أنا بديت صج اشيل فكرة الخدامة عن بالي و مابي احن عليها خلاص .. لان اكتشتفت صج شغل البيت ما يبي له شي بس احنا مشكلتنا تعودنا على الراحة ,, أغلبنا قاعدين بشقة يعني موبيت 3 ادوار و حوش ..
اهم شي الترتيب .. انا قمت اعود روحي قبل لا انام كل يكون مترتب و بمكانه .. اول ما اقوم الصبح و و قبل لا اطلع من البيت السرير مترتب و الهدوم بالسله و الصالة مرتبه
ريشه التنظيف دايم جدامي بسرعه اشيل الغبرة عن الاشياء " شقه تجارية الغبار و البرد يدش من كل صوب " ..
الهدوم اهي اللي تأزمني أن شاءالله اشتري غسالة اكبر و نشافة و هدوم البيت تتصفط و انا واقفة و سيدة على الكبت و دشاديش ريلي المصبغة و لبسي انا اغلبه عبي فقبل لا اطلع اكويه بالبخار و هدوم الطلعة ماراح تعذب بالكوي اكوي كل ما طلعنا ..
اذا البيت مرتب خلاص تنظيفه سهل كل يومين الله يخلي الفاكيوم اخم حتى السيراميك فيها و السطل الدوار عجيب اجهز فيه ( الديتول + داك + و معطر الأرضية + و شوي كلوركس ) بخمس دقايق مسحت البيت كله ..
الحمامات جهزي علبه و حطي فيها المنظفات و حطي مخمه صغيرة .. الصبح او قبل لا تسبحين صبي شوي على المغسلة و الأرضيات و و نظفي و المرحاض عزكم الله منزلين له منظف ينحط على الطرف و كل ما نزلتي السيفون نظف نفسه او طبقي سالفه صابون لعملاق اللي ينحط داخل السيفون .. و جف عندهم منظف الحمام رشرشي على المغسلة و المرحاض .. و تقدرين تصبين جف و هاربك من الليل و الصبح بثواني كل شي يتنظف .. و مادام عيالج صغار استخدموا حمام واحد و الثاني خلوه نظيف اذا ياكم ضيوف بس صبوا ديتول و يصير كل شي تمام ..
انا ولدي رضيع بس ان شاءالله اذا كبر بعلمه يرتب سريره " جذي كانت امي تعلمنا ماكان عندنا خدامة و احنا صغار " و يشيل العاابه اذا خلص منها و يردها مكانها .. و دايما خلي دثرتهم بمكان واحد ..
الحين يينا حق العذاب المطبخ و ما ادراك ما المطبخ .. انا مطبخي صغير جذي لو صحن واحد بالمغسلة عفس كل شي .. امس يأست منه دقيت على الشركة يتلي وحده نظفت المطبخ من عرجه حتى متحسفه ادشه من كثر مااهو نظيف ..
بس بقول لج شنو اسوي .. الجوله اغطيها بقصدير و كل اسبوع يتغير ..
الطاولة اللي اشتغل عليها اغطيها بسفره و مرات لوح التقطيع اغطيه بنايلون و اشتغل ..
جدوري ستيل ودي اغيرهم و اخليهم تيفال اسهل بالتنظيف ..
لما اسوي دياي بالفرن احطه باكياس الفرن و الصينيه ابطنها بقصدير علشان لا تحترق و اتعذب بتنظيفها حتى الديايه تطلع ترفه ..
الصحون شيلي الزايد عنهم و انتوا على السفره ..
انا ودي بدش ووشر بس ماعندي لها مكان ان شاءالله اذا توسعت راح اشتري .. امي تستخدمها من عمر الدنيا شحلات الصحون تطلع نظيفة و حارة و تلمع ..
الطباخ حتى لو عندي خدامة انا راح اطبخ .. الدياي و اللحم ينفاح من الليل او الصبح .. لو بتسوين صينية سوي كمية حق يومين و استخدمي صحون القصدير اسهل .. الشوربة لو مكوناتج فرش حق يومين مايصير فيها شي بس شوربات ماجي انا مانصح فيها و حق يوم واحد .. الدياي و الربيان و اللحم لو تبين اتبلينه من الليل .. استخدمي صدور الدياي حق الباستات و السندويشات مايحتاج فوح تقصيصينها و تشوحينها على النار و ترا عندي طبخات وايد سهلة و ما تحتاج تحضير .. السلطة و انتي واقفة تسوينها ..
الريوق بما ان موظفات ريوق اليهال الله يخلي الكرواسان و الميني باتيه الجاهز .. و لانش بوكس الحضانة تجهزينه من الليل .. العشا مرة من البيت و مرة من برا ..و شغلي شمعه معطرة و انتي تطبخين تشيل ريحه كل شي ..
و قبل لا تغسلين المواعين نظفي المطبخ و استخدمي مستر مسل مال المطبخ عجيب ينظف المطبخ ..
و اذا ماعندي وقت اغسل المواعين حاطه طاسه كبيرة داخل المغسلة و فيها فيري و كلوركس شوي و انقع فيها المواعين و اذا فضيت بسرعه ارد عليها بالاسفنجع..
و أرضية المطبخ جهزي لج علبه و فيها كل المنظفات متى ما طاح شي نظفيه .. و مو شرط تغسلينه كل يوم تقدرين تكتفين بمساحه مبلوله بماي بدون عصر مسحي الارضيه و استخدمي مساحه ناشفه و شيلي الماي الزايد ..
لو كل شي أول بأول بدون تراكم و تسويف صدقيني ماراح نحتاج للخدم .. و اذا بيوم تعبتي و حسيتي ان الامور خارج السيطرة ما يمنع ان تيبين احد يساعدج ..
لا تنسين لمساتج بالبيت شموع و بخور و فواحات و الزرع " لكي بامبو ماتحتاج عناية زايدة " راح تحسي بيتج مملكتج ..
