني قاعده متأخره كلش
و تغديت كوب مرق عدس مع نص كوب عيش مشخول بدون زيت
و سناك العصر استكانة مكسرات نيه
و سناك المغرب قوطي روب الوفره خالي الدسم الصغير كلش
و عشاي لي الحين ما قررت بس غالبا بسويلي بيض و يمكن سلطه.
الحين بتمرن و امشي عالجهاز ﻷن الجو ما ينبغى استغفر الله

 

[تبطي عظم!]

الو فيرا

الحمد لله الي نقدر نزلهم اعرف واجد مايقدرون مساكين مع انه زيادتهم ماتعدت الـ ١٢ كيلو

بس ماينزلون كلش والجسم يخترب وتبتدي تزيد بعد الولاده وتعالي شوفي الجسم شلون يصير


انا نفسج حملت بدون تخطيط وحملت على زياده ٤ كيلو بس وحامي كان بالاكل مااكل ذبحتني اللوعه والغثيان ونزلو هالاربعه كيلو من حالهم


والحمد لله ورديت زدت ٤ كيلو من الشهر الخامس علشان جذي خايفه لاني رديتهم بسرعه مو كيلو كل شهر لا كيلوين كل شهر ازيد علشان جذي بخفف

ابي اطلع من الاربعين وزني بالخمسينات لانه حييل حلوو علي





حياة ريلي الله يتمم لج على خييير






للحين ماخربطت الحمد لله




قاعده افكر بجدول حق باجر مشكلتي مااقدر اتحكم بالغدا لان يكون من حمولتي تحت وماادري شنو يكون

لان كل يوم غيير ومااقدر اقولهم مابي لان خالتي بتزعل بس الي اسوي اكل اقل بواجد


اليوم الغدا كان صينية دجاج وبطاط مع عيش عدس ودقوق طمام

قللت حيل الكميه ماحطيت واجد

 

[تبطي عظم!]

حياة ريلي


عاااشت عاااااشت عااااااشت

الله يتمم علينا ونضبط نفسنا يااارب




وين الباجي لايكوون تاكلوون وتخربطون

 

[Aloe Vera]

انا توني طلعت من بيت حمولتي صارلي شهر صج كان صعب موضوع الغدا ما اقدر اتحكم فيه و بالغالب اكل مو مال رجيم بس كنت اقلل كمية شسوي
و كنت كليوم اودي معاي الدوام فواكهه و سلطة علشان ما ارجع ميته يوع

 

[Aloe Vera]

مادري شسوي حق الغدا باجر
يمكن صينية سمج بالفرن مع عيش اسمر و سلطة

الريوق و السناك سهلين

 

[تبطي عظم!]

حلو سمج بالفرن


انا غدا صعب صعب افكر فيه فخليني ع التخفيف احسن واشوا انه دجاج او سمج كله يسونه بالفرن هذا مهون علي هم مايحطون دهن واجد


بس مني لين انام بفكر للعشا شنو يكون باجر بقوم الحين اسوي عشاي



بيضه مفيوحه مع شريحتين توست محمص وجبن سلايس قليل الدسم وعصير برتقال وليمون

 

[حياة ريلي]

انا تعشيت بيضتين عجه مع طناط و بصل و بقدونس بدون دهن كلش و اكلتهم بالشوكه و معاهم سلطه خضرا بالليمون و نص قفشة زيت زيتون و سويت لي عصير ليمون بالسبلندا
و سلامتكم و تعيشون