تجمع امهات العالمية الامريكية

[caramella]

السلام أمهات إشلونكم ؟
اشلونكم مع الجو الحار ؟
ذاك اليوم يسإلوني ها برد لندن ولا حر الكويت؟ قلت لا حر الكويت صج يتعب ويحسسج إنج منهلكه بس ولا برد لندن اللي مهما لبستي ولا كأنج لابسه شي

 

[bella bambina]

صباح الخير أمهات
ملكه و مرو الله يسلمكم و الشر ماييكم ان شاء الله

 

[bella bambina]

صباح الخير أمهات وينكم ؟
اشلونكم مرو وفوز وملكه وكراميلا وريماااااااااان ؟

 

[mr000]

السلام أمهات اشلونكم..الجو مخلينا في بيات صيفي الحمدلله على كل حال..ماكو طلعه قبل المغرب...

 

[Fouz]

السلام عليكم
شلونكم أمهات شخباركم ان شاءالله بخير
عذروني هاليومين حدي لاهية و ان شاءالله يرجع التجمع عامر مثل ما كان
أخليكم ألحين توها الصغيرة نامت، نشوفكم على خير

 

[bella bambina]

صباح الخير أمهات

 

[mr000]

السلااام اشلونكم أمهات..هلا والله فوز اشلونج شخبارج ..بيلا ..كراميلا ..ريمان اشلونكم مع الإجازه..بيلا ان شاءالله باجر آخر يوم دوام؟؟ريلي العاده يقولون لهم لاتيون آخر يوم دوام بس هالسنه ناظرهم تغير وقالهم باجر دوام..عاد مسكين ليلحين تعبان وغصب يداوم..

 

[bella bambina]

صباح الخير أمهات اشلونكم واشلون عيالكم ؟
مرو احنا أمس كان آخر يوم دوام
يوم الأحد ان شاء الله مسافرة النمسا وبقعد هناك شهر ما تآمروني على شي من هناك اللي تبي توصيني على أي شي آنا بالخدمه

 

[mr000]

بيلا تروحين وتردين بالسلامه..مشكوره حبيبتي ماتقصرين نبي سلامتج..أمهات اشلونكم شخباركم

 

[caramella]

السلام أمهات
إشلونكم و شخباركم من زمان عنكم
مبرووك الإجازه بيلا إفتكيتو
حتى ريلج مروو إفتك صراحه دوام الصيف متعب
بيلا تروحين و تردين بالسلامه يا قلبي ما نبي إلا سلامتج ووناستج

 

[ملكة بيتها]

السلام عليكم
بيلا ..مبروك الإجازه وتسافرين وتردين بالسلامه ...
مروو ..كارميلا ...فوز ..ريمان ...ليال ...شخباركم مع الإجازه إن شاء الله تمام

وشكلها ماراح نتيمع إلا مع بدايه العام الدراسي الجديد الظاهر ظروف البنات كلش ما تساعد الحين وأنا بعد هالأسبوعين اللي طافو بنتي من شي لي شي ويوم السبت بدخلها المستشفى بسويلها عمليه ..ووراي سفر ولحد الحين ما جهزت لسفرتي الله المستعان ..ما عليه بنات فضفت شوي:ssssso:

 

[mr000]

السلام أمهات اشلونكم ..ملكه سلامتها بنتج ماتشوف شر..وتسافرين بالسلامه ان شاءالله..

 

[Fouz]

السلام عليكم أمهات شخباركم
باركولي أمس ولد أخوي ملج عاد هذا أول حفيد في بيتنا عسى الله يبارك لهم و يوفقهم
بيلا حبيبتي تروحين و تردين بالسلامة ان شاءالله و عسى الله يسهل عليج كل الأمور هناك، بس ولا عليج أمر أبي قرشة هوا بارد حق العازة
مرو شخبارج و ان شاءالله تستانسون بالاجازة و تفتكون من طلعة الحر و اللواهيب
كاراميلا عاش من شافج، عاد ناطرة أصادفج لانج يارتنا و أمس ملجة ولد أخوي هم بنفس القطعة بس هم ما صادفتج و انا أحوس بالقطعة
مكة ما تشوف شر بنيتج و ان شاءالله تقوم بالسلامة و سفرة سعيدة ان شاءالله، و ان شاءالله نتيمع عقب رمضان بحيل الله و تكون ظروفنا كلها أحسن و هم زين علشان يمديني أضعف هههه
ريمان و ليالي شخباركم ان شاءالله بخير

 

[mr000]

السلام أمهات اشلونكم..فوز ألف مبروك ملجة ولد أخوج..عسى الله يهنيه ويوفقه والفال حق بنياتج يارب..فوز خل آنا أضعف..والله شبعت احباط كلما أقيس قمصان حق السفر كله مو كبري صايره ديناصور من القعده..والله شي يضيق الخلق..أمهات شخباركم مع الإجازه..واشلون عيالكم..فوز اشلون بنيتج مع أختها الصغيره ماتقولج بشيلها أو تغار منها..

 

[ملكة بيتها]

سلام أمهات
مروو ..فوز ..الشر ما ييكم إدعو لبنتي باجر الصبح عمليتها عسى ربي ييسر العمليه وتقوم بالسلامه ..
فوز ..مبروك ملجه ولد أخوج وربي يرزقه الذريه الصالحه ...إن شاء الله نتيمع بعد رمضان ويارب ظروفنا كلنا تتعدل ..

 

[mr000]

ملكه ان شاءالله بسيطه وسهله العمليه وماعليها إلا العافيه ان شاءالله والله يقومها بالسلامه وطمنينا عليها باجر..ولا تحاتين ماكو إلا العاقيه..

 

[mr000]

سوووووري عالبدليه الأخيره = العافيه

 

[ملكة بيتها]

شكرا مروو ....الله يعافيج حبيبتي

 

[bella bambina]

السلام أمهات اشلونكم ؟
ألله يسلمك جميعا واجازه سعيده ان شاء الله
سلامتها بنيتج ملكه ما تشوف شر والله يقومها بالسلامه عملية شنو ؟
فوز مبروك زواج ولد أخوج وعقبال ما تفرحين بزواج عيالج ان شاء الله

 

[mr000]

السلاام امهات اشلونكم..بنت ولدي صار فيها جديري ماي..ومتلعوزين معاها صخونه وعساره وبجي ولا تخلينا نحطلها من اللوشن اللي حق الجسم..وماتاكل كلش وهي بروحها شهيتها ضعيفه ..بسم الله بيومين انترست كلها من الحبوب ويهها وجسمها..استغفرالله متى تطيب وترتاح واحنا نرتاح بعد..بس أشوه صار فيها ألحين ولاوقت سفرتي عالأقل آنا مجابلتها ألحين..